“თინა ხიდაშელის და სხვა პირების მცდელობები, გააფუჭონ ჩინეთთან არსებული უმნიშვნელოვანესი ურთიერთობები, წარუმატებელი იქნება და ფიასკოთი დასრულდება”, – ამის შესახებ მმართველი გუნდის წევრმა, დავით მათიკაშვილმა განაცხადა.

მისივე თქმით, თინა ხიდაშელის ანტიჩინური კი არა, არამედ ანტიქართული პროპაგანდა ფინანსდება ტაივანიდან – თვითგამოცხადებული ე.წ. ქვეყნიდან, რომელსაც არავინ აღიარებს.

„ეს თემა იმდენად მნიშვნელოვანია, რამდენადაც ის ჩვენი ქვეყნის სტრატეგიულ პარტნიორს და სტრატეგიულ განვითარებას ეხება. ძალიან კარგად იცის საზოგადოებამ, თუ რა დიდი მნიშვნელობა აქვს შუა დერეფანს ეკონომიკური აქტივობისთვის და რა მართლაც რადიკალურად დიდი მნიშვნელობა აქვს საქართველოსა და ჩინეთს შორის ძალიან მაღალ ზღურბლზე არსებულ ურთიერთობას. ოპოზიციურად განწყობილი პირების მხრიდან ამ პოზიტიური და წარმატებული სვლის შეფერხებისთვის შეგნებულად გარკვეული ნაბიჯები იდგმება. შორს ვარ იმ აზრისგან, რომ თინა ხიდაშელი ცოდნის კუთხით იმდენად სიბნელეში არის, რომ ვერ ხვდებოდეს, რას ნიშნავს ტაივანის მხრიდან დაფინანსებული ორგანიზაციის მიერ ან ზოგადად ტაივანის ფინანსირებით საქართველო-ჩინეთის ურთიერთობების გაფუჭების მცდელობა. ეს მცდელობა წარუმატებელი და ძალიან უსუსურია, მაგრამ მნიშვნელოვანია ის, რომ როგორც კი ქვეყნის ეკონომიკური განვითარების, პოლიტიკური წინსვლის და სხვა მიმართულებით ხელშესახები პროგრესი წარმოიქმნება, აუცილებლად ჩნდებიან გვერდიდან პირები, რომლებიც ცდილობენ, ამას ხელი შეუშალონ. თინა ხიდაშელის ანტიჩინური კი არა, არამედ ანტიქართული პროპაგანდა ფინანსდება ტაივანიდან – თვითგამოცხადებული ე.წ. ქვეყნიდან, რომელსაც არავინ აღიარებს. ჩინეთს აქვს თავისი პოლიტიკური მიზნები და ძალიან გასაგები მოცემულობა, მით უმეტეს ჩვენთვის, როდესაც ორი ოკუპირებული ტერიტორია გვაქვს. ისინი აცხადებენ, თითქოს, გამჭვირვალეა ყველაფერი და ტაივანიდან რომ ფინანსდება, ეს ჩვენ დავინახეთ – მაგრამ რამდენით და როგორ ფინანსდება, ეს არსად ჩანს. ხიდაშელის და სხვა პირების მცდელობები, გააფუჭონ ეს უმნიშვნელოვანესი ურთიერთობები, წარუმატებელი იქნება და ფიასკოთი დასრულდება“, – აღნიშნა მათიკაშვილმა “იმედის” ეთერში საუბრისას.

ცნობისთვის, თავდაცვის ყოფილი მინისტრის, თინა ხიდაშელის განცხადებით, ჩინეთ-საქართველოს ეკონომიკურ ურთიერთობასა და ჩინური ინვესტიციების ჩვენს ქვეყანაში შემოდინებაზე სიმართლეს ყველაზე უკეთ საქართველოს სტატისტიკის დეპარტამენტის მიერ წლების განმავლობაში გამოქვეყნებულ ოფიციალური სტატისტიკა ასახავს,  სადაც, მისივე თქმით, სრულიად ერთმნიშვნელოვნად ჩანს ხელისუფლების სრული ფიასკო ჩინური ინვესტიციების მოზიდვის გზაზე, განსაკუთებით მაშინ, როდესაც დიდ ინტერესსა და „უსაზღვროდ გაღრმავებულ“ ურთიერთობებზე საუბრობენ.

“იმისთვის შევქმენით ანტიკორუფციული ბიურო, რომ ამოწმოს ყველა და ყველაფერი განურჩევლად პარტიული კუთვნილებისა და, მათ შორის, ქონებრივი მდგომარეობისა:”, – ამის შესახებ მმართველი გუნდის წევრმა, გია ცაგარეიშვილმა განაცხადა.

მისი თქმით, ანტიკორუფციული ბიურო მხოლოდ ხელისუფლების წარმომადგენლებს არ ამოწმებს.

„ბედოვლათმა ოპოზიციამ, რომელსაც პარტიული ტელევიზიებიც აუბამენ ხოლმე მხარს, მსოფლიო ბანკის კვლევის შედეგების გადაფარვა მოინდომა. ამ მიზნით შემოაგდეს თემა, თითქოს ანტიკორუფციული ბიურო ხელისუფლების წარმომადგენლებს ამოწმებს. ეს ინფორმაცია ყველამ კარგად იცოდა, დაახლოებით ერთი კვირის წინ გავრცელდა. რატომღაც შემოინახეს და დღეს დაემთხვა ეს ყველაფერი დროსა და სივრცეში. თქვენ აღნიშნეთ, რომ ვინმე ჯერემი როზნერი, რომელიც არის „ნაციონალური მოძრაობის“ და მასთან აფილირებული სატელიტური პოლიტიკური ორგანიზაციების მრჩეველი, ის აძლევს რჩევას, რომ ეს ინფორმაცია შეენახათ და შესაბამისად, იმისთვის, რომ მსოფლიო ბანკის კვლევა როგორმე გადაეფარათ, დღეს ყოფილიყო ამ ე.წ. სკანდალზე საუბარი, მაგრამ აქ ადამიანებს ერთი მარტივი რამ გამორჩათ – თქვენ არ გეგონოთ, რომ ანტიკორუფციული ბიურო მხოლოდ ხელისუფლების წარმომადგენლებს ამოწმებს. ამოწმებს ოპოზიციის წარმომადგენლებსაც და ეს ბრიყვულად გავრცელებული ინფორმაცია, რომელიც შემოგდებულია შესაბამისი მედია საშუალებებით, ბრიყვული რომაა აქედანაც კარგად ჩანს”, – განაცხადა გია ცაგარეიშვილმა.

მისი თქმით, ამოწმებენ ვახტანგ მეგრელიშვილს, ალექსანდრე ელისაშვილს, ფრიდონ ინჯიას, ცეზარ ჩოჩელს, კახა ოქრიაშვილს, დავით ზილფიმიანს, კობა ნაყოფიას, რომლებიც არ არიან „ქართული ოცნების“ წევრები.

„თქვენ ამბობთ და ამტკიცებთ, რომ ეს არის ძალიან დიდი სენსაცია, რომ საქართველოს პარლამენტის მიერ ახლად შექმნილი ანტიკორუფციული ბიურო ამოწმებს მათ შორის პარლამენტის წევრებს და მთავრობის წარმომადგენლებს. მე ვამბობ და ვამტკიცებ საპირისპიროს – ეს არ არის სენსაცია, მომავალ წელსაც გადამოწმდება ასევე შერჩევით 300 და შეიძლება უფრო მეტი ადამიანი, იმის შემდეგაც და ეს ძალიან კარგია. ამისთვის შევქმენით ანტიკორუფციული ბიურო, რომ ამოწმოს ყველა და ყველაფერი განურჩევლად პარტიული კუთვნილებისა და მათ შორის, ქონებრივი მდგომარეობისა“ , – განაცხადა გია ცაგარეიშვილმა.

ანტიკორუფციული ბიურო 300 თანამდებობის პირის ქონებრივ დეკლარაციას შეისწავლის.

ბიძინა ივანიშვილმა გამოიჩინოს გამბედაობა და გამოუშვას მიშა სააკაშვილი ციხიდან, რომ ჩართული იყოს საარჩევნო კამპანიაში და ხალხმა თვითონ გადაწყვიტოს, ვის ანდოს სახელმწიფო, – ამის შესახებ „ერთიანი ნაციონალური მოძრაობის“ გენერალურმა მდივანმა, პეტრე ცისკარიშვილმა განაცხადა.

მისი თქმით, ძალიან ბევრი სხვადასხვა ტიპის განმარტება მოისმინა, თუ რატომ დაბრუნდა ბიძინა ივანიშვილი პოლიტიკაში.

ცისკარიშვილის მოსაზრებით, „ქართულ ოცნებას“ ძალიან უჭირს.

„გასაგებია, რომ ძალიან უჭირთ და ეშინია, ერთტურიანი არჩევნებია, მაჟორიტარები არ ჰყავთ, მანდატებთან დაკავშირებული ფორა აღარ აქვთ, აღარც ის სამკვირიანი ფორა აღარ აქვთ – 2018 წელს რომ გამოვიდა, იტირა, ხალხის მოსყიდვას სხვადასხვა ინსტრუმენტებით შეეცადა იმისათვის, რომ მეორე ტურში წარმატებისათვის, ისევ და ისევ გაყალბების ფონზე მიეღწია.

ბევრი სხვადასხვა ვერსია მოვისმინეთ მის დაბრუნებასთან დაკავშირებით, მაგრამ გამოჩნდა. ჩრდილიდან გამოვიდა, თორემ ის პოლიტიკაში და ამ გუნდის მართვაში მუდმივად იყო ჩართული, ეყო ამის გამბედაობა და ვაჟკაცობა. თუ ამას გამბედაობა სჭირდებოდა, მოდი, ახლა ის გამბედაობა გამოიჩინოს და პოლიტიკური ვაჟკაცობა დავარქვათ ამას, რომ მთავარი ოპონენტი, ოპოზიციონერი, რომელიც იზოლირებულია, ციხეშია, რომელსაც არ ეძლევა საშუალება, რომ საარჩევნო კამპანიაში იყოს ჩართული – მიშა სააკაშვილი გამოუშვას, სულ რაღაც ცხრა თვეშია არჩევნები და ეს ორი ძალა შეეჯიბროს ერთმანეთს და ხალმა გადაწყვიტოს, ვის ანდობს ქვეყანას, ვის ანდობს ამ სახელმწიფო მომავალს“, – განაცხადა პეტრე ცისკარიშვილმა.

ჩინეთთან სავაჭრო-ეკონომიკური ურთიერთობა აქვს ყველა დიდ ქვეყანას, – ამის შესახებ, „ხალხის ძალის“ ერთ-ერთმა ლიდერმა დიმიტრი ხუნდაძემ მედიასთან ისაუბრა.

მისი თქმით, ჩინეთთან მჭიდრო ეკონომიკურ ურთიერთობები წარმოშობს პოლიტიკური სტაბილურობის უდიდეს შესაძლებლობას საქართველოსთვის.

„მთელი მსოფლიოსთვის ჩინეთთან ურთიერთობის ძალიან დიდი პერსპექტივაა. მთელი მსოფლიო ცდილობს, როგორმე მოძებნონ ალტერნატიული, სავაჭრო-ეკონომიკური ურთიერთობები, რომ დააკავშირონ ორი კონტინენტი – ევროპა და აზია ერთმანეთს. ამ კავშირის ერთ-ერთი მნიშვნელოვანი და პოზიტიური ხაზი სწორედ საქართველოზე გადის და ამ შესაძლებლობასაც ისინი ნეგატივში წარმოაჩენენ. ჩინეთთან სავაჭრო ეკონომიკური ურთიერთობა აქვს ყველა დიდ ქვეყანას. თავად ამერიკის შეერთებულ შტატებსაც. თქვენ ნახეთ ორი ლიდერის, სი ძინპინის და ბაიდენის შეხვედრა. ისინი ცდილობენ, რომ ეს ურთიერთობები კიდევ უფრო მეტად გაამყარონ.

კანადა, ბრიტანეთი, ევროპის უდიდესი ნაწილი ჩინეთთან საკმაოდ მჭიდრო ეკონომიკურ ურთიერთობებშია. ეს ურთიერთობები შემდგომ წარმოშობს პოლიტიკური სტაბილურობის უდიდეს შესაძლებლობას, მით უმეტეს საქართველოსთვის და როგორ შეიძლება ამის ხელიდან გაშვება. ოპოზიციისთვის, ყველაფერი ის რაც არის ქართული, ქვეყნისთვის სასარგებლო და საზოგადოების უსაფრთხოებისთვის მნიშვნელოვანი, ეს მათთვის არის წამგებიანი და ამას ყველაფერს ისინი არქმევენ რუსულს“, – განაცხადა ხუნდაძემ.