ოპოზიციის წარმომადგენლები დადიან სხვადასხვა დედაქალაქებში, ზეპირად ვიცით, რას საუბრობენ, როგორ „გულშემატკივრობენ“ საქართველოში სტატუსის მინიჭებას, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისივე თქმით, მთავარია მოგვცენ კანდიდატის სტატუსი და თუ უნდა ოპოზიციამ დაიბრალოს.

„კანდიდატის სტატუსი მოგვცენ და თუ უნდათ, ოპოზიციას მისცენ. ოპოზიციის წარმომადგენლები დადიან სხვადასხვა დედაქალაქში, ზეპირად ვიცით, რას საუბრობენ, როგორ „გულშემატკივრობენ“ საქართველოში სტატუსის მინიჭებას. თვითონაც მიდიან და საუბრობენ, როგორ არ ვარგა ჩვენი ქვეყანა, როგორ ცუდია ჩვენი ინსტიტუტები, როგორ გაუბედურებულია აქ სიტუაცია, ოღონდ იქნებ გადმოგვიგდოთ კანდიდატის სტატუსი, ამ დონეზე არიან დასულები. მთავარია, მოგვცენ და თუ უნდათ, ოპოზიციამ დაიბრალოს“, – აღნიშნა პაპუაშვილმა.

ამასთან, კითხვაზე, – „ველოდებით ევროკომისიის ანგარიშს და მედიის პუნქტი არ არის შესრულებული“, – პაპუაშვილმა განაცხადა, რომ „მედიის წარმომადგენელზე თუ არის ძალადობა, დროულად და სათანადოდ უნდა იქნას გამოძიებული“.

„რაც შეეხება რეკომენდაციის შესრულებას, ანგარიშის შემდეგ პარლამენტმა მიიღო ცვლილებები, რაც იქნება ევროკავშირის აუდიო და ვიზუალურად დირექტივის იმპლემენტაცია საქართველოში. დარწმუნებული ვარ, ეს მნიშვნელოვნად წინ წასწევს ამ პროცესს. რაც შეეხება უსაფრთხოებას, აქ საუბარია არა რაიმე საკანონმდებლო დამატებით რეგულაციებზე, არამედ იმაზე, რომ მოხდეს დროული გამოვლენა და პასუხისმგებლობაში მიცემა, ვისგანაც ხდება ჟურნალისტზე თავდასხმა. მეორე მხრივ, ეს დაკავშირებულია ზოგადად ძალადობის კულტივირების პრევენციასთან ბევრი მხრიდან და ამაზეც არაერთხელ გვქონდა საუბარი“, – განაცხადა პაპუაშვილმა.

დღეს ჩვენთვის ისტორიული დღეა – ფრანკოფონიის საპარლამენტო ასამბლეა პირველად ტარდება მის არაწევრ სახელმწიფოში. ამიტომ, საქართველოს პარლამენტისთვის დიდი პატივია, ასამბლეის და მისი სესიის ფარგლებში, ორმოცი დელეგაციის 200-მდე წარმომადგენლის მასპინძლობა, – ამის შესახებ საქართველოს პარლამენტის თავმჯდომარე შალვა პაპუაშვილმა ფრანკოფონიის საპარლამენტო ასამბლეის სესიის გახსნის ცერემონიაზე განაცხადა.

როგორც შალვა პაპუაშვილმა აღნიშნა, ფრანკოფონიის საპარლამენტო ასამბლეის სესიის საქართველოში ჩატარება კარგი შესაძლებლობაა სახელმწიფოებს შორის თანამშრომლობის გაღრმავებისთვის.

მისი თქმით, განსაკუთრებით დასაფასებელია ასამბლეის მიერ საქართველოს სუვერენიტეტისა და ტერიტორიული მთლიანობის ურყევი მხარდაჭერა.

„ასამბლეა შესანიშნავი პლატფორმაა წევრ სახელმწიფოებს შორის თანამშრომლობის წახალისებისთვის, საჭირბოროტო საკითხებზე მოსაზრებების ურთიერთგაზიარებისა და ფრანგული ენის პოპულარიზაციისთვის. ფრანკოფონიის საპარლამენტო ასამბლეის ეს სესია საქართველოსთვის არის ფრანგულენოვან სამყაროსთან ისტორიული კავშირების ლოგიკური გაგრძელება. ამიტომ მჯერა, რომ აღნიშნული სესიის საქართველოში ჩატარება ჩვენს საუკუნოვან თანამშრომლობას დადებით მუხტს შესძენს და ახალგაზრდებში ფრანგულ ენას კიდევ უფრო საინტერესოს გახდის. საქართველოს პარლამენტი წლებია აქტიურად თანამშრომლობს ფრანკოფონიის საპარლამენტო ასამბლეასთან. ვაფასებთ ასამბლეის მიერ საქართველოს სუვერენიტეტისა და ტერიტორიული მთლიანობის ურყევ მხარდაჭერას, რაც დღევანდელ, გამოწვევებით სავსე დროებაში მეტად მნიშვნელოვანია. სულ ცოტა ხნის წინ, საერთაშორისო სამართლის ფუნდამენტური პრინციპების პატივისცემის შეხსენება ბევრის გაკვირვებას იწვევდა და ზედმეტ აქტიურობად ითვლებოდა. თუმცა, ჯერ 2008 წელს, რუსეთის მიერ საქართველოს ტერიტორიების ოკუპაციით, ახლა კი უკრაინაში შეჭრით, კარგად გამოჩნდა, რაოდენ მნიშვნელოვანია ამ საკითხზე პარტნიორების მხარდაჭერა და აგრესორი სახელმწიფოების შეკავება. მოხარულები ვართ, რომ საერთაშორისო საზოგადოება, გეოგრაფიული მდებარეობის მიუხედავად, ერთიანია საქართველოს, უკრაინის და სხვა მსგავსი სახელმწიფოების დამოუკიდებლობის, თავისუფლებისა და ევროპული მომავლის მხარდაჭერაში.

თავის მხრივ, საქართველო პატივს სცემს ფრანკოფონიის საპარლამენტო ასამბლეის პრინციპებს და ღირებულებებს, თანამშრომლობასა და საერთაშორისო სამართალზე დაფუძნებულ გლობალურ წესრიგს. ეს არის ის ფუნდამენტი, რაც ჩვენს ქვეყანას აბრუნებს მის ევროპულ საფუძვლებთან. ამისთვის საქართველო ყველაფერს აკეთებს. ჩემი მშობლების თაობამ შესძლო საბჭოთა ანექსიიდან თავის დაღწევა და სახელმწიფოებრივი დამოუკიდებლობის აღდგენა. ჩვენი თაობის ვალი და მთავარი საზრუნავი ამ დამოუკიდებლობის განმტკიცება და ქვეყანაში მშვიდობის და კეთილდღეობის უზრუნველყოფაა, რათა ახალგაზრდებს, მომავალ თაობებს ჰქონდეთ მსოფლიო მასშტაბით დამოუკიდებელი და თავისუფალი საქართველოს სახელით ახალი სიმაღლეების დაპყრობის შესაძლებლობა”, – განაცხადა შალვა პაპუაშვილმა.

ცნობისთვის, დღეს ფრანკოფონიის საპარლამენტო ასამბლეის 48-ე სესია ოფიციალურად გაიხსნა. აღსანიშნავია, რომ საქართველო ფრანკოფონიის ასამბლეას პირველად მასპინძლობს. უშუალოდ ასამბლეის საქმიანობაში კი საქართველო 2004 წლიდან დამკვირვებლის სტატუსით ჩაერთო. 2021 წელს საქართველოს პარლამენტმა ოფიციალური წერილით მიმართა ფრანკოფონიის საპარლამენტო ასამბლეას ასოცირებული წევრობის თაობაზე. სწორედ 48-ე სესიაზე მიიღებენ გადაწყვეტილებას საქართველოს ასოცირებული წევრობის თაობაზე.

ფრანკოფონიის საპარლამენტო ასამბლეა წარმოადგენს ფრანკოფონიის საერთაშორისო ორგანიზაციის საკონსულტაციო, საპარლამენტო ორგანოს. დღეისათვის მის შემადგენლობაში 91 წევრია. 56 სრულუფლებიანი, 17 ასოცირებული, ხოლო 18 დამკვირვებლის სტატუსით. ასამბლეა, დემოკრატიის განვითარების და ადამიანის უფლებების დაცვის მიმართულებით მუშაობს, არის აქტიური პლატფორმა წევრ სახელმწიფოებს შორის ინფორმაციის გაცვლისა და დიალოგისთვის და მსოფლიოში ფრანგული ენის პოპულარიზაციაზეა ორიენტირებული.

საქართველოს მოსახლეობა თავის მომავალს მხოლოდ ევროპასთან ერთად და ევროპაში ხედავს და მას არასოდეს გადაუხვევია ამ ეგზისტენციური არჩევანიდან, – ასე მიმართა საქართველოს პრეზიდენტმა სალომე ზურაბიშვილმა ფრანკოფონიის საპარლამენტო ასამბლეის 48-ე პლენარული სესიის მონაწილეებს, რომლებისთვისაც პრეზიდენტის სახელით მიღება გაიმართა.

ამასთან, ზურაბიშვილის თქმით, საქართველოსთვის ევროკავშირის კანდიდატი წევრის სტატუსის თაობაზე მოსალოდნელმა გადაწყვეტილებამ, „კიდევ უფრო უნდა მიაბას საქართველო ევროპას, გააძლიეროს მისი დემოკრატია და სტაბილურობა“.

„საქართველო მოხარულია, რომ პირველად მასპინძლობს ფრანკოფონიის საპარლამენტო ასამბლეასა და პლენარულ სესიას. მაქვს პატივი, მოგესალმოთ ყველას: დელეგატებს, რომლებიც 28 წევრ და ასოცირებულ სახელმწიფოსა და 10-ზე მეტ რეგიონს წარმოადგენენ.

საქართველო, რომელიც თქვენი 48-ე სესიის მასპინძელია, ამაყობს, იმით, რომ ერთ-ერთი ქვეყანაა, სადაც ფრანგულმა, როგორც კულტურისა და ევროპისადმი ღიაობის ენამ, მნიშვნელოვანი როლი ითამაშა. უნივერსალური, მოწოდების ენის გამოყენება აშკარად წარმოადგენს აუცილებლობას მსოფლიოში ნაკლებად გავრცელებული და იშვიათი ენის მქონე ქვეყნისთვის.

საბჭოთა კავშირის დახურულ სივრცეში, რუსული დაგვიწესდა, როგორც კომუნიკაციის სავალდებულო ენა, თუნდაც როგორც მორჩილების ენა. თავისუფლებისა და დამოუკიდებლობისკენ დაბრუნება დაემთხვა ახალი სივრცეების გახსნას, ახალ ორგანიზაციებში შესვლას, სადაც ინგლისური დღეს კომუნიკაციის მთავარი, თუმცა არა ექსკლუზიური ენაა ამ გლობალიზებულ სამყაროში. თუმცა, ფრანგული განსაკუთრებულ ადგილს ინარჩუნებს, განსაკუთრებულ ადგილს აქ, როგორც კულტურის ენა, უპირველეს ყოვლისა, არჩევანის ენა და კვლავაც ევროპისადმი ღიაობის ენა.

მაგრამ, ფრანკოფონიის ასამბლეა გაცილებით მეტია, ვიდრე იმ ქვეყნების შეხვედრა, რომლებიც სხვადასხვა ხარისხით იზიარებენ ფრანგული ენის გამოყენებას. ბევრი სხვა, მულტილატერალური ფორმების მსგავსად, ფრანკოფონიის საპარლამენტო ასამბლეა დროთა განმავლობაში, იქცა სივრცედ, რომლის წევრ ან ასოცირებულ სახელმწიფოებს აერთიანებთ ბევრად უფრო მეტი, ვიდრე ენა, და ეს საერთო პროექტები და საერთო ღირებულებებია.

დღეს მსოფლიოში და სხვადასხვა ადგილას მულტილატერალიზმისა და საერთაშორისო სამართლის ძირითადი პრინციპები – საზღვრების, ტერიტორიული მთლიანობისა და სუვერენიტეტის პატივისცემა, თავდასხმის ქვეშაა, ან პირდაპირ ირღვევა.

ეს დარღვევები და არსებითი პრინციპების ეჭვქვეშ დაყენება აშკარაა უკრაინაში, სადაც რუსული აგრესია განაგრძობს რუსული იმპერიალიზმის ნამდვილი სახის გამოვლენას. ეს რეალობა, რომლის ხილვის საშუალება თქვენ თავად მოგეცათ აქ, საქართველოში, სადაც რუსეთი კანონისა და სამართლიანობის დარღვევით იკავებს ჩვენი ტერიტორიის 20%-ს.

5 ივლისს საოკუპაციო ხაზთან თქვენი ვიზიტი მნიშვნელოვანია ჩვენთვის, როგორც სოლიდარობის ნიშანი და მნიშვნელოვანია თქვენთვისაც, რადგან ეს საშუალებას მოგცემთ წარმოიდგინოთ ეს მიუღებელი რეალობა და გაზომოთ, თუ როგორ არ აქვს ალტერნატივა სუვერენიტეტისა და ტერიტორიული მთლიანობის პრინციპებს: მხოლოდ უკომპრომისო პატივისცემით შეგვიძლია ავაშენოთ ხანგრძლივი მშვიდობა და სამართლიანი სამყარო.

ასეთი ფორუმების არსებობა, რომლებიც გვაერთიანებს საერთო იდეალების გარშემო, იმის შეხსენებაა, რომ კანონის უზენაესობა და დემოკრატია ჩვენი საერთო და განუყოფელი სიკეთეა.

თქვენ სტუმრობთ საქართველოს თავისი ისტორიის გადამწყვეტ ეტაპზე და დემოკრატიის, კანონის უზენაესობისა და ევროპისკენ მტკიცე მსვლელობისას; მოსალოდნელმა გადაწყვეტილებამ, რომელსაც ევროპული პერსპექტივის მინიჭების შემდეგ, ამ წლის ბოლოს ველოდებით, კიდევ უფრო უნდა მიაბას საქართველო ევროპას, გააძლიეროს მისი დემოკრატია და სტაბილურობა; ნებისმიერ შემთხვევაში, ეს საქართველოს მოსახლეობის უდიდესი უმრავლესობის სურვილი და ნებაა, რომელსაც არასოდეს გადაუხვევია ამ ეგზისტენციური არჩევანიდან და თავის მომავალს მხოლოდ ევროპასთან ერთად და ევროპაში ხედავს.

ამ გლობალიზებულ, მაგრამ კონფლიქტებითა და ძალადობით გაჟღენთილ დაუწყნარებელ სამყაროში, კულტურების მრავალფეროვნება და მათ შორის დიალოგი უფრო აუცილებელია, ვიდრე ოდესმე: ეს არის გაკვეთილი, რომელსაც ჩვენ ვატარებთ ჩვენი ისტორიის, ჩვენი ტრადიციების ნაწილით, რომელთა შორის ტოლერანტობა გამორჩეულია.

სწორედ ამიტომ, მოხარული ვარ, რომ დღეს თქვენს ასამბელას, რომელიც თავისი მრავალფეროვნებითა და მულტიკულტურალიზმით გამოირჩევა, ჩვენს დედაქალაქში – თბილისში ვმასპინძლობ, რომლის ისტორია კულტურებს, რელიგიებს შორის მრავალსეკულარული დიალოგის ცოცხალ ნიშანს ატარებს. თავად არქიტექტურაში შეიძლება ამის ამოკითხვა. ამიტომ, იმედი მაქვს, რომ გექნებათ დრო, თქვენი საქმის გარდა, რათა აღმოაჩინოთ მისი სიმდიდრე.

თქვენი დღის წესრიგის თემები ასევე ჩვენი პრიორიტეტებიცაა. ქალები და მე მათგან ვიწყებ, რადგან ისინი კონფლიქტების, დაუცველობისა და ძალადობის პირველი მსხვერპლნი არიან: თქვენმა ასამბლეამ ეს თემა დღის წესრიგში შეიტანა, ეს თემა იყო სწორედ თბილისის მე-2 ქალთა საერთაშორისო კონფერენციის ცენტრალური საკითხიც, რომელიც სამი დღის წინ დავხურე. და ძალიან ბედნიერი ვიქნები მომავალ წელს თქვენს დელეგატებს ვუმასპინძლო რიგით მე-3 საერთაშორისო კონფერენციაზე, რომელიც ქალებს, კონფლიქტებსა და უსაფრთხოებას ეხება.

გლობალური დათბობის წინააღმდეგ ბრძოლა ყველა ჩვენგანის პრობლემაა, რაც გარკვეულწილად, გვაკავშირებს. ეს არის საკითხი, რომელიც პრიორიტეტულია ამ პატარა ქვეყნისთვისაც, რადგან იგი გამოირჩევა ბიომრავალფეროვნებით, აქვს ეს სიმდიდრე, რომელიც არ არის მხოლოდ ჩვენი, ეს ჩვენი საერთო პლანეტის ნაწილია და ის უნდა შევინარჩუნოთ.

დეზინფორმაციისა და ყველა სახის ჰიბრიდული საფრთხის წინააღმდეგ ბრძოლა ჩვენი საზოგადოებისთვის განსაკუთრებულ გამოწვევას წარმოადგენს, სტრატეგიულ გამოწვევას ჩვენი ძალიან ძლიერი მეზობლის ამბიციებისა და საშუალებების გათვალისწინებით. ამიტომ დიდ წარმატებას გისურვებთ 48-ე სესიაზე ამ თემებზე მუშაობისას.

მე არ შემიძლია ეს გამოსვლა ისე დავასრულო, რომ არ მივულოცო ჩვენს თავს და არ აღვნიშნო თქვენი გადაწყვეტილების მნიშვნელობა, საქართველო დამკვირვებლის სტატუსიდან ასოცირებულ წევრობაზე გადაიყვანოთ. მადლობას გიხდით ამ გადაწყვეტილებისთვის, რომელიც გვაფასებს და გვავალდებულებს. წარმატებულ მუშაობას გისურვებთ!“,- განაცხადა ზურაბიშვილმა.

​ფრანკოფონიის საპატიო საპარლამენტო ასამბლეის თბილისში მიღება პრივილეგია და დიდი სიხარულია. საქართველოსთვის ეს პატივია და მინდა, მადლობა გადავუხადო პრეზიდენტს, ამ სესიის ორგანიზატორებს, არჩეულ წარმომადგენლებს საზოგადოების ყველა მიმართულებიდან, სხვადასხვა კონტინენტიდან და ასევე ჩვენს დეპუტატებს, რომლებსაც ჰქონდათ შესანიშნავი იდეა, ეს სხდომა ჩატარებულიყო თბილისში, – ამის შესახებ საქართველოს პრემიერ-მინისტრმა, ირაკლი ღარიბაშვილმა ფრანკოფონიის საპარლამენტო ასამბლეის სესიის გახსნაზე სიტყვით გამოსვლისას განაცხადა.

ღარიბაშვილის თქმით, საქართველოს, ამ ცნობილ ასამბლეაში დამკვირვებელ ქვეყანას, დიდწილად განზოგადებული ფრანკოფილიის გარდა, ფრანკოფონიის ხანგრძლივი და მდიდარი ტრადიცია აქვს.

„საქართველოს ფრანგულენოვანი ოჯახი, რომლის ნაწილიც ვარ და ვამაყობ ამით, მიუხედავად მისი შედარებით მოკრძალებული ზომისა, უდავოდ არის მსოფლიოში ერთ-ერთი ყველაზე ენთუზიაზმით სავსე და დინამიური. საფრანგეთში სწავლის შემდეგ, ფრანგული ენა ჩემთვის განსაკუთრებით ძვირფასია. ვისარგებლებ შემთხვევით და მადლობას გადავუხდი ხელმძღვანელობას და გენერალურ სამდივნოს, ფრანკოფონიის საპარლამენტო ასამბლეის წევრებს იმ გამორჩეული ჯილდოსთვის, რომლითაც თქვენ პატივი დამდეთ გუშინ. პლეადის ორდერი უფრო მეტად მავალდებულებს, რომ ჩემს ქვეყანაში ფრანგული ენის სწავლებას ხელი შევუწყო, რათა „ფრანგული სიტყვები პლეადის ვარსკვლავებივით ათას შუქად ანათებდნენ“.

საქართველოში ნახავთ ინტერესს, უპირობო სიყვარულს ფრანგული და ფრანკოფონიური ლიტერატურის მიმართ. საქართველო არის ქვეყანა, სადაც ბევრს კითხულობენ, სადაც ბევრი წიგნი ითარგმნება, სადაც წიგნს აფასებენ. ამ კუთხით მინდა ხაზი გავუსვა ქართველი ფრანკოფონების, კერძოდ, ფრანგული რენესანსის ქართული დელეგაციისა და მისი პრეზიდენტის, საქართველოს ფრანკოფონიის და ზოგადად ფრანკოფონიის საყრდენის, ქ-ნი მზაღო დოხტურიშვილის მოღვაწეობის მნიშვნელობას. ემერიტუსის პროფესორი, სამეცნიერო და კულტურული ფრანკოფონიის ძალიან ერთგულია. ფრანგულენოვანი ოჯახის შეკრების შემდეგ, დაწესდა ქართული გონკურის პრემია ქართველი მკითხველის მიერ შერჩეული ფრანგულენოვანი ავტორების დასაჯილდოებლად. ამასთან, გამოცემა Agora – სპეციალიზირებულია ფრანგულენოვანი ნაწარმოებების ქართული თარგმანების რედაქტირებაში, ისევე როგორც ყველა სხვა გამომცემლობასა და სკოლაში, უნივერსიტეტებში, რომლებიც ეძღვნება ფრანგული ენის პოპულარიზაციას და განვითარებას, ფრანგული სკოლა – მთავარი სახლი და ემბლემური ადგილია ფრანგულენოვანი ადამიანებისთვის, უფრო მეტიც, ჩემი შვილები იქ სწავლობენ, რათა შევინარჩუნოთ ჩვენი ოჯახური ტრადიცია ფრანგულენოვანი სამყაროს შესახებ.

ჩვენი ხელოვანები, კინორეჟისორები და მეცნიერები, ისევე როგორც ჩვენი უახლესი წარსულიდან ამ სფეროების წარმომადგენელი დიდებული ადამიანები, ინარჩუნებენ ძალიან მჭიდრო კავშირებს საფრანგეთთან და ფრანგულენოვან სამყაროსთან, ჩამოაქვთ ცოდნა საქართველოში და აცნობენ მას საზღვარგარეთ. ასევე, ვემზადებით პარიზის წიგნის საერთაშორისო ბაზრობისთვის, სადაც საქართველო იქნება საპატიო სტუმარი ერთ-ერთ მომდევნო გამოცემაზე და წარადგენს თავისი ლიტერატურის, პოეზიისა და კულტურის საგანძურებს ფრანგულ ენაზე.

ჩვენმა მთავრობამ დააწესა სტიპენდიები ქართველი ახალგაზრდებისთვის, რომლებსაც სურთ განათლება მიიღონ ფრანგულ და ფრანგულენოვან უნივერსიტეტებში, ჩვენ მათ ამის საშუალებას ვაძლევთ საფრანგეთის მთავრობასთან ერთად, თბილისში მათი საელჩოს მეშვეობით. განათლების საერთაშორისო ცენტრი გულდასმით ირჩევს სწავლისა და ტრენინგის მსურველ ახალგაზრდა კანდიდატებს, რათა მათ შემდეგ შეძლონ დიდ უნივერსიტეტებში და საერთაშორისო სკოლებში შეძენილი ცოდნა საქართველოს საკეთილდღეოდ გამოიყენონ. ამ კონტექსტში, მინდა, მადლობა გადავუხადო ფრანკოფონიის საუნივერსიტეტო სააგენტოს (AUF) საქართველოში გაწეული საქმიანობისთვის.

გასულ წელს ხელი მოეწერა ჩარჩო ხელშეკრულებას AUF-სა და საქართველოს განათლების სამინისტროს შორის საქართველოში უმაღლესი განათლებისა და კვლევის განვითარებისა და თანამშრომლობის გაძლიერების მიზნით. ამ ჩარჩო შეთანხმების მეშვეობით, სამინისტრო, AUF-თან ერთად, მიზნად ისახავს, ხელი შეუწყოს უმაღლესი განათლების, კვლევებისა და ფრანგულენოვანი ინოვაციების განვითარებას. ეს შეთანხმება არის იმის კარგი მაგალითი, რომ ჩვენი მთავრობა მზად არის, განავითაროს სამეცნიერო ფრანკოფონია იმ ექვსი ქართული უნივერსიტეტის სასარგებლოდ, რომლებიც AUF-ის წევრები არიან. AUF-ის მხარდაჭერით, ქართველი სტუდენტები და მკვლევარები მონაწილეობენ საუნივერსიტეტო გაცვლით პროგრამებში ფრანკოფონიის წევრ ქვეყნებთან.

გარდა ამისა, მიმდინარეობს კიდევ ერთი სასწავლო პროექტი საგარეო საქმეთა სამინისტროსა და ფრანკოფონიის საერთაშორისო ორგანიზაციას (OIF) შორის „ეროვნული ფრანკოფონური ინიციატივების (IFN)“ პროგრამის ფარგლებში – ქართველი დიპლომატების სასწავლო პროგრამა ფრანგულენოვანი დიპლომატების კორპუსის გასაძლიერებლად.

იმედი მაქვს, რომ ეს ღონისძიება ხელს შეუწყობს საქართველოს აღზევებას ფრანგულენოვან ოჯახში, ფრანგულის სწავლების გაძლიერებას ქართულ სკოლებში და ამით ამ ენის უფრო ხშირ გამოყენებას დიპლომატიასა და პოლიტიკურ წრეებში. ფრანკოფონია, ფრანკოფონიის საპარლამენტო ასამბლეა, რომელიც შედგება ქალებისა და მამაკაცებისგან, რომლებმაც იციან მშვიდობის, თავისუფლებისა და სოლიდარობის ღირებულებების მნიშვნელობა; თქვენ ჩვენ გადმოგვცემთ ჩვენთვის ძვირფას ღირებულებებს. განსაკუთრებით ამ რთულ პერიოდში მთელი მსოფლიოსთვის. საქართველო ამჟამად გადის დიდი გეოპოლიტიკური გამოწვევების პერიოდს, ამიტომ ჩვენი ვალია გავიაროთ ეს ეტაპი სიბრძნით და მოთმინებით, ვიყოთ ფხიზლად, ვიმოქმედოთ გონიერებითა და წინდახედულებით, ვიზრუნოთ მშვიდობის შენარჩუნებაზე და მივცეთ ქვეყანას განვითარების შესაძლებლობა, რათა დაკმაყოფილდეს ჩვენი მოსახლეობის მოლოდინები“, – განაცხადა ირაკლი ღარიბაშვილმა.