სრულიად მიუღებელია იმ განცხადების ტონი, რომელიც აშშ-ის საელჩომ საქართველოში FARA-ს კანონის მეშვეობით გასაჯაროებული კონტრაქტის საპასუხოდ გამოაქვეყნა“, – ამის შესახებ „ხალხის ძალის“ ერთ-ერთმა ლიდერმა, სოზარ სუბარმა განაცხადა.

მისი თქმით, განცხადებაში იმ კითხვებზე საერთოდ არ არის პასუხი გაცემული, რაც ქართულ საზოგადოებაში გაჩნდა FARA-ს კანონის მეშვეობით გასაჯაროებული კონტრაქტის შემდეგ და მსგავსი ბუნდოვანება აშშ-ის საელჩოსთვის, ზოგადად, დამახასიათებელია.

„ქალბატონი კელი დეგნანი საქართველოს მოსახლეობასა და მთლიანად ქვეყანას, სამწუხაროდ, ძალიან არასწორად უყურებს. ეს ადამიანი გვარწმუნებს, რომ, ერთი მხრივ, მან თითქოს წაიკითხა და დეტალურად შეისწავლა ცენტრ „ემპათიის“ 1000-გვერდიანი დასკვნა, როგორ „სჭირს“ სააკაშვილს დემენცია, როგორ კვდება, როგორ წამლავენ რუსული წამლებით, როგორ უყრიან საჭმელში დარიშხანს, პოლონიუმს, ასხივებენ მანქანებით და ა.შ. მეორე მხრივ, თურმე წაკითხული არ აქვს ამერიკის იუსტიციის დეპარტამენტის გვერდზე გამოქვეყნებული მასალა, რომელშიც მისი საელჩოს ოფიცრის მონაწილეობაზეა ლაპარაკი. რა თქმა უნდა, ეს არის დაუჯერებელი და, მით უმეტეს, სრულიად მიუღებელია იმ განცხადების ტონი, რომელიც აშშ-ის საელჩომ საქართველოში ამ ყველაფრის საპასუხოდ გამოაქვეყნა. ეს განცხადება არის მკაცრი, ვითომ პრინციპული, თუმცა ბუნდოვანი და გაურკვეველი. საერთოდ არ აქვთ პასუხი გაცემული იმ კითხვებზე, რაც ჩვენ საზოგადოებაში გაჩნდა. საუბარია იმაზე, თუ რა როლი აქვს აშშ-ის თანამშრომელს ამ ყველაფერში, ვის დაურეკა, ვის ელაპარაკა და ა.შ. ასეთი გაურკვეველი პასუხები კი, რაც აშშ-ის საელჩოს საქართველოში ამასთან დაკავშირებულ განცხადებაში ჰქონდა, მათგან ძალიან ხშირია ხოლმე. ასეთივე პასუხი ჰქონდა კელი დეგნანს მაშინ, როცა ჩვენ, „ხალხის ძალამ“ ბიძინა ივანიშვილთან დაკავშირებით ვკითხეთ, შედგა თუ არა მათი შეხვედრა, რაზეც ქალბატონმა კელი დეგნანმა ძალიან ორაზროვანი პასუხი გაგვცა. დღემდე არ გაუცია ჩვენ პასუხი მიერ მრავალგზის გამეორებულ კითხვაზე, მონაწილეობდა თუ არა ბაკურიანის შეხვედრაში, რომელსაც ბატონი აკერმანი ატარებდა და სადაც საქართველოს ხელისუფლების არა არჩევნების, არამედ რევოლუციის გზით შეცვლა იგეგმებოდა. ჩვენ გვაქვს ძალიან დამაჯერებელი ინფორმაცია ამ შეხვედრასთან დაკავშირებით, გვაქვს ინფორმაცია, მონაწილეობდა თუ არა კელი დეგნანი იქ, მაგრამ გვინდა მისი პასუხი. ან მკაფიოდ თქვას – არა, ან მკაფიოდ თქვას – კი. თუ არა-ს იტყვის, ამის შემდეგ ჩვენ ვიტყვით, რატომ გვაქვს ეჭვები. თუმცა, დღემდე არც ბუნდოვანი და არც მკაფიო პასუხი არ მოგვისმენია“, – განაცხადა სოზარ სუბარმა გადაცემა „პოლიტიკურ პოსტში“.

“ქართული ოცნების” წევრი მიხეილ სარჯველაძე აცხადებს, რომ “ნაციონალური მოძრაობა” ყველაზე დიდი ოპოზიციური პარტიის სტატუსის შენარჩუნებას ცდილობს და სწორედ ამის გამო, ყველა რესურსის მობილიზებას ახდენს. მისივე შეფასებით, “ნაციონალურ მოძრაობაში” კრიზისია.

“ძალიან არასერიოზულად გამოიყურება უბრალოდ ვაშაძის და ხაბეიშვილის გაერთიანება და ამისთვის “გამარჯვების პლატფორმის” დარქმევა. მე მგონია, რომ ყველა ხვდება, “ნაციონალურ მოძრაობას” აქვს უმძიმესი კრიზისი. ამ კრიზისის ერთ-ერთი სიმპტომი გახლავთ ის არჩევნები და დაპირისპირება, რომელიც ჰქონდათ პარტიაში. ერთადერთი ფიქრი რაც აქვთ და მათი გადმოსახედიდან, ეს შეიძლება რეალისტურთან ახლოს იყოს, ეს ოპოზიციის რიგებში ყველაზე დიდი ოპოზიციური ძალის სტატუსის შენარჩუნებაა და აქედან გამომდინარე, ბუნებრივია, უწევთ ყველა რესურსის მობილიზება, რომელიც კი შეიძლება მოიაზრებოდეს მათ ხელქვეშ,”- აცხადებს მიხეილ სარჯველაძე.

“ქართული ოცნების” წევრის, გივი მიქანაძის შეფასებით, ძველი წევრების “ნაციონალურ მოძრაობაში” დაბრუნების პროცესი მიუთითებს, რომ პარტიას, რეალურად, არანაირი რესურსი არ გააჩნია.

“ნაციონალურ მოძრაობას” რომ არანაირი არ გააჩნია, ბოლო პერიოდის მოვლენებიც მეტყველებს. მათი ყოფილი წევრები, სხვადასხვა შენაერთებიდან და მათი დაფრთიანებული ე.წ. პოლიტიკოსები კვლავ უბრუნდებიან იმ ე.წ. ფუნდამენტს, რასაც “ნაციონალური მოძრაობა” და ეს დესტრუქციული ძალა ჰქვია. ჭიაბერაშვილის დაბრუნებაც, ვაშაძის გაერთიანებაც “ნაციონალურ მოძრაობასთან” არის ზუსტად ამ პროცესების რეალური გამოხატულება. ეს დესტრუქციული ძალა ორიენტირებულია მხოლოდ საკუთარ ვიწროპარტიულ ინტერესებზე და იმ დაკვეთების შესრულებაზე, რომელიც “გლობალური ომის პარტიიდან” მომდინარეობს. ცხადზე ცხადია ის გარემოება, რომ “ნაციონალურ მოძრაობაში” ცალსახად ცალსახად ფიქსირდება არაფორმალური მმართველობა იმ ოდიოზური ფიგურების, რომლებიც საზოგადოებისთვის მხოლოდ და მხოლოდ ნეგატივით არიან ცნობილნი,”- აცხადებს გივი მიქანაძე.

სააკაშვილის ხელისუფლების კრიმინალური ქმედებები არ გვიკვირს და ძალიან ბევრია, თუმცა აგვისტოს ომის დღეებში რამდენიმე ისეთი ფაქტი მოხდა, რომელიც „ნაციონალური მოძრაობისთვისაც“ კი დღემდე რჩება ყველაზე მძიმე ფაქტად, – ამის შესახებ „ხალხის ძალის“ წევრმა, სოზარ სუბარმა განაცხადა.

როგორც სოზარ სუბარმა აღნიშნა, ერთ-ერთი ასეთი არის 16 აგვისტოს როინ შავაძის მკვლელობა.

„ამავე პერიოდში დააკავეს დავით ცინდელიანი და პაატა ქარდავა. ორივე გაიყვანეს ზღვაში, დახვრიტეს, ფეხზე ქვები მოაბეს და ისე ჩაძირეს ზღვაში, მათი გვამები, დღემდე არ არის ცნობილი, სად არის. რაც შეეხება შავაძეს, ის წამოიყვანეს ქობულეთის მიმართულებით და მოხდა მისი დახვრეტა. ჯერ კიდევ მაშინ, როდესაც მე ვიყავი სახალხო დამცველი და ვიკვლევდი ამ საქმეს, ისინი აშანტაჟებდნენ შავაძის ოჯახს, მათ ეუბნებოდნენ, რომ ხმა არ ამოეღოთ, რადგან როინ შავაძეს მოღალატედ გამოაცხადებდნენ და მის შვილებს მოუწევთ მოღალატის იარლიყით ცხოვრება. მაშინ გავარკვიეთ პირველად ის დეტალები, რომლებიც დღეს პროკურატურამ გაცილებით ფართოდ, მასშტაბურად და დეტალურად გახადა ცნობილი. პროკურატურამ თქვა, როინ შავაძეს მართლა გაქცევა რომ სდომოდა, ვერ მოახერხებდა გაქცევას, იმდენად სასტიკად იყო ნაწამები, რომ მას მოძრაობის საშუალებაც კი არ ჰქონდა. ეს ფაქტები მაშინ მე არ მქონდა. ასევე, პროკურატურამ გამოავლინა საქმეში მონაწილე ყველა პირი, მაშინ მე მხოლოდ რამდენიმე პირის სახელი და გვარი მქონდა დასახელებული.

კიდევ ერთხელ რომ ვისაუბრო სააკაშვილის რეჟიმის სისასტიკესა და არაადამიანურობაზე, იმდენად დიდი იყო ზეწოლა ციცინო შავაძეზე და მის მცირეწლოვან შვილებზე, რომ თვეების განმავლობაში სახალხო დამცველის წარმომადგენლები მორიგეობით ცხოვრობდნენ შავაძეების ოჯახში. ყოველ ღამე ერთი ადამიანი რჩებოდა მათთან სახლში, რადგან მათ ჰქონდათ საფრთხე, ემუქრებოდნენ, რომ შემოგივარდებით და შენს შვილებსაც იმავეს დავმართებთ, რაც დაემართა შენს მეუღლესო, ამას ეუბნებოდნენ ქალბატონ ციცინოს. არაადამიანურ რეჟიმს დღეს აქვს მცდელობა, რომ დაბრუნდეს ხელისუფლებაში და, ძალიან სამწუხაროდ, დღეს მას ჰყავს ძალიან ბევრი მხარდამჭერი ევროპარლამენტსა თუ ამერიკის შეერთებული შტატების სახელმწიფო სტრუქტურებში“, – განაცხადა სუბარმა.

ჩინეთის სახალხო რესპუბლიკაში საქართველოს პრემიერ-მინისტრის ირაკლი ღარიბაშვილის ვიზიტი გრძელდება,- ამის შესახებ ინფორმაციას მთავრობის ადმინისტრაცია ავრცელებს.

უწყების ცნობით, მთავრობის მეთაური პეკინში ჩავიდა.

მათი ინფორმაციით, ვიზიტის ფარგლებში, პეკინში პრემიერ-მინისტრი ორმხრივი, მაღალი დონის შეხვედრებს გამართავს.

აგვისტოს ომის ვეტერანი, როინ შავაძე, ძალადობით მოკლეს ქობულეთის გზაზე 40 ჭრილობით და დღეს „ქართული ოცნება“ მორალური პედესტალიდან ესაუბრება საზოგადოებას, თითქოს სამართლიანობის აღდგენა მიმდინარეობს. ეს არის უმძიმესი, უბინძურესი ტყუილი შავაძის ოჯახის, მისი ხსოვნისა და მოქალაქეების წინააღმდეგ, – ამის შესახებ პარტია „ლელოს“ გენერალურმა მდივანმა ირაკლი კუპრაძემ განაცხადა.

მისი თქმით, „ქართული ოცნება“ მფარველობს ამ საქმის მთავარ მონაწილეებს – შავაძის საქმის პროკურორს ვასილ როინიშვილს, რომელიც დღეს არის საკონსტიტუციო სასამართლოს თავმჯდომარის მოადგილე და შავაძის საქმის გამომძიებელ რესან კონცელიძეს, რომელიც არის მმართველი პარტიის დეპუტატი და ბათუმის მაჟორიტარი.

„დღეს „ქართული ოცნება“ გამოდის გონორით და საუბრობს იმაზე, თითქოსდა სამართლიანობის აღდგენა დაიწყეს, რაც არის ტყუილი და ნაძირლობა „ქართული ოცნების“ მხრიდან. 2020 წელს მხოლოდ და მხოლოდ ევროპული სასამართლოს მიერ, სტრასბურგის სასამართლოს გადაწყვეტილების შემდეგ, განახლდა საგამოძიებო მოქმედებები სერჟანტ როინ შავაძის საქმესთან დაკავშირებით, რის შემდეგაც, მხოლოდ და მხოლოდ ახლა დააკავეს კუდ-ის რამდენიმე თანამონაწილე მკვლელობის. მაგრამ დღეის მდგომარეობით, ისევ დაუსჯელები რჩებიან მთავარი მოქმედი პირები, რომლებმაც გააყალბეს შავაძის საქმე. დაზარალებულის სტატუსიც კი არ მიანიჭეს ოჯახის წევრებს, რომლებსაც მოუკლეს აგვისტოს ომის მონაწილე ოჯახის წევრი.

საუბარია ვასილ როინიშვილზე, რომელიც ამ პერიოდის განმავლობაში იყო აჭარის ავტონომიური რესპუბლიკის მთავარი პროკურორი და შავაძის საქმის ზედამხედველი პროკურორი. „ქართულმა ოცნებამ“ ვასილ როინიშვილი 2020 წელს, მათ შორის ჩვენი პროტესტის პარალელურად, დანიშნა და აირჩია საქართველოს საკონსტიტუციო სასამართლოს მოსამართლედ. ამის შემდეგ, ის კიდევ უფრო დააწინაურეს და დღეს არის საკონსტიტუციო სასამართლოს თავმჯდომარის მოადგილე. პირი, რომელზეც ევროპული სასამართლო ამბობს, რომ პროკურატურამ არაფერი გააკეთა შავაძის საქმის გამოძიებისთვის, პირიქით, ხელს უშლიდა მას და იყო ერთ-ერთი გამყალბებელი.

მეორე პირი, რესან კონცელიძე, რომელიც „ქართულმა ოცნებამ“ აქცია საქართველოს პარლამენტის დეპუტატად და ბათუმის მაჟორიტარად. ადამიანი, რომელიც იყო აჭარის მთავარი პოლიციელი, შავაძის საქმის გამომძიებელი, რომელსაც ხელს ადებს შავაძის ოჯახი, ადვოკატი. ადამიანი, რომელმაც პირველმა შეისწავლა, დაასურათა და აღწერა ფაქტობრივი მტკიცებულებები, გააყალბა ისინი და მიაწოდა პროკურატურას. ორი ადამიანი -რესან კონცელიძე და ვასილ როინიშვილი დღეს იკავებენ უმნიშვნელოვანეს სახელმწიფო ინსტიტუტებში უმაღლეს პოზიციებს. „ქართული ოცნება“ სერჟანტ შავაძის საქმეში არის თანამონაწილე იმ დანაშაულისა, რომელიც დაათენეს ერთ ჩვეულებრივ ოჯახს. „ქართული ოცნება“ მფარველობს ამ საქმის მთავარ მონაწილეებს. მოვუწოდებთ თავად როინიშვილს და კონცელიძეს, აიღონ პასუხისმგებლობა ამ უმძიმეს საქმეზე და დატოვონ ის პოზიციები, რომლებიც მათ დღეს აქვთ. მათ არ აქვთ არანაირი მორალური უფლება, იყვნენ საქართველოს მოსახლეობის წარმომადგენლები“,- განაცხადა კუპრაძემ.

“მამუკა მდინარაძეს კომენტარი ლაინერთან დაკავშირებით საერთოდ არ გაუკეთებია, მაგრამ მაინც მთელი სერიოზულობით აზიარებენ ნახევარსაათიან „ფეიკს“ და შფოთავენ”, – ამის შესახებ ფრაქცია „ქართული ოცნების“ თავმჯდომარის მოადგილე, რატი იონათამიშვილი სოციალურ ქსელში წერს.

„სინამდვილეში, ამით ორი რამე აშკარავდება – ერთი, რომ ყალბ ამბებზე აგებენ საკუთარ დღის წესრიგს და მეორე – თუ რამე არ მოიგონეს, არაფერი აქვთ ხელმოსაჭიდი. თან, ასე, არაგრამატიკულად და უხარისხოდ.

მაგრამ ზუსტად ასეთი უგემოვნო „ფეიკები“ აჩვენებს ყველაზე კარგად, ვინ არის ორიენტებული საქმეზე და ვინ ცილისწამებასა და ტყუილზე“, – წერს რატი იონათამიშვილი.

როინ შავაძის საქმესთან დაკავშირებით სამართლიანობა უნდა აღდგეს, მაგრამ ეჭვი არ უნდა არსებობდეს, რომ ასეთი გადაწყვეტილების დრო პოლიტიკურ კლიმატს უკავშირდება, – ამის შესახებ განცხადება პარტია „ხალხისთვის“ ლიდერმა, ანა დოლიძემ სოციალურ ქსელში გაავრცელა.

მისი თქმით, უნდა დავსვათ კითხვა, რატომ დასჭირდა „ქართულ ოცნებას“ ამდენი ხანი იმისთვის, რომ პასუხისგებაში მიეცა შესაბამისი ხალხი.

„რა თქმა უნდა, როინ შავაძის მკვლელობა გამოსაძიებელია და ყველა დამნაშავე პასუხისგებაში უნდა იქნეს მიცემული. ყველა ასეთ შემთხვევაში სამართლიანობა უნდა დადგეს. მაგრამ უნდა დავსვათ კითხვა, რატომ დასჭირდა „ქართულ ოცნებას“ ამდენი ხანი იმისთვის, რომ პასუხისგებაში მიეცა შესაბამისი ხალხი?! სტრასბურგის გადაწყვეტილება აქ არ არის თავის გამართლება, ჯერ ერთი, გადაწყვეტილებიდან სამი წელი გავიდა და მეორეც, სტრასბურგის გარეშეც დიდი ხანია შეეძლო ხელისუფლებას, შესაბამისი ხალხი პასუხისგებაში მიეცა. ამიტომ სამართლიანობა უნდა აღდგეს, მაგრამ ეჭვი არ უნდა არსებობდეს, რომ ასეთი გადაწყვეტილების დრო პოლიტიკურ კლიმატს უკავშირდება.“- განაცხადა ანა დოლიძემ.

ანა დოლიძის განცხადებას პარტია „ხალხისთვის“ ავრცელებს.