ბოლო პერიოდში პატრიარქი უფრო და უფრო იშვიათად ჩნდება – სამწუხაროდ, ბოლო პერიოდი ფიზიკურად ძალიან უჭირს, ძალიან დიდი დატვირთვაა წირვა, – ამის შესახებ საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ ჟურნალისტებს განუცხადა.

როგორც ანდრია ჯაღმაიძემ აღნიშნა, ილია მეორის მოღვაწეობას გამოარჩევდა ის, რომ დღესასწაულებსა და წირვა-ლოცვებს არ ტოვებდა.

„ზოგადად, ჩვენ ვხედავთ, რომ ბოლო პერიოდში პატრიარქი უფრო და უფრო იშვიათად ჩნდება. მისი მოღვაწეობის პერიოდში პატრიარქი გამოირჩეოდა იმით, რომ არ ტოვებდა არცერთ წირვა-ლოცვასა და დღესასწაულს. სამწუხაროდ, ბოლო პერიოდი ფიზიკურად ძალიან უჭირს, ძალიან დიდი დატვირთვაა წირვა“, – აღნიშნა ჯაღმაიძემ.

ცნობისთვის, სვეტიცხოვლის საკათედრო ტაძარში, „წმინდა დიდებულთა ათორმეტთა მოციქულთა კრების” – სვეტიცხოვლობის დღესასწაულთან დაკავშირებით წირვა-ლოცვა მიმდინარეობს.

წირვა – ლოცვას სვეტიცხოვლობის დღესასწაულთან დაკავშირებით, საპატრიარქოს ტახტის მოსაყდრე, მეუფე შიო მღვდელმთავრებთან ერთად აღავლენს.

გუშინ მალხაზ ურთქმელიძემ გააკეთა განცხადება, [მიხეილ სააკაშვილი] კარგად გამოიყურებაო. ბატონი ურთქმელიძე ქალბატონი რომ ყოფილიყო, ეს ჩემს შვილს შეიძლება კომპლიმენტადაც მიეღო – მე რასაც ვუყურებ, იმავე მდგომარეობაშია, საკმაოდ სუსტად, – ამის შესახებ საქართველოს მესამე პრეზიდენტის, მიხეილ სააკაშვილის დედამ, გიული ალასანიამ კლინიკა „ვივამედთან“ ჟურნალისტებს განუცხადა.

გარდა ამისა, მან პოლონელ ექიმებს, რომლებმაც მიხეილ სააკაშვილი მოინახულეს, მადლობა გადაუხადა.

„ძალიან ბევრი საათი გაატარეს, ყველაფერს აქ ვერ გააკეთებდნენ, რაღაც რეკომენდაციებიც გასცეს ალბათ. წერილობითი ფორმითაც წარმოადგენენ ამ ყველაფერს. ძალიან დიდი მადლობა მინდა ვუთხრა, პირველ რიგში, მატეუშ მორავეცკის, ვისი თამადობითაც მოხდა ეს ყველაფერი. მთელი ევროპა დადგა ფეხზე, ძალიან ბევრმა ევროპულმა გაზეთმა გამოაქვეყნა ჩემს შვილზე სტატიები. ძალიან გამამხნევებელი იყო პრეზიდენტ ბაიდენის გუშინდელი განცხადება, რომელმაც ქართველ ხალხს ბრძოლისკენ მოუწოდა. დღეს მაგალითად, სისხლის გადასხმას აპირებენ, ვერ არის ფორმაში. გუშინ მალხაზ ურთქმელიძემ გააკეთა განცხადება, კარგად გამოიყურებაო. ბატონი ურთქმელიძე ქალბატონი რომ ყოფილიყო, ეს ჩემს შვილს შეიძლება კომპლიმენტადაც მიეღო. შექმნილ ვითარებაში, რა ვიცი რა გითხრათ.

მე რასაც ვუყურებ, იმავე მდგომარეობაშია, საკმაოდ სუსტად. არ მაქვს ინფორმაცია პოლონელი ექიმები დღესაც გეგმავენ თუ არა მოსვლას. არ მაქვს არანაირი ინფორმაცია“, – განაცხადა გიული ალასანიამ.

კლინიკა „ვივამედის“ კლინიკური დირექტორის, ზურაბ ჩხაიძის განცხადებით, პოლონელი ექიმები მათ მიერ მომზადებულ, მიხეილ სააკაშვილის მკურნალობის ტაქტიკას და ჩატარებულ კვლევებს დაეთანხმნენ.

მისივე თქმით, ის რეკომენდაციები, რაც პოლონელმა ექიმებმა კლინიკა „ვივამედის“ ექიმებს მისცეს, „ვივამედის“ მედიკოსებს პაციენტისთვის უკვე გაწეული ჰქონდათ.

როგორც ზურაბ ჩხაიძემ აღნიშნა, პოლონელ ექიმებთან კოლეგიალური შეხვედრა შედგა.

„გუშინ, ჩვენს კლინიკაში ვიზიტით პოლონელი კოლეგები იმყოფებოდნენ. ექიმების შემადგენლობა ასეთი იყო: ნეიროქირურგი, შინაგანი მედიცინის სპეციალისტი და ტოქსიკოლოგი. შემიძლია გითხრათ, რომ მე და ჩვენი კოლეგები ძალიან კმაყოფილი ვართ, ნამდვილად კოლეგიალური შეხვედრა იყო. ერთობლივად განვიხილეთ პაციენტის მდგომარეობა და ჩატარებული წინა კვლევები. ნამდვილად ძალიან კოლეგიალური და კეთილგანწყობილი შეხვედრა იყო, განსხვავებით სხვა, წინა ექსპერტებისგან, რომლებიც ჩამოდიოდნენ და მათთან საერთოდ კომუნიკაცია არ გვქონდა. არა მარტო უცხოელი ექსპერტები, ასევე ქართველი ექსპერტები, რომელთაც, ფაქტობრივად, ჩვენი კლინიკის ექიმებთან კომუნიკაცია არ ჰქონიათ.

რაც შეეხება მიმდინარე მკურნალობას, ზოგადად შემიძლია გითხრათ, რომ ისინი სრულად დაეთანხმნენ ჩვენი მკურნალობის ტაქტიკას, ჩატარებულ კვლევებს. სხვა დანარჩენ დეტალებზე ალბათ, თვითონ გააკეთებენ განცხადებას. ის, რაც რეკომენდაციის სახით მოგვცეს, ჩვენ პაციენტისთვის რეკომენდებული გვქონდა, მაგრამ პაციენტი მაშინ უარს აცხადებდა იმ კვლევის ჩატარებაზე – თუნდაც, ფუნქციის ჩატარება ხერხემალზე, რომელზეც პაციენტმა არაერთხელ განაცხადა უარი, ეს მათაც შესთავაზეს. საუბარი იყო კვებასთან დაკავშირებულ საკითხზეც. ეს ყველაფერი ჩვენი საერთო აზრი იყო და საერთო გადაწყვეტილება, რის შესახებაც ისინი პაციენტს ესაუბრნენ“, – განაცხადა ჩხაიძემ.

როგორც ჩხაიძე ამბობს, საქართველოს მესამე პრეზიდენტს წონაში მომატებული აქვს.

„მე ვერ გეტყვით პოლონელ ექიმებს სპეციალური პენიტენციური სამსახურის სამედიცინო დეპარტამენტის ხელმძღვანელთან, მალხაზ ურთქმელიძესთან ჰქონდათ თუ არა კომუნიკაცია, მე შემიძლია გითხრათ, რომ ჩემთან კომუნიკაცია ჰქონდათ და ჩვენი კლინიკის სხვა დანარჩენ ექიმებთან. რაც შეეხება წონაში მატებას, რა თქმა უნდა, არის წონაში მატება. მიხეილ სააკაშვილი წონაში მომატებულია და ჩვენ ეს ძალიან გვახარებს. მე მგონი, პაციენტსაც უნდა ახარებდეს და მის გარემოცვასაც“, – აღნიშნა ჩხაიძემ.

ჟურნალისტის კითხვაზე: წონაში მატება ხომ არ ნიშნავს, რომ ყოფილ პრეზიდენტს საპატიმრო დაწესებულებაში გადაიყვანენ, ჩხაიძემ განაცხადა, რომ „წონაში მატება სადმე გადაყვანის განმსაზღვრელი არ არის.“

„მისი მდგომარეობა საყურადღებოა, თუნდაც ამ ლაბორატორიული კვლევის შედეგებიდან , თუმცა ყველა პარამეტრი არის სტაბილური. ციხეში გადაყვანაზე საუბარი ჩვენთან არ არის“, – განაცხადა ჩხაიძემ.