იუსტიციის მინისტრის რატი ბრეგაძის განცხადებით, მიხეილ სააკაშვილის ჯანმრთელობასთან დაკავშირებით, “ლიმბახის” გერმანული ლაბორატორიიდან მიღებული ანალიზებით კიდევ ერთხელ დადასტურდა, რომ “სახელმწიფოს წინააღმდეგ წარმოებული მილიონ დოლარიანი კამპანია კრახით დასრულდა”. მისივე თქმით, ანალიზის პასუხები ექსპრეზიდენტის მოწამვლას გამორიცხავს.

როგორც რატი ბრეგაძემ “ღამის კურიერში” განაცხადა, მიხეილ სააკაშვილის ჯანმრთელობის მდგომარეობით სპეკულაცია მიმდინარეობს, რომელიც მიზნად ისახავს განხორციელდეს საქართველოს დისკრედიტაცია და სიტუაცია წარმოჩინდეს იმგვარად, თითქოს მიხეილ სააკაშვილი იყო მოწამლული.

“მიხეილ სააკაშვილის პენიტენციურ დაწესებულებაში შემოსახლების დღიდან, მოსახლეობა აკვირდება სახელმწიფოს წინააღმდეგ მიმდინარე კამპანიას, რომელიც მიზნად ისახავს განხორციელდეს საქართველოს დისკრედიტაცია და სიტუაცია წარმოჩინდეს იმგვარად, თითქოს მიხეილ სააკაშვილი იყო მოწამლული, ან მას ვინმე აწამებს, ან არღვევს მის რომელიმე უფლებას, რაც იმთავითვე ვთქვით, რომ აბსოლუტურად მტკნარი სიცრუეა და არ შეესაბამებოდა სინამდვილეს.

ჩვენ მსჯავრდადებულს იმთავითვე გავუკეთეთ შეთავაზება, რომ გაეკეთებინა ტოქსიკოლოგიური ექსპერტიზა, თუმცა მან ამაზე უარი განაცხადა და ამის შემდგომ, მან ასევე უარი განაცხადა, რომ ნიმუშები გამოძიებისთვის მიეცა. შესაბამისად, გაჩნდა ძალიან ბევრი კითხვა იმის შესახებ, რომ თუ ადამიანი არის მოწამლული, მის ჯანმრთელობას შესაძლოა საფრთხე შეექმნას, რატომ არ არის დაინტერესებული სიმართლის დადგენით და შესაბამისი მკურნალობით. მე აქაც ვფიქრობ, რომ მოსახლეობისთვის სურათი საკმაოდ ნათელია. ეს კვლევა, ჯერ ერთი, ჩვენ არ ჩაგვიტარებია. იმ კვლევაზე, რომელზეც მე ვსაუბრობ, ეს იყო ჩვენი შეთავაზება და ამ შემთხვევაში საავადმყოფო ატარებს ჩვეულებრივ შემოწმებას, სისხლის ანალიზებს და ბუნებრივია, სისხლის ანალიზის დროს ხდება სხვადასხვა ტიპის შემოწმება. აქაც აღმოჩნდა, რომ ყველა ის მეტალი, რომელზეც მსჯავრდადებულის მხარე აპელირებდა, აბსოლუტურად ნორმაშია სისხლში და შესაბამისად, აქ რაიმე სახის მოწამვლაზე საუბარი გამორიცხულია. ამერიკული ლაბორატორიის ანალიზების მიხედვითაც აღმოჩნდა, რომ ყველა მონაცემი ნორმაში იყო. შესაბამისად, მთელი ეს ისტორია მიუთითებს იმ გარემოებაზე, რომ სახელმწიფოს წინააღმდეგ წარმოებული მილიონ დოლარიანი კამპანია დასრულდა კრახით”, – განაცხადა რატი ბრეგაძემ.

შეგახსენებთ, როგორც დღეს “ვივამედის” კლინიკური დირექტორმა ზურაბ ჩხაიძემ განაცხადა, “ლიმბახის“ ლაბორატორიიდან მიღებული ანალიზებით დადასტურდა, რომ მიხეილ სააკაშვილთან მძიმე მეტალებით მოწამვლას ადგილი არ ჰქონია.

მისივე განცხადებით, ყველა ჩამოთვლილი მძიმე მეტალი, რომელსაც იკვლევდნენ, ნორმის ფარგლებშია.

„დავით კეზერაშვილზე ლაპარაკობენ და ისტერიკა რომ აქვთ, მე მაინტერესებს ამით ეშველება საქართველოს კანდიდატის სტატუსს? ამით ეშველება კორუფციულ სასამართლოს? ამით გელათს ეშველება? რიკოთის უღელტეხილზე უბედურება რომ ხდება ეშველება“, – ამის შესახებ „ნაციონალური მოძრაობის“ თავმჯდომარემ ლევან ხაბეიშვილმა ტვ „პირველის“ ეთერში საუბრისას განაცხადა.

„მარტივი ჭეშმარიტება მინდა ხალხს ვუთხრა. საქართველოში ე.წ. ქოლ ცენტრები არსებობს და ამის ერთ-ერთი მთავარი გამომძიებელი მეც ვიყავი. მე კონკრეტულ მისამართებზე ვარ მისული, სადაც სამართალდამცველებს ვიძახებდი და რეაგირება არ ჰქონდათ.

პარლამენტის ტრიბუნიდან კონკრეტული მისამართები და მფარველები დავასახელე. ამის შემდეგ გერმანელი პროკურორები ჩამოვიდნენ საქართველოში და რამდენიმე ცენტრი თვალთმაქცურად დახურეს. ამის მიუხედავად, დღესაც მუშაობს ქოლ ცენტრები“, – აღნიშნა ხაბეიშვილმა.

ჟურნალისტის კითხვაზე გამორიცხავს თუ არა ე.წ. ქოლცენტრების საქმეში დავით კეზერაშვილის ჩართულობას? ხაბეიშვილი აცხადებს, რომ კეზერაშვილი თავის თავს მიხედავს.

„მარტივი რამე უნდა ვთქვა, დავით კეზერაშვილი თავის საქმეს მიხედავს. თუ გამოძიება დაიწყება, კეზერაშვილი დარწმუნებული ვარ თავისი ადვოკატებით თავის თავს აუცილებლად მიხედავს. დავით კეზერაშვილზე ლაპარაკობენ და ისტერიკა რომ აქვთ, მე მაინტერესებს ამით ეშველება საქართველოს კანდიდატის სტატუსს? ამით ეშველება კორუფციულ სასამართლოს? ამით გელათს ეშველება? რიკოთის უღელტეხილზე უბედურება რომ ხდება ეშველება.

დავით კეზერაშვილზე რომ ვლაპარაკობთ, მთელი დღე რომ დავკარგეთ კეზერაშვილზე ანუ კეზერაშვილი ჭამოს ხალხმა? მართლა მაინტერესებს. მე მიმაჩნია რომ ეს არის კონკრეტული თემიდან ყურადღების გადატანა?“, – აცხადებს ლევან ხაბეიშვილი.

იუსტიციის უმაღლესი საბჭოს მოსამართლე წევრმა, დიმიტრი გვრიტიშვილმა ამერიკაში ტრენინგზე გამგზავრებული ქართველი მოსამართლეების შესახებ აშშ-ის საელჩოს განცხადება შეაფასა.

მისი თქმით, ამერიკაში ტრენინგზე გამგზავრებული ქართველი მოსამართლეების შესახებ აშშ-ის საელჩოს განცხადება იმ ხაზის გაგრძელებაა, რაც ამერიკის შეერთებული შტატების ელჩმა 2021 წლიდან დაიწყო, როდესაც აშკარად დაყო მოსამართლეები კარგ და ცუდ მოსამართლეებად.

„ეს არის იმ ხაზის გაგრძელება, რაც ამერიკის შეერთებული შტატების ელჩმა 2021 წლის ოქტომბრიდან დაიწყო. მაგალითად, როდესაც აშკარად დაყო მოსამართლეები კარგ და ცუდ მოსამართლეებად. როდესაც ფოტო გამოქვეყნდა ამ 10 მოსამართლის და საელჩოს კომენტარი, რომ ის მხარს უჭერს პროფესიონალ და კეთილსინდისიერ მოსამართლეებს, თუ გათვლა არის ის, რომ ამ კარგ მოსამართლეებს, ჩვენ ცუდი მოსამართლეები დავუპირისპირდეთ, ანუ, მე და ჩემ სანქცირებულ კოლეგებს გაგვიჩნდეს პროტესტის გრძნობა ამ 10 მოსამართლის მიმართ, მაშინ ძალიან ცდება ამ მეთოდის ავტორი. ეს არ მუშაობს.

მოსამართლე ლაშა ჩხიკვაძემ ღიად დააფიქსირა მისთვის კონკრეტულ საქმეზე გამოტანილი განაჩენის შესახებ ანგარიშის მოთხოვნის ფაქტი, ამით გაღიზიანებულმა საელჩომ გადაწყვიტა ერთგვარად დაესაჯა ეს მოსამართლე და სასწავლო ვიზიტით წასაყვან მოსამართლეთა სიიდან ამოეღო. შემდგომში დაფიქსირდა ასევე ფაქტი, როდესაც სხვა მოსამართლეებმა სოლიდარობა გამოუცხადეს ლაშა ჩხიკვაძეს და არც მათ მიიღეს მონაწილეობა ამ სასწავლო ვიზიტში“, – განაცხადა დიმიტრი გვრიტიშვილმა.

აშშ-ის სახელმწიფო დეპარტამენტი საქართველოს სასამართლო სისტემის 10 წარმომადგენელს, ტრენინგზე მასპინძლობს. „შეერთებული შტატები ამაყობს, რომ მხარს უჭერს საქართველოს შრომისმოყვარე, კეთილსინდისიერ, პროფესიონალ მოსამართლეებს, – ამ განცხადებით აჯამებს  აშშ-ის საელჩო ქართველ მოსამართლეთა სამუშაო ვიზიტს.

ეს არის გამოძალვა. აქციისთვის თანხის გარკვეულ ნაწილს, იღებთ, ჰპირდებით, მიგაქვთ და შემდეგ არ მოგყავთ ხალხი, – ასე მიმართა პარტია „კანონი და სამართლის“ ლიდერმა თაკო ჩარკვიანმა „ნაციონალური მოძრაობის“ წევრ დავით ნებიერიძეს გადაცემა „ვახო ხუზმიაშვილის თავისუფალ სივრცეში“.

„ერთ-ერთი აქციის გაკეთების დროს თანხა აიღოთ ადამიანებმა და მერე ხალხი არ მოიყვანოთ. აი ასე, ბატონო დავით. ახლა გირჩევთ, თქვენ აქ შეწყვიტოთ და წერტილი დაუსვათ… იკვებებით გადმოგდებული ოლიგარქის ფულებით… ეს არის სიმართლე… აი ახლა, რომ სხედხართ, შუბლის ძარღვი გაქვთ გაწყვეტილი. დავით, თქვენ ის დავით ნებიერიძე ხართ ჩემს ოფისში „კანონში და სამართალში“ მრავალი ადამიანის თანდასწრებით იჯექით და ძალიან გთხოვთ, დასვით ახლა წერტილი. ეს იყო ერთი წლის წინ. ამიტომ გეუბნები, რომ ორმაგ სტანდარტში ხართ თქვენ… სამარცხვინო ხართ. ახლავე გეუბნებით, რომ  ჩვეულებრივი გამომძალველი ხართ… ხართ ჩვეულებრივი ორმაგი სტანდარტის გამომძალველი…“, – განაცხადა თაკო ჩარკვიანმა.

„ქვეყნის გარშემო გამოძიების კონტექსტში ამოტივტივდა დავით კეზერაშვილის სახელი. ეს არის მძიმე დარტყმა და ბრალდება. „ბიბისი“ არ არის სახუმარო გამოცემა“, – ამის შესახებ პარტია „დროას“ ლიდერმა ელენე ხოშტარიამ ტვ „პირველის“ ეთერში „ბიბისის“ საგამოძიებო მასალასთან დაკავშირებით განაცხადა, რის თანახმადაც თავდაცვის ექსმინისტრი, „ფორმულას“ დამფუძნებელი დავით კეზერაშვილი გლობალურ თაღლითურ ქსელთან არის დაკავშირებული.

როგორც ხოშტარიამ აღნიშნა, რამდენიმე არაკეთილსინდისიერი ადამიანი გამოჩნდა, რომელიც ადრე კეზერაშვილთან კარგი ურთიერთობით სარგებლობდა და ახლა მის წინააღმდეგ კამპანიაში ჩაერთნენ.

„ვის როგორი დამოკიდებულება აქვს კეზერაშვილის მიმართ, მისი ბიზნესის მიმართ, ეს არის ადამიანების საქმეა და ყველა უნდა შეეჩვიოს რომ ყველანაირი კითხვა უნდა დაისვას. განსაკუთრებით მას შემდეგ რაც „ფორმულა“ შეიქმნა და რაც მიმდინარეობს დავით კეზერაშვილის წინააღმდეგ, ეს არის პოლიტიკური დევნის კამპანია, რომელიც ემსახურება არა მხოლოდ კეზერაშვილის დევნას, არამედ „ფორმულას“ დევნას, ოპოზიციის დევნას და ზოგადად მოცილებას, ვინც ეწინააღმდეგება რუსულ რეჟიმს.

მესამე საკითხი – ე.წ. ქოლ ცენტრების თემა არის უბინძურესი და უმძიმესი საქმე. ქვეყნის სირცხვილია და მიდის საერთაშორისო გამოძიება. ნებისმიერი ვინც ამაში არის ჩართული, კატასტროფაა. ამ საქმეზე გამოძიებას თავად ოპოზიცია ითხოვდა, იმიტომ რომ ფაქტია საქართველოში ეს სისტემა ფუნქციონირებს, საკმაოდ მასიურია, ბევრი ახალგაზრდაა დასაქმებული და შეუძლებელია ეს სუსის მფარველობის გარეშე ხდებოდეს.

სამწუხაროდ, არცერთი გამოძიება ამაზე არ ჩატარებულა. ვნახეთ, რომ ქვეყნის გარშემო გამოძიების კონტექსტში ამოტივტივდა დავით კეზერაშვილის სახელი. ეს არის მძიმე დარტყმა და ბრალდება. „ბიბისი“ არ არის სახუმარო გამოცემა.

ბოლო პუნქტი, რომელიც არ შემიძლია არ დავასახელო. მე ვხედავ რამდენიმე ძალიან არაკეთილსინდისიერ ადამიანს, რომელიც ძალიან კარგად სარგებლობდა დავით კეზერაშვილთან ურთიერთობით და დღეს, არ ვიცი რა მიზეზებით, უცებ კამპანიაში ჩაერთნენ, რომ თითქოს ეს ყველაფერი არის დამტკიცებული“, – აცხადებს ხოშტარია.

ახალაიას კლანი იქნება, პეტრეს კლანი იქნება, მელიას კლანი იქნება,  არ მაინტერესებს, დავიღალეთ ამ სიბინძურით – ამის შესახებ პარტია „კანონი და სიმართლის“ ლიდერმა თაკო ჩარკვიანმა გადაცემა „ვახო ხუზმიაშვილის თავისუფალ სივრცეში“ განაცხადა.

„არ მაინტერესებს ვინ რა გვარის არის. ახალაიას კლანი იქნება, პეტრეს კლანი იქნება, მელიას კლანი იქნება, არ მაინტერესებს, დავიღალეთ ამ სიბინძურით, რეფორმები მინდა სამართლებრივ ქვეყანაში, რომ კლანური მმართველობა და მკვლელები არ ბედავდნენ ტლინიკინს პირველ რიგში“, – განაცხადა ჩარკვიანმა.

გურამ მაჭარაშვილმა ამერიკაში ტრენინგზე გამგზავრებული ქართველი მოსამართლეების შესახებ აშშ-ის საელჩოს განცხადება შეაფასა. „ხალხის ძალის“ წევრს მიაჩნია, რომ საელჩო ქართულ მართლმსაჯულებაზე კონტროლის დამყარებას ცდილობს.

„სამწუხაროდ, შეერთებული შტატების საელჩოს სურს რომ კონტროლი დაამყაროს ქართულ მართლმსაჯულებაზე, პირდაპირ ერევა მართლმსაჯულებაში. ეს ფაქტიც ამის პირდაპირი დადასტურებაა. როდესაც საელჩო ამბობს, რომ ეს მოსამართლე არის კარგი და კეთილსინდისიერი, მეორე მოსამართლე კი არ არის კარგი და კეთილსინდისიერი, ანუ პრაქტიკულად ყოფს სიტუაციას, ეს არის აშკარა. სხვას კი არაფერს ვამბობთ. ელჩი გადაწყვეტილებას ვერ გამოიტანს. ამაზეა ზუსტად საუბარი, რომ მოსამართლეებს ეუბნება: „შენ კარგი ხარ, იმიტომ რომ მიჯერებ, ამიტომ წაგიყვან ჩემთან ამერიკაში. ის ცუდია, იმიტომ რომ არ მიჯერებს და ამერიკაში ჩემთან არ წავიყვან“, – აცხადებს მაჭარაშვილი.

აშშ-ის სახელმწიფო დეპარტამენტი საქართველოს სასამართლო სისტემის 10 წარმომადგენელს, ტრენინგზე მასპინძლობს. „შეერთებული შტატები ამაყობს, რომ მხარს უჭერს საქართველოს შრომისმოყვარე, კეთილსინდისიერ, პროფესიონალ მოსამართლეებს, – ამ განცხადებით აჯამებს აშშ-ის საელჩო ქართველ მოსამართლეთა სამუშაო ვიზიტს.

პარტია „მოქალაქეების“ ლიდერი ალეკო ელისაშვილი „პალიტრანიუსის“ ეთერში დასმული კითხვის საპასუხოდ BBC-ის ჟურნალისტურ გამოძიებას გამოეხმაურა, რომლის თანახმადაც თავდაცვის ექსმინისტრი, „ფორმულას“ დამფუძნებელი დავით კეზერაშვილი გლობალურ თაღლითურ ქსელთან არის დაკავშირებული.

როგორც ელისაშვილმა აღნიშნა, კეზერაშვილი იშვიათი გარეწარია და ამისთვის საზოგადოებას „ბიბისის“ გამოძიება არ სჭირდებოდა.

„კეზერაშვილი რომ იშვიათი გარეწარია, რად გვინდოდა ამისთვის „ბიბისის“ გამოძიება. ერთადერთი კაცი, რომელიც 2008 წლის ომის შემდეგ ბედნიერი იყო, ეს იყო კეზერაშვილი. მას შემდეგ რაც ჩვენი საწყობები რუსებმა  გაძარცვეს, განსაკუთრებით უფლისციხის ცენტრალური საწყობი, კეზერაშვილმა ცხვარი ან ხარი დაკლა ბედნიერებისგან, იმიტომ რომ მანამდე რაც ჰქონდა მოპარული და შეჭმული, მიდი და გაიგე.

დავლურს ცეკვავდა ბედნიერებისგან, ისედაც კი ჰქონდა ჰეროინი მიღებული და ბედნიერი დარბოდა იმ დღეებში. აქ იყო და კეზერაშვილმა გაძარცვა ქართული ჯარი, ევროპაში წავიდა და გაძარცვა ევროპელი პენსიონერები“, – აცხადებს ალეკო ელისაშვილი.