ე.წ. ქოლცენტრების საქმე – “ევროჯასტი” და “ევროპოლი” განცხადებას ავრცელებენ

22:50 - 13/04/2023

„ევროჯასტი“ და „ევროპოლი“ ე.წ. ქოლცენტრების საქმესთან დაკავშირებით განცხადებას ავრცელებენ.

როგორც განცხადებაშია აღნიშნული, „ევროჯასტმა“ და „ევროპოლმა“ მხარი დაუჭირეს კოორდინირებულ მოქმედებას ონლაინსაინვესტიციო პლატფორმების თაღლითობის საქმეზე, რომლითაც, სულ მცირე, 33 000 ადამიანი დაზარალდა, ზარალის ოდენობამ კი დაახლოებით 89 მილიონ ევროს მიაღწია.

განცხადების თანახმად, გერმანიის ხელისუფლების მოთხოვნით, მარტში ორი ოპერაცია ჩატარდა, რომლის დროსაც ხუთი ეჭვმიტანილი დააკავეს. ბულგარეთში, რუმინეთსა და ისრაელში კი 15 ლოკაციაზე ჩატარდა ჩხრეკა, მათ შორის ხუთ არაკანონიერ ქოლცენტრში. ეს ოპერაცია არის 2021 წლის იმავე თაღლითური სქემის გამოძიების გაგრძელება.

2021 წელს ამ კოორდინირებულმა მოქმედებამ, დიდი რაოდენობით ინფორმაციისა და მტკიცებულებების დაგროვებამ შესაძლებელი გახადა ოპერაციის ჩატარება 2023 წლის მარტში. მანამდე თაღლითობის შედეგად მიყენებული ფინანსური ზარალი, სულ მცირე, 15 მილიონ ევროდ იყო შეფასებული. ახალი ინფორმაციის საფუძველზე, თაღლითური სქემის უკან არსებულმა კრიმინალურმა ქსელმა უფრო დიდი ფინანსური ზიანი გამოიწვია და კიდევ ბევრი ადამიანია დაზარალებული.

„ევროჯასტმა“ 2023 წლის იანვარში მხარი დაუჭირა ონლაინთაღლითობის სქემების შესახებ საგამოძიებო ჯგუფის შექმნისა და ორი საკოორდინაციო შეხვედრის ორგანიზებას ახალი მოქმედებებისთვის მოსამზადებლად. გარდა ამისა, სააგენტო დაეხმარა ევროპული დაპატიმრების ორდერების, ევროპული საგამოძიებო ორდერებისა და ურთიერთსამართლებრივი დახმარების მოთხოვნების შესრულებაში. სპეცოპერაციის დღეებში 33 გერმანელი პოლიციელი მონაწილეობდა. საგამოძიებო მოქმედებები ჩატარდა ბულგარეთში, რუმინეთში, საქართველოსა და ისრაელში. სპეცოპერაცია ჩატარდა „ევროპოლის“ სპეციალისტების მხარდაჭერით.

განცხადების მიხედვით, სპეცოპერაციის მხარდასაჭერად „ევროპოლმა“ შექმნა სპეციალური ოპერატიული სამუშაო ჯგუფი, რომლის მეშვეობითაც ხელი შეუწყო ინფორმაციის გაცვლას და ანალიტიკურ მხარდაჭერას. ბოლო სამოქმედო დღეებში „ევროპოლმა“ ექსპერტები გაგზავნა ისრაელში და დისტანციურად – „ევროჯასტის“ საკოორდინაციო ცენტრში. სპეცოპერაციის დროს ამოიღეს მთელი რიგი ძვირადღირებული ქონება, მათ შორის ძვირადღირებული საათები, ელექტრონული აღჭურვილობა, ნაღდი ფული, ბიტკოინები, საბანკო ბარათები, მრავალი დოკუმენტი და მონაცემთა შემნახველი მოწყობილობები.

როგორც განცხადებაშია აღნიშნული, თაღლითობის უკან არსებული ქსელი იზიდავდა ინვესტორებს ვებსაიტებზე განთავსებული პროფესიონალური ბანერებითა და სოციალურ მედიაში გავრცელებული რეკლამების საშუალებით. ამისთვის კი ევროპის სხვადასხვა ქვეყანაში არსებულ ქოლცენტრებს იყენებდნენ. თაღლითები თავიანთ მსხვერპლს ეუბნებოდნენ, რომ თავდაპირველად გაეკეთებინათ მცირე ინვესტიციები, 200-დან 250 ევრომდე, აჩვენებდნენ მაღალ მოგებას ყალბი გრაფიკებისა და პროგრამული უზრუნველყოფის საშუალებით. დაზარალებულებს დაუკავშირდნენ ეგრეთ წოდებული პირადი ფინანსური მრჩევლები, რომლებიც დაჰპირდნენ უფრო მაღალ მოგებას უფრო დიდ ინვესტიციებზე. ეს მაღალი ინვესტიციები შემდგომში დაიკარგა, უკანონო მოგებები კი დამნაშავეთა ანგარიშებზე ირიცხებოდა.

განცხადებაში ასევე აღნიშნულია, რომ თაღლითობის სქემა, სავარაუდოდ, 2019-დან 2021 წლების დროის მონაკვეთში მოქმედებდა. 2021 წელს ოპერაციებში ეჭვმიტანილებმა ან მათმა თანამოაზრეებმა ხელახლა შექმნეს ქოლცენტრები ბულგარეთსა და რუმინეთში. დაბალი საპროცენტო განაკვეთის გამო, ამ პერიოდში ინვესტორები დაინტერესებული იყვნენ მაღალი რისკის ფინანსურ ინსტრუმენტებში ინვესტიციების ჩადებაში, როგორიცაა ბინარული ვარიანტები. ბინარული ვარიანტი ხშირად ექვემდებარება თაღლითობას, შესაბამისად, გამოიყენება ონლაინთაღლითობაშიც. მსგავსი ვარიანტები უმეტეს შემთხვევაში არის ფიქსირებული თანხები, რომლებიც ემსახურება სარისკო ფინანსური ტრანზაქციების ან აქტივების თეორიული ფასის გარანტიას.

1tv.ge

მთავრობის ადმინისტრაცია პრეზიდენტის ადმინისტრაციას პასუხობს

22:35 - 13/04/2023

საქართველოს მთავრობის ადმინისტრაცია სტრასბურგში ვიზიტის გადადებასთან დაკავშირებით საქართველოს პრეზიდენტის ადმინისტრაციის განცხადებას ეხმაურება.

„გვსურს, გამოვეხმაუროთ საქართველოს პრეზიდენტის განცხადებას ქალაქ სტრასბურგში მისი ვიზიტის გადადებასთან დაკავშირებით.

ხაზგასმით ვაცხადებთ, ინფორმაცია იმის შესახებ, რომ საქართველოს მთავრობამ ხელოვნურად გააჭიანურა თანხმობის გაცემის პროცესი, რაც გახდა ვიზიტის გადადების მიზეზი, არის მცდარი და სიმართლეს არ შეესაბამება.

საქართველოს მთავრობის მხრიდან სიტყვიერი თანხმობა სტრასბურგში დაგეგმილ ვიზიტთან დაკავშირებით პრეზიდენტმა ჯერ კიდევ მარტის დასაწყისში, მისი აშშ-ში ვიზიტის დროს მიიღო. მთავრობის ადმინისტრაციასა და პრეზიდენტის ადმინისტრაციას შორის მიმდინარეობდა სამუშაო პროცესი და ტექნიკური დეტალების დაზუსტება. ბოლო, დაზუსტებული წერილი პრეზიდენტის ადმინისტრაციიდან მთავრობის ადმინისტრაციაში შემოვიდა გუშინ, 12 აპრილს და მეორე დღესვე, 13 აპრილს მას გაეგზავნა წერილობითი თანხმობა 17-19 აპრილს საფრანგეთის რესპუბლიკაში, ქალაქ სტრასბურგში სამუშაო ვიზიტთან დაკავშირებით.

ასევე, საქართველოს პრეზიდენტს გაეგზავნა წერილობითი თანხმობა დიდ ბრიტანეთსა და ჩრდილოეთ ირლანდიის გაერთიანებულ სამეფოში სამუშაო ვიზიტთან დაკავშირებით.

აქვე აღვნიშნავთ, რომ 13-16 მარტს საფრანგეთის რესპუბლიკასა და ბელგიის სამეფოში პრეზიდენტის სამუშაო ვიზიტის შემთხვევაში პრეზიდენტის ადმინისტრაციიდან 10 მარტს შემოსულ წერილზე მთავრობის ადმინისტრაციამ თანხმობა 13 მარტს გასცა. შესაბამისად, მთავრობის ადმინისტრაციამ როგორც წინა ვიზიტების შემთხვევაში, ასევე აღნიშნულ ვიზიტთან დაკავშირებითაც თანხმობა მყისიერად გასცა“, – ნათქვამია საქართველოს მთავრობის ადმინისტრაციის განცხადებაში.

საქართველოს მთავრობის ადმინისტრაცია ასევე აქვეყნებს პრემიერ-მინისტრ ირაკლი ღარიბაშვილის მიერ ხელმოწერილ შესაბამის განკარგულებებს.

საქართველოს პრეზიდენტის ადმინისტრაციამ სტრასბურგში 18 აპრილს დაგეგმილი სალომე ზურაბიშვილის ვიზიტის გადადებასთან დაკავშირებით განცხადება დღეს გაავრცელა. „საქართველოს მთავრობის მხრიდან ხელოვნურად გაჭიანურებული თანხმობის მიღების პროცესის გამო სალომე ზურაბიშვილმა მიიღო გადაწყვეტილება, გადაედო ვიზიტი სტრასბურგში“, – ნათქვამია პრეზიდენტის ადმინისტრაციის განცხადებაში.

რატომ გადაიდო პრეზიდენტის სტრასბურგში ვიზიტი -ადმინისტრაციის განცხადება

21:46 - 13/04/2023

საქართველოს პრეზიდენტის ადმინისტრაცია სტრასბურგში 18 აპრილს დაგეგმილი სალომე ზურაბიშვილის ვიზიტის გადადებასთან დაკავშირებით განცხადებას ავრცელებს და ვიზიტის გადადების მიზეზს განმარტავს.

„საქართველოს მთავრობის მხრიდან ხელოვნურად გაჭიანურებული თანხმობის მიღების პროცესის გამო, საქართველოს პრეზიდენტმა მიიღო გადაწყვეტილება, გადაედო უმნიშვნელოვანესი ვიზიტი ქალაქ სტრასბურგში, რადგან პრეზიდენტს მიაჩნია, რომ ეს უნდა იყოს ნაბიჯი დეპოლარიზაციისკენ და არა პირიქით.

ევროპარლამენტისადმი მიმართვა და ევროკავშირის უმაღლეს წარმომადგენელებთან შეხვედრების შესაძლებლობა მაქსიმალურად უნდა იყოს გამოყენებული ჩვენი კანდიდატის სტატუსის გასამყარებლად. ამიტომ, ევროპარლამენტის პრეზიდენტთან ერთად იქნება შერჩეული გამოსვლის სათანადო დრო“, – ნათქვამია განცხადებაში.

ვეტერანების საქმეთა სახელმწიფო სამსახურს ბონი ქეროლი ეწვია

21:33 - 13/04/2023

მიმდინარე წლის 13 აპრილს, ვეტერანების საქმეთა სახელმწიფო სამსახურის დირექტორმა, გენერალ-მაიორმა კობა კობალაძემ, ამერიკულ არასამთავრობო ორგანიზაცია – ”TAPS”-ის („Tragedy Assistance Program for Survivors”-”ტრაგედიის დახმარების პროგრამა მარჩენალდაკარგულთათვის”) დამფუძნებელს და პრეზიდენტს, ქალბატონ ბონი ქეროლს უმასპინძლა.

კობა კობალაძემ სტუმარს გააცნო სამსახურის სტრუქტურა, მიზნები, ამოცანები, სამომავლო გეგმები, ის ერთობლივი პროგრამები, რომელთაც სამსახური, სახელმწიფოსთან და არასამთავრობო სექტორთან ერთად ახორციელებს ვეტერანების, ომში დაღუპულთა ოჯახის წევრების მხარდასაჭერად. მან, ასევე, ისაუბრა იმ გამოწვევებზე, რომლებიც სამსახურისა და საქართველოს ვეტერანების წინაშე ჯერ კიდევ დგას და რომელთა გადალახვაშიც საერთაშორისო პარტნიორების თანადგომა მნიშვნელოვანია.

სამსახურის დირექტორმა ხაზი გაუსვა საქართველოს გეოსტრატეგიულ მნიშვნელობას, ჩვენი ქვეყნის წინაშე მშვიდობისა და უსაფრთხოების კუთხით არსებულ გამოწვევებს, რომელთაც რუსული ოკუპაცია აყენებს თითოეული მოქალაქის და მთლიანად, სახელმწიფოს წინაშე.

ბონი ქეროლმა განაცხადა, რომ გააგრძელებს ომში დაღუპულ მეომართა შვილების, ოჯახის წევრების მხარდაჭერას და სამსახურის დირექტორთან ერთად, მომავალი თანამშრომლობის გზებზე ისაუბრა.

შეხვედრას, ასევე, ესწრებოდნენ, ვეტერანების საქმეთა სახელმწიფო სამსახურის დირექტორის პირველი მოადგილე, ნიკოლოზ კვეზერელი, მოადგილე, მირონ ჩიგოგიძე, დირექტორის მრჩეველი, ვლადიმერ იმნაძე, სამსახურის პასუხისმგებელი თანამდებობის პირები, ”TAPS”-ის წარმომადგენელი, ფატმა მეგრაჰი.

დღესვე, ბონი ქეროლი, კობა კობალაძესთან ერთად, წეროვანში, მარო მაყაშვილის სახელობის სარეაბილიტაციო ცენტრს ესტუმრა და ცენტრის მუშაობას გაეცნო.

ქალბატონი ბონი ქეროლი ამერიკელი ვეტერანის, გარდაცვლილი ბრიგადის გენერლის, ტომი ქეროლის მეუღლეა. ტომი ქეროლი 1992 წელს, სამხედრო თვითმფრინავის კატასტროფის დროს, 7 ოფიცერთან ერთად დაიღუპა. 1994 წელს, ბონი ქეროლმა, ომში დაღუპულთა ოჯახების მხარდასაჭერად, ორგანიზაცია „Tragedy Assistance Program for Survivors”( ”TAPS’) დაარსა და მათი თანადგომისთვის, მთელი მსოფლიოს მასშტაბით ახორციელებს სხვადასხვა მხარდამჭერ პროექტებსა და ღონისძიებებს, ატარებს სემინარებს.

ბონი ქეროლის ვიზიტი საქართველოში კიდევ ორ დღეს გასტანს. ვიზიტის ფარგლებში, მას დაგეგმილი აქვს ვ.სანიკიძის სახელობის ვეტერანთა კლინიკური ჰოსპიტლის მონახულება, შეხვედრა პარლამენტის თავდაცვისა და უშიშროების კომიტეტთან და ომში დაღუპულ მებრძოლთა ოჯახის წევრებთან.

პროკურატურა ე.წ. ქოლცენტრების საქმესთან დაკავშირებით განცხადებას ავრცელებს

21:04 - 13/04/2023

საქართველოს პროკურატურა ე.წ ქოლ-ცენტრების საქმესთან დაკავშირებით განცხადებას ავრცელებს.უწყება ეხმაურება ევროჯასტის მიერ დღეს გავრცელებულ განცხადებას, რამდენიმე ქვეყანაში, მათ შორის საქართველოში ჩატარებულ სპეციალურ ღონისძიებასთან დაკავშირებით.

პროკურატურის ინფორმაციით, დაგეგმილი საგამოძიებო მოქმედებები, მხარეთა შეთანხმებით ერთდროულად ჩატარდა რამდენიმე ქვეყანაში, კერძოდ ბულგარეთში, რუმინეთში, ისრაელში და საქართველოში, რის შედეგადაც სხვა ქვეყნის ტერიტორიაზე დაკავებულია, შესაძლო დანაშაულში მონაწილე 5 პირი.

საქმეზე გრძელდება გამოძიება და საერთაშორისო თანამშრომლობა დანაშაულებრივი ჯგუფის წევრების, ასევე ანალოგიური საქმიანობით დაკავებული სხვა ფიზიკური თუ იურიდიული პირების გამოვლენისა და მხილების მიზნით.

„გვსურს გამოვეხმაუროთ ევროჯასტის მიერ დღეს გავრცელებულ განცხადებას, რამდენიმე ქვეყანაში, მათ შორის საქართველოში ჩატარებულ სპეციალურ ღონისძიებასთან დაკავშირებით,რომელიც მიმართული იყო თაღლითური ონლაინ პლატფორმების და დანაშაულში მონაწილე პირთა გამოსავლენად.

ერთ-ერთ ესეთი ღონისძიება მიმდინარე წლის მარტში ჩატარდა, დანაშაულში მონაწილე პირთა გამოსავლენად, რომელთა ქმედებების შედეგად 89 მილიონი ევროს ზიანი მიადგა მინიმუმ 33 000 დაზარალებულს, ევროპის სხვადასხვა ქვეყნის მოქალაქეებს.

დანაშაულებრივი თაღლითური ქსელი, რომელიც სავარაუდოდ მოქმედებდა 2019-2021 წლების პერიოდში, სოციალურ მედიაში და სხვა საჯარო სივრცეში განთავსებული რეკლამებისა და ე.წ ქოლ-ცენტრებს გამოყენებით, ევროპის სხვადასხვა ქვეყნის მოქალაქეებს ინვესტიციების მოზიდვას, სანაცვლოდ კი მაღალ სარგებელს ჰპირდებოდა. მოგვიანებით, დაზარალებულები გაწეულ ინვესტიციებს კარგავდნენ, რომელიც დამნაშავეთა საბანკო ანგარიშებზე ნაწილდებოდა.

საქართველოში ჩატარებულ ღონისძიებას უძღვებოდა საქართველოს პროკურატურა, ევროჯასტში საქართველოს მეკავშირე პროკურორთან კოორდინაციით.

ერთობლივი საგამოძიებო ჯგუფის ფარგლებში, საქართველოს ტერიტორიაზე ჩასატარებელი საგამოძიებო მოქმედებები, საქართველოს პროკურატურისა და გერმანიის ფედერაციული რესპუბლიკის სამართალდამცავი სტრუქტურების შესაბამის წარმომადგენლების ჩართულობით იგეგმებოდა ბოლო რამდენიმე თვის განმავლობაში, სისხლის სამართლის სფეროში თანამშრომლობის ევროკავშირის იუსტიციის ერთიანი ქსელის – ევროჯასტის მხარდაჭერით.

დაგეგმილი საგამოძიებო მოქმედებები, მხარეთა შეთანხმებით ერთდროულად ჩატარდა რამდენიმე ქვეყანაში, კერძოდ ბულგარეთში, რუმინეთში, ისრაელში და საქართველოში, რის შედეგადაც სხვა ქვეყნის ტერიტორიაზე დაკავებულია, შესაძლო დანაშაულში მონაწილე 5 პირი. ასევე, გამოიკითხნენ სავარაუდო დანაშაულთან შემხებლობაში მყოფი პირები, ამოღებულია უამრავი დოკუმენტაცია და ელექტრონული ინფორმაციის მატარებლები.

საზოგადოებას შევახსენებთ, რომ საქართველოს პროკურატურა ევროჯასთის მხარდაჭერით ე.წ თაღლითური ქოლ-ცენტრების საქმიანობის წინააღმდეგ საბრძოლველად არაერთი წელია აქტიურად თანამშრომლობს გერმანიის ფედერაციული რესპუბლიკისა და სხვა მრავალი ქვეყნის კომპეტენტურ უწყებებთან.

ერთობლივი საგამოძიებო ჯგუფის ფარგლებში, ტრანსნაციონალური, ე.წ თაღლითური ქოლ-ცენტრების და ორგანიზებულ დანაშაულში მონაწილე პირთა გამოვლენის მიზნით, საქართველოს ტერიტორიაზე 2021 წლის ოქტომბერსა და 2022 წლის ნოემბერში ჩატარდა ფართომაშტაბიანი ღონისძიებები.

ღონისძიების ფარგლებში განხორციელდა რამდენიმე მოქმედი ქოლ-ცენტრის, ათეულობით ფიზიკური პირის, მათი საცხოვრებელი ბინების, ავტომანქანების და სამუშაო ადგილების ჩხრეკა. ამოღებული იქნა ასეულობით ინფორმაციის ელექტრონული მატარებელი, დოკუმენტაცია და დიდი ოდენობით ფულადი თანხა. ამავდროულად ყადაღა დაედო სავარაუდოდ დანაშაულებრივი გზით მოპოვებულ ათეულობით მილიონი ლარის ღირებულების ქონებებს და საბანკო ანგარიშებზე განთავსებულ დიდი ოდენობით თანხებს.

ჩატარებული ფართომაშტაბიანი ღონისძიებების შედეგად დაკავებულ იქნა დანაშაულებრივი ორგანიზებული ჯგუფის ხელმძღვანელები და ათეულობით წევრი, სისხლისსამართლებრივი დევნა დაიწყო დანაშაულში მონაწილე იურიდიული პირების მიმართ.

საქართველოში ჩატარებულ სპეციალურ ოპერაციებში გერმანიის ფედერაციული რესპუბლიკის 80-მდე და საქართველოს სამართალდამცავი ორგანოების 400-მდე თანამშრომელი მონაწილეობდა.

საქართველოს გენერალური პროკურატურის ერთ-ერთ ძირითად მიმართულებას სწორედ ტრანსნაციონალური დანაშაულის წინააღმდეგ ბრძოლა წარმოადგენს, რომელიც ფართოდ არის გავრცელებული ევროპის სხვადასხვა ქვეყნის ტერიტორიაზე, დანაშაულებრივი სქემისა და მონაწილე პირების გამოვლენაში ჩართულია არაერთი ქვეყნის სამართალდამცავი სტრუქტურის თანამშრომელი, რომლებთანაც საქართველოს გენერალური პროკურატურა აქტიურ რეჟიმში თანამშრომლობს.

საქართველოს პროკურატურა კიდევ ერთხელ მადლობას უხდის ევროჯასტს და გერმანიის ფედერაციული რესპუბლიკის საგამოძიებო სტრუქტურებს ტრანსნაციონალური დანაშაულის წინააღდეგ ბრძოლაში ეფექტიანი თანამშრომლობისთვის”, – აღნიშნავს პროკურატურა განცხადებაში.

“სააკაშვილის პირობითი სასჯელით სამკურნალოდ გათავისუფლება ყველაზე სწორი იქნებოდა”- ნავალნი

20:22 - 13/04/2023

რუსი ოპოზიციონერი ალექსეი ნავალნი ქართველების მიმართ „დამამცირებელი ეპითეტისთვის“ ბოდიშს იხდის და საქართველოს ხელისუფლებას მიხეილ სააკაშვილის გათავისუფლებისკენ მოუწოდებს.

მინდა ვისაუბრო მიხეილ სააკაშვილზე. ჩვენ მას არ ვიცნობთ და არასდროს შევხვედრილვართ. მის გუნდში არავის ვიცნობ და ჩემთვის ამ პოსტის დაწერა არც არავის უთხოვია.

მე, ჩემდა სამარცხვინოდ, ქართულ პოლიტიკაზე საკმაოდ სუსტი წარმოდგენა მაქვს და შეიძლება რამე არასწორადაც ვთქვა. ჩემდა კიდევ უფრო დიდად სამარცხვინოდ, რატომღაც, იმის გავლენით, რომ ჩემი მეგობარი ცხინვალში იყო დაბომბვების ქვეშ, 2008 წელს ქართველების მისამართით შეურაცხმყოფელი პოსტი დავწერე. ამის გამო ბოდიშს კიდევ ერთხელ ვიხდი, მაგრამ ვიცი, რომ ამ მხრივ ჩემს აზრს საქართველოში დიდი წონა არ აქვს.

თუმცა, გადავწყვიტე, დამეწერა როგორც ადამიანს და ქრისტიანს, რადგან ეს ძნელი საყურებელია. სააკაშვილი იტანჯება, მისი ოჯახი და მთელი საქართველო იტანჯება. ცუდია, რაც რაც ხდება და ამაში კარგი არაფერია არც მათთვის, ვისაც სურს, რომ სააკაშვილი სიცოცხლის ბოლომდე ციხეში იყოს.

მე მჯერა საქართველოს ბედნიერი, ევროპული მომავლის. ეს შესანიშნავი ქვეყანაა, რომელსაც კეთილდღეობისთვის ყველაფერი აქვს. მჯერა, რომ პოლიტიკური დაპირისპირება, (და სად არ არის ეს?) მშვიდობიანად და უსაფრთხოდ მოგვარდება. მაგრამ ყოფილი პრეზიდენტის პატიმრობა და ტანჯვა საშინელი და უგულოა. ეს გავლენას ახდენს ევროპულ არჩევანზე, განვითარებაზე, ამცირებს ქვეყნის ნორმალური მომავლის შანსს. აქვეითებს მორალს და ქვეყანას ბოროტებით ავსებს.

გასაგებია, რომ ეს დაპირისპირება სასტიკი და ემოციებით სავსეა. ეჭვი არ მეპარება, რომ სააკაშვილის მოწინააღმდეგეებს ბევრი დასამახდოვრებელი და შურის საძიებელი აქვთ. და ამაზე მინდა საუბარი, თუ ვინმე გაიგებს. არ არის საჭირო შურისძიება, თუმცა ძალიან მინდა. ამ შურისძიებით მთელი საქართველო დაზარალდება. ეს გადაწყვეტილება ჩიხში შემყვანი და სტრატეგიულად ყველასთვის სასტიკი და არახელსაყრელია. ჩვეულებრივ, ყველაფერი ეყრდნობოდა იმას, რომ სახის შენარჩუნება ყველას სურს.

მაგრამ, ხელისუფლება უფრო მოწყალე უნდა იყოს, ვიდრე მისი ოპონენტები. ის არის ძალა.

სააკაშვილი ძალიან ავადაა და სიმულაციაზე საუბარი სისულელეა. დამიჯერეთ, ციხე ყველას ართმევს ჯანმრთელობას, თან ძალიან სწრაფად. მისი პირობითი სასჯელით, მკურნალობის მიზნით გათავისუფლება, ან ისეთი რამის გაკეთება, რაც მხარეებს კანონის დაცვისა და სახის გადარჩენის საშუალებას მისცემს, სწორი ნაბიჯი იქნება.

ახლა მართლმადიდებლურ ქვეყნებში წმინდა კვირაა, შემდეგ კვირა კი აღდგომის კვირაა. ახლა კარგი დროა ქვეყნის სასიკეთოდ რთული, მაგრამ მოწყალე მოქმედებისთვის და ეროვნული შერიგებისკენ გადადგმული ნაბიჯისთვის.

მოვუწოდებ საქართველოს ხელისუფლებასა და მიხეილ სააკაშვილის ყველა ოპონენტს, გადადგას ეს ნაბიჯი ქრისტიანული ქველმოქმედებისა და მშვიდობის დამყარების სულისკვეთებით.

ნეტარ იყვნენ მოწყალენი, რამეთუ იგინი შეიწყალნენ”, – წერს ნავალნი.

“საქართველოს სამართალდამცავ ინსტიტუციებს სხვისი ჭკუის დარიგება არ სჭირდება”- ბექა ოდიშარია

19:08 - 13/04/2023

საქართველოს სამართალდამცავ ინსტიტუციებს – უშიშროების სამსახურს, პროკურატურას, შსს-სა თუ ფინანსურ პოლიციას სხვისი ჭკუის დარიგება არ სჭირდება, – ასე უპასუხა საპარლამენტო უმრავლესობის წევრმა, ბექა ოდიშარიამ კითხვას იმის შესახებ, თუ რას ფიქრობს კელი დეგნანის შეფასებაზე, რომელმაც აღნიშნა, რომ საქართველოს ხელისუფლებას ექნება შესაძლებლობა, თავად გამოიძიოს მათ მიერ მოსამართლეებისთვის წარდგენილი ბრალდებები:

„საქართველოს სამართალდამცავ ინსტიტუციებს – უშიშროების სამსახურს, პროკურატურას, შსს-სა თუ ფინანსურ პოლიციას სხვისი ჭკუის დარიგება არ სჭირდება. როდესაც გერმანულ მხარესთან ერთად ჩატარდა სპეცოპერაცია, გერმანიის ელჩის მოადგილემ განაცხადა, რომ 110 ადამიანი მონაწილეობდა საგამოძიებო პროცესში და მათ შორის ეს იყო საქართველოს გენერალური პროკურატურა, შსს, უსაფრთხოების სამსახური და ფინანსური პოლიცია. ასე, რომ ვფიქრობ, ყოველგვარი მითითებების გარეშე იმოქმედებენ ეს სტრუქტურები“, – განაცხადა ოდიშარიამ.

“მურუსიძის ავკარგიანობას განაპირობებდა ის, რომ წინა აღმასრულებელ ხელისუფლებას იღლიაში ჰქონდა ამოდებული ჰქონდა სასამართლო”

18:13 - 13/04/2023

ოპონენტების განმარტებები, რომ თურმე იგივე ადამიანებისგან შემდგარი სასამართლო ცუდი იყო წინა ხელისუფლების დროს და დღესაც ასეა, არის დიდი „ბლეფი“ – მურუსიძის ავკარგიანობას განაპირობებდა ის, რომ აღმასრულებელი ხელისუფლებას იღლიაში ჰქონდა ამოდებული მთელი სასამართლო ხელისუფლება, – ამის შესახებ ჟურნალისტებთან პარლამენტის ადამიანის უფლებათა კომიტეტის თავმჯდომარე მიხეილ სარჯველაძემ განაცხადა.

სარჯველაძე მიიჩნევს, რომ თუ წინა ხელისუფლების პირობებში ვინმე ზეწოლას ვერ უძლებდა, ეს იმას არ ნიშნავს, რომ ჯოხი მასზე უნდა გადატყდეს.

მისივე თქმით, საგამოძიებო კომისიის ფუნქცია არის კონკრეტული სამართალდარღვევის გამოძიება და რეაგირება, კონკრეტული ფაქტები კი არ არსებობს, ხოლო კომისიის მხრიდან მოსამართლის გათავისუფლების ან პასუხისმგებლობის საკითხის დაყენება მიუღებელია და ხელისუფლების დანაწილების პრინციპს ეწინააღმდეგება.

“ჩვენ შეიძლება გვქონდეს განსხვავებული ინტერპრეტაციები, არგუმენტები, მოსაზრებები, მაგრამ ამას აზრი არ ექნება, თუ არ გვეცოდინება, რა არის მიზეზი (მოსამართლეთა დასანქცირების). კორუფცია საერთოდ არ არის კავშირში გირგვლიანის საქმესთან. თუ ზეწოლაზე გვაქვს საუბარი, ზეწოლის განმახორციელებელი ვინ იყო, გახსოვთ, აღმასრულებელი და საკანონმდებლო ხელისუფლება იმხანად. თუ ეს გვახსოვს, კატეგორიულად მიუღებელია ჩვენი ოპონენტების განმარტებები, რომ თურმე სასამართლო იგივე ადამიანებისგან შემდგარი ცუდი იყო წინა ხელისუფლების დროს და დღესაც ასეა, ეს არის დიდი ბლეფი – მურუსიძის ავკარგიანობას ძირითადად განაპირობებდა ის, რომ აღმასრულებელი ხელისუფლება იყო ისეთი, რომ [მაპატიეთ გამოთქმისთვის, შეურაცხყოფისთვის არ ვიძახი] მთლიანად იღლიაში ჰქონდა ამოდებული მთელი სასამართლო ხელისუფლება, რის გამოც სასამართლო არ იყო დამოუკიდებელი, მთლიანად კონტროლდებოდა აღმასრულებელი ხელისუფლებიდან. ეს ვითარება შეიცვალა 2012 წლიდან. როცა სასამართლოში ვინმე იმ ზეწოლას ვერ უძლებდა, რასაც ადგილი ჰქონდა პოლიტიკური ხელისუფლებიდან, იმაზე ჯოხის გადატეხვას ნურავინ ეცდება. იმას თავის წილი პასუხისმგებლობა აქვს, მაგრამ ამას სჭირდება რელევანტური შეფასება. ახლა ყველაზე მთავარი – საბედნიეროდ, საქართველოში აღარ არის სისტემა, რომლის დროსა პოლიტიკოსების სიმპათიაზე და ანტიპათიაზე შეიძლება იყოს დამოკიდებული კონკრეტული მოსამართლეების სასამართლოში ყოფნა – არყოფნა. კონსტიტუცია ბრძანებს, რომ სასამართლო ხელისუფლება დამოუკიდებელია და არაერთი ნორმა მიგანიშნებთ, რომ სასამართლოდან ადამიანების გათავისუფლება არ არის აღმასრულებელი და საკანონმდებლო ხელისუფლების პრეროგატივა, ამიტომ როგორიც არ უნდა იყოს ჩემი დამოკიდებულება ინდივიდუალური მოსამართლეების მიმართ, ვერც ერთ შემთხვევაში ვერ უნდა ხდებოდეს მათი გათავისუფლების მიზეზი.

კომისია რეგლამენტის თანახმად კონკრეტულ შემთხვევასთან დაკავშირებით იქნება და ასეთი დღემდე არ ვიცით. ის, რომ ვინმეს გვარზეა საუბარი არ არის ეს კონკრეტული შემთხვევა. რეაგირება და სამართალდარღვევის შესწავლა წარმოადგენს რეგლამენტის თანახმად კომისიის ფუნქციას. დავუშვათ მივიდა დასკვნამდე, რომ ადგილი არ აქვს ან აქვს სამართალდარღვევას, კომისიამ თქვენი აზრით უნდა მიიღოს გადაწყვეტილება რომელიმე მოსამართლის გათავისუფლებაზე ან პასუხისმგებლობის შესახებ? – ეს იქნებოდა ხელისუფლების დანაწილების უხეში დარღვევა”, – განაცხადა სარჯველაძემ.

“მოსამართლეთა სოლიდარობა არა კონკრეტული გვარების ირგვლივ ჩამოყალიბდა – არამედ ქვეყნის სუვერენულ უფლებაზე”

17:47 - 13/04/2023

მოსამართლეთა სოლიდარობა არა კონკრეტული გვარების ირგვლივ ჩამოყალიბდა – არამედ, ქვეყნის სუვერენულ უფლებაზე: ჰყავდეს დამოუკიდებელი სასამართლო სისტემა, რომელიც ეფუძნება კანონის უზენაესობაზე და უდანაშაულობის პრეზუმპციაზე, – ასე ეხმაურება „ხალხის ძალის“ წევრი, დავით ქართველიშვილი გავრცელებულ ინფორმაციას იმის შესახებ, რომ სამმა მოსამართლემ, სანქცირებული კოლეგების სოლიდარობის მიზნით, აშშ-ში სასწავლო ვიზიტით გამგზავრებაზე უარი თქვა.

დავით ქართველიშვილის განცხადებით, კოლონიზატორული დამოკიდებულება ქვეყნის, როგორც ვასალის მიმართ, საქართველოში არ გაჭრის. მისივე თქმით, მსგავსი მიდგომის წინააღმდეგ ბოლო პერიოდში სხვადასხვა ევროპულმა სახელმწიფომაც აიმაღლა ხმა.

„ჯანყი ჯორჯიას პლანტაციებზე“. რატომღაც გამახსენდა მე-19 საუკუნის ქართველი სემინარისტების პროტესტი ეგზარქოსის მიმართ, ვინც საეკლესიო ენას და გალობას გვიწუნებდა. იქიდან დაიწყო ეს ტალღა და 1918 წლის 26 მაისამდე მიაღწია. რა მოხდა შემდეგ – ეს სხვა ისტორიაა და უდიდესი გამოცდილება, თუ რატომ არ უნდა დავკარგოთ დე ფაქტო დამოუკიდებლობა დღეს. მოსამართლეთა სოლიდარობა არა კონკრეტული გვარების ირგვლივ ჩამოყალიბდა – არამედ ქვეყნის სუვერენულ უფლებაზე: ჰყავდეს დამოუკიდებელი სასამართლო სისტემა, რომელიც ეფუძნება კანონის უზენაესობაზე და უდანაშაულობის პრეზუმფციაზე.

საბჭოური „ტროიკების” განაჩენები – გამოვიარეთ. მიდგომა: ეს კანონი „რუსულია“, იმიტომ რომ მე ასე მინდა, ან ეს მოსამართლე „კორუმპირებულია“, იმიტომ რომ მე ვთქვი ასე – შეიძლება დღეს ჭრიდეს უკრაინასა თუ მოლდოვაში, მაგრამ არა საქართველოში. დღეს მსგავსი მიდგომების წინააღმდეგ ხმა აიმაღლა საფრანგეთმაც და ევროსაბჭომაც. კოლონიზატორ-ვასალის დამოკიდებულებას დღეს ევროპაც ეწინააღმდეგება. ჩვენ ასეთ მიდგომას სოლიდარობას ვუცხადებთ!“ – წერს დავით ქართველიშვილი სოციალურ ქსელში.

ცნობისათვის, იუსტიციის უმაღლესი საბჭოს მოსამართლე წევრის, დიმიტრი გვრიტიშვილის განცხადებით, სამმა მოსამართლემ აშშ-ში სასწავლო ვიზიტით გამგზავრებაზე უარი თქვა, რაც სოლიდარობის ერთგვარი აქტია.

“თურქი ხალხი დასავლეთს პასუხს 14 მაისის არჩევნებზე გასცემს” – ერდოღანი

17:39 - 13/04/2023

თურქი ხალხი დასავლეთს პასუხს 14 მაისის არჩევნებზე გასცემს, – ამის შესახებ განცხადება თურქეთის პრეზიდენტმა, რეჯეფ თაიფ ერდოღანმა გააკეთა. ინფორმაციას თურქეთის სახელმწიფო სააგენტო „ანადოლუ“ ავრცელებს.

სატელევიზიო ინტერვიუში ერდოღანმა ისაუბრა ემანუელ მაკრონის მიერ ჩინეთში ვიზიტის შემდეგ გაკეთებული განცხადებაზე, რომლის მიხედვითაც, „აშშ-სთან ალიანსი არ ნიშნავს, რომ საფრანგეთი ვაშინგტონის ვასალია“.

„დასავლეთს აქვს გეგმები თურქეთთან დაკავშირებით. თქვენ ახლა ხედავთ სიტუაციას საფრანგეთის პრეზიდენტ ემანუელ მაკრონის გარშემო. რა ხდება მაკრონის ჩინეთში მოგზაურობის კულისებში? რა სიტუაციაა საფრანგეთის და აშშ-ის ურთიერთობებში? რატომ ჩავიდა მაკრონი ჩინეთში? “– განაცხადა ერდოღანმა.

ინტერვიუში ერდოღანმა ხაზი გაუსვა, რომ დასავლეთი მის წინააღმდეგაა და დაამატა, რომ თურქი ხალხი დასავლეთს საჭირო პასუხს 14 მაისს დანიშნულ საპარლამენტო და საპრეზიდენტო არჩევნებზე გასცემს.

„თურქეთი დასავლეთს გზავნილს არჩევნებზე გაუგზავნის. ქვეყანა არ იყურება დასავლეთით არც ტერორიზმთან ბრძოლისას და არც ეკონომიკური პოლიტიკის განსაზღვრისას“, – განაცხადა ერდოღანმა.

“სააკაშვილის ოჯახმა, ადვოკატებმა და თანაპარტიელებმა ახალი ტაქტიკა აირჩიეს”

17:24 - 13/04/2023

მიხეილ სააკაშვილის ოჯახმა, ადვოკატებმა და თანაპარტიელებმა ახალი ტაქტიკა აირჩიეს – მთელ მსოფლიოში მისთვის ჯილდოების შეგროვება დაიწყეს, – ამის შესახებ საპარლამენტო უმრავლესობის წევრმა, გია ცაგარეიშვილმა განაცხადა.

მისივე თქმით, საქართველოში ყველამ ძალიან კარგად იცის, ვინ არის სააკაშვილი.

„როგორც ჩანს, შემდეგ ამ პრიზებს პალატაში განათავსებენ, რათა ეს ადამიანი იმ ცრუხიბლით დატკბეს, რომელშიც 2004 წლიდან არის ჩავარდნილი. სააკაშვილი საკუთარი თავისგან სწორუპოვარ გმირს ქმნიდა და თავი მართლა პრომეთე ეგონა, რომელიც ჯერ თამარ მეფის ხიდთან მიაჯაჭვა, ხოლო შემდეგ მოიპარა და ბორჯომში გადახვეწა. ახლა ვარშავიდან მისი მშობელი ჯილდოს ჩამოუტანს. ამით მისი კასტისა და დაჯგუფების წევრები სავარაუდოდ გაიხარებენ, მაგრამ ეს არაფერს ცვლის. ოჯახებისთვის, რომლებიც სააკაშვილის მმართველობის პერიოდში ფიზიკურად და მორალურად განადგურდნენ, ვერავითარი შვება ვერ იქნება იმით, ორი ჯილდო მიანიჭეს თუ ათი. საქართველოში ყველამ ძალიან კარგად იცის, ვინ არის სააკაშვილი. მოწამვლის ბოდვითი თეორია კი ჩაფლავდა და ლიმბახის დასკვნის შემდეგ წერტილი დაესვა“, – განაცხადა გია ცაგარეიშვილმა.

სპეციალური საგამოძიებო სამსახური 7-9 მარტის აქციებთან დაკავშირებით მიმდინარე გამოძიების თაობაზე განცხადებას ავრცელებს

17:15 - 13/04/2023

სპეციალური საგამოძიებო სამსახური 7-9 მარტის აქციებთან დაკავშირებით მიმდინარე გამოძიების თაობაზე განცხადებას ავრცელებს.

როგორც განცხადებაშია აღნიშნული, გამოძიების დაწყებიდან დღემდე გამოკითხულია 91 მოქალაქე, მათ შორის 19 ჟურნალისტი.

სპეციალური საგამოძიებო სამსახურის განმარტებით, გამოძიების ფარგლებში 7 სხვადასხვა ლოკაციაზე დათვალიერდა შემთხვევის ადგილი, რა დროსაც იდენტიფიცირებული იქნა გამოძიებისათვის საინტერესო სამეთვალყურეო ვიდეოკამერები.

„გვსურს საზოგადოებას მივაწოდოთ ინფორმაცია სპეციალურ საგამოძიებო სამსახურში მიმდინარე სისხლის სამართლის საქმეების თაობაზე, რომელიც შეეხება საქართველოს შინაგან საქმეთა სამინისტროს ცალკეული თანამშრომლების მხრიდან, 2023 წლის 7-9 მარტს, ქ. თბილისში, საქართველოს პარლამენტის შენობის მიმდებარედ გამართულ საპროტესტო აქციის მონაწილეთა მიმართ განხორციელებული სამსახურებრივი უფლებამოსილების ძალადობით შესაძლო გადამეტების ფაქტებს.

სპეციალურ საგამოძიებო სამსახურში 2023 წლის 7-9 მარტს, ქ. თბილისში, საქართველოს პარლამენტის შენობის მიმდებარე ტერიტორიაზე, აქციის მონაწილეების მიმართ სამართალდამცავი ორგანოს თანამშრომლების მხრიდან განხორციელებული შესაძლო კანონსაწინააღმდეგო ქმედებების თაობაზე, სხვადასხვა უწყებიდან ჯამში 123 შეტყობინება შემოვიდა, რომელიც აქციის მონაწილეების და ცალკეული ჟურნალისტების უფლებების დარღვევას ეხებოდა.

როგორც საზოგადოებისთვის ცნობილია, შემოსულ შეტყობინებებთან დაკავშირებით სპეციალურ საგამოძიებო სამსახურში გამოძიება საქართველოს სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით გათვალისწინებული დანაშაულის ნიშნებით მყისიერად დაიწყო.

გამოძიება ცალკე ეპიზოდად მიმდინარეობს საქართველოს შინაგან საქმეთა სამინისტროს ცალკეული თანამშრომლების მხრიდან, 2023 წლის 8 მარტს, ქ. თბილისში, საქართველოს პარლამენტის შენობის მიმდებარედ გამართულ საპროტესტო აქციის მიმდინარეობისას ზურაბ გირჩი ჯაფარიძის და ნიკა მოსიაშვილის მიმართ განხორციელებული სამსახურებრივი უფლებამოსილების ძალადობით შესაძლო გადამეტების ფაქტზე.

გარდა ზემოაღნიშნულისა, გამოძიების შესწავლის საგანს ასევე წარმოადგენს მასმედიით გავრცელებული ვიდეოკადრების მონიტორინგის შედეგად სამსახურის მიერ გამოვლენილი სამართალდამცავი ორგანოს თანამშრომლების მხრიდან სხვადასხვა პირის მიმართ განხორციელებული ძალის შესაძლო გადამეტების ფაქტებიც.

სპეციალურმა საგამოძიებო სამსახურმა შემოსულ თითოეულ შეტყობინებაზე სწრაფი სამართლებრივი რეაგირება უზრუნველყო. გამოძიების დაწყებიდან დღემდე გამოკითხულია 91 მოქალაქე (მათ შორის 19 ჟურნალისტი).

მიმდინარე გამოძიების ფარგლებში 7 სხვადასხვა ლოკაციაზე დათვალიერდა შემთხვევის ადგილი, რა დროსაც იდენტიფიცირებული იქნა გამოძიებისათვის საინტერესო სამეთვალყურეო ვიდეოკამერები;

მომხდარი ფაქტობრივი გარემოებების დადგენის, სამართალდამცავების მიერ გამოყენებული ძალის შესაძლო გადამეტების საკითხის შესწავლის და ასევე გამოძიებისთვის საინტერესო ინდივიდუალურ ეპიზოდებში სპეციალური ეკიპირებით აღჭურვილი სამართალდამცავების იდენტიფიცირების და ამოსაცნობი ნიშნების დადგენის მიზნით, გამოძიების მიერ მოპოვებული იქნა საჯარო ინტერნეტ-სივრცეში არსებული სატელევიზიო გადაცემების ჩანაწერები, ასევე, სასამართლოს განჩინების საფუძველზე, საქართველოს პარლამენტიდან, შსს საზოგადოებრივი უსაფრთხოების მართვის ცენტრ – 112-დან, ქ. თბილისის მუნიციპალიტეტის მერიიდან და პარლამენტის შენობის მიმდებარედ განლაგებული სხვა საჯარო და კერძო დაწესებულებებიდან (საერთო ჯამში 37 ობიექტიდან) გამოთხოვილი იქნა გამოძიებისთვის საინტერესო ვიდეოჩანაწერები, რომლებზეც ასახულია 7-9 მარტს რუსთაველის გამზირზე და მის მიმდებარე ტერიტორიაზე განვითარებული მოვლენები.

ამ ეტაპისთვის მოპოვებული ჩანაწერების ჯამური ხანგრძლივობა შეადგენს 3 000-ზე მეტ საათს, რომლის შესწავლაც და საგამოძიებო ჯგუფის მიერ მათი საგამოძიებო წესით დათვალიერება აქტიურ რეჟიმში მიმდინარეობს.

გარდა ზემოხსენებულისა, მოპოვებულია სასამართლოს განჩინებები, შინაგან საქმეთა სამინისტროს საპატრულო პოლიციის დეპარტამენტიდან, დროებითი მოთავსების უზრუნველყოფის დეპარტამენტიდან და სსიპ საზოგადოებრივი უსაფრთხოების მართვის ცენტრ – 112-დან, გამოძიებისთვის საინტერესო (საპატრულო პოლიციის დეპარტამენტის შენობის გარე პერიმეტრის სამეთვალყურეო კამერების, ქ. თბილისის დროებითი მოთავსების იზოლატორის გარე პერიმეტრის სამეთვალყურეო კამერების, საპატრულო პოლიციის დეპარტამენტის ავტომანქანების ბორტის ვიდეორეგისტრატორების და პატრულ ინსპექტორთა სამხრე კამერების ჩანაწერები) სამეთვალყურეო და სამხრე ვიდეოკამერების ჩანაწერების გამოთხოვის თაობაზე, რომელიც გადაგზავნილია აღნიშნულ დაწესებულებებში და მიმდინარეობს ჩანაწერების მომზადება. ასევე, მოპოვებულია სასამართლოს განჩინებები 7 ტელეკომპანიიდან აქციის მიმდინარეობისას გადაღებული აუდიო-ვიდეო ჩანაწერების გამოთხოვის ნებართვის თაობაზე; კერძო პირთაგან გამოძიებისთვის საინტერესო ვიდეოჩანაწერების გამოთხოვისა და სხვა ობიექტების ამოღების თაობაზე, რომლებიც ასევე არის შესრულების პროცესში. ზემოხსენებული ვიდეოჩანაწერების და მასალების საპროცესო წესით სისხლის სამართლის საქმეში დამაგრების შემდეგ, საგამოძიებო ჯგუფი მოახდენს მათ დეტალურ შესწავლას და დათვალიერებას.

ზურაბ „გირჩი“ ჯაფარიძის და ნიკა მოსიაშვილის ეპიზოდთან დაკავშირებით გამოძიებით გამოირკვა, რომ შემთხვევის ადგილზე განთავსებული საჯარო დაწესებულების სამეთვალყურეო ვიდეოკამერების ჩამწერი მოწყობილობა (DVR) ტექნიკურად იყო დაზიანებული და მასზე წვდომა ტექნიკური მიზეზების გამო იყო შეუძლებელი. სასამართლოს განჩინების საფუძველზე სახელმწიფო დაცვის სპეციალურ სამსახურიდან ამოღებული იქნა აღნიშნული ჩამწერი მოწყობილობა, რომელზეც სსიპ ლევან სამხარაულის სახელობის სასამართლო ექსპერტიზის ეროვნულ ბიუროში დაინიშნა საინფორმაციო-ტექნოლოგიური ექსპერტიზა, მოწყობილობის დაზიანების მიზეზების დადგენის, მასში არსებული ჩანაწერების მოპოვების (მათ შორის, აღდგენის გზით) და გამოძიებისთვის საინტერესო სხვა გარემოებების დასადგენად;

შინაგან საქმეთა სამინისტროდან გამოთხოვილ იქნა ინფორმაცია აქციის მონაწილეების დამკავებელი და ოპერაციაში მონაწილე შინაგან საქმეთა სამინისტროს თანამშრომლების ვინაობის შესახებ, რასთან დაკავშირებითაც აქტიურ რეჟიმში მიმდინარეობს სამართალდამცველების გამოკითხვა.

მოწმეთა ბაზის შექმნის და დოკუმენტური მტკიცებულებების მოპოვების მიზნით:

სსიპ ,,საგანგებო სიტუაციების კოორდინაციისა და გადაუდებელი დახმარების ცენტრიდან“ გამოთხოვილია ინფორმაცია სასწრაფო-სამედიცინო დახმარების ჯგუფის იმ თანამშრომელთა ვინაობის შესახებ, ვინც 2023 წლის 7-9 მარტს, ქ. თბილისში, საქართველოს პარლამენტის შენობის მიმდებარე ტერიტორიაზე (აქციასთან დაკავშირებით) ასრულებდა სამსახურებრივ მოვალეობას;

სასამართლოს განჩინების საფუძველზე სსიპ ,,საგანგებო სიტუაციების კოორდინაციისა და გადაუდებელი დახმარების ცენტრიდან“ მიმდინარეობს იმ პირთა სამედიცინო ბარათების ამოღება, ვისაც 2023 წლის 7-9 მარტს, ქ. თბილისში, საქართველოს პარლამენტის შენობის მიმდებარე ტერიტორიაზე გაეწია სასწრაფო სამედიცინო დახმარება.

სასამართლოს განჩინების საფუძველზე, საქართველოს შინაგან საქმეთა სამინისტროს დროებითი მოთავსების უზრუნველყოფის დეპარტამენტიდან მიმდინარეობს ადმინისტრაციული დაკავების ოქმებისა და შედგენილი სამედიცინო დოკუმენტაციის გამოთხოვა.

კერძო კლინიკებიდან გამოთხოვილია ინფორმაცია იმ პირთა სამედიცინო დოკუმენტაციის თაობაზე, რომელთაც 2023 წლის 7-9 მარტს, ქ. თბილისში, საქართველოს პარლამენტის შენობის მიმდებარე ტერიტორიაზე განვითარებული მოვლენების შემდეგ გაეწია ამბულატორიული/სტაციონარული სამედიცინო დახმარება; დანიშნულია სასამართლო-სამედიცინო ექსპერტიზები. მათ შორის სსიპ ,,ლევან სამხარაულის სახელობის სასამართლო ექსპერტიზის ეროვნულ ბიუროში“ სასამართლო-სამედიცინო ექსპერტიზა დაენიშნათ ზურაბ გირჩი ჯაფარიძეს (პირადი წარდგენით) და ნიკა მოსიაშვილს (სამედიცინო დოკუმენტაციის საფუძველზე).

სპეციალურ საგამოძიებო სამსახურში, ასევე აქტიურად მიმდინარეობს გამოძიება აქციაზე დაშავებული ზაზა ბიღიაშვილის ეპიზოდთან დაკავშირებით.

მიმდინარე გამოძიების ფარგლებში გამოძიებისთვის საინტერესო გარემოებების დადგენა, დაზუსტების მიზნით ორჯერ გამოიკითხა ზაზა ბიღიაშვილი;

სსიპ ,,ლევან სამხარაულის სახელობის სასამართლო ექსპერტიზის ეროვნულ ბიუროში“ ზაზა ბიღიაშვილის მიმართ დაინიშნა სამედიცინო ექსპერტიზა, რომლის ფარგლებშიც, ობიექტური შემოწმების მიზნით, ექსპერტის წინაშე პირადად იქნა წარდგენილი და შემოწმებული იგი;

სხვადასხვა ლოკაციაზე დათვალიერდა შემთხვევის ადგილი და მიმდებარე ტერიტორია;

აქტიურ რეჟიმში მიმდინარეობს საჯარო ინტერნეტ-გვერდიდან მოპოვებული და სასამართლოს განჩინების საფუძველზე, სხვადასხვა კერძო და საჯარო ობიექტებიდან გამოთხოვილი ვიდეოკამერების ჩანაწერების დათვალიერება, რათა დაიდენტიფიცირდეს და დადგინდეს კონკრეტული გარემოებები, რა ვითარებაშიც ზაზა ბიღიაშვილმა მიიღო დაზიანებები.

გამოძიების მიერ გამოკითხული არიან სსიპ ,,საგანგებო სიტუაციების კოორდინაციისა და გადაუდებელი დახმარების ცენტრის“ სასწრაფო სამედიცინო დახმარების ჯგუფის ის თანამშრომლები, რომლებიც 2023 წლის 8 მარტს სამედიცინო დახმარების აღმოჩენის მიზნით პარლამენტის მიმდინარე ტერიტორიაზე გამოცხადდნენ;

სასამართლოს განჩინების საფუძველზე, სსიპ ,,საგანგებო სიტუაციების კოორდინაციისა და გადაუდებელი დახმარების ცენტრიდან“ და სამოქალაქო კლინიკიდან ამოღებულია ზაზა ბიღიაშვილის სამედიცინო დოკუმენტაცია, რომელიც გადაეგზავნება სასამართლო-სამედიცინო ექსპერტიზას.

სპეციალური საგამოძიებო სამსახური ზემოაღნიშნული საქმეების გამოძიებას ღიად და გამჭვირვალედ აწარმოებს. სამსახური 2023 წლის 7-9 მარტს საქართველოს პარლამენტის წინ მიმდინარე აქციის მონაწილეებს, რომლებიც უთითებენ სამართალდამცავების მხრიდან საკუთარი უფლებების დარღვევის თაობაზე, აძლევს სისხლის სამართლის საქმეებთან წვდომის და საქმის მასალების გაცნობის შესაძლებლობას. ასევე, მოქალაქეებს, უფლებადამცველ ორგანიზაციებსა და სახალხო დამცველის აპარატს მიმდინარე გამოძიების თაობაზე, მათთვის საინტერესო საკითხებთან დაკავშირებით მიეწოდება ამომწურავი ინფორმაცია.

სპეციალური საგამოძიებო სამსახური აქტიურ რეჟიმში განაგრძობს საგამოძიებო და საპროცესო მოქმედებების ჩატარებას, შესაბამისი მტკიცებულებების მოპოვების და დანაშაულში მხილებული პირების იდენტიფიცირების შემთხვევაში სამსახური გაატარებს კანონით გათვალისწინებულ სამართლებრივ ღონისძიებებს. სპეციალური საგამოძიებო სამსახური საზოგადოებას მიაწვდის ინფორმაციას გამოძიების მიმდინარეობის და შედეგების შესახებ“,-აღნიშნულია განცხადებაში.

1...1,7141,7151,716...1,765 Page 1,715 of 1,765