ოჯახს შესთავაზეს, მოეწვიათ ნებისმიერი ექიმი, რომელიც სააკაშვილის ჯანმრთელობის მდგომარეობას დააკვირდებოდა, – ამის შესახებ პარტია „ქართული ოცნების“ თავმჯდომარე ირაკლი კობახიძემ პოლონელი ექიმების საქართველოში ჩამოსვლასთან დაკავშირებით განაცხადა.

კობახიძის განცხადებით, სააკაშვილთან დაკავშირებით ერთადერთი პრობლემაა ის, რომ სათანადო კალორაჟის საკვებს არ იღებს. მისივე თქმით, ამ კუთხით პასუხისმგებლობა აქვს სააკაშვილის ოჯახს.

„იუსტიციის სამინისტრო ყოველთვის იყო გახსნილი ამ თვალსაზრისით. ისინი იწვევდნენ, მათ შორის ოჯახის ხაზით ექიმებს. შესთავაზეს ოჯახს, მოეწვიათ ნებისმიერი ექიმი, რომელიც დააკვირდებოდა ჯანმრთელობის მდგომარეობას. აქედან გამომდინარე, ხედავთ, რომ დასამალი არავის არაფერი აქვს. მთავარი პრობლემა მდგომარეობს იმაში, რომ მიხეილ სააკაშვილთან ოჯახს სათანადო კალორაჟის საკვები არ შეაქვს და ამის გამო ის წონაში იკლებს. ეს არის ერთადერთი პრობლემა. შეიტანონ სათანადო კალორაჟის საკვები და ეს პრობლემაც აღარ იქნება. პასუხისმგებლობა აქვს ოჯახს“, – განაცხადა ირაკლი კობახიძემ.

ჩვენ არ ვართ ევროკავშირის წევრი, ჩვენ ვართ საქართველოს ევროკავშირში გაწევრიანების ძლიერი მხარდამჭერები, რადგან ვიცით, რომ ეს არის უმრავლესობის, ქართველების აბსოლუტური უმრავლესობის მკაფიო არჩევანი და სწორედ ამიტომ ვეხმარებით საქართველოს რამდენადაც შეგვიძლია, განახორციელოს რეფორმები, რომლებიც საჭიროა იმისათვის, რომ იყოს შესაბამისი და იყოს მზად საქართველოს ევროკავშირში გაწევრიანების გზაზე შემდეგი მნიშვნელოვანი ნაბიჯისთვის, – ამის შესახებ საქართველოში ევროკავშირის ელჩმა, კელი დეგნანმა განაცხადა, რომელსაც დაუსვეს შეკითხვა, ევროკავშირის წევრის სტატუსის მიღების რა შანსები აქვს საქართველოს მომავალ ზამთარს.

„რაც ახლა ძალიან მნიშვნელოვანია, საქართველოს პოლიტიკურმა ლიდერებმა აჩვენონ, რომ მათ აქვთ გამბედაობა, აქვთ ძალა, რომ გვერდზე გადადონ უთანხმოება და ყურადღება გაამახვილონ იმ სამუშაოს შესრულებაზე, რომელიც უნდა შესრულდეს. ევროპულმა კომისიამ ორიოდე კვირის წინ ცხადყო, რომ თორმეტი რეკომენდაციიდან სამი სრულად შესრულდა, რაც ნამდვილად კარგი ამბავია, კარგი ნამუშევარია, მაგრამ კიდევ ცხრაა, რომელსაც ახლა ფოკუსირება სჭირდება, სჭირდება, რომ საქართველოს ყველა პოლიტიკურმა ლიდერმა, ყველა დაინტერესებულ მხარესთან ერთად, რომელსაც აქვს ინტერესი ამ სფეროებში, ერთად იმუშაოს საქართველოს საუკეთესო ინტერესებისთვის. ეს არის ის, რაც საჭიროა, რაც უნდა დავინახოთ დარჩენილ თვეებში, საქართველოს პოლიტიკური ლიდერების გამბედაობა, რომ გვერდზე გადადონ თავიანთი უთანხმოება და გაერთიანდნენ ამ ქვეყნის გარშემო, ევროპული მომავლის გარშემო“, – აღნიშნა ელჩმა.

მიხეილ სააკაშვილმა უნდა ჭამოს და ყველაფერი იქნება რიგზე და ყველაფერი იქნება ნორმალურად, – ამის შესახებ დედაქალაქის მერმა, კახა კალაძემ განაცხადა.

როგორც კახა კალაძემ აღნიშნა, ადამიანს აქვს კონკრეტული დანაშაულები ჩადენილი, რაზეც უწევს პასუხისგება, ადამიანი, რომ არ ჭამს, ამის გამო ციხიდან ვერ გათავისუფლდება.

„რაც შეეხება მიხეილ სააკაშვილს, თავიდან ბოლომდე მისი შემოტანა, როგორც განუბაჟებელი ბარგის საქართველოში, თავიდან ბოლომდე ყველაფერი იყო დადგმული, გაგრძელებული იმ პიარკამპანიით რაც ხდებოდა ამ თვეების განმავლობაში. დღეში ათჯერ კვდებოდა, უმძიმეს მდგომარეობაში იყო, ეს ყველაფერი მიმართულო იყო ერთი რამისკენ, ერთი მიზანი ჰქონდა ამ ყველაფერს, რომ როგორმე მომხდარიყო მისი დახსნა და გათავისუფლება სასჯელიდან. ადამიანს აქვს კონკრეტული დანაშაულები ჩადენილი, რაზეც უწევს პასუხისგება და არჭამის გამო ციხიდან ადამიანები ვერ გათავისუფლდებიან. მე არავის ცუდად ყოფნა არ გამიხარდება ვინც არ უნდა იყოს. მისმა ოჯახის წევრებმა, მისმა გარემოცვამ უნდა იზრუნოს ამ ადამიანის ჯანმრთელობა, შესაბამისი კალორაჟის საკვები უნდა მიაწოდონ, რომ ის იყოს ჯანმრმთელი.

ყველა პატიმრის ჯანმრთელობის მდგომარეობა განურჩევლად, არ აქვს მნიშვნელობა, ვინ ვინ იყო, ვის რა აქვს გაკეთებული, ჩვენთვის არის ძალიან მნიშვნელოვანი, შესაბამისად, სახელმწიფო ამ მოცემულობაში არის მოწოდების სიმაღლეზე, რაც ძალიან მნიშვნელოვანია“, – განაცხადა კალაძემ.

„ქართული ოცნების“ გენერალური მდივნის, კახა კალაძის განცხადებით, პრეზიდენტ სალომე ზურაბიშვილის მიერ „მთავარი არხის“ დამფუძნებლის, ნიკა გვარამიას შეწყალება პოლარიზაციის გაღრმავებისკენ გადადგმული ნაბიჯი იყო. კობახიძემ სტრასბურგში ნიკა გვარამიას სტუმრობა შეაფასა და განაცხადა, რომ მათი [გვარამია და ევროპარლამენტარების ნაწილი] მიზანი ხელისუფლების ცვლილებაა.

„როდესაც პრეზიდენტმა ნიკა გვარამიას შეწყალების გადაწყვეტილება მიიღო, მაშინ ვთქვი, რომ ეს იყო პოლარიზაციის გაღრმავებისკენ გადადგმული ნაბიჯი. მაშინ, როდესაც მოწოდებები არის დეპოლარიზაციისკენ, ეს პირიქით, ხელს შეუწყობს პოლარიზაციის გაღრმავებას. ვნახეთ, თუნდაც ის ვიზიტი, როდესაც ბატონი გვარამია მიწვეული იყო და ვინ იყვნენ მასპინძლები. კარგად გვახსოვს, ეს ადამიანები რა განცხადებებს აკეთებდნენ საქართველოსთან მიმართებით, რა განცხადებებს აკეთებდნენ სტატუსის მიღებასთან დაკავშირებით – სტატუსის საპირწონედ კრიმინალ სააკაშვილის გათავისუფლებას აყენებდნენ და ამაზე პირდაპირ საუბრობდნენ. ჩვენთვის ყველაფერი ნათელია – ესენი არიან ადამიანები, რომლებსაც აბსოლუტურად სხვა მიზანი აქვთ. ესენი არ არიან საქართველოს მეგობრები, მათ აქვთ კონკრეტული მიზანი საქართველოსთან მიმართებით, ეს არის ხელისუფლების ცვლილება. არ აქვს მნიშვნელობა, ეს როგორი გზით იქნება. მათთვის არადემოკრატიული ქმედებებიც მისაღებია, მთავარია მიზანს მიაღწიონ, მაგრამ მინდა იმედები გავუწბილო მათ და ვუთხრა, რომ არაფერი გამოუვათ. მათი ქმედებები და ის რადიკალიზმი, რაც ამ ადამიანებისგან მოდის, ყოველთვის მარცხისთვის არის განწირული“, – განაცხადა კალაძემ.

როგორც ცნობილია, „მთავარი არხის“ დამფუძნებელი ნიკა გვარამია, რომელიც პრეზიდენტმა ცოტა ხნის წინ შეიწყალა, ევროპარლამენტარების მიწვევით სტრასბურგში იმყოფებოდა. გვარამიამ 12 ივლისს, რამდენიმე ევროპარლამენტართან, კერძოდ – ანა ფოტიგასთან, ვიოლა ფონ კრამონთან, მარიამ ლექსმანთან და პეტრას აუსტრევიჩუსთან ერთად ბრიფინგიც გამართა.

8 ივლისის ღონისძიებაზე მაქსიმალურად ვეცადეთ, დაცული ყოფილიყო როგორც გამოხატვის თავისუფლება, ასევე ადამიანების სიცოცხლე და ჯანმრთელობა, – ამის შესახებ შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორმა, თეიმურაზ კუპატაძემ განაცხადა.

როგორც თეიმურაზ კუპატაძემ აღნიშნა, 9 ივლისს მობილიზებული იყო შინაგან საქმეთა სამინისტროს თითქმის ყველა დანაყოფი, 3000-მდე პოლიციელი, მათ შორის ცენტრალური კრიმინალური პოლიციის დეპარტამენტი.

„მაქსიმალურად ვეცადეთ, დაცული ყოფილიყო როგორც გამოხატვის თავისუფლება, ასევე ადამიანების სიცოცხლე და ჯანმრთელობა. შესაბამისად, მოვიდა კონტრაქციის წარმომადგენლების ძალიან დიდი რაოდენობა. ჩვენ გვქონდა კორდონები გაკეთებული გზის სავალ ნაწილებზე. ლოკაცია არ გვაძლევდა საშუალებას, რომ მთელი პერიმეტრი ყოფილიყო მაქსიმალურად დაცული და უსაფრთხო, ადამიანები კი ცდილობდნენ, რომ ჩვენი კორდონებისთვის აექციათ გვერდი, მინდვრებით და გრუნტიანი გზებით მიეღწიათ იმ ლოკაციამდე, სადაც ღონისძიება ტარდებოდა. ამის შემდეგ ჩვენ მივიღეთ გადაწყვეტილება, ვინაიდან სიცოცხლე და ჯანმრთელობა არის უპირველეს ყოვლისა და ჩვენი უშუალო მოვალეობაა ეს, მოვახდინეთ „პრაიდის“ მონაწილეებისა და ორგანიზატორების ევაკუაცია, გავიყვანეთ ეს ადამიანები, რომ არ მომხდარიყო რაიმე დაპირისპირება. საბოლოოდ, რაც იყო ჩვენი მთავარი მიზანი, ეს იქნა დაცული და ამ ღონისძიებაზე არავინ დაზიანებულა“, – განაცხადა კუპატაძემ.

ბევრი ინსინუაციის მიუხედავად, ყველა დაადგენს, რომ არ არის რაიმე მიზეზი კრიტიკისთვის ან თავდასხმისთვის, რომ ვინმე ვინმეს წამლავდა, საკმარისი მკურნალობა არ იყო, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ პოლონელი ექიმების ჩამოსვლასთან დაკავშირებით განაცხადა.

სარჯველაძის თქმით, ყველას ექნება შესაძლებლობა, ნახოს, რომ მიხეილ სააკაშვილთან დააკვშირებით ყველა პროცედურა უნაკლოდ მიმდინარეობდა.

„ვინმესთვის სარწმუნო რადგან არ აღმოჩნდა სააკაშვილის ჯანმრთელობასთან დაკავშირებით „ვივამედის“ მკურნალობის კურსი, სახელმწიფოს გაცხადებული პოზიციები ან სტრასბურგის სასამართლოს გადაწყვეტილება და აქვთ სურვილი, ეს საკითხი შეისწავლონ, მათი ნებაა და პრობლემა არაა. ყველას ექნება შესაძლებლობა, ნახოს, რომ უნაკლოდ მიმდინარეობდა ყველა პროცედურა, რომელიც სააკაშვილს სამედიცინო თვალსაზრისით სჭირდებოდა. მიუხედავად იმისა, რომ ბევრი ინსინუაცია მოვისმინეთ, ყველა დაადგენს, რომ არ არის რაიმე მიზეზი კრიტიკისთვის ან თავდასხმისთვის, რომ ვინმე ვინმეს წამლავდა, საკმარისი მკურნალობა არ იყო. ამ ყველაფერს საფუძველი მოესპობა და ამაში ყველა დარწმუნდება“, – აღნიშნა მიხეილ სარჯველაძემ.

რაც შეეხება პოლონეთის პრემიერ-მინისტრის, მატეუშ მორავეცკის განცხადებას, მიხეილ სარჯველაძის თქმით, სააკაშვილი გასაჭირში არ იმყოფება.

„რაც შეეხება განცხადებას, რომ მეგობრებს გასაჭირში არ ტოვებენ, ყველა კარგად დაინახავს, რომ სააკაშვილი გასაჭირში არ იმყოფება. პოლონეთის პრემიერს მეგობარს ნამდვილად ვერ მოვუწონებ, რადგან არ მგონია, ასეთ დამოკიდებულებას და ასეთი სიტყვებით მოხსენიებას იმსახურებდეს სააკაშვილის შემთხვევა. გარკვეული პერიოდულობით არის მცდელობა, რომ ეს საქმე ყურადღების ქვეშ მოექცეს, თუმცა ობიექტურად ამას მიზეზი არ აქვს. არ მგონია, რომ განმცხადებელთა ვინაობა რაიმე დიდ არგუმენტს მატებდეს სააკაშვილის თემაზე არსებულ მდგომარეობას, რადგან სტრასბურგის სასამართლოს გადაწყვეტილების შემდეგ არანაირი საფუძველი არ არის საქართველოს კრიტიკისთვის, თითქოსდა სააკაშვილის მიმართ ადგილი ჰქონდა რაიმე უფლების დარღვევას. გასაგებია, რომ შეიძლება, ვინმესთვის პოლიტიკური თვალსაზრისით სააკაშვილის გარეთ გაყვანა საინტერესო იყოს, მაგრამ ეს შესაძლებელი იქნება მხოლოდ მას შემდეგ, რაც ის ქართული კანონმდებლობით სასჯელს მოიხდის“, – აღნიშნა მიხეილ სარჯველაძემ.

პოლონეთის პრემიერ-მინისტრი მატეუშ მორავეცკი პოლონელი ექიმების საქართველოში ვიზიტს სოციალურ ქსელში გამოეხმაურა და დაწერა: „მეგობრებს გაჭირვებაში არ ვტოვებთ, ჩემი თხოვნით, პოლონელი ექიმების გუნდმა მიხეილ სააკაშვილის სამედიცინო გამოკვლევა დაიწყო“.