უკრაინა დღეს დამოუკიდებლობის 32-ე წლისთავს აღნიშნავს. ქვეყნის ეროვნულ დღესასწაულთან დაკავშირებით, თბილისის ანძა უკრაინის სახელმწიფო დროშის ფერებში განათდა.

ამასთან, დამოუკიდებლობის დღე უკრაინელ ხალხს თბილისის მერმა, კახა კალაძემ მიულოცა და ტერიტორიულ მთლიანობასთან ერთად, კეთილდღეობა უსურვა.

„ვულოცავ ჩვენს მეგობარს, უკრაინას და გმირ ხალხს უკრაინის დამოუკიდებლობის დღეს. დაე, თქვენი ბრძოლა იყოს გამარჯვების, დამოუკიდებლობისა და მშვიდობის მომტანი!!! უკრაინას ვუსურვებ ტერიტორიულ მთლიანობასა და კეთილდღეობას!“, – აღნიშნა კახა კალაძემ.

სახელმწიფოებრივი დამოუკიდებლობა უკრაინაში 1991 წლის 24 აგვისტოს გამოცხადდა.

COVID-19-ის ახალი შემთხვევების მატების ფონზე სიფხიზლე და ჯანდაცვის სისტემის მობილიზება რა თქმა უნდა აუცილებელია, მაგრამ საქართველოს მოსახლეობას შეუძლია, მშვიდად იყოს. მისი ჯანმრთელობა, მათ შორის COVID- უსაფრთხოება საიმედოდაა დაცული, – ამის შესახებ ინფორმაციას ინფექციური საავადმყოფოს დირექტორი თენგიზ ცერცვაძე სოციალურ ქსელში ავრცელებს.

თენგიზ ცერცვაძე „კოვიდის“ მართვასთან დაკავშირებით გაკეთებულ განცხადებებს ეხმაურება და აღნიშნავს, რომ „ყველა მცდელობა, დახატოთ ქვეყანაში აპოკალიფსის სურათი, განწირულია“.

„როგორი ჯანდაცვა გვაქვს საქართველოში – ბატონი ვატო სურგულაძე, რომელიც ერთ დროს კომპეტენტურობით და ინტელექტით გამოირჩეოდა და პატივისცემითაც სარგებლობდა, ბოლო დროს სამწუხაროდ შეპყრობილია სურვილით, რომ მოსახლეობა დაარწმუნოს, თითქოს ჩვენს ქვეყანაში ყველაფერი ძალიან ცუდადაა და მხოლოდ საშინელებები ხდება. განსაკუთრებით მწვავედ აკრიტიკებს ქვეყნის ჯანდაცვას. თუ მას დავუჯერებთ, ჩვენს ქვეყანას ჯანდაცვა საერთოდ არ აქვს?! ბატონო ვატო, იქნებ დამისახელოთ საქართველოს თანაზომადი შესაძლებლობების და რესურსების მქონე რომელიმე ქვეყანა, რომელსაც საქართველოზე უკეთესი ჯანდაცვა აქვს. ნუთუ მართლა ვერ ხედავთ, რომ მარტო C ჰეპატიტის ელიმინაციის უნიკალურმა პროგრამამ უკვე 80 000 – ზე მეტი ადამიანის სიცოცხლე გადაარჩინა და ამ დარგში მსოფლიოში უპირობო ლიდერები ვართ. საქართველო პირველი, ან ერთ-ერთი პირველი ქვეყანა იქნება მსოფლიოში, რომელიც უახლოეს წლებში დაძლევს ოცდამეერთე საუკუნის ორი მთავარი გამოწვევის C ჰეპატიტის და აივ/შიდსის ეპიდემიებს. ვერ ხედავთ იმას, რომ საყოველთაო ჯანდაცვის პროგრამით მოსახლეობის ყველა ფენისთვის ხელმისაწვდომია ხარისხიანი სამედიცინო მომსახურება. ქვეყანაში კეთდება ურთულესი კარდიოქირურგიული და ნეიროქირურგიული ინტერვენციები, ულტრათანამედროვე რადიოლოგიური კვლევები (PET-ის ჩათვლით). სახელმწიფო სრულად აფინანსებს ყველა სახის მაღალტექნოლოგიურ ონკოლოგიურ სერვისებს, ბავშვთა ონკოლოგიური დაავადებების მკურნალობას მსოფლიოს წამყვან ქვეყნებსა და კლინიკებში!! ღეროვანი უჯრედების, ღვიძლის და თირკმლის გადანერგვას, ენდოპროტეზირებას და სხვა და სხვა. არ იცით, რომ ამჟამად ქვეყნის ჯანდაცვაში ტარდება მასშტაბური, სისტემური, სიღრმისეული რეფორმები, რის შემდეგაც საქართველოს მოსახლეობა კიდევ უფრო ხელმისაწვდომ და მაღალი ხარისხის ჯანდაცვას მიიღებს.

ამ დღეებში ბატონმა ვატომ TV პირველის ეთერში უაპელაციოდ განაცხადა, რომ COVID-ის ახალი შემთხვევების მატების ფონზე (რაც მთელ მსოფლიოში აღინიშნება) მოსახლეობა ბედის ანაბარადაა მიტოვებული, პირველადი ჯანდაცვა და ოჯახის ექიმის ინსტიტუტი საერთოდ არ არსებობს, ხოლო კლინიკებს COVID-თან ბრძოლის არანაირი ცოდნა და რესურსი არ გააჩნიათ?! როგორც ჩანს ბატონი ვატო ხელმძღვანელობს გებელსის პრინციპით: თქვი ტყუილი, დიდი ტყუილი, მრავალჯერ გაიმეორე და ხალხი დაიჯერებს. ბატონო ვატო, არ იცით, რომ საქართველო იყო ერთ-ერთი პირველი ქვეყანა მსოფლიოში, რომელმაც მიაღწია „COVID თავისუფლებას“ და COVID-ით პაციენტების პროაქტიული და თანამედროვე მიდგომებით მკურნალობით ჯერ კიდევ 2022 წლის მაისიდან COVID-19 ფატალური დაავადებიდან გადააქცია რიგით რესპირაციულ ინფექციად, რაც ნიშნავს, რომ COVID-ით გამოწვეული სიკვდილობა და მისი ნეგატიური გავლენა ადამიანის ცხოვრების ხარისხსა და ეკონომიკაზე პრაქტიკულად არ აღემატება ან მხოლოდ ცოტათი აღემატება სხვა რესპირაციული ინფექციების მაგ. გრიპით გამოწვეულ შესაბამის მაჩვენებლებს. ოფიციალურ დოკუმენტებში ხელმისაწვდომია და შეგიძლიათ გადაამოწმოთ, რომ 2022 წლის მაისის შემდეგ ერთ მილიონ მოსახლეზე გადათვლით საქართველოში COVID გარდაცვალებების რაოდენობა ბევრად, შეუდარებლად ბევრად ნაკლებია ვიდრე ამერიკის, ევროპის და დანარჩენი მსოფლიოს უმეტეს ქვეყნებში, მათ შორის ისეთებშიც კი, რომლებიც სანიმუშოდ ითვლებოდნენ COVID-ის მართვაში (ისრაელი, გერმანია, აშშ, ბრიტანეთი, საფრანგეთი, ავსტრალია, იაპონია, სამხრეთ კორეა, სკანდინავიის და ბალტიის ქვეყნები, იტალია, ესპანეთი და სხვა). საქართველო ერთ-ერთი ქვეყანა იყო, სადაც უკლებლივ ყველა COVID ავადმყოფი იღებდა სრულყოფილ სამედიცინო მომსახურებას. კლინიკებში ადგილების არ ქონის გამო, სასწრაფოებს არ უხდებოდათ საათობით რიგში დგომა. COVID ავადმყოფები არ კვდებოდნენ ბინაზე, სასწრაფო დახმარების მანქანებში და ა.შ. ბატონო ვატო, როცა ამბობთ, რომ ჩვენს კლინიკებში COVID-ის მართვა არ იციან და არც არავითარი რესურსი არ აქვთ, ღმერთის მაინც არ გეშინიათ?! არ იცით, რომ (შეგიძლიათ, გადაამოწმოთ) მაგალითად ჩვენს კლინიკაში COVID-19-ით მოთავსებული ყველა ავადმყოფიდან მხოლოდ 1.6% გარდაიცვალა, რაც ძალიან დაბალი მაჩვენებელია მსოფლიოს მასშტაბით.

ქვეყნის 100-ზე მეტ COVID-კლინიკაში ჰოსპიტალიზებული (როგორც წესი მძიმე) ავადმყოფების გარდაცვალების საშუალო მაჩვენებელი 6%-ია, მაშინ როდესაც წამყვანი ქვეყნების უმეტეს კლინიკებში სიკვდილობის საშუალო მაჩვენებელი 6-დან 10%-მდე მერყეობს. COVID-ის კლინიკური მართვის ხარისხის ძირითადი ინდიკატორი – ყველა დადასტურებულ შემთხვევას შორის გარდაცვალების მაჩვენებელი -ე.წ. CFR (Case fatality rate) საქართველოს მსოფლიოს 112 ქვეყანაზე დაბალი (ანუ უკეთესი აქვს) 0.93%. რაც იმას ნიშნავს, რომ მთელი პანდემიის მანძილზე, ყოველი ასი დადასტურებული COVID- შემთხვევიდან ავადმყოფების 99%-ზე მეტის გადარჩენა ხერხდებოდა და მხოლოდ 1%-ზე ნაკლები მთავრდებოდა ფატალურად. ბატონო ვატო, თქვენი დაუსაბუთებელი განცხადებებისგან განსხვავებით ეს ყველაფერი აბსოლუტური ჭეშმარიტებაა და დაფიქსირებულია ძირითად, მათ შორის საერთაშორისო დოკუმენტებში (შეგიძლიათ გადაამოწმოთ) და ეს ქვეყნის მოსახლეობის უდიდესმა ნაწილმა იცის. ამიტომ იმედი მაქვს, რომ თქვენი ყველა მცდელობა, დახატოთ ქვეყანაში აპოკალიფსის სურათი, განწირულია და მას არცერთი ნორმალური და არაანგაჟირებული ადამიანი არ დაიჯერებს. COVID-19-ის ახალი შემთხვევების მატების ფონზე სიფხიზლე და ჯანდაცვის სისტემის მობილიზება რა თქმა უნდა აუცილებელია, მაგრამ საქართველოს მოსახლეობას შეუძლია, მშვიდად იყოს. მისი ჯანმრთელობა, მათ შორის COVID- უსაფრთხოება საიმედოდაა დაცული“, – აღნიშნავს თენგიზ ცერცვაძე.

სურსათის ეროვნულმა სააგენტომ დაავადებათა კონტროლისა და საზოგადოებრივი ჯანმრთელობის ეროვნული ცენტრიდან და თბილისის გადამდებ დაავადებათა ეპიდზედამხედველობისა და კონტროლის მუნიციპალური ცენტრიდან მიიღო ორი შეტყობინება რვა ადამიანის საკვებისმიერი ინტოქსიკაციის შესახებ, რომელთაც სალმონელოზი დაუდასტურდათ, – ამის შესახებ სურსათის ეროვნულ სააგენტოში აცხადებენ.

მათივე ცნობით, ეპიდემიოლოგიური კვლევით დადგინდა, რომ ორივე შემთხვევაში პაციენტებმა საკვებად მიიღეს ს.ს. „ნიკორა ტრეიდის“ სასურსათო მაღაზიებში შეძენილი „კოტლეტი კიევური“.

„შეტყობინებების მიღებისთანავე, სურსათის ეროვნული სააგენტოს თბილისის საქალაქო სამსახურის უფლებამოსილმა პირებმა განახორციელეს ინსპექტირება „ნიკორა ტრეიდის“ სასურსათო მარკეტებში (ს/კ 206255808) მისამართებზე: თბილისი აღმაშენებლის ხეივანი N62/495; თბილისი, ხომლელის ქუჩა და აეროდრომის დასახ. მე-7 ქუჩას შორის, ასევე, მიკვლევადობით დადგენილ სს „ნიკორა ტრეიდის“ მზა კერძების წარმოებაში (აღმაშენებლის ხეივანი 1.6 კმ), საიდანაც ორივე მარკეტი „კოტლეტი კიევურით“ მარაგდებოდა“, – აღნიშნავენ სურსათის ეროვნულ სააგენტოში.

მათივე ცნობით, სააგენტოს ინსპექტორებმა ლაბორატორიული კვლევისთვის აიღეს სურსათის ნიმუშები, რომლებშიც პათოგენური მიკროორგანიზმი სალმონელა აღმოჩნდა.

„შედეგად, სს „ნიკორა ტრეიდის“ მზა კერძების წარმოება დაჯარიმდა და კრიტიკული შეუსაბამობების აღმოფხვრამდე საწარმოო პროცესი  შეუჩერდა. ამოღებულია და შესაბამისი წესების დაცვით განადგურდება პათოგენით დაბინძურებული 20 კგ ქათმის ფილე, 100 კგ სხვადასხვა სახეობის სურსათისა და 22 კგ „კოტლეტი კიევურის“ ფარში, სადაც გამოყენებული იყო აღნიშნული ქათმის ფილე“, – აცხადებენ სურსათის ეროვნულ სააგენტოში.

მათივე ინფორმაციით, მიკვლევადობის მიზნით, სურსათის ეროვნული სააგენტო სახელმწიფო კონტროლს ნედლეულის იმპორტიორ კომპანიაშიც განახორციელებს.

24 აგვისტოს ბათუმის ილია ჭავჭავაძის სახელობის პროფესიულ სახელმწიო დრამატულ თეატრში XV საიუბილეო საერთაშორისო ფესტივალის „ღამის სერენადები“ პრესკონფერენცია გაიმართა.

პრესკონფერენციას ესწრებოდნენ ქალაქ ბათუმის მერის მოადგილე სოფო ხალვაში, აჭარის განათლების, კულტურისა და სპორტის მინისტრის მოადგილე აკაკი ძნელაძე, ფესტივალის „ღამის სერენადები“ სამხატვრო ხელმძღვანელი,გერმანიაში მოღვაწე მუსიკოსი გიორგი ისაკაძე, ფესტივალის „ღამის სერენადები“ დირექტორი ნინა ცაგარელი, ორკესტრის „საქართველოს ვირტუოზები“ კონცერტმაისტერი და პირველი ვიოლინო ლელა მჭედლიძე. სოპრანო ეილიკა ვუნში, ტენორი რიკარდო მარინელო, მევიოლინე ჰეიონ პარკი, პიანისტი თამარ ლიჩელი.

ორგანიზატორებმა და მხარდამჭერებმა ფესტივალის წლევანდელ პროგრამასა და კონცერტებში მონაწილე შემსრულებლებზე, სიახლეებსა და სამომავლო გეგმებზე ისაუბრეს.

სოფო ხალვაში, ქალაქ ბათუმის მერის მოადგილე:

“წლების განმავლობაში “ღამის სერენადები” ყოველთვის გამოირჩეოდა განსხვავებულობით, ეს ფესტივალი წელსაც იქნება მნიშვნელოვანი ჩვენი ბათუმისთვის. ტრადიციულად ქალაქ ბათუმის მერია მხარდამჭერია ფესტივალის და მინდა ვუსურვო ბევრი წარმატება, იმიტომ რომ ნამდვილად გამორჩეული მუსიკოსები არიან წელს და მსმენელს ელოდება ძალიან დიდი დღესასწაული.”

აკაკი ძნელაძე, აჭარის განათლების კულტურისა და სპორტის მინისტრის მოადგილე:

“აქ თავისთავად არა მარტო ბათუმისთვის, არამედ მთელი საქართველოსთვის არის მნიშვნელოვაანი ფესტივალი “ღამის სერენადები”, იმიტომ რომ ხაზგასმით ვამბობ, ლიანა ისაკაძე არის გენიალური მუსიკოსი, თანაც “ღამის სერენადები” ბათუმი-თბილისის  გეოგრაფია მუსიკაში არის ერთ-ერთი ბრწყინვალე ეპიზოდი ქართულ-კულტურულ სივრცეში ბოლო წლების მანძილზე. აუცილებელია ამ ფესტივალის მხარდაჭერა. მომავალშიც ასე იქნება და კიდევ ხაზგასმით მინდა ვთქვა, რომ როგორ შეიძლება საერთაშორისო ფესტივალს “ღამის სერენადები”, რაღაც კულტურული ემოციური ხაზგასმა გავუკეთო, მაგრამ ასე ვიტყვი – ეს არის ერთ-ერთი საუკეთესო კულტურული ფესტივალი თავისი ინტელექტით საქართველოში. დიდი მადლობა ამ ფესტივალს.”

გიორგი ისაკაძე, ფესტივალის სამხატვრო ხელმძღვანელი:

“ფესტივალის პროგრამა ჩვეულებისამებრ ძალიან მრავალფეროვანი და საინტერესოა. წელსაც ვუმასპინძლებთ არაერთ მსოფლიოში აღიარებულ უცხოელ და ქართველ მუსიკოსს: Milano Classica-ს მთავარი დირიჟორი, Orchestra Scarlatti Young-ის მთავარი დირიჟორი და ტოსკანას ორკესტრის მთავარი მოწვეული დირიჟორი, ბეატრიჩე ვენეცი, საერთაშორისო კონკურსების ლაურეატთან, ქართველ მევიოლინესთან, ვერიკო ჭუმბურიძესთან ერთად შეასრულებს ჩაიკოვსკის სავიოლინო კონცერტს. ლა სკალას ორკესტრის კონცერტმაისტერი, სოლისტი და ვენიავსკის კონკურსების ლაურეატი ლაურა მარზადორი მსმენელებს მოცარტის სავიოლინო კონცერტებს წარუდგენს. სოლო კონცერტს გამართავს ბეთჰოვენის საერთაშორისო კონკურსის გამარჯვებული, მიუნხენის მუსიკისა და თეატრის უმაღლესი სკოლის პროფესორი და თავისი თაობის ერთ-ერთი გამორჩეული პიანისტი ანტი სიირალა.

საოცარი საღამო გვაჩუქეს გერმანული პროექტის “Das Supertalent” გამარჯვებულმა ტენორმა რიკარდო მარინელომ და საერთაშორისოდ აღიარებული ქართველმა ტენორმა გიორგი ონიანმა, რომლებმაც საოპერო მუსიკის შედევრები და ნეაპოლური სიმღერები შეგვისრულეს ქალაქ ბორჯომში. მინდა ავღნიშნო მსოფლიოში ცნობილი გერმანელი კლარნეტისტი საბინე გროფმაიერის საოცარი შესრულება.

კორეელი მევიოლინე ჰეიონ პარკი თამარ ლიჩელთან ერთად შეასრულებს ფრანკისა და ვოან უილიამსის ნაწარმოებებს, ასევე ბეთჰოვენის სავიოლინო კონცერტს. პუბლიკა შეხვდება ახალგაზრდა ქართველ მუსიკოსებსაც. სოლისტებს ტრადიციულად თანხლებას გაუწევს ფესტივალის საბაზო ორკესტრი „საქართველოს ვირტუოზები“, კონცერტმაისტერი ლელა მჭედლიძე.”

ნინა ცაგარელი, ფესტივალის დირექტორი:

“მეთხუთმეტე, საიუბილეო „ღამის სერენადებს“ მნიშვნელოვანი და სასიხარულო სიახლეებით ვხვდებით. უპირველეს ყოვლისა აღვნიშნავ, რომ გაიზარდა ჩვენი გეოგრაფიული არეალი და მასპინძელ ქალაქებს დაემატა ქალაქი ბორჯომი. წლევანდელმა ფესტივალმა სწორედ ბორჯომში აიღო სტარტი გალა-კონცერტით, შემდეგ კი ტრადიციულად ულამაზეს ბათუმში გადმოვინაცვლეთ. მეორე უმნიშვნელოვანესი სიახლე გახლავთ ის, რომ ფესტივალის პარტნიორთა სიას დაემატა ეროვნული სიმფონიური ორკესტრი, რომელიც ყოველწლიურად ფესტივალის ფარგლებში ერთ კონცერტს გამართავს. წლევანდელი ფესტივალი 6 დაუვიწყარ საღამოსთან ერთად უკვე ტრადიციულად გააერთიანებს მასტერკლასებს და ვორკშოპებს სამუსიკო სკოლის მოსწავლეებისთვის, სტუდენტებისთვის და შშმ პირებისათვის, ასევე საქართველოში ასტრო-არტის და Art-Science -ის პირველი წარმომადგენლის მხატვარ ეკა აბულაძის ნამუშევრების გამოფენას.”

რიკარდო მარინელო, ტენორი:

“ძალიან ბედნიერი ვარ, აქ რომ ვიმყოფები. პირველად ვარ ბათუმში და ამაყი ვარ, რომ ჩემს მუსიკას შევთავაზებ ამ ფესტივალის დამსწრე საზოგადოებას. იტალიელი ვარ და შევასრულებ კლასიკად აღიარებულ ნაწარმოებებს ” ო სოლე მიო” და უდიდეს არიას “ნესუნ დორმა”.

აელიკა ვუნში სოპრანო:

“უბედნიერესი ვარ, რომ ვიმყოფები საქართველოში და ამ ულამაზეს თეატრში შევხვდები მსმენელს. ჩემთვის უძვირფასეს არიებს შევასრულებ და იმედი მაქვს, რომ კონცერტზე მოსული მსმენელი ისიამოვნებს. დიდი მადლობა ქართველებს მოწვევისთვის.

ჰეიონ პარკი, მევიოლინე:

“დიდი სიამოვნებით ველოდები შეხვედრას მსმენელთან და მსურს ჩემი შესაძლებლობები მაქსიმალურად წარმოვაჩინო – საუკეთესოდ დავუკრა. თათა ლიჩელთან ერთად დავუკრავ. უნიჭიერესი პიანისტია და მიხარია, რომ მასთან ერთად მუშაობის საშუალება მომეცა. მიყვარს საქართველო, კარგი ამინდია, კარგი განწყობა…”

შეგახსენებთ, რომ კლასიკური მუსიკის საერთაშორისო ფესტივალი „ღამის სერენადები“ წელს, მეთხუთმეტედ იმართება. ფესტივალს სამი ქალაქი ბორჯომი, ბათუმი და თბილისი მასპინძლობს. ტრადიციულად „ღამის სერენადები“ კონცერტებზე მსოფლიოში აღიარებულ მუსიკოსები ცნობილი კომპოზიტორების ნაწარმოებებს შეასრულებენ .

ფესტივალის დამფუძნებელია მსოფლიოში სახელგანთქმული მევიოლინე და დირიჟორი ლიანა ისაკაძე, სამხატვრო ხელმძღვანელი გერმანიაში მოღვაწე მუსიკოსი გიორგი ისაკაძე.
ფესტივალ „ღამის სერენადების“ ბათუმის კონცერტს მაყურებელი აჭარის საზოგადოებრივი მაუწყებლის ეთერში 24 აგვისტოს 20:40 იხილავს.
პროგრამაშია ვოლფგანგ ამადეუს მოცარტი – Exsultate, jubilate, K 165 ერნესტო დე კურტისი – Torna surriento ვოლფგანგ ამადეუს მოცარტი – „მწყემსი მეფე“ – L’amerò, sarò costante იმრე კალმანი – „ჩარდაშის დედოფალი“ – Tanzen möcht’ ich სეზარ ფრანკი – სავიოლინო სონატა ლა მაჟორი ჯუზეპე ვერდი – „რიგოლეტო“ – La donna è mobile ფრანც ლეჰარი – „მხიარული ქვრივი“ – Lippen schweigen ჯაკომო პუჩინი – „ტურანდოტი“ – Nessun Dorma ედუარდო დი კაპუა – O sole mio ჯუზეპე ვერდი – „ტრავიატა“ – Sempre libera

ფესტივალის მხარდამჭერები არიან: საქართველოს კულტურის, სპორტისა და ახალგაზრდობის სამინისტრო, ქალაქ ბათუმის მერია, ქალაქ თბილისის მერია, ქალაქ ბორჯომის მერია,აჭარის განათლების, კულტურისა და სპორტის სამინისტრო იტალიის საელჩო საქართველოში, გერმანიის საელჩო საქართველოში. მასპინძელი სასტუმროები: ბორჯომი ლიკანი, ჰილტონ გარდენ ინნ თბილისი. ფესტივალის პარტნიორები: ეროვნული სიმფონიური ორკესტრი, ბათუმის ილია ჭავჭავაძის სახელობის პროფესიული სახელმწიფო დრამატული თეატრი. ხარისხისა და დიზაინის საუკეთესო გარანტი ავეჯის სახლი „ნიტა“, პარფიუმერულ მაღაზიათა ქსელი „ლუტეცია“, მცენარეული კოსმეტიკის ფუძემდებელი საფრანგეთიდან “ივ როშე”, კომპანია „სარაჯიშვილი“, ძმები ხუციშვილების “ღვინის მარანი” “HOTSALE.GE”-ს პრემიუმ მიმართულება, ფარმაცევტული კომპანია „პსპ“ საინფორმაციო მხარდამჭერები: აჭარის საზოგადოებრივი მაუწყებელი, საქართველოს პირველი არხი, ტელეკომპანია „რუსთავი2“, ტელეკომპანია „იმედი“, „პოსტ ტვ“, „ევრონიუს ჯორჯია“, მედიაჰოლდინგი „ჯორჯიან თაიმსი“, საპატრიარქოს ტელევიზია „ერთსულოვნება“,„ტვ25“, მედია და ციფრული კომუნიკაციების სააგენტო „კლიპ არტი“, საინფორმაციო პორტალი “ამბები.ჯი”, საინფორმაციო სააგენტო „პრაიმ ტაიმი“, „ჯორჯიან პრესი“ , ინგლისურენოვანი გაზეთი “Georgia Today“, ინგლისურენოვანი ყოველდღიური გაზეთი „Messenger“, ჟურნალი „სარკე“, გაზეთი „აჭარა“, რადიო „ფორტუნა“ და ვებ-საიტი ფორტუნა.