რუსეთის საოკუპაციო ძალების მიერ უკანონოდ დაკავებული კახაბერ ნათაძე და მამუკა ჩხიკვაძე თავისუფალი არიან და ცენტრალური ხელისუფლების მიერ კონტროლირებად ტერიტორიაზე იმყოფებიან. ამის შესახებ ინფორმაციას სახელმწიფო უსაფრთხოების სამსახური ავრცელებს.

უწყების ცნობით, კახაბერ ნათაძის და მამუკა ჩხიკვაძის უკანონო პატიმრობიდან გათავისუფლების პროცესში აქტიურად გამოიყენებოდა „ცხელი ხაზის“ მექანიზმი.

„კახაბერ ნათაძის და მამუკა ჩხიკვაძის უკანონო პატიმრობიდან დაუყოვნებლივ გათავისუფლების საკითხს, საქართველოს ცენტრალური ხელისუფლება რეგულარულად აყენებდა ინციდენტების პრევენციისა და მათზე რეაგირების მექანიზმის (IPRM) და ჟენევის საერთაშორისო დისკუსიების ფორმატებში.

საქართველოს ცენტრალური ხელისუფლება ინფორმაციას მუდმივ რეჟიმში აწვდიდა საერთაშორისო პარტნიორებს.

მოლაპარაკების არსებული ფორმატებისა და ინსტრუმენტების ფარგლებში წარმოებული ინტენსიური დიალოგის შედეგად, კახაბერ ნათაძე და მამუკა ჩხიკვაძე დაუბრუნდნენ საკუთარ ოჯახებს.

საქართველოს ცენტრალური ხელისუფლება იყენებს მის ხელთ არსებულ ყველა მექანიზმს უკანონოდ დაკავებული საქართველოს მოქალაქეების გასათავისუფლებლად.

ოკუპირებულ რეგიონებსა და საოკუპაციო ხაზის გასწვრივ განხორციელებულ დესტრუქციულ ქმედებებზე სრული პასუხისმგებლობა საოკუპაციო ძალას”, – ნათქვამია ინფორმაციაში.

ცნობისთვის, საოკუპაციო ძალების წარმომადგენლებმა მამუკა ჩხიკვაძე და კახაბერ ნათაძე 2021 წლის დეკემბერში დააკავეს.

აკადემიკოსი, ყოფილი პარლამენტარი ლადო პაპავა „ნაციონალური მოძრაობის“ იმ რეაქციას იხსენებს, როდესაც 2007 წელს რთვლის სუბსიდირების საკითხი დადგა.

„მახსოვს 2007 წლის შემოდგომა იყო, მაშინ დეპუტატი გახლდით საქართველოს პარლამენტის, კახეთში რთველი უკვე დამთავრებული იყო და ერთ-ერთი ოპოზიციური პარტიის წარმომადგენელმა დააყენა საკითხი, რომ რაჭაში მოგვიანებით არის რთველი და მოდით გამოვყოთ 5 მილიონი სუბსიდირებისთვისო. ატყდა ერთი ამბავი – როგორ შეიძლება ამის გაკეთება, ყველა დარგი თავისით უნდა ვითარდებოდეს, არანაირი სუბსიდირებაო და ეს საკითხი ჩააგდეს. მერე მოხდა 2007 წლის 7 ნოემბერი, ყველასთვის კარგად ცნობილი, დაინიშნა საპრეზიდენტო არჩევნები და მხოლოდ ამის შემდეგ, 2008 წლის შემოდგომიდან დაიწყო რთვლის სუბსიდირება „ნაციონალური მოძრაობის“ ხელისუფლებამ, რადგან მაშინ სჭირდებოდა გარკვეული მხარდაჭერა მოეპოვებინა ხალხში“, – აცხადებს პაპავა.

„ნაციონალური მოძრაობის“ თავმჯდომარემ ლევან ხაბეიშვილმა ფერმერებთან სტუმრობა მას შემდეგ გადაწყვიტა, რაც პრემიერ-მინისტრის ინიციატივით, რთველთან დაკავშირებით მთავრობის სხდომა გაიმართა და გადაწყდა, რომ სახელმწიფო გლეხებს მასშტაბურ დახმარებას გაუწევს. კერძოდ, სახელმწიფო სრულად ჩაიბარებს იმ ყურძენს, რომელზეც კერძო სექტორის მხრიდან მოთხოვნა არ იქნება. დაზიანებულ ყურძენში მევენახეს სახელმწიფო 90 თეთრს გადაუხდის.

რუსეთის უშიშროების საბჭოს ხელმძღვანელის მოადგილე დიმიტრი მედვედევი ოკუპირებული აფხაზეთისა და “სამხრეთ ოსეთის” ე.წ. ლიდერებს, ასლან ბჟანიას და ალან გაგლოევს, შეხვდა. ამის შესახებ ინფორმაციას რუსული სახელმწიფო გამოცემა “რია ნოვოსტი” ავრცელებს.

„მნიშვნელოვანი თარიღის მოლოდინში ვართ – მე-15 წლისთავი რუსეთის მიერ სამხრეთ ოსეთისა და აფხაზეთის დამოუკიდებლობის აღიარებიდან. ეს ყველაზე მარტივი გადაწყვეტილება არ იყო, რომელიც რუსეთმა 2008 წელს მიიღო, მაგრამ რომელმაც კავკასიაში მშვიდობა უზრუნველყო, უზრუნველყო რესპუბლიკების მცხოვრებლების სიცოცხლე და ჯანმრთელობა და დიდი ამოცანების შესრულება,” – განაცხადა რუსეთის უშიშროების საბჭოს ხელმძღვანელის მოადგილემ, დიმიტრი მედვედევმა.

მისი აზრით, მას შემდეგ რუსეთისა და ორი ე.წ. რესპუბლიკის ურთიერთობები კარგად ვითარდება.

ოკუპირებული აფხაზეთის ე.წ. პრეზიდენტმა ასლან ბჟანიამ მადლობა გადაუხადა მედვედევს “აფხაზური სახელმწიფოებრიობის განვითარებაში შეტანილი უზარმაზარი წვლილისთვის.”

ოკუპირებული ცხინვალის ე.წ. პრეზიდენტმა ალან გაგლოევმა ასევე გადაუხადა მადლობა მედვედევს „2008 წელს მიღებული გადაწყვეტილებებისთვის“, რომლებმაც, მისი თქმით, „შესაძლებელი გახადა ქართული აგრესიის შეჩერება.”

მე პირადად გეუბნებით – ყველა პრორუსთან ყოველთვის პოლარიზებული ვიქნები! – დეპოლარიზაცია იმთავითვე შეუძლებელი იყო, რადგან რუსულ ინტერესებს ატარებს კობახიძე, ღარიბაშვილი, ივანიშვილი და ამიტომაც არის პრობლემები,- ამის შესახებ ჟურნალისტებთან “სტრატეგია აღმაშენებლის” თავმჯდომარე გიორგი ვაშაძემ განაცხადა.

მისი თქმით, ეთანხმება კელი დეგნანის განცხადებას, რომ რუსული დეზინფორმაციული ძალები დასავლეთთან ინტეგრაციის შეფერხებას ცდილობენ, “უბრალოდ, დააზუსტებს, რომ ეს ძალა არის “ქართული ოცნება”.

მან ასევე შეაფასა კელი დეგნანის ელჩობის პერიოდი და აღნიშნა, რომ უამრავი პროექტი განხორციელდა ამ პერიოდში ხალხისთვის სასიკეთოდ და ელჩს ამაში დიდი როლი აქვს. ვაშაძის განცხადებით, სხვა ხელისუფლების პირობებში, გაცილებით მეტის რეალიზების შესაძლებლობა იქნებოდა, მათ შორის, ამერიკასთან თავისუფალი ვაჭრობის.

“რომ არა კელი დეგნანი, მისი პერსონალური, აქტიური მუშაობა, საქართველოს ამერიკასთან ურთიერთობა კიდევ უფრო ცუდ მდგომარეობაში იქნებოდა, რადგან ხელისუფლებაში გვყავს ძალა ღარიბაშვილ-კობახიძე- ივანიშვილის დაჯგუფება, რომელიც ყველაფერს აკეთებს, რომ ქვეყნის სტრატეგიული პარტნიორი, ყველაზე ძლიერი სახელმწიფო, რომელიც შენი მეგობარია, მტრად აქციოს. მადლობა უნდა გადავუხადოთ ამ ადამიანს, რომ მიუხედავად მასზე პერსონალური თავდასხმებისა, “ქართულმა ოცნებამ” ვერ მოახერხა გაეფუჭებინა საქართველოსა და ამერიკას შორის ურთიერთობა. დღეს აშშ არის საქართველოს სტრატეგიული პარტნიორი და როგორც კი მოვიცილებთ “ქართულ ოცნებას”, ამ პარტნიორობას მყისიერად მივცემთ იმ დიდ პერსპექტივას, რომელიც ასე უნდა ქართველ ხალხს.

გავრილოვის ღამე იყო ის წყალგამყოფი, როცა დაიწყო იმის თვალნათლივ გამოაშკარავება, რომ “ქართული ოცნება” რეალურად არის რუსული ინტერესების გამტარებელი. მე პირადად გეუბნებით – ყველა პრორუსთან ყოველთვის პოლარიზებული ვიქნები, რადგან ჩემი სამშობლოს, ჩემი ქვეყნის, ჩემი პირადი არჩევანი არის ძლიერი საქართველო ევროკავშირთან და ნატოსთან ერთად და არა რუსეთის მონობაში მყოფი საქართველო. შესაბამისად, აქ დეპოლარიზაცია იმთავითვე შეუძლებელი იყო, რადგან რუსულ ინტერესებს ატარებს კობახიძე, ღარიბაშვილი, ივანიშვილი და ამიტომაც არის ეს პრობლემები,”- განაცხადა ვაშაძემ.

თბილისის საკრებულოს სხდომაზე, სადაც დეპუტატები დედაქალაქში დაგეგმილ სამშენებლო პროექტებს განიხილავენ, საკრებულოს თავმჯდომარის მოადგილემ ზურაბ აბაშიძემ ოპოზიციის მხრიდან გაჟღერებულ განცხადებებს უპასუხა.

ზურაბ აბაშიძე: „ზოგიერთი ოპონენტისთვის, როგორც ჩანს, მიუღებელია ზაფხულში მუშაობა, რადგან შვებულებების პერიოდია. ამ პოზიციამ გუშინ კომისიის სხდომაზეც არაერთხელ გაიჟღერა. ეს ძალიან უცნაურია, რადგან საკრებულო ვალდებულია, ქვეყნისთვის და ქალაქისთვის მნიშვნელოვანი საკითხები წლის ნებისმიერ დროს განიხილოს.

 ამ საკითხის სიღრმეებში აღარ შევალ. აქ არის ერთი მარტივი და მნიშვნელოვანი რამე – არსებობს გლობალური ომის პარტია, რომელმაც დღეს თავისი სახე კიდევ ერთხელ გამოაჩინა და თქვა, რომ ამ ქვეყანაში არ უნდა მშვიდობა. რატომ არ უნდა მშვიდობა? იმიტომ, რომ არ უნდა იყოს აღმშენებლობა, არ უნდა ვითარდებოდეს ქვეყანა, დედაქალაქი. ალბათ,  მოეწონებოდათ მათ მსგავსად რომ ვძარცვავდეთ ხალხს, ვიჭერდეთ, ვსვამდეთ ციხეში, ვაწამებდეთ, შემდეგ გამოვძალავდეთ ქონებას და ამის ხარჯზე ვმდიდრდებოდეთ, როგორც მდიდრდებოდა წლების განმავლობაში ეს პარტია. მას შემდეგ სწორედ ამ პარტიის წევრები არიან ოპოზიციაში და მუდმივად არყევენ ქვეყანას და ყველა საკითხს იყენებენ თავისი პოლიტიკური მიზნების მიღწევისთვის.

 პროექტებს, რომლებსაც დღეს განვიხილავთ, უნდა შევხედოთ იმ კუთხით, თუ როგორ სჭირდება მათი განხორციელება ქვეყნის ეკონომიკურ განვითარებას. დაახლოებით მილიარდზეა საუბარი და ეს პროექტები ძალიან დიდ მოგებას მოუტანს ქვეყანას, დედაქალაქს.

აქ კიდევ მეორე საკითხია, ჩვენი სხვა ოპონენტები, რომლებიც წარმოდგენილები არიან საკრებულოში, აწყობენ იაფფასიან სპექტაკლებს და ამბობენ ნაციონალურ მოძრაობასთან ნუ გვაიგივებთო. მინდა მათ მივმართო, ეს ნუ გაგიკვირდებათ იმიტომ, რომ ხელწერა ერთი გაქვთ, მესიჯბოქსი, განწყობები ერთი გაქვთ და საზოგადოებას ნუღარ მოსთხოვთ პასუხს, თუ რატომ არ გაძლევენ ხმას. საზოგადოება თქვენში ალტერნატივას ვერ ხედავს. ალტერნატივა არის ომი, ნაციონალური მოძრაობა და ხალხი ამას არ მიიღებს, იმიტომ, რომ სწორედ თქვენ ერთხელ უკვე დაანგრიეთ ეს ქვეყანა და მეორედ ამის საშუალებას არ მოგცემთ.

მივიღებთ ყველა იმ გადაწყვეტილებას, რომელიც სჭირდება ამ ქვეყანას და დედაქალაქს პირველ რიგში, თქვენ კი პასუხი მოგეთხოვებათ იმისთვის, რომ ხელს უშლიდით და უშლით ქვეყნისა და თბილისის განვითარებას.‘‘

კელი დეგნანს ჰკითხეთ, რა იგულისხმა ძირის გამომთხრელ საქმიანობაში? არჩევნებზე გამოჩნდება, ვინ რა ძირის გამოთხრას აპირებს თუ არ აპირებს, – ამის შესახებ  საპარლამენტო უმრავლესობის წევრმა, გია ვოლსკიმ განაცხადა.

ვოსლკის კითხვა დაუსვეს კელი დეგნანის განცხადებასთან დაკავშირებით, სადაც მან აღნიშნა: „სამწუხაროდ, მივიჩნევ, რომ საქართველოს ევროკავშირისკენ მიმავალი გზისთვის ძირის გამოთხრის მიზნობრივი კამპანია მიმდინარეობს“.

გია ვოლკის განაცხადებით, უმრავლესობიდან დეპუტატები საწინააღმდეგო მოსაზრებებს თუ აფიქსირებენ, ეს დასავლეთის სტრატეგიული მიმართულებისგან გადახვევას არ ნიშნავს.

„საპირისპირო აზრების ჭიდილი არ უნდა გაგვიკვირდეს. ამერიკის შეერთებულ შტატებში ათი წელი გავატარე, ამერიკისა და სხვა ქვეყნის წარმომადგენლებს შორის საკმაოდ მწვავე გადაძახილები მინახავს, მათ შორის მაღალი ტრიბუნებიდან, გაერო-ში იქნება თუ ვაშინგტონში. ასეთი პოლემიკა აბსოლუტურად ნორმალური დემოკრატიული პროცესის ნაწილია და წარმოუდგენელ ანომალიად არ უნდა მივიჩნიოთ, ევროპისგან, დასავლეთის სტრატეგიული მიმართულებისგან გადახვევას არ ნიშნავს. სახელმწიფომ თავისი სტრატეგია ჩამოაყალიბა და ოპტიმალური ვარიანტი შეარჩია, რათა გადარჩეს ფიზიკურად და თავისი ხალხი სამშვიდობის გაიყვანოს. ჩვენ რაიმე საწინააღმდეგო მოსაზრებები თუ გვაქვს, თუნდაც ამერიკის ელჩის მოსაზრებებთან დაკავშირებით, რომელსაც მიაჩნია, რომ ელექტრონული არჩევნები შეიძლება, გაყალბდეს ან მოუწოდებს საზოგადოებას, გამოვიდნენ, რევოლუციურ პროცესში ჩაერთონ, ნორმალურია, თუ ამას ვუპასუხებთ. ყოველ შემთხვევაში – ამერიკელებისთვის, და ვიღაცისთვის შეიძლება, ნორმალური არ იყოს. მთავარია, მართალი იყო და შენს ქვეყანას ემსახურებოდე, რათა ამ ურთულეს პერიოდში მისი სამშვიდობოს გაყვანა უზრუნველყო.

კელი დეგნანს ჰკითხეთ, რა იგულისხმა ძირის გამომთხრელ საქმიანობაში. ეს პირველი განცხადება არ არის, თუნდაც კელი დეგნანისგან. ანომალიურად არ უნდა მივიჩნიოთ, თუ აზრთა სხვადასხვაობა არსებობს, ეს ამერიკელისთვის გასაკვირი არ არის. ასეთ დემოკრატიაზე ვითარდებოდა და ვითარდება დღესაც, მომავალშიც ამ დემოკრატიაზე იქნება აგებული ამერიკის შეერთებული შტატები. აზრთა და შეხედულებათა დაპირისპირებასთან დაკავშირებით დასკვნები საზოგადოებამ უნდა გამოიტანოს. არჩევნებზე აუცილებლად გამოჩნდება, ვინ როგორ ფიქრობს და ვინ რა ძირის გამოთხრას აპირებს თუ არ აპირებს“, – განაცხადა გია ვოლკსიმ.