ირაკლი ღარიბაშვილმა ყველას დაანახა, რომ შეუძლია ძალიან რთული გადაწყვეტილებების მიღება, შეუძლია გუნდის შეკვრა და შეუძლია ქვეყანა მშვიდობით ატაროს 21-ე საუკუნის ყველაზე დიდი გამოწვევის პირობებში – ეს არის ობიექტური რეალობა, თუ გვინდა ერთ წინადადებაში შევაფასოთ, თუ რას აკეთებს დღეს მთავრობის მეთაური საქართველოში, – ამის შესახებ ფრაქცია „ქართული ოცნების“ თავმჯდომარის მოადგილემ, ირაკლი ჩიქოვანმა გადაცემაში „იმედი LIVE“ განაცხადა.

როგორც ჩიქოვანმა აღნიშნა, არჩევნების მოახლოებასთან ერთად, ხელისუფლებაზე, პრემიერ-მინისტრზე და სხვა ლიდერებზე ორკესტრირებული შეტევების გააქტიურების მოლოდინი აქვს, თუმცა, ერთი და იმავე ადამიანების მიერ ამ თემაზე საუბარი უკვე შედეგის მომტანი არ არის. მისივე თქმით, ხელისუფლებისთვის შეურაცხყოფის მიყენებით, საბოლოო ჯამში, სახელმწიფოს და მის ხალხსაც შეურაცხყოფენ.

„ჩვენ კარგად ვნახეთ, რომ არაერთი ორკესტრირებული შეტევა ყოფილა საქართველოს სახელმწიფოს წინააღმდეგ და ამ შემთხვევაშიც, ეს ყველაფერი მიმართული არის ასევე ხელისუფლების, მთავრობის მიმართ, უშუალოდ კონკრეტული პირების: პრემიერ-მინისტრის და ყველა ჩვენი ლიდერის მიმართ. მე მგონია, ეს გაგრძელდება და უფრო მეტსაც გეტყვით, შეიძლება ეს უფრო აქტიური იყოს საარჩევნო წლის მოახლოებასთან ერთად, მაგრამ გულწრფელად გეტყვით, იმდენად გაუვიდა ყავლი, რაოდენობრივად რაც არ უნდა დიდი იყოს ეს ყველაფერი, შედეგის მომტანი არ არის. კარგად დავინახეთ, რომ ეს შეტევები მოდის, ვხედავთ, არის ხოლმე შემთხვევები როდესაც ახალი აქტორები ერთვიან, მაგრამ ის ადამიანები, ვინც ამაზე საუბრობენ, უკვე გათელილი თემაა და შესაბამისად, აქ ახალი არაფერი არ არის.

ადამიანები, რომლებიც ჩვენ გვიწოდებენ “ბანდას”, იმ ადამიანს მგონი, საერთოდ წარმოდგენა არ აქვს საქართველოში რა ხდება და ერთის მხრივ, პირდაპირ, უშუალო შეურაცხყოფას აყენებს აბსოლუტურად ყველა იმ მოქალაქეს, რომელიც ირჩევს საკუთარ სახელმწიფოში იმ ხელისუფლებას, რომელიც ჰყავს და მეორე, საბოლოო ჯამში, შეურაცხყოფას აყენებს ამით ხალხსაც და ჩვენს სახელმწიფოსაც.” – განაცხადა ირაკლი ჩიქოვანმა.

ამ მართლაც გაუგონარი საქციელის იქით კიდევ უფრო გაუგონარი და ამაზრზენი იყო როგორც „ნაციონალური მოძრაობის“ ლიდერების, ისე ამ ბატონის ახსნა-განმარტება, – ამის შესახებ ფრაქცია „ქართული ოცნების“ თავმჯდომარის მოადგილემ, რატი იონათამიშვილმა განაცხადა, რითაც გამოეხმაურა „ვივამედში“ პოლონელ ექიმთან დაკავშირებით მომხდარ ინციდენტს.

„ფაქტია, რომ ვინც „ნაციონალურ მოძრაობას“ ან სააკაშვილს გაეკარა ყველამ შეირცხვინა თავი. ძალიან უხერხული იქნება ამ ექიმებს თუნდაც თვითონ რომ ჰქონდეთ პრეტენზია, რომ კიდევ შევიდნენ იქ. ის ახსნა, რაც ამ ექიმის მხრიდან იყო, რომ თურმე მას აქვს ჩვევა, რომ ყველაფერს წინდებში იდებს, ეს კიდევ ცალკე უხერხული ახსნაა. ფაქტია, რომ ამ მართლაც გაუგონარი საქციელის იქით კიდევ უფრო გაუგონარი და ამაზრზენი იყო როგორც „ნაციონალური მოძრაობის“ ლიდერების, ისე ამ ბატონის ახსნა-განმარტება“, – აღნიშნა იონათამიშვილმა.

სპეციალურმა პენიტენციურმა სამსახურმა 14 ივლისს მიხეილ სააკაშვილთან პოლონელი ექიმების ვიზიტის შესახებ განცხადება გაავრცელა, სადაც აღნიშნულია, რომ მსჯავრდადებულ სააკაშვილისგან აღებული ნიმუში ერთ-ერთმა პოლონელმა ექიმმა ქაღალდში გადაახვია და ფეხსაცმლის მეშვეობით ცდილობდა მის მალულად გატანას.

პოლონელმა ექიმმა ჩამორთმეულ ახსნა-განმარტებაში თავად დაადასტურა მიხეილ სააკაშვილისგან აღებული ნიმუშის წინდაში განთავსებისა და გატანის მცდელობის ფაქტი.

პოლონელ მედიკოსთან დაკავშირებული ინციდენტის გამო საქართველოს საგარეო საქმეთა სამინისტროში იმყოფებოდა პოლონეთის ელჩის მოვალეობის შემსრულებე

პოლიტიკურ პარტიას კი არა, ისეთ საქმიანობასაც ვერ წარმოვიდგენ, რომელიც შეიძლება, ხაბეიშვილს და ვაშაძეს ჩააბარო, – ამის შესახებ საპარლამენტო უმრავლესობის წევრმა, რატი იონათამიშვილმა განაცხადა.

იონათამიშვილი გამოეხმაურა „ნაციონალური მოძრაობის“ და „სტრატეგია აღმაშენებლის“ გადაწყვეტილებას, რომ ამ ორ პარტიას საერთო სტრატეგია ექნება და შეიქმნება „გამარჯვების პლატფორმა“ პროდასავლური პარტიების პლატფორმაზე.

„ორი არასერიოზული, მაგრამ ძალიან ბედნიერი ადამიანის გაერთიანება ვნახეთ. ამაზე სერიოზული კომენტარის გაკეთება ძალიან გამიჭირდება, ვინაიდან ხაბეიშვილიც და ვაშაძეც ისეთი ადამიანები არიან, რომ პოლიტიკურ პარტიას კი არა, ისეთ საქმიანობასაც ვერ წარმოვიდგენ, რომელიც შეიძლება, მათ ჩააბარო. ასეთი კარიკატურული და უშინაარსო პოლიტიკური ქორწინება დიდი ხანია, არ გვინახავს, მაგრამ ესეც ნიშანდობლივია როგორც ერთი, ისე მეორე პარტიისთვის“, – განაცხადა რატი იონათამიშვილმა.

რა განასხვავებს ხაბეიშვილს და ვაშაძეს ერთმანეთისგან ან ამ პარტიული ორგანიზაციების განმასხვავებელი ნიშანი რა არის?  შეიძლება ის იყოს, რომ ხაბეიშვილი უკეთესად დახტუნავს, უფრო ინტენსიურად დარბის სარბენ ბილიკზე. არა მგონია, ვაშაძემ ამ ტემპს გაუძლოს, – ამის შესახებ საპარლამენტო უმრავლესობის წევრმა, გია ცაგარეიშვილმა განაცხადა.

ცაგარეიშვილი გამოეხმაურა „ნაციონალური მოძრაობის“ და „სტრატეგია აღმაშენებლის“ გადაწყვეტილებას, რომ ამ ორ პარტიას საერთო სტრატეგია ექნება და შეიქმნება „გამარჯვების პლატფორმა“ პროდასავლური პარტიების პლატფორმაზე.

ცაგარეიშვილი არ გამორიცხავს, რომ ეს პლატფორმაც ისე დაიშალოს, როგორც ვაშაძე-ხოშტარია-ჯაფარიძის პლატფორმა.

„მახსოვს რამდენიმე ხნის წინ შეიქმნა პლატფორმა – ვაშაძე-ხოშტარია-ჯაფარიძე. ეს პლატფორმა ისე შეიქმნა და ისე დაიშალა, ტრანსფორმირდა ახალ პლატფორმაში, რომ არც იმ პლატფორმის შემქმნელებმა და არც მიმტოვებელმა ვაშაძემ ვერაფერი გაიგო, ვერც ვერავითარი დასკვნა გამოიტანა. ეს არის რაღაც უძღები შვილის დაბრუნება. ვერავითარ აზრს, შინაარს ვერ ვხედავ ამ დაბრუნებებში, გადაადგილებებში, ხან გაქცევებში, ხან უკან მიბრუნებაში, ხან ჩახუტებაში. თუ ამ ადამიანებს ჰგონიათ, რომ საკუთარი პარტიების ტრიბუნით ერთი დარბაზიდან მეორე დარბაზში ხეტიალი შედეგის მომტანია, შეუძლიათ, ეს გააგრძელონ. რაღაც სიძველის სუნი ასდის ამ ყველაფერს და არაფრის მომტანი არ არის. ჩვენ ამ ყავლგასული ადამიანების მოწოდებების, პლატფორმების მნახველები ვართ. იქნებ ვინმემ მითხრას, რა განასხვავებს ამ ადამიანებს ერთმანეთისგან ან ამ პარტიული ორგანიზაციების განმასხვავებელი ნიშანი რა არის?

ერთადერთი განმასხვავებელი ნიშანი შეიძლება ის იყოს, რომ ხაბეიშვილი უკეთესად დახტუნავს, უფრო ინტენსიურად დარბის სარბენ ბილიკზე. არა მგონია, ვაშაძემ ამ ტემპს გაუძლოს – სარბენ ბილიკზე სირბილს. ეს თუ განასხვავებს ამ ადამიანებს და სურთ, ეს გააერთიანონ, შეეძლოთ, რომელიმე კარგ სპორტულ დარბაზში მოეწყოთ პრეზენტაცია და იქიდან უფრო მეტყველი იქნებოდა მათი მოწოდებაც, მათი მომავალი საქმიანობაც, როგორც ფიზკულტურაში დამაშვრალი ადამიანებისა.

არ გამოვრიცხავ, რომ ერთ მშვენიერ დღეს ეს პლატფორმაც ისე დაიშალოს, რომ ვერც მისმა შემქმნელებმა გაიგონ, რა უნდოდათ ერთად ხუთვარსკვლავიანი სასტუმროს ფოიეში. ეს არ არის ის პლატფორმა და პოლიტიკური ხედვა, რომელიც ხელისუფლებას მოახლოებულ არჩევნებში რაიმე სახის კონკურენციას გაუწევს. საქართველოს ხელისუფლებას დღეს ნამდვილად სჭირდება ქმედითი, საქმიან კრიტიკაზე ორიენტირებული ოპოზიცია, რომელიც, სამწუხაროდ, დღეს არ ჰყავს“, – განაცხადა გია ცაგარეიშვილმა.

„ნაციონალური მოძრაობა“ რჩება „ნაცმოძრაობად“ თავისი ანასხლეტებით. გინდ გაერთიანდნენ და გინდა ცალ-ცალკე იყვნენ, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

აღნიშნული კომენტარით მაჭარაშვილი გამოეხმაურა „ნაციონალური მოძრაობის“ და „სტრატეგია აღმაშენებლის“  გადაწყვეტილებას, რომ ამ ორ პარტიას საერთო სტრატეგია ექნება და შეიქმნება „გამარჯვების პლატფორმა“ პროდასავლური პარტიების პლატფორმაზე.

„„სტრატეგია აღმაშენებელი“, რომელიც პარლამენტში შემოვიდა ოთხი წევრით, დარჩა ორი წევრით, 2024 წლამდე, შესაძლოა, ერთი წევრით დარჩეს. „ნაციონალური მოძრაობა“ შემოვიდა 36 წევრით, ახლა ოცნი არიან. პრაქტიკულად, განახევრდნენ და 2024 წლის არჩევნებამდე რაოდენობამ შეიძლება, უფრო დაიკლოს. ანუ, ნელ-ნელა მილევად რეჟიმში არიან. ალბათ თვითონაც ნახეს კვლევები, რომ სანდოობის ხარისხი დაბლა იწევს და თქვეს, მაინც ერთიანი ვართ, მაინც ერთი მიზანი, საერთო ჯიში გვაქვს და მოდი, რაღაცნაირად გავერთიანდეთო. ეს არის მათი ძირითადი ე.წ. სტრატეგია, თორემ ვაშაძის სტრატეგიას აღმაშენებლობის რომ არაფერი ჰქონდა, ეს საზოგადოებამ დაინახა. იმიტომაც არის, რომ ის დაუბრუნდა თავის დედულეთს თუ მამულეთს, „ნაციონალურ მოძრაობას“ და, სავარაუდოდ, სიაში ჩასვამენ. ეს არის მთელი პოლიტიკური ძვრები, რაც შეიძლება, მოხდეს. ქართულ პოლიტიკაში ახლა მეტი არაფერი შეიცვლება, „ნაციონალური მოძრაობა“ რჩება „ნაცმოძრაობად“ თავისი ანასხლეტებით, გინდ გაერთიანდნენ და გინდა ცალ-ცალკე იყვნენ. ცალ-ცალკე ყოფნა არ აწყობთ, რადგან ბარიერი მაღალია და ბარიერის გადალახვის შესაძლებლობა არ აქვთ. „ნაცმოძრაობაც“ კი კითხვის ნიშნის ქვეშ რჩება, ნელ-ნელა მილევად რეჟიმში არიან. მათ სურთ, შიდა პატარა შეთანხმება წარმოაჩინონ ისე, თითქოს გლობალური ძვრები მოხდება ქართულ პოლიტიკაში, მაგრამ ასე არ იქნება“, – განაცხადა გურამ მაჭარაშვილმა.

კითხვაზე, როგორი შანსები აქვს 2024 წლის არჩევნებში ახალ პლატფორმას, მაჭარაშვილმა აღნიშნა:

„ვაშაძე ისე აქტიურად თუ იმუშავებს, როგორც აქამდე – მაგალითად, უცხოეთში სადარბაზოებში აიღებს ინტერვიუებს, ევროკავშირში აპარატის თანამშრომლის მესამე მოადგილეს შეხვდება, რა თქმა უნდა, ასეთი დონით მას და მის პარტიას წარმატება ექნება, მაგრამ თუ დაიზარა, ისინი ბარიერს ვერ გადალახავენ. მათ სერიოზულად არავინ უყურებს. მათ არავინ შეეკითხება, რა პლატფორმით გამოვლენ და როგორ მოიქცევიან არჩევნების წინ. პატრონები როგორც ეტყვიან, ისე დალაგდებიან. რა თქმა უნდა, ამბიცია აქვს ვაშაძეს, ამბიცია აქვთ გახარიას, ხაზარაძეს – მათ არ სურთ, რომ ხაბეიშვილი ჰყავდეთ ლიდერად. ახლა ეს პროცესი მიმდინარეობს, მეტი არაფერი პროცესი არაა. მათ შორის განსხვავება არაფერია. ყველამ კარგად ვნახეთ „კოკა-კოლას“ ფონზე როგორ იყვნენ ხელიხელგადახვეულები ერთი ხის ნაყოფის რტოები. ამიტომ, პოლიტიკური თვალსაზრისით, ახალ პლატფორმას არანაირი მნიშვნელობა არ ექნება, პირიქით, შეიძლება კარგიც იყოს“, -განაცხადა გურამ მაჭარაშვილმა.