მდაბიო საქციელი ვიხილეთ ხაბეიშვილის მხრიდან. წარმოუდგენელია, ადამიანმა, ვინც პარტიაში გასტროლიორად იყო წარმოდგენილი, ხან მიდიოდა, ხან მოდიოდა „ნაციონალური მოძრაობიდან“, ის ადამიანები გარიცხოს, რომლებიც წლების განმავლობაში ამ პარტიის გამარჯვებისთვის და ამ ქვეყნის კეთილდღეობისთვის იბრძოდნენ, – ამის შესახებ „ნაციონალური მოძრაობის“ წევრმა გიორგი პატარაიამ ჟურნალისტებთან განაცხადა.

მისივე თქმით, თავად პარტიიდან წასვლას არ აპირებს.

„სამარცხვინო და მდაბიო საქციელი იყო ლევან ხაბეიშვილის მხრიდან. ანალოგი თუ მოიძებნება, ეს გახლავთ, ალბათ, საბჭოთა კავშირის დროს პოლიტიკური ბიუროს წარმომადგენლებს რომ ადამიანებს პარტიიდან რიცხავდნენ და სასჯელს უწესებდნენ. წარმოუდგენელია, ადამიანმა ვინც პარტიაში გასტროლიორად იყო წარმოდგენილი, ხან მიდიოდა, ხან მოდიოდა და სეირნობდა აქეთ-იქით „ნაციონალური მოძრაობიდან“, ის ადამიანები გარიცხოს, რომლებიც წლების განმავლობაში ამ პარტიის გამარჯვებისთვის, ამ ქვეყნის კეთილდღეობისთვის და პარტიის წარმატებისთვის იბრძოდნენ. სამწუხარო და მდაბიო საქციელია მისი მხრიდან. რაც შეეხება მე მივდივარ თუ არა პარტიიდან, მე ნამდვილად არსად წავსულვარ „ნაციონალური მოძრაობიდან“ არასდროს – უკვე 22 წელია ამ პარტიაში ვარ და არც ახლა ვაპირებ წასვლას. თუ რაიმე გადაწყვეტილებას მიიღებს აღნიშნული პიროვნება, ვიხილავთ. რაც ყველაზე მთავარია, „ნაციონალური მოძრაობის“ ერთ- ერთი ყველაზე დიდი წარმატება იყო, რომ შიდაპარტიულ პროცესებში მუდმივად იყო კამათი, განსხვავებული აზრები და არასდროს არავის მოსვლია აზრად ვინმეს გარიცხვა, გამორიცხვა თუ გაგდება. სამწუხაროა ის ფაქტი, რაც გუშინ „ფორმულას“ ეთერში ვიხილეთ,“- განაცხადა პატარაიამ.

“ნაციონალური მოძრაობის” თავმჯდომარემ, ლევან ხაბეიშვილმა “ფორმულას” პირდაპირ ეთერში ხელი მოაწერა ფურცელზე, სადაც ეწერა, რომ ნიკა მელია პარტიის წევრი აღარ არის და განაცხადა, რომ მელია არ წარმოადგენს „ნაციონალურ მოძრაობას“.

„ნაციონალური მოძრაობის“ წევრის, აკაკი მინაშვილის განცხადებით, „ვარდების რევოლუციის“ 20 წლისთავზე გამართული კონფერენცია და მანიფესტიც არა ერთიანობას, არამედ პარტიის გაყოფას ემსახურებოდა.

მინაშვილის თქმით, ნიკა მელიასთან დაკავშირებით „ნაციონალური მოძრაობის“ თავმჯდომარის, ლევან ხაბეიშვილის ქმედება ძალიან სამწუხაროა.

ამასთან, აკაკი მინაშვილის შეფასებით, ახალი მენეჯმენტის პირობებში „ნაციონალური მოძრაობა“ ზიანდება.

„„ვარდების რევოლუციის“ 20 წლის თავზე, როცა „ნაციონალურმა მოძრაობამ“ კონფერენცია გამართა „ვარდების რევოლუციაზე“ და მანიფესტი გამოიტანა, ეს მანიფესტიც და კონფერენციაც, საბოლოო ჯამში, ემსახურებოდა არა ერთიანობას, არამედ პარტიის გაყოფას, იმას, რაც გუშინ დადასტურდა – პარტიიდან ადამიანების გაგდებას, რაც არასწორი, ძალიან მძიმე და სამწუხარო საქციელია. ეს არ მოუტანს პარტიას წარმატებას. ჩემი პოზიცია იგივე რჩება, კრიტიკულად ვიყავი განწყობილი ამ მენეჯმენტის მიმართ და რვა თვის განმავლობაში რა ნაბიჯებიც გადადგეს და რა გზავნილებიც ჰქონდათ, ამან კიდევ უფრო გააღრმავა ჩემი კრიტიკული დამოკიდებულება „ნაციონალური მოძრაობის“ მენეჯმენტის მიმართ. ჯერ ერთი, პარტიიდან გარიცხვა ასე არ ხდება. ადამიანები, ვინც პარტიში ჯერ მოვიდნენ, შემდეგ წავიდნენ, შემდეგ „ნაციონალურ მოძრაობას“ „სიკვდილს“ ეძახდნენ წლების წინ, ვიღაცები მიხეილ სააკაშვილზე შეურაცხმყოფელ განცხადებებს აკეთებდნენ, სინამდვილეში, ის ადამიანები „ნაციონალური მოძრაობიდან“ ვერავის გარიცხავენ. ფორმალურად რა ხდება, როგორ ხდება, რა ცვლილებები შეიტანეს იმ იდუმალ პოლიტსაბჭოზე, რომელიც ჩატარდა 8 თვის წინ, ამაზე მე ვერ მოგახსენებთ, მენეჯმენტს უნდა ჰკითხოთ. მთავარი არის, რომ ახალი მენეჯმენტის პირობებში „ნაციონალური მოძრაობა“ ზიანდება, ეს არის ძალიან დიდი პრობლემა. თუ გვინდა, რომ „ნაციონალურმა მოძრაობამ“ წარმატებას მიაღწიოს, მენეჯმენტში ცვლილებები უნდა განხორციელდეს“, – აღნიშნა აკაკი მინაშვილმა.

„ნაციონალური მოძრაობის“ თავმჯდომარემ, ლევან ხაბეიშვილმა ფურცელს, რომელზეც ეწერა, რომ ნიკა მელია პარტიის წევრი აღარ არის, გუშინ პირდაპირ ეთერში მოაწერა ხელი და განაცხადა, რომ ნიკა მელია არ წარმოადგენს „ნაციონალურ მოძრაობას“, აღარ არის პარტიის წევრი.

დეკემბერში სტატუსს ველოდებით, რითიც საქართველო მნიშვნელოვან ეტაპზე გადადის, რაც ქვეყნის ევროკავშირში გაწევრიანებას გულისხმობს, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.

თალაკვაძის თქმით, ევროკომისიის გადაწყვეტილებით კარგად გამოჩნდა, რამდენად შედეგიანი იყო რეკომენდაციების შესასრულებლად მმართველი გუნდის მიერ წარმართული სამუშაო პროცესი.

„რამდენად „ფარსი“ იყო კანდიდატის სტატუსთან დაკავშირებით შექმნილი სამუშაო ჯგუფები, ბოლოს კარგად გამოჩნდა, როცა საქართველოს ევროკომისიამ მწვანე შუქი აუნთო სტატუსის მისაღებად. ეს პირდაპირ ნიშნავს, რომ წარმართული სამუშაო პროცესი შედეგიანი იყო და ჩვენმა ხელისუფლებამ საზოგადოებასა და ევროკავშირთან ერთად შეძლო, ისტორიული გადაწყვეტილებისთვის ვიზა მიეღო. დეკემბერში სტატუსს ველოდებით, რითიც საქართველო მნიშვნელოვან ეტაპზე გადადის, რაც ქვეყნის ევროკავშირში გაწევრიანებას გულისხმობს. გეგმის შესრულების შემდეგ, რა თქმა უნდა, საქართველო მწვანე შუქს მიიღებს გაწევრიანებაზე. სტატუსის მიღების შემდეგ ჩვენი ქვეყნისთვის საგზაო რუკა სწორედ ის გეგმა იქნება, რითიც ევროკავშირში მივალთ და ევროპული ოჯახის წევრები გავხდებით“, – განაცხადა არჩილ თალაკვაძემ.

როდესაც მოგატყუებენ პირველად, შემდეგ მეორედ, მესამე მოტყუება იმას ნიშნავს, რომ გსიამოვნებს როცა გატყუებენ – „ქართული ოცნების“ ტყუილებით სიამოვნების მიღებას და სამუშაო ჯგუფებში შესვლას არ ვაპირებთ, – ეს განცხადება ჟურნალისტებთან „სტრატეგია აღმაშენებლის“ დეპუტატმა პაატა მანჯგალაძემ გააკეთა.

მანჯგალაძის თქმით, ევრორეკომანდაციების თაობაზე შექმნილ სამუშაო ჯგუფებთან დაკავშირებული წინა გამოცდილება მხოლოდ იმას ადასტურებს, რომ ხელისუფლება ოპოზიციასთან არაფრის დათახმებას არ აპირებს.

„დაახლოებით ცხრა სამუშაო ჯგუფი იყო და არც ერთ ჯგუფს ოპოზიციასთან შეთანხმებით გადაწყვეტილება არ მიუღია – ასეთი არც ერთი პრეცედენტი არ არსებობს. თუ ვინმე ერთობა და „ქართულ ოცნებასთან“ ერთად სამუშაო ჯგუფში ჯდომა უხარია, ჩვენ ამის წინააღმდეგი არა ვართ“, – განაცხადა პაატა მანჯგალაძემ.

გაარკვიეს, რომ ნიკა მელია ირიცხება, მაგრამ პარტიაში ირიცხება, თუ პარტიიდან ირიცხება, ჯერ ვერ გაარკვიეს. როგორც ჩანს, ნიკა მელია ჯერ კიდევ რჩება ლევან ხაბეიშვილის თავისტკივილად და ლევან ხაბეიშვილი – ნიკა მელიას გულისტკივილად, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.

თალაკვაძის თქმით, „ნაციონალური მოძრაობა“ დაშლის ფაზაშია.

„ნაციონალური მოძრაობა“ 2024 წლის არჩევნებს დაშლილი და დასუსტებული შეხვდება, რაც ლოგიკური შედეგია – რაც დათესეს, იმას იმკიან. სინამდვილეში, ამ პარტიას თავმჯდომარე არ ჰყავს. მათი ყოფილი ლიდერი, რომელიც დღეს პატიმრობაშია, ყველაფერს აკეთებს, რომ პარტიის შიგნით ბრძოლა იყოს და ვერავინ შეძლოს ლიდერობის მოპოვება. სწორედ ამ ხერხით ცდილობს, შეინარჩუნოს ლიდერობა და მითი, რომ თავად არის პარტიის უცვლელი ლიდერი. ამაზე მეტყველებს ყველა განცხადება და მოქმედება, რომელიც სააკაშვილსა და თავის გარემოცვას აქვთ“, – აღნიშნა არჩილ თალაკვაძემ.

„ნაციონალური მოძრაობის“ თავმჯდომარემ, ლევან ხაბეიშვილმა ფურცელს, რომელზეც ეწერა, რომ ნიკა მელია პარტიის წევრი აღარ არის, გუშინ პირდაპირ ეთერში მოაწერა ხელი და განაცხადა, რომ ნიკა მელია არ წარმოადგენს „ნაციონალურ მოძრაობას“, აღარ არის პარტიის წევრი.

საქართველოში ჩინეთის ელჩმა, ჭოუ ციენმა საქართველო-ჩინეთს შორის სტრატეგიული პარტნიორობის ფარგლებში განხორციელებულ ნაბიჯებზე ისაუბრა.

მისი თქმით, ჩინეთი ყოველთვის მოწოდებულია, დაეხმაროს საქართველოს სოციალურ-ეკონომიკური ზრდის გაუმჯობესებისთვის.

„ჩვენ უზრუნველვყავით ქალაქ გორისთვის ფინანსური დახმარება, რათა გაუმჯებესდეს სოციალური სახის აღჭურვილობა ქალაქის ირგვლივ და სოფლებში. სტრატეგიული პარტნიორობის დამყარების შემდეგ საქართველოს მთავრობის დახმარება, განავითაროს ადგილობრივი სოციალური და ეკონომიკური სახის აღჭურვილობა, ორმხრივი ურთიერთობების მნიშვნელოვანი ნაწილია. ჩვენ ასევე გვსურს, ვაჩვენოთ ჩვენი მხარდაჭერა საქართველოს სუვერენიტეტის და ტერიტორიული მთლიანობის მიმართ. ეს არის ჩვენი ორმხრივი სტრატეგიული ურთიერთობების საფუძველი. ასევე, მსურს, აღვნიშნო, რომ კოვიდის დროს ჩინეთმა უზრუნველყო 200 000-ზე მეტი ვაქცინა საქართველოსთვის და საქართველოს მოსახლეობისთვის. ამ დროს აშშ და ევროპის ქვეყნები ვაქცინების ექსპორტს კრძალავდნენ. ასევე, ჩინეთმა საქართველოს მთავრობას კოვიდის დროს მიაწოდა 1.5 მილიონი დოლარის ღირებულების დახმარება, მათ შორის, ნიღბები და ვენტილატორები კოვიდის შედეგების დაძლევის, ეკონომიკის გადატვირთვის მიზნით. როგორც სტრატეგიული პარტნიორი, ჩინეთი ყოველთვის მოწოდებულია, დაეხმაროს საქართველოს მისი მოსახლეობის სოციალურ-ეკონომიკური ზრდის გაუმჯობესებისთვის“, – განაცხადა ჩინეთის ელჩმა.