„ხაბე“ არის მკაცრი – 4 საათამდე მისცა ვადა მელიას და არ გადათქვამს! – ის კაცი შევარცხვინე, რომ აგდებენ, პანჩურს ურტყამენ და კიდევ იმ პარტიას ებღაუჭება, – ასე ეხმიანება ნაციონალური მოძრაობის თავმჯდომარის ლევან ხაბეიშვილის განცხადებას საპარლამენტო უმრავლესობის წევრი ირაკლი ზარქუა.

ზარქუას შეფასებით, მელია და ხაბეიშვილი „ხელმოცარულები“ არიან.

„მელია, ჩემო ძმაო, 4 საათამდე გაქვს ვადა, ასე რომ, ჩამოყალიბდი, გინდა ,,ნაცებში“ ყოფნა? 4-მდე მისცა ვადა, „ხაბე“ არის მკაცრი, დაუნდობელია, შეუბრალებელი, არ გადათქვამს! ვუყუროთ ახლა ამ ხელმოცარულებს. ის კაცი შევარცხვინე, „ხაბე“ რომ გამოგაგდებს პარტიიდან და მეორედ შევარცხვინე კიდევ, ისევ ამ პარტიას რომ ებღაუჭები – გაგდებენ, პანჩურს გირტყამენ ხან პირდაპირ ეთერში, ხან ეთერს მიღმა და მაინც ებღაუჭები. ჩემს „ხაბეზე“ არაფერს ვიტყვი, რაც ვთქვი, ისიც ეყოფა”, – განაცხადა ზარქუამ.

ინფორმაციისთვის, ლევან ხაბეიშვილის განცხადებით, საზოგადოებას დღეს, 16:00 საათის შემდეგ ექნება კონკრეტული ინფორმაცია იმ ადამიანების შესახებ, ვინც უერთდება მანიფესტს და შესაბამისად იქნება „ნაციონალური მოძრაობის” პოლიტიკური საბჭოს წევრი.

„მე კიდევ ერთხელ მინდა შევთავაზო ყოფილი პოლიტიკური საბჭოს წევრებს – ყველა ის ადამიანი, ვინც იყო „ნაციონალური მოძრაობის” პოლიტიკურ საბჭოში და შეუერთდება პრეზიდენტ სააკაშვილის ერთობის მანიფესტს, სადაც ცალსახად წერია ერთობის და ბიძინა ივანიშვილის წინააღმდეგ ბრძოლის მნიშვნელობაზე, მივიღებთ გადაწყვეტილებას, ეს ადამიანები იყვნენ „ნაციონალური მოძრაობის” პოლიტსაბჭოში და წარმოადგინონ პარტია“, – განაცხადა ხაბეიშვილმა.

რუსეთისთვის სანქციების დაწესებით ჩვენ მათ ეკონომიკას ზიანს ვერ მივაყენებთ, მაგრამ ეს იქნება გასროლა საკუთარ ფეხში. რა აზრი აქვს ამას? – ამის შესახებ საგარეო ურთიერთობათა კომიტეტის თავმჯდომარემ, ნიკოლოზ სამხარაძემ NPR-ის ეთერში განაცხადა.

„უკრაინული სცენარი ზუსტი ასლია იმისა, რაც საქართველოში მოხდა. ჩვენ გამოვიტანეთ გაკვეთილი, რომ როდესაც რუსეთი დაგვესხა თავს, მას მარტო ვებრძოდით. დიახ, გვქონდა დასავლეთის მორალური მხარდაჭერა, მაგრამ სამი თვის შემდეგ რუსეთთან ბიზნესი ჩვეულებრივად გაგრძელდა. ჩვენთვის მნიშვნელოვანია ჩვენი საკუთარი ინტერესები – რუსეთისთვის სანქციების დაწესებით ჩვენ მათ ეკონომიკას ზიანს ვერ მივაყენებთ, მაგრამ ეს იქნება გასროლა საკუთარ ფეხში. რა აზრი აქვს ამას? თუ ზიანს ვერ აყენებ რუსეთს, რატომ უნდა დაიზიანო საკუთარი თავი?“ – აღნიშნა სამხარაძემ.

„ნაციონალური მოძრაობის” წევრი ბესო გაზდელიანი და თბილისის რაიონული ორგანიზაციების ყოფილი თავმჯდომარეები პარტიის თავმჯდომარეს, ლევან ხაბეიშვილს თანამდებობის დატოვებისკენ მოუწოდებენ.

როგორც მათ დღევანდელ ბრიფინგზე აღნიშნეს, ლევან ხაბეიშვილისა და პარტიის ახალი მენეჯმენტის არასწორმა გადაწყვეტილებებმა გადაწყვეტილებებმა, „ნაციონალური მოძრაობა“ უმძიმეს მდგომარეობაში ჩააგდო.

„ყველანი თვალყურს ვადებთ „ნაციონალურ მოძრაობაში“ მიმდინარე იმ მძიმე პროცესებს, რამაც პრაქტიკულად, პარტია გახლიჩა. ერთობა იყო ყოველთვის უნიკალური ფორმულა იმისთვის, რომ წარმატებებისთვის მიგვეღწია. „ნაციონალური მოძრაობა“ თუ ოდესმე ძლიერი ყოფილა, სწორედ ამ ერთობის პერიოდში. სამწუხაროდ, შიდა არჩევნების შემდგომ, ყველაზე მეტად თუ რამე დაზიანდა, სწორედ ეს ერთობა იყო. დღეს აქ, რა ოფისიდანაც ჩვენ ამ მიმართავს ვწერთ, ეს ის ცნობილი ოფისია, რომელიც სამწუხაროდ, მაისის თვეში მხოლოდ და მხოლოდ ერთი მიზეზით დაგვიკეტეს, რომ ჩვენ განსხვავებულად ვფიქრობდით. მხოლოდ და მხოლოდ იმიტომ დაგვიკეტეს, რომ ნიკა გვარამიას მხარდამჭერ აქციაზე ნიკა მელიასთან ერთად მივედით. მეორე დილიდანვე ოფისი დაიკეტა, თუმცა, ოფისს ვინ ჩივის, ჩემს გვერდით დგანან ადამიანები, რომლებიც, სამწუხაროდ, ახალმა მენეჯმენტმა პარტიული სივრციდან გარიყა და ყველა პოზიციას ჩამოაცილა მხოლოდ და მხოლოდ ერთი მიზეზით, რომ ხმა არ მივეცით ლევან ხაბეიშვილს და ნიკა მელიას მხარდამჭერები ვიყავით. სამწუხარო რეალობა, რის წინაშეც დღეს ვგავართ, გამოიწვია პარტიის დღევანდელი თავმჯდომარის და ახალი მენეჯმენტის არასწორმა გადაწყვეტილებებმა, რომელმაც პარტია უმძიმეს მდგომარეობაში ჩააგდო, პრაქტიკულად, ჩიხში შეიყვანა, ორად არის გახლეჩილი. ჩვენი აზრით, ერთადერთი გამოსავალი არის ის, რომ მოქმედი თავმჯდომარე გადაადგეს“, – განაცხადა ბესო გაზდელიანმა.

„ნაციონალური მოძრაობის” თბილისის რაიონული ორგანიზაციების ყოფილი თავმჯდომარეები ლევან ხაბეიშვილს მიმართავენ, რომ თანამდებობას ნუ ჩაეჭიდება.

„ჩემო მეგობარო, ლევან, ამ სკამს ნუ ჩაეჭიდები. არ გიღირს იმად, რომ პარტიის მრავალწლიან ისტორიაში ყველაზე შავი ასოებით შევიდეს შენი თავმჯდომარეობა ისევე, როგორც დღევანდელი მენეჯმენტის. ამიტომ, მოგიწოდებთ, დაკავებული თანამდებობიდან გადადგე!“ – განაცხადა გაზდელიანმა.

რუმინეთის პარლამენტმა დეპუტატთა პალატისა და სენატის გაერთიანებულ სხდომაზე დაამტკიცა „რეზოლუცია მოლდოვის რესპუბლიკის, უკრაინის, საქართველოსა და დასავლეთ ბალკანეთის ევროპული პერსპექტივის შესახებ“.

აღნიშნულს საქართველოს საგარეო საქმეთა მინისტრი, ილია დარჩიაშვილი სოციალურ ქსელში ეხმაურება.

„დიდი მადლობა რუმინეთის პარლამენტს საქართველოს ევროპული პერსპექტივის შესახებ რეზოლუციის მიღებისთვის. ჩვენ ძალიან ვაფასებთ თქვენს მხარდაჭერას ჩვენი ქვეყნისადმი, განსაკუთრებით ევროკავშირში გაწევრიანების გზაზე ასეთ გადამწყვეტ მომენტში“, – წერს დარჩიაშვილი X-ის პირად გვერდზე.

ივანიშვილი გონიერი კაცია და დამარცხებულ რუსეთს არ გაჰყვება სამარეში, – ამის შესახებ „სტრატეგია აღმაშენებლის“ დეპუტატმა პაატა მანჯგალაძემ განაცხადა.

მანჯგალაძე გამოეხმაურა Politico-ს სტატიას, სადაც ბიძინა ივანიშვილი ე.წ. ამრევების სიაშია და ოლიგარქად არის მოხსენიებული. როგორც ოპოზიციონერმა დეპუტატმა აღნიშნა, ეს სტატია კიდევ ერთხელ ადასტურებს, რომ საერთაშორისო საზოგადოება ყველაფერს კარგად ხედავს.

„იცით, რომ აშშ-მა დაასანქცირა ფარცხალაძე, რომელიც იყო პირი ივანიშვილის გარემოცვიდან. მის ირგვლივ წრე ფართოვდება. მე ვიტყვი, რომ ივანიშვილი გონიერი კაცია და დამარცხებულ რუსეთს არ გაჰყვება სამარეში. რუსეთი დამარცხდება. ივანიშვილს განცდა ჰქონდა, რომ რუსეთი მალე მოიგებდა, იმიტომ იყო, რომ თებერვალში ღარიბაშვილმა ლამის წარმატება უსურვა რუსეთს. შემდეგ ვნახეთ, რომ რუსეთმა ვერანაირ წარმატებას ვერ მიაღწია, მეტიც დამარცხებისთვისაა განწირული უფრო და არა გამარჯვებისთვის. თუ უდიდეს შეთქმულებაში არ მონაწილეობენ საქართველოს წინააღმდეგ, ყველა გონიერი ადამიანი უნდა მიხვდეს, რუსეთს არ უნდა გაყვეს პოლიტიკურ სამარეში,“ – განაცხადა მანჯგალაძემ.

ის, ასევე, გამოეხმაურა საგარეო საქმეთა მინისტრის, ილია დარჩიაშვილის ეუთოს მინისტერიალში მონაწილეობას, სადაც, ასევე, სერგეი ლავროვი მონაწილეობს და აღნიშნა, რომ „ქართული ოცნება“ რუსეთთან პოლიტიკურ ფლირტს აგრძელებს.

„უკომპრომისოა“ ჩვენი საგარეო საქმეთა მინისტრი და ისევ დავითაშვილი გაუშვან სჯობს, რამე კონფლიქტი არ მოხდეს ლავროვთან. რა უნდა ვთქვა ამაზე? – ეს ხალხი, იმის ნაცვლად, ქართული ინტერესის გამტარებლები იყვნენ, რუსეთთან პოლიტიკურ ფლირტს აგრძელებენ, რაც რა თქმა უნდა, საქართველოს ინტერესში არ არის“, – განაცხადა მანჯგალაძემ.