ჩემთვის განსაკუთრებულად ძვირფასია ქართულ-ამერიკული ურთიერთობა, მაგრამ ეს ურთიერთობა არ ნიშნავს იმას, რომ ჩვენ უპირობოდ, ყველა მოსაზრებას უაპელაციოდ დავეთანხმოთ. თუ პარტნიორები ვართ, რა თქმა უნდა, რეკომენდაციები უნდა მივიღოთ და ამაზე მსჯელობა გავაგრძელოთ, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ სანქცირებულ მოსამართლეებზე საუბრისას „ქრონიკაში“ განაცხადა.

„დავუშვათ შეიქმნა საგამოძიებო კომისია და რა უნდა მოხდეს?! პოლიტიკოსებმა უნდა დაიბარონ პარლამენტში მოსამართლეები, მიუხედავად იმისა, რომ კონსტიტუციაში წერია: ანგარიშს ნუ მოსთხოვთ აღმასრულებელი და საკანონმდებლო ხელისუფლება მოსამართლეებს. სასამართლოს დამოუკიდებლობის პრინციპთან ჩვენ უნდა ვიყოთ სრული პატივისცემის რეჟიმში და სოლიდარობა გამოვუცხადოთ სასამართლოს.

როდესაც პოლიტიკურ საჯილდაო ქვად გადაიქცევა სასამართლო ხელისუფლებაში რომელიმე მოსამართლის ყოფნა-არყოფნის საკითხი, მაშინ უნდა შევახსენო ყველას, რომ რატომ იქმნება იუსტიციის საბჭო კონსტიტუციის მიხედვით“, – აღნიშნა მიხეილ სარჯველაძემ.

აშშ-ის სახელმწიფო მდივნის, ენტონი ბლინკენის განცხადებით, აშშ-მა მოსამართლეებს მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს, მნიშვნელოვან კორუფციულ საქმიანობაში მათი ჩართულობის მოტივით, სანქციები დაუწესა.

აშშ-ის მიერ 4 ქართველი მოსამართლის სანქცირების შემდეგ, ოპოზიცია პარლამენტში სასამართლო სისტემის შემსწავლელი დროებით საგამოძიებო კომისიის შექმნას ითხოვს.

პარლამენტის 18 აპრილის პლენარულ სხდომაზე სასამართლოსთან დაკავშირებით დროებითი საგამოძიებო კომისიის შექმნის საკითხისთვის უნდა ეყარათ კენჭი, თუმცა, კვორუმის არარსებობის გამო კენჭისყრა ვერ შედგა.

სასამართლოს შესახებ საგამოძიებო კომისიის შექმნაზე კენჭისყრა ისევ კვორუმის არარსებობის გამო ვერც 19 და 20 აპრილს შედგა. ამის მიზეზი მმართველი გუნდის პოლიტიკური გადაწყვეტილება იყო.

„მოვდივარ“ – ამ სახელწოდებით 30 აპრილს რესპუბლიკის მოედანზე აქცია გაიმართება. აქციის ერთ-ერთი ორგანიზატორი, „ქართული ოცნების“ ყოფილი წევრი ზაზა პაპუაშვილი მედიასთან საუბრისას აცხადებს, რომ შეკრების მიზანია საზოგადოების გაერთიანება და ქვეყნის წინაშე მდგარი განსაცდელების თავიდან აცილება.

„ის განსაცდელებიც, რაც შეიძლება, ქვეყანას შეექმნას, უნდა ავიცილოთ თავიდან. ამდენი შეურაცხყოფა, ბრძანებები, რაღაცები დაანონსებულია ომები და მაიდნები და… ამას სჭირდება საზოგადოების შეკრება და პროტესტის გამოხატვა, რომ საქართველოს უმრავლესობა არ ფიქრობს ისე, როგორც ვინმე ტვინგადახრილი ადამიანი. საზოგადოებას უნდა გააჩნდეს ძალა, რომ ნეგატიური პროცესები არ განვითარდეს ქვეყანაში“, – ამბობს პაპუაშვილი.

მისი თქმით, საქართველოს არიდებული აქვს „ის უბედურება რაც სხვა ქვეყნებშია“.

„არასდროს არ მითქვამს მე, რომ ხელისუფლებაში ყოფნა იოლია. დღესდღეობით ის უბედურება რაც სხვა ქვეყნებშია, ჩვენთან ეს არიდებულია – მოდი, მადლობა გადავუხადოთ ხელისუფლებას. ჩვენ უნდა ვითანამშრომლოთ ხელისუფლებასთან, ეს შეკრება დანაწევრებისკენ კი არ არის, არამედ საზოგადოების გაერთიანებისკენ, რომ მოტივირებული იყო ხელისუფალი, ჯარი, პოლიციელი და ყველა ჩვენგანი. ქართველები ვიგებთ, როცა სრული ერთიანობა გვაქვს ერთ საკითხში მაინც, რომ არ ჩამოინგრეს ჩვენი ქვეყანა. საქართველო უპირველეს ყოვლისა – ეს არის ჩვენი შეკრების არსი“, – აცხადებს პაპუაშვილი.