იმპიჩმენტთან დაკავშირებით არც ერთ პარტიასთან კონსულტაციები არ გვქონია და ეს საკითხი დღის წესრიგში არ დგას, რომ ვინმესთან კონსულტაციები გავმართოთ, – ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა განაცხადა, რითაც უპასუხა კითხვას, გეგმავს თუ არა მმართველი გუნდი ოპოზიციის რომელიმე ნაწილთან კონსულტაციებს, რომ იმპიჩმენტისთვის საჭირო 100 ხმა ჰქონდეს.

მისივე თქმით, იმპიჩმენტის პროცედურის დაწყების გარდა, გუნდს, რომელიც „სამართლებრივი სახელმწიფოს პრინციპებით ხელმძღვანელობს, სხვა სივრცე არ დარჩა“.

„ეს იყო ერთადერთი გზა, რომელიც ჰქონდა მმართველ პარტიას დარჩენილი, როცა სახეზეა საქართველოს უზენაესი კანონის, კონსტიტუციის უხეშად დარღვევა, სხვა სივრცე არ რჩება სამართლებრივი სახელმწიფოს პრინციპებით მოხელმძღვანელე გუნდს, რომ მიიღოს შესაბამისი გადაწყვეტილება. ყველამ კეთილი უნდა ინებოს და პატივი სცეს ქვეყნის უზენაეს კანონს.

რაც შეეხება კითხვას კონსტიტუციის 78-ე მუხლით ხომ არ იხელმძღვანელა პრეზიდენტმა და ეს ხომ არ აძლევს მის ქმედებას გამართლების საფუძველს, ოპონენტები მთავარს ტოვებენ, როცა ამბობენ, რომ ყველა უწყებამ ყველაფერი უნდა გააკეთოს, რომ ევროინტეგრაციას ხელი შეუწყოს, თუმცა, მთავარია გამოტოვებული მიზანმიმართულად, თავიანთი უფლებამოსილების ფარგლებში – სამი სიტყვაა გამოტოვებული, ვინც ამას გეუბნებათ. ეს იმას ნიშნავს, რომ პრეზიდენტმა სწორედ საქართველოს მთავრობის თანხმობით შეიძლება შეიტანოს წვლილი და შესაბამისმა კონსტიტუციურმა ორგანოებმა, მათი უფლებამოსილების ფარგლებში, წინააღმდეგ შემთხვევაში ქაოსს მივიღებთ. როგორ წარმოგიდგენიათ, ყველა უწყება ერთმანეთის კომპეტენციაში ისე ერეოდეს, რომ არავინ არავის აზრს არ ეკითხებოდეს, სამართლებრივ პრინციპებს და წესებს არ იცავდეს. ასე როგორ შეიძლება ხელი შეეწყოს ევროინტეგრაციას?”- განაცხადა ოხანაშვილმა.

დეპუტატი, ასევე, გამოეხმაურა გერმანიის ბუნდესტაგის საგარეო საქმეთა კომიტეტის თავმჯდომარისა და ევროპარლამენტარ მარკეტა გრეგოროვას კრიტიკულ განცხადებებს და ევროპელ კოლეგებს ურჩევს, „ჯერ გაერკვნენ, რას ითვალისწინებს საქართველოს კონსტიტუცია“.

„ყველას მოვუწოდებ, პატივი სცენ ჩვენი ქვეყნის უზენაეს კანონს ისევე, როგორც ჩვენ ვცემთ ევროპელი კოლეგების და მათი ქვეყნების უზენაეს კანონს. დამისახელეთ რომელიმე ევროპული, სამართლებრივი სახელმწიფო, სადაც პრეზიდენტის მხრიდან ხდება კონსტიტუციის უხეშად დარღვევა, დაასახელონ ამ ადამიანებმა, ვინც ასე უხეშად საუბრობს და ცდილობს ჩაერიოს ჩვენი ქვეყნის შიდა საკითხში, დაასახელონ როგორ იქცევიან და იქ როგორ ხდება ასეთი გადაწყვეტილების მიღება, ასევე თუკი ასეთი რამ მოხდება, დაცული უნდა იყოს თუ არა მათი კონსტიტუცია.

ქალბატონი გრიგოროვა არ არის მხოლოდ ჩვენი პარტნიორი, ის აკეთებს განცხადებებს, რომელიც არ შეეფერება პარტნიორობას და ქვეყნის მიმართ გულშემატკივრობას, მითუმეტეს, არც ჩვენი ხალხისადმი გულშემატკივრობას. ჩვენ გვყავს ბევრი ნამდვილი გულშემატკივარი, პარტნიორი, რომელიც მხარს უჭერენ ქვეყნის, ხელისუფლების, ხალხის მთალიანად ევროინტეგრაციას, მაგრამ არა ისეთი განცხადებებით, რომელსაც გრეგოროვა აკეთებს,“- განაცხადა ოხანაშვილმა.

„ევროპული საქართველოს“ თავმჯდომარე, გიგა ბოკერიას განცხადებით, „ქართული ოცნების“ მიერ საქართველოს პრეზიდენტის, სალომე ზურაბიშვილის მიმართ იმპიჩმენტის პროცედურის დაწყების შესახებ სპეკულირება, თუ ზუსტად რაზეა გათვლილი ეს ნაბიჯი, არაფრის მომტანია.

ბოკერია აღნიშნავს, რომ „ქართული ოცნება” ისტორიული მომენტის გამოყენების ნაცვლად, სამარცხვინო მასკარადით არის დაკავებული.

„მთავარი დასკვნა, რაც აქამდეც უნდა გამოგვეტანა და ახლაც არის, რომ რეჟიმი, რომელიც ამ ისტორიულ მომენტში, საქართველოს ნატო-ში წევრობისა და ევროკავშირთან დაახლოების საქმეში სრული ენერგიის და კონცენტრაციის ჩადების ნაცვლად, დაკავებულია სამარცხვინო მასკარადით, რაც ახლა შემოგვთავაზეს, არის გასაშვები. ამათი გაშვების გარეშე ჩვენი ისტორიული მისიის შესრულებისა და დაცულ, თავისუფალ ქვეყნად საქართველოს შედგომის შანსი არის ნულის ტოლი”, – აღნიშნავს გიგა ბოკერია.

ცნობისთვის, „ქართული ოცნება“ საქართველოს პრეზიდენტ სალომე ზურაბიშვილის მიმართ იმპიჩმენტის პროცედურას იწყებს. შესაბამისი განცხადება „ქართული ოცნების“ თავმჯდომარემ ირაკლი კობახიძემ პრესკონფერენციაზე გააკეთა. კობახიძის განმარტებით, იმპიჩმენტის პროცედურა დაიწყება მიუხედავად იმისა, რომ მის აღსრულებას პარლამენტში ოპოზიციის მხარდაჭერაც სჭირდება.

და ახლაც, როცა მორიგ ჯერზე გაჩნდა შანსი, მიუხედავად რუსული და ანტიდემოკრატიული მთავრობისა, ქართველმა ხალხმა მისი უდიდესი სურვილისა და ისტორიული დამსახურების გამო მიიღოს სტატუსი, მთავრობა საბოტაჟის მორიგ და ყველაზე სამარცხვინო აქტს ახორციელებს, – ამის შესახებ უკრაინის დეპუტატი, ფრაქცია „ხალხის მსახურის“ თავმჯდომარე, დავით არახამია სოციალ ქსელში წერს, რითაც „ქართული ოცნების“ მიერ საქართველოს პრეზიდენტ, სალომე ზურაბიშვილის მიმართ იმპიჩმენტის პროცედურის დაწყებას ეხმაურება.

როგორც არახამია წერს, „ქართული ოცნება“ ღიად ვერ ამბობს უარს ევროკავშირის წევრობის კანდიდატის სტატუსზე, მაგრამ ყველაფერს აკეთებს, რომ საქართველოს ევროკავშირმა უარი უთხრას სტატუსის მინიჭებაზე.

„საქართველოს პრეზიდენტის ევროპულ ტურნეზე “ქართული ოცნების” რეაქცია სრულიად აშიშვლებს იმ რეალობას, რომ დღეს ივანიშვილი და მის უკან მდგარი რუსეთი ათამაშებენ 2013 წლის იანუკოვიჩის სცენარს, ოღონდ პირიქით: რაკიღა ახსოვთ იანუკოვიჩის ისტორიის დასასრული, თვითონ ღიად ვერ ამბობენ უარს სტატუსზე, მაგრამ ყველაფერს აკეთებენ, რომ საქართველოს ევროკავშირმა უთხრას უარი სტატუსის მინიჭებაზე. ამ მიზნით სტატუსის საქართველოსთვის მინიჭების გადაწყვეტილება მომწიფდება თუ არა, იჭერენ ქვეყნის ყველაზე გავლენიან და კრიტიკულ ჟურნალისტს, იღებენ რუსულ კანონს, აღადგენენ ფრენებს რუსეთთან. და ახლაც, როცა მორიგ ჯერზე გაჩნდა შანსი, მიუხედავად რუსული და ანტიდემოკრატიული მთავრობისა, ქართველმა ხალხმა მისი უდიდესი სურვილისა და ისტორიული დამსახურების გამო მიიღოს სტატუსი, მთავრობა საბოტაჟის მორიგ და ყველაზე სამარცხვინო აქტს ახორციელებს.

სავსებით ცხადია, რომ „ქართული ოცნება” იბრძვის იმისთვის, რომ შეასრულოს რუსული დაკვეთა და საქართველო ევროპული სტატუსის გარეშე დატოვოს“,- წერს არახამია საკუთარ „ფეისბუქ“ გვერდზე.

ცნობისთვის, „ქართული ოცნება“ საქართველოს პრეზიდენტ სალომე ზურაბიშვილის მიმართ იმპიჩმენტის პროცედურას იწყებს. შესაბამისი განცხადება „ქართული ოცნების“ თავმჯდომარემ ირაკლი კობახიძემ პრესკონფერენციაზე გააკეთა. კობახიძის განმარტებით, იმპიჩმენტის პროცედურა დაიწყება მიუხედავად იმისა, რომ მის აღსრულებას პარლამენტში ოპოზიციის მხარდაჭერაც სჭირდება.