პარლამენტის ვიცე-სპიკერის, არჩილ თალაკვაძის განცხადებით, პენსიების 1000 ლარამდე ზრდასთან დაკავშირებით პარტია „ლელოს“ დაპირება წმინდა წყლის პოპულიზმი და რეალობას მოწყვეტილია.

მისივე თქმით, რა ვადებშიც „ლელო“ მოქალაქეებს პენსიის 1000 ლარამდე გაზრდას ჰპირდება, მათემატიკურ ლოგიკას მოკლებულია.

როგორც თალაკვაძე აღნიშნავს, პენსია ინდექსირებულია და მომავალ წლებში, ეკონომიკურ ზრდასთან ერთად ავტომატურად გაიზრდება.

„ეს არის წმინდა წყლის პოპულიზმი და რა თქმა უნდა, პოპულიზმი აზიანებს ჯანსაღ პოლიტიკურ პროცესს. რა თქმა უნდა, ეს არის არარეალური დაპირება და რეალობას მოწყვეტილია. პენსიონერებს სახელმწიფოსგან არა მხოლოდ საპენსიო მხარდაჭერა, არამედ სხვა სოციალური ბენეფიტები აქვთ, დაწყებული სატრანსპორტო შეღავათებიდან, გაგრძელებული ჯანდაცვით“, – განაცხადა თალაკვაძემ.

ირაკლი კობახიძემ პარლამენტში „სტრატეგია აღმაშენებლის“ ლიდერის, გიორგი ვაშაძის კითხვას უპასუხა, რომელიც უმუშევრობას ეხებოდა. პრემიერ-მინისტრობის კანდიდატმა აღნიშნა, რომ 2012 წელს, მხოლოდ ბიზნეს სფეროში, 543 ადამიანი იყო დასაქმებული, 2023 წელს კი მათი რაოდენობა 758 ათასამდე გაიზარდა.

„ეს ნიშნავს იმას, რომ მარტო ბიზნეს-სექტორში შეიქმნა 224 ათასი სამუშაო ადგილი. ეს არის სტატისტიკა. ამ ადამიანებს შეაქვთ გადასახადები ბიუჯეტში. ბიუჯეტი რომ იყო 8,5 მილიარდი და ახლა თითქმის 29 მილიარდი ლარი რომ არის, მარტო მე და თქვენ ხომ არ შეგვაქვს ეს გადასახადები ბიუჯეტში? შეაქვთ ადამიანების. ანუ, მარტო ბიზნეს სექტორში შექმნილია 224 ათასი ახალი სამუშაო ადგილი. რამდენჯერ გავიმეორო ეს ყველაფერი?

თან თვითონაც არ ესწრება [ვაშაძე] ამ სხდომას. ასე იცის ხოლმე, რაღაცას იტყვის, ჩაწერს ვიდეოს, მერე დებს უმრავლესობის დეპუტატების ვიდეოებს და აჩვენებს, ვითომ უმრავლესობის დეპუტატები ამ ყველაფერს უსმენენ. არ ვიცი, შეიძლება მის ამომრჩეველზე იყოს ეს გათვლილი, მაგრამ ისიც მინდა გითხრათ, რომ ამომრჩეველი ძალიან გაიზარდა და სწორედ ამის გამოა, რომ კონკრეტულად გიორგი ვაშაძის პარტია 20%-ს არის წამოცდენილი, როცა 30% აიღეს სულ რაღაც 2 წლის წინ თვითმმართველობის არჩევნებზე. ახლა მათი მაჩვენებელი არის 18%.

ასეთი მანიპულაციები უკვე აღარ იყიდება საზოგადოებაში. საზოგადოება არის გაზრდილი. შესაბამისად, ვურჩევ ჩვენს ოპონენტებს, კონკრეტულად კი გიორგი ვაშაძეს, რომ ნაცვლად მანიპულაციებისა, მეტი აქცენტი გააკეთოს საფუძვლიან კრიტიკაზე. თუმცა, როგორც ჩანს, ასე აფასებს, რომ არ აწყობს საფუძვლიანი კრიტიკა და ურჩევნია ციფრებით მანიპულირება. ესეც დემოკრატიის ნაწილია. ეს არის მისი არჩევანი“, – განაცხადა კობახიძემ.

მთელი ქვეყანა თუ გაგიჟდა და სალომე ზურაბიშვილი მოუნდათ ლიდერად, დავფიქრდებით, სხვა შემთხვევაში მხოლოდ საარჩევნო და ევროპის საკითხებზე შეიძლება ლაპარაკი, – ამის შესახებ „სტრატეგია აღმაშენებლის“ წევრმა, პაატა მანჯგალაძემ საქართველოს პირველ არხს განუცხადა.

კითხვაზე, თუ ექნებათ საუბარი საქართველოს პრეზიდენტთან, მანჯგალაძე პასუხობს:

„ევროკავშირის რეკომენდაციებზე – კი ბატონო; არჩევნების გაყალბებაზე – კი ბატონო; თუ მიხეილ სააკაშვილის შეწყალებას აპირებს – კი ბატონო.

თუ მთელი ქვეყანა გაგიჟდა და სალომე ზურაბიშვილი მოუნდათ ლიდერად, დავფიქრდებით, სხვა შემთხვევაში, ვფიქრობთ, რომ მხოლოდ საარჩევნო და ევროპის საკითხებზე შეიძლება ლაპარაკი“, – აღნიშნა მანჯგალაძემ.

სისუსტედ არ მინდა ჩამეთვალოს, არსებულ ბარიერს უკვე შეგუებული ვართ, მაგრამ შემთხვევით, ხომ არ აპირებთ, ამ რაღაცნაირი დეპოლარიზაციის აურის გათვალისწინებით, საარჩევნო ბარიერიც დაწიოთ, ან ხომ არ დაუჭერთ მხარს? – ამ კითხვით „გირჩის“ ერთ-ერთმა ლიდერმა ვახტანგ მეგრელიშვილმა პრემიერ-მინისტრობის კანდიდატს, ირაკლი კობახიძეს მიმართა.

მეგრელიშვილის თქმით, მთავარი პრობლემა ისაა, რომ ოპოზიცია და ხელისუფლება ტელევიზიებში ერთმანეთთან დებატებში მონაწილეობას არ იღებენ.

„ბატონო ირაკლი, მადლობა მინდა გითხრათ, გუშინ პასუხი რომ გამეცით, ყველაზე მნიშვნელოვანი იყო, რომ თქვით, „ქართული ოცნება“ ეკლექტიკური პარტიააო, რადგან ეკლექტიკური პარტიაა, კონკრეტულად უნდა გკითხოთ, იდეიდან გამომდინარე ვერ გამოვიცნობ, ამიტომ თქვენი პასუხი მჭირდება. როგორც ხედავთ, მაგალითად, „ნაციონალური მოძრაობის“ დამოკიდებულება შეცვლილია, სხვანაირად იქცევა, გუშინ ერთ-ერთი ძალიან კარგი განცხადება გააკეთეთ, როცა თქვით, რადიკალური ოპოზიცია ქვეყნის მტრობას არ ნიშნავსო, ჰოდა, ეს კომბინაციაში დეპოლარიზაციისკენ მიმართული განცხადებებია, საქმის თვალსაზრისით რომ წარმოვიდგინოთ, ორი რაღაც მგონია მნიშვნელოვანი. პირველი, დაიწყოს მართლა საუბარი, დებატები. ჩვენი მთავარი პრობლემაა, ცალ-ცალკე ვსხედვართ და ერთმანეთს ვლანძღავთ, თქვენი ტელევიზიები გაიხსნება თუ არა ოპოზიციისთვის დებატებისთვის, ერთი ეს კითხვა მაქვს.

მეორე კითხვა ასევე დეპოლარიზაციას უკავშირდება. ბიძინა ივანიშვილმა თქვა, ოპოზიცია განადგურებულიაო, თქვენ გაქვთ ნათქვამი, თუ ევროკავშირში მიგვიღებენ, ბარიერს დავწევთო. სისუსტედ არ მინდა ჩამეთვალოს, არსებულ ბარიერს უკვე შეგუებული ვართ, მაგრამ შემთხვევით, ხომ არ აპირებთ, ამ რაღაცნაირი დეპოლარიზაციის აურის გათვალისწინებით ბარიერიც დაწიოთ, ან ხომ არ დაუჭერთ მხარს? ეს კითხვები მქონდა, დაგვპატიჟებთ ტელევიზიაში თუ არა, დაწევთ თუ არა ბარიერს?“ – განაცხადა მეგრელიშვილმა.

„კარენოი ნაცები“ ძალიან აკადემიურები ჩანან. ხმის ტონალობაშიც ეტყობათ. შესძლებიათ. ეს გახარიები და „ლელო“ რა დღეში არიან? მარგინალები და რადიკალები გახდნენ, – ამის შესახებ რეგიონული პოლიტიკისა და თვითმმართველობის კომიტეტის თავმჯდომარის პირველმა მოადგილემ ირაკლი ზარქუამ განაცხადა.

„რასთან გვაქვს საქმე? ორი დღეა ვკითხულობ. გუშინ საერთოდ არ შემოვიდნენ დამწვარი მუსტანგის მიმდევრები. საერთოდ არ მოუსმინეს. შესაძლებლობა გაქვს, რომ კითხვა დაუსვა პრემიერობის კანდიდატს და დღეს საერთოდ არ შემოვიდნენ. გახარიების არ მიკვირს. გაიშიფრნენ და ამიტომ გაბრაზებულები არიან. სამეგრელოში ხალხი მოატყუეს „ქართული ოცნების“ მეორე პარტია ვართო და ამით მოატყუეს საზოგადოება. „ნაცები“ უტყდებათ. იციან, რომ ისინი გაკოტრებულები არიან. აბა სამეგრელოში და რუსთავში კოალიცია ვინ შეუქმნა „ნაცებს“? მე მივმართავ ბატონ კირკიტაძეს, ის არის ძველი და ნაღდი „ნაცი“, მიიღეთ თქვენს შემადგენლობაში, გაშიფრულები არიან უკვე. ვერ გადალახავენ ზღვარს და გაგიჭირდებათ მერე. მიიღეთ გახარიები და „ლელოს“ ვაცადოთ მუსტანგით „კატაობა“, – განაცხადა ზარქუამ.

ყველაფერი უნდა გაკეთდეს, რათა გავაძლიეროთ ქართული საზოგადოება, მისი სოციალური სტრუქტურა, ხელი შევუწყოთ არა ხელოვნური ფსევდოელიტების, არამედ ჯანსაღი სამოქალაქო საზოგადოების ფორმირებას, – ამის შესახებ საქართველოს პრემიერმინისტრობის კანდიდატმა, ირაკლი კობახიძემ პარლამენტის პლენარულ სხდომაზე განაცხადა.

კობახიძის თქმით, მხოლოდ სტრუქტურულად გამართულ საზოგადოებას შეუძლია, უზრუნველყოს ქართული სახელმწიფოს წინაშე მდგარი ამოცანების მაქსიმალურად ეფექტიანად გადაჭრა.

„ამ მიზნის მიღწევაში განსაკუთრებული როლი უნდა შეასრულონ განათლების, მეცნიერებისა და ახალგაზრდობის, კულტურისა და სპორტის სამინისტროებმა. საჭიროა მეტი რესურსის ინვესტირება განათლების, მეცნიერების, კულტურისა და სპორტის განვითარებაში, ახალგაზრდების სტიმულირებაში. განსაკუთრებული ყურადღება უნდა დავუთმოთ პედაგოგებს, ექიმებს, ჩვენი საზოგადოების სხვა გამორჩეულ წარმომადგენლებს. შესაბამისი სახელმწიფოებრივი გადაწყვეტილებები დარგის წარმომადგენლებთან მჭიდრო კონსულტაციის საფუძველზე უნდა იქნას მიღებული. ეს არის ყველაზე სწორი გზა საქართველოში ნამდვილი სამოქალაქო საზოგადოების ჩამოყალიბებისკენ“, – აღნიშნა ირაკლი კობახიძემ.

წარმატებას ვუსურვებთ ირაკლი კობახიძეს პრემიერ-მინისტრის პოსტზე. საქართველოს საკეთილდღეოდ, საქართველო-გერმანიის პარტნიორობისა და მეგობრობის საკეთილდღეოდ, – ამის შესახებ საქართელოში გერმანიის ელჩმა პეტერ ფიშერმა პარლამენტში ჟურნალისტებს განუცხადა.

ელჩის თქმით, მათთვის უმთავრესი საკითხია საქართველოს ევროინტეგრაციის პროცესი.

„ჩვენთვის ყველაზე მნიშვნელოვანი ნაწილია ევროკავშირში ინტეგრაციის პროცესი. მან ამაზე ყურადღება გაამახვილა და განაცხადა, რომ სწრაფად და შეუფერხებლად განახორციელებს ამას. ეს არის ის, რაც ჩვენ გვსურს, ჩვენ ამაზე ერთადა ვიმუშავებთ“, – აღნიშნა ელჩმა.