ფრაქცია „ქართული ოცნების“ თავმჯდომარის, მამუკა მდინარაძის განცხადებით, „ნაციონალურ მოძრაობაში“ არა გაჯანსაღების, არამედ დაშლის პროცესი მიმდინარეობს.

ამასთან, მდინარაძის თქმით, პარტიაში მყოფი ადამიანები თავიანთი პატრონების დავალებების შესაბამისად მოქმედებენ და როგორც დააჯგუფებენ, ისე გადალაგდებიან.

„ვინ ეკითხებათ, ვინ ვისკენ იქნება? რასაც დაავალებენ, იმას გააკეთებენ. არცერთ მათ ტელევიზიას არ ეკითხება, ვისკენ იქნება, ისევე, როგორც ე.წ. პოლიტიკოსებს. მათ როგორც დააჯგუფებენ პატრონები, ისე გადალაგდებიან. ჩოხატაურში ჩავარდნენ და ერთი თავისიანს ლობირებდა, მეორე – თავისიანს და გაწევ-გამოწევა იყო. ისინი ამას გაჯანსაღების პროცესად ფუთავენ და ამაზე ვიმსჯელოთ? კი არ გაჯანსაღდნენ, დაიშალნენ, ჩამოიშალნენ და ერთმანეთის ნაძარცვ ფულებს ვერ იყოფენ. საინტერესოა, რომ მათ ერთი პატრონი ჰყავთ და საარჩევნოდ ის დაალაგებთ, დავალებებს მისცემენ და ასე იმოქმედებენ. მათ არავინ ეკითხებათ, საით იქნებიან. რომ დაავალონ, გახარია, ხაბეიშვილი, ვაშაძე ერთად იქნებიან“, – აღნიშნა მამუკა მდინარაძემ.

ლოგისტიკური შესაძლებლობების დივერსიფიკაცია ჩინეთსა და ევროპას შორის ძალიან მნიშვნელოვანია „სარტყლისა და გზის“ ინიციატივისთვის, შუა დერეფანი მნივნელოვანია ჩინეთ-ევროპის ლოგისტიკისთვის, რადგან ჩვენ არ გვაქვს სხვა არჩევანი, მხოლოდ ჩრდილოეთის ხაზი, – ამის შესახებ საქართველოში ჩინეთის ელჩმა, ჭოუ ციენმა განაცხადა.

ელჩის განცხადებით, შუა დერეფანი არ არის მხოლოდ ლოგისტიკა.

„ეს ნიშნავს, რომ ტრანსპორტირების უსაფრთხოება ჩინეთსა და ევროკავშირს შორის არ არის ისეთი, როგორიც უნდა იყოს. ასე რომ, შუა დერეფანი, შესაძლოა, იყოს ძალიან მნიშვნელოვანი. შუა დერეფანი არ არის მხოლოდ ლოგისტიკა, ჩვენ გვსურს, სარგებელი მივიღოთ ტურიზმიდანაც. როგორც ჩინეთში ვამბობთ, თუ გინდათ, გამდიდრეთ, პირველ რიგში, ააშენეთ გზები. ასე რომ, შუა დერეფანი მნიშვნელოვანია საქართველოს სამომავლო კეთილდღეობისთვის“, – განაცხადა ელჩმა.

ამასთან, როგორც საქართველოში ჩინეთის ელჩმა აღნიშნა, კონფერენცია, რომელიც დღეს თბილისში იმართება, ეხება „ერთი სარტყელისა და ერთი გზის“ ინიციატივის მეათე წლისთავს, ჩინეთის მოდერნიზაციას და ახალ შესაძლებლობებს ჩინეთისა და საქართველოს ურთიერთობებში.

„ეს ძალზეც მნიშვნელოვანია, რადგან სულ რაღაც ერთი თვის წინ ჩინეთმა და საქართველომ გამოაქვეყნეს შეთანხმება სტრატეგიული პარტნიორობის შესახებ. ეს ნიშნავს, რომ ორმხრივი ურთიერთობები ახალ ეტაპამდე გაიზარდა. ეს ნიშნავს მეტ ინვესტიციებს, კონტაქტებს, განსაკუთრებით ეს ეხება შუა დერეფანს, „ერთ გზას და ერთ სარტყელს“, რომელიც გაძლიერდა ახალ დონემდე. ჩემი აზრით, ეს მნიშვნელოვანია არა მხოლოდ ჩინეთისთვის, არამედ საქართველოსთვისაც“, – განაცხადა ჩინეთის ელჩმა.

ჩვენ ყოველთვის მხარს ვუჭერთ საქართველოს ტერიტორიულ მთლიანობას და ეს ორ მთავრობას შორის წარსულში გაფორმებულ არაერთ დოკუმენტშია აღნიშნული, – ამის შესახებ ჩინეთის სახალხო რესპუბლიკის ელჩმა, ჭოუ ციენმა განაცხადა, რითაც უპასუხა კითხვას, თუ რატომ არ არის მკაფიო ჩანაწერი ჩინეთის მხრიდან საქართველოს ტერიტორიული მთლიანობის აღიარების შესახებ ორ ქვეყანას შორის ახლად გაფორმებულ სტრატეგიული თანამშრომლობის დოკუმენტში.

„ვფიქრობ, ეს გამიზნულად შეცდომაში შეყვანის მცდელობა. ჩვენ ყოველთვის მხარს ვუჭერთ საქართველოს ტერიტორიულ მთლიანობას და ეს ორ მთავრობას შორის წარსულში გაფორმებულ არაერთ დოკუმენტშია აღნიშნული. აქვე ყურადღებას გავამახვილებდი იმაზე, თუ რატომ უჭერს მხარს საქართველო „გლობალური უსაფრთხოების ინიციატივის“. აღნიშნული იმიტომ ხდება, რომ ინიციატივის უმნიშვნელოვანესი ნაწილი გაეროს წესდების პატივისცემაა. ეს იმას ნიშნავს, რომ ჩინეთი პატივს სცემს ყველა ქვეყნის სუვერენიტეტსა და ტერიტორიულ მთლიანობას. სწორედ ამიტომაა საქართველო „გლობალური უსაფრთხოების ინიციატივის“ წევრი. შესაბამისად, იმაზე საუბარი რომ იქ აფხაზეთი და სამხრეთ ოსეთი მოხსენიებული არაა, გამიზნულად შეცდომაში შეყვანაა“, – განაცხადა ჭოუ ციენმა.

ჩინეთი და საქართველო, ორივე, დამოუკიდებელი ქვეყნები არიან. ჩვენ გვაქვს უფლება, გავაკეთოთ არჩევანი, ვინ არის ჩვენი პარტნიორი, ვინ არის ჩვენი სტრატეგიული პარტნიორი, – ამის შესახებ საქართველოში ჩინეთის ელჩმა, ჭოუ ციენმა განაცხადა.

მისივე თქმით, ჩინეთსა და ევროკავშირს ასევე აქვთ სტრატეგიული პარტნიორობა.

„ჩემი პირადი მოსაზრებაა, რომ ჩინეთსა და ევროკავშირის გარეშე შუა დერეფანში წარმატებას ვერ მივაღწევთ. რატომ? იმიტომ, რომ შუა დერეფანში მნიშვნელოვანია ლოგისტიკა ჩინეთსა და ევროკავშირს შორის. ეს არის საწარმოო ძალა და ის საქონელი, რასაც ჩინეთი აწარმოებს, ასევე სამომხმარებლო სივრცე ევროკავშირში. ეს ნიშნავს, რომ ჩინეთისა და ევროკავშირის მხარდაჭერის გარეშე შუა დერეფანში წარმატება არ იქნება. მაქვს ინფორმაცია, რომ ევროკავშირი შუა დერეფანში ძალიან აქტიურია და ვფიქრობ, რომ ეს კიდევ ერთი მნიშვნელოვანი პლატფორმაა ჩინეთ-ევროკავშირის თანამშრომლობისთვის. ეს პრობლემა არ არის საქართველოსთვის, შესაძლოა, პირიქით“, – განაცხადა საქართველოში ჩინეთის ელჩმა, ჭოუ ციენმა.

სამწუხაროა ჩვენი ზოგიერთი მხარდაჭერის შეფასება. არ ვიტყვი, რომ ეს კარგია, ის პროცესები, რაც იყო, ნაწილობრივ დამაზიანებელი იყო, როცა ჩვენი ცალკეული ლიდერები თუ პარტიის წევრები პირდაპირ პარტიაზე გადავიდნენ, – ამის შესახებ ფრაქცია „ნაციონალური მოძრაობის“ წევრმა, დავით ხაჯიშვილმა განაცხადა.

მისი თქმით, ვინც კრიტიკულად აფასებს ამა თუ იმ პროცესს, რამდენიმე თვეში თავიანთ პოზიციას გადააფასებენ.

„ახლა პარტია სწორ გზას ადგას, გამოჯანმრთელების გზას, რადგან ჩვენ ბევრი რამე გადავაფასეთ, შევისწავლეთ და უკვე ვძლიერდებით იმ დონემდე, რომ, სხვა ოპოზიციურ პარტიებთან ერთად, „ქართული ოცნების“ დამარცხება შეგვიძლია. დარწმუნებული ვარ, ვინც კრიტიკულად აფასებს ამა თუ იმ პროცესს, რამდენიმე თვეში თავიანთ პოზიციას გადააფასებენ. დავსუსტდით და ახლა ვძლიერდებით. ყველა გამოცდილ კადრს, ვინც ქართულ პოლიტიკაშია და ჩვენი ქვეყნისთვის ბევრი აქვს გაკეთებული, რა თქმა უნდა, ჩვენს რიგებში ველოდებით. მათ შეცდომები აღიარეს და შემდეგ დაუბრუნდნენ პარტიას. ჩვენ მეორე შანსის გვჯერა და ჩვენს თანამებრძოლებს მეორე შანსს ვაძლევთ. რაც შეეხება მიხეილ სააკაშვილის სტატუსს, 2016 წელს პარტიიდან ბოკერია გავიდა და დღეს ვხედავთ, რომ განულებული არიან. ეს აღწერა სააკაშვილმა და ეს ფაქტია. ვინც მასთან ერთად გავიდა, მათ შეცდომები გადააფასეს“, – განაცხადა ხაჯიშვილმა.

„გირჩი – მეტი თავისუფლება“ და „დროა“ საარჩევნო გაერთიანებას ქმნიან. ამის შესახებ ინფორმაციას ორივე პარტიის პრესსამსახურები ავრცელებენ.

„ჩვენ გვაერთიანებს:

– ნულოვანი თანამშრომლობა რუსულ რეჟიმთან;

– მომავლის მკაფიო ხედვა;

– მოტივაცია, შევცვალოთ საბჭოთა, ერთპარტიული სისტემა თანამედროვე, დასავლური ტიპის, კოალიციური მმართველობით.

ჩვენ ვქმნით ნორმალურ არჩევანს საქართველოს მოქალაქეებისთვის“, – ნათქვამია პარტიების პრესსამსახურების ინფორმაციაში.