პარტია „საქართველოსთვის“ ლიდერის, გიორგი გახარიას განცხადებით, პრეზიდენტ სალომე ზურაბიშვილის მიმართ იმპიჩმენტის პროცესი ქვეყნის ევროპულ მომავალს საფრთხეს უქმნის.

როგორც გიორგი გახარია „ფეისბუქის“ საკუთარ გვერდზე ვიდეომიმართვაში აღნიშნავს, პარტია „საქართველოსთვის“ პრეზიდენტის იმპიჩმენტის პროცედურას მხარს არ დაუჭერს.

„ქართული ოცნების“ მიერ დღეს გამოცხადებული, საქართველოს პრეზიდენტის იმპიჩმენტის პროცესი, მიუხედავად იმისა, როგორც არ უნდა დასრულდეს ეს პროცედურა, ქართული საზოგადოებისთვის რამდენიმე რამეს ნიშნავს. პირველი, ეს გახლავთ გააზრებული ნაბიჯი ქვეყნის ევროპული მომავლის წინააღმდეგ, ეს ნაბიჯი ფაქტობრივად საფრთხეს უქმნის ქვეყნის ევროპულ მომავალს. მეორე, ეს გახლავთ მიზანმიმართული ნაბიჯი ქვეყანაში რადიკალიზაციის, დაპირისპირების, პოლარიზაციის გაღრმავებისკენ, რაც რა თქმა უნდა, ქართულ სახელმწიფოს სტაბილურობის სერიოზულ პრობლემას უქმნის. სწორედ ამიტომ, პარტია „საქართველოსთვის“, რა თქმა უნდა, პრეზიდენტის იმპიჩმენტის პროცედურას მხარს არ დაუჭერს. გარდა ამისა, მინდა თხოვნით მივმართო ბევრ ღირსეულ ადამიანს, ვინც დარჩა ჯერ კიდევ „ოცნებაში“, მინდა მათ ვკითხო, როგორ ფიქრობთ, 2012 წელს გამარჯვების შემდგომ, რატომ არავის მოსვლია აზრად სააკაშვილის იმპიჩმენტის დაყენება და დღეს რატომ აყენებს ვიღაც საქართველოს იმ პრეზიდენტის იმპიჩმენტის საკითხს, რომლის არჩევაშიც თქვენც და მეც პირადად დიდი წვლილი გვაქვს მიღებული?“, – აცხადებს გახარია.

გარკვეული ბუნდოვანება იყო როგორც მიშელის, ასევე ბორელისა და ევროკომისიის განცხადებებში. ყველაზე მეტად ის დროა, როცა სწრაფი გადაწყვეტილებები უნდა იყოს მიღებული, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.

მისივე თქმით, ევროკავშირში გაწევრიანების ვადები რაც შეიძლება მოკლე უნდა იყოს.

„ევროკავშირის გაფართოებისთვის დასახელებული 2030 წელი ზედმეტად გაწელილი ვადაა. ახალი ბუნდოვანება გაჩნდა ევროკომისიის განცხადების შემდეგ, როცა ითქვა, რომ რელევანტური თარიღი, შეიძლება, 2030 წელი არ იყოს. ყველაზე მეტად იმედის მომცემი ბორელის განცხადება იყო, თუმცა დამატებით უნდა თქმულიყო, რომ არა მხოლოდ კონკრეტული ვადებია საჭირო, არამედ ეს ვადები რაც შეიძლება მოკლე უნდა იყოს“, – განაცხადა მიხეილ სარჯველაძემ.

ვროკომისიის პრეზიდენტმა, ურსულა ფონ დერ ლაიენმა 21 აგვისტოს „ტვიტერის“ გვერდზე დაწერა, რომ საჭიროა, ევროკავშირის წევრობის ასპირანტი ქვეყნები ევროკავშირთან უფრო სწრაფად დააახლოონ. ასევე, 28 აგვისტოს ევროპული საბჭოს პრეზიდენტმა, შარლ მიშელმა განაცხადა, რომ ევროკავშირი მზად უნდა იყოს 2030 წლისთვის ახალი წევრების მისაღებად. ამავე თემაზე განცხადება გააკეთა ევროკომისიის პრესსპიკერმა, დანა სპინატმა, რომელმაც აღნიშნა, რომ ორიენტირებული არ არიან ევროკავშირში ახალი ქვეყნების გაწევრიანების თარიღზე. ამასთან, 31 აგვისტოს საგარეო და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჯოზეფ ბორელმა აღნიშნა, რომ ევროკავშირს სჭირდება საორიენტაციო თარიღი ახალი წევრებისთვის, რომელთა რაოდენობა, შესაძლოა, ათი იყოს.

პრეზიდენტის იმპიჩმენტი არათუ შეუშლის ხელს, არამედ პირიქით, აჩვენებს ჩვენი ქვეყნის ევროპულობას. რომ ვუფრთხილდებით კონსტიტუციას, ეს არის სწორედ ევროპულობა, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისი თქმით, ნებისმიერი თანამედროვე სახელმწიფო საკუთარ კონსტიტუციაზე დგას.

„აქ საუბარია ნებისმიერი სახელმწიფოს უმარტივეს, საბაზისო პრინციპებზე. ნებისმიერი თანამედროვე სახელმწიფო დგას საკუთარ კონსტიტუციაზე. ეს არის ძირითადი კანონი, რომელიც კრავს მთელ საზოგადოებას. შესაბამისად, აქ ჩვენ საკითხი გვაქვს იმასთან დაკავშირებით, დაირღვა თუ არა განზრახ ჩვენი კონსტიტუცია. ეს არის მნიშვნელოვანი. წინასწარ განსაზღვრული იყო თუ არა ეს დარღვევა და უნდა ჰქონდეს თუ არა რეაქცია სახელმწიფოს, რომელიც პატივს სცემს საკუთარ კონსტიტუციას, დემოკრატიას და ხალხის მმართველობას. ამიტომ ეს არათუ ხელს შეუშლის, არამედ პირიქით, აჩვენებს კიდევ ერთხელ ჩვენი ქვეყნის ევროპულობას, რომ ჩვენ ვუფრთხილდებით ჩვენს კონსტიტუციას. ეს არის სწორედ ევროპულობა და არა – პირიქით, რომ კონსტიტუციის დარღვევას შეიძლება რაიმე საერთო ჰქონდეს ევროპულ მისწრაფებასთან“, – განაცხადა პაპუაშვილმა.

„ქართული ოცნება“ პრეზიდენტ სალომე ზურაბიშვილის იმპიჩმენტის პროცედურას იწყებს. როგორც „ქართული ოცნების“ თავმჯდომარემ, ირაკლი კობახიძემ განმარტა, სალომე ზურაბიშვილმა უხეშად დაარღვია საქართველოს კონსტიტუცია და მთავრობის თანხმობის გარეშე დაიწყო ვიზიტების სერია საზღვარგარეთის ქვეყნებში.

შარშან ევროკავშირის უსამართლო გადაწყვეტილება ვიხილეთ, როცა კანდიდატის სტატუსი არ მიენიჭა ლიდერ ქვეყანას. ამიტომ გვიჭირს ევროკავშირის გადაწყვეტილებების წინასწარ განჭვრეტა, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.

მისივე თქმით, ხელისუფლება პასუხისმგებლობაა, ქვეყანა იყოს მზად ევროკავშირის წევრობისთვის და ამ პასუხისმგებლობით მოქმედებს.

„ევროკავშირის გაფართოებას და გაწევრიანების პერსპექტივას რაც შეეხება, აქ არის ორი მხარე. ერთი მხარეა ევროკავშირი, რომელმაც უნდა მიიღოს ეს გადაწყვეტილება. ჩვენ ვხედავთ, რომ გადაწყვეტილებას აქვს როგორც ობიექტური განზომილება, ასევე პოლიტიკური. შარშან ქართულმა საზოგადოებამ ეს განზომილება ძალიან მწარედ იწვნია, როდესაც ევროკავშირის აბსოლუტურად უსამართლო გადაწყვეტილება ვიხილეთ – კანდიდატის სტატუსი არ მიენიჭა ლიდერ ქვეყანას და ლიდერს უკან მყოფ ქვეყნებს სტატუსი მიენიჭათ. ამიტომ გვიჭირს ევროკავშირის გადაწყვეტილებების წინასწარ განჭვრეტა. გარდა ობიექტური, გაზომვადი კრიტერიუმებისა, შემოდის ხოლმე სხვადასხვა პოლიტიკური თემა სხვადასხვა ქვეყნიდან, სხვადასხვა მოსაზრებიდან გამომდინარე. ამის წინასწარ არც განჭვრეტა შეგვიძლია და სამწუხაროდ, არც ზოგიერთ საკითხზე რაიმე ზემოქმედება.

მეორე მხარეს დგას ჩვენი სახელმწიფო და ამ შემთხვევაში, ხალხის წინაშე ჩვენი პასუხისმგებლობაა, ქვეყანა კეთილსინდისიერად მოვამზადოთ ევროკავშირის წევრობისთვის. აქამდე ნებისმიერი შეფასება აჩვენებდა, რომ საქართველო იყო და არის ლიდერი ყველა იმ ქვეყანასთან შედარებით, რომელიც კანდიდატი, მომავალში ევროკავშირის სავარაუდო წევრია. ჩვენ ვართ ლიდერი ბევრი მიმართულებით, იქნება ეს ინსტიტუციური მოწყობა თუ ქვეყნის ეკონომიკური განვითარება. ეს არის ჩვენი პასუხისმგებლობა და ამ პასუხისმგებლობით ვმოქმედებთ. მთავარია, პირნათელი ვიყოთ ჩვენი საზოგადოების წინაშე, ქვეყანა იყოს მზად. რა გადაწყვეტილებას მიიღებს ევროკავშირი, ვხედავთ, რომ ამაზე გავლენა არ გვაქვს და ასევე, სამწუხაროდ, ვხედავთ, რომ ევროკავშირის მხრიდან უსამართლო გადაწყვეტილებებიც ხდება ხოლმე“, – განაცხადა შალვა პაპუაშვილმა.

„ნაცმოძრაობას“ პრეზიდენტზე ზეწოლის ბერკეტი უჩნდება, თუ მიშას არ გამოუშვებს, იმპიჩმენტს მხარს დაუჭერენ, – ამის შესახებ პარტია „გირჩის“ წევრმა, ალექსანდრე რაქვიაშვილმა განაცხადა.

მისივე თქმით, ასეთ ვითარებაში, შესაძლოა, პრეზიდენტი დათმობაზე წავიდეს და სააკაშვილი შეიწყალოს.

„„ქართულ ოცნებას“ წინასაარჩევნოდ ბუა სჭირდება. როგორც ჩანს, ხელისუფლებამ გადაწყვიტა, რომ მიხეილ სააკაშვილი გამოუშვას, რადგან ციხეში პოლიტიკურად ძალიან სუსტად გამოიყურება და ახლა ყველაფერს აკეთებენ, რომ თავად არ გამოუშვან და ეს პრეზიდენტის ხელით გააკეთონ. იმპიჩმენტს „ნაცმოძრაობის“ ხმების გარეშე ვერ შეძლებენ, 13 ადამიანს ვერ მოისყიდიან. ასეთ კონფიგურაციაში „ნაცმოძრაობას“ პრეზიდენტზე ზეწოლის ბერკეტი უჩნდება – თუ მიშას არ გამოუშვებთ, იმპიჩმენტს მხარს დავუჭერთო. ამ სიტუაციაში პრეზიდენტმა შეიძლება, იმპიჩმენტის გამო დათმოს და მიშა შეიწყალოს. მას ბოლომდე „ნაცობა“ „შეეტენება“, „ქართულ ოცნებას“ კი საარჩევნოდ ბუა ეყოლება და მიშას გათავისუფლებაც არ დაბრალდება.

კონსტიტუციის დარღვევა არასერიოზულია, საკუთარი თავით დაიწყონ, რაც საგამოძიებო კომისიაზე გააკეთეს. უნდა დაამტკიცონ, რომ პრეზიდენტის ქმედებები პროცესს აზიანებდა და ამის დამტკიცება შეუძლებელია. ეს „ნაცებსა“ და „ქოცებს“ შორის შეთანხმებას არ ჰგავს, ეს არის „ქართული ოცნების“ წინასაარჩევნო სტრატეგია. მიშა ციხეში ზის და საფრთხეს საერთოდ არ წარმოადგენს, მისი სახელით სოფო ჯაფარიძე დადის და ხალხს ეხუტება, რაც არ შეიძლება, პრობლემა იყოს. „ქართულ ოცნებას“ მეტი დაძაბულობა სჭირდება. მიშაა, ვინც შეიძლება ხელისუფლების ამომრჩევლის მობილიზაცია მოახდინოს და მას თავად ვერ გამოუშვებენ, თავისივე მხარდამჭერები შეჭამენ და ეს გზა მოიფიქრეს. თუ პრეზიდენტი მართლა აპირებს, სერიოზულ დაპირისპირებაში შევიდეს, მას შეუძლია, „ქართულ ოცნებას“ ცხოვრება გაურთულოს – შეწყალებები დაიწყოს და ვეტოები დაადოს კანონპროექტებს. პრეზიდენტი რომ ვიყო, „ქართულ ოცნებას“ მაქსიმალურად დავაზიანებდი და ვნახავდი, ოპოზიცია იმპიჩმენტს როგორ დაუჭერდა მხარს“, – განაცხადა ალექსანდრე რაქვიაშვილმა.

„ქართული ოცნება“ პრეზიდენტ სალომე ზურაბიშვილის იმპიჩმენტის პროცედურას იწყებს. როგორც „ქართული ოცნების“ თავმჯდომარემ, ირაკლი კობახიძემ განმარტა, სალომე ზურაბიშვილმა უხეშად დაარღვია საქართველოს კონსტიტუცია და მთავრობის თანხმობის გარეშე დაიწყო ვიზიტების სერია საზღვარგარეთის ქვეყნებში. მისივე თქმით, საქართველოს კონსტიტუციის თანახმად, მხოლოდ საქართველოს მთავრობაა უფლებამოსილი, განახორციელოს ქვეყნის როგორც საშინაო, ისე საგარეო პოლიტიკა და საქართველოს პრეზიდენტს მხოლოდ მთავრობის თანხმობით შეუძლია განახორციელოს წარმომადგენლობითი უფლებამოსილებები საგარეო ურთიერთობებში. „ნებისმიერი თვალის დახუჭვა საქართველოს კონსტიტუციის უხეშ დარღვევაზე ძირს უთხრის სამართლებრივ სახელმწიფოს, სამართლის უზენაესობასა და დემოკრატიულ კონსტიტუციურ სისტემას, რასაც ჩვენ ვერ დავუშვებთ“, – განაცხადა ირაკლი კობახიძემ.