ოთხი ქართველი მოსამართლე აშშ-ში გაემგზავრა

13:19 - 23/04/2023

რამდენიმე ქართველი მოსამართლე ამერიკის შეერთებულ შტატებში გაემგზავრა. ამის შესახებ მოსამართლე ეკა არეშიძის Facebook „პოსტიდან“ გახდა ცნობილი. არსებული ინფორმაციით, მასთან ერთად შეერთებულ შტატებში გაემგზავრნენ მოსამართლეები: ლევან დარბაიძე, თამარ ჩიხლაძე და ნინო ელიეშვილი.

აღსანიშნავია, რომ ნინო ელიეშვილი იმ ხუთი მოსამართლის თავდაპირველ შემადგენლობაში იყო, რომლებიც აშშ-ში სასწავლო ვიზიტით უნდა გამგზავრებულიყვნენ, თუმცა, მას შემდეგ, რაც ამერიკის სახელმწიფო დეპარტამენტმა კორუფციაში მონაწილეობის ბრალდებით ლევან მურუსიძეს, მიხეილ ჩინჩალაძეს, ირაკლი შენგელიას და ვალერიან ცერცვაძეს სანქციები დაუწესა და ქვეყნის ტერიტორიაზე შესვლა აუკრძალა, ოთხმა მოსამართლემ აშშ-ში დაგეგმილ ვიზიტზე უარი თქვა. არსებული ცნობით, სწორედ ლევან დარბაიძემ, თამარ ჩიხლაძემ და ნინო ელიეშვილმა ჩაანაცვლეს ისინი.

შტატებში ქართველი მოსამართლეების გამგზავრებას სოციალური ქსელის საშუალებით გამოეხმაურა იუსტიციის უმაღლესი საბჭოს ყოფილი წევრი ნაზი ჯანეზაშვილი. მისი თქმით, პატივისცემას იმსახურებენ ის მოსამართლეები, რომლებიც ოთხი მოსამართლის უარის შემდეგ დათანხმდნენ ვიზიტს.

„არ შემიძლია, არ გამოვეხმაურო მოსამართლეების მიმდინარე სასწავლო ვიზიტს აშშ-ში. მოსამართლის ნებისმიერი საჯარო ნაბიჯი თუ გადაწყვეტილება მის მიმართ ნდობაზე აისახება და მიუთითებს, არის თუ არა მედეგი. როგორც იცით, რამდენიმე ხნის წინ მოსამართლეების ნაწილმა უარი თქვა სასწავლო ვიზიტში მონაწილეობაზე (5-დან 4-მა), შესაბამისად აღნიშნულმა აქტმა, ამ კონტექსტში, დატოვა განცდა, რომ ეს იყო არა დამოუკიდებელი გადაწყვეტილება, არამედ ზემოქმედების შედეგი.

ასეთ დროს ჩნდება კითხვა: მოსამართლეს, რომელსაც არ შეუძლია დამოუკიდებლად გადაწყვიტოს, მიიღებს თუ არა სასწავლო პროგრამაში მონაწილეობას; ის როგორ შეძლებს განაჩენის გამოტანას დამოუკიდებლად იმ შემთხვევაში, თუ მასზე პოლიტიკურ, შიდა ან სხვა სახის ზეგავლენას ექნება ადგილი?

ამჟამად სასწავლო ვიზიტით აშშ-ში იმყოფება რამდენიმე მოსამართლე. მათ შორისაა ქალბატონი ნინო ელიეშვილი. როგორც ჩანს, ის არ დაემორჩილა კლანურ წესებს და ფსევდო სოლიდარობის აქტში არ მიიღო მონაწილეობა. გარდა ამისა, პატივისცემას იმსახურებენ ის მოსამართლეები, რომლებმაც 4 მოსამართლის უარის შემდეგ დათანხმდნენ ვიზიტს.

მოსამართლეების ეს გადაწყვეტილება მათ მედეგობაზე მიუთითებს.

განსაკუთრებით ახლა, მოსამართლეების მიმართ ამ ინტენსიური ხელისუფლების განცხადებებისა და საპარლამენტო უმრავლესობის ე.წ. პოლიტიკური სოლიდარობის ფონზე“, – წერს ნაზი ჯანეზაშვილი Facebook-ზე.

23 აპრილი წიგნის საერთაშორისო დღეა – საინტერესო ფაქტები

12:35 - 23/04/2023

დღესასწაულს საფუძველი 1923 წლის 23 აპრილს კატალონიაში ჩაეყარა. ძველისძველი კატალონიური ტრადიციის მიხედვით, ერის მფარველი წმინდანის, წმინდა გიორგის სახელობის დღეს ბარსელონელები და ქალაქის ირგვლივ მცხოვრებნი ერთმანეთს ვარდებს ჩუქნიდნენ.

იმ დღეს მებაღეებსა და ვარდების გამყიდველებს უამრავი მყიდველი ჰყავდათ. წიგნით მოვაჭრეთა გილდიას ეს ფაქტი ძალიან მოეწონათ და 1923 წლის 23 აპრილს, წმინდა გიორგისა და ვარდების სახალხო დღესასწაულზე, მათ კატალონიაში მცხოვრებლებს ვარდებთან ერთად წიგნებიც აჩუქეს.

მართალია, დღესასწაულის დაარსებას წიგნების გაყიდვის იდეა უძღოდა წინ, მაგრამ ამ ფაქტს რომ ხალხი არ გაეღიზიანებინა გილდიის წარმომადგენლებმა გაიხსენეს, რომ 1616 წლის 23 აპრილი მიგელ სერვანტესის და უილიამ შექსპირის გარდაცვალების დღეცაა…

23 აპრილს კატალონიელები დაახლოებით 4 მილიონ ვარდს ყიდულობდნენ და ამავე დროს, ყოველწლიურად გაყიდული წიგნების 10 პროცენტი 23 აპრილზე მოდიოდა.
1995 წელს კატალონიამ იუნესკოს ამ დღესასწაულის შესახებ მოახსენა, მის ინიციატივას გამომცემელთა საერთაშორისო ასოციაციაც შეუერთდა და გენერალური კონფერენციის გადაწყვეტილებით, 23 აპრილი მსოფლიო წიგნის დღედ გამოცხადდა.

იუნესკოს გადაწყვეტილება მსოფლიომ დიდი ენთუზიაზმით მიიღო. განსაკუთრებით აქტიური ორი ქვეყანა გამოდგა: ნიდერლანდები, სადაც ამ დღესასწაულს “თეთრი წიგნის კვირეულით” აღნიშნავენ და დიდი ბრიტანეთი, სადაც “წიგნის მსოფლიო დღე” დიდ დღესასწაულად იქცა.

წიგნის დღეს ზეიმობენ ავსტრალიაში, კანადაში, ესპანეთში, საბერძნეთში, შვედეთში, იტალიაში, საფრანგეთში, შვეიცარიაში, სპილოს ძვლის სანაპიროზე, მოზამბიკში, პუერტო რიკოში, კუბაზე, საქართველოში…

2003 წლიდან „წიგნის დღე“ ჩვენს ქვეყანაშიც აღინიშნება.

ინდონეზიაში ორი ძლიერი მიწისძვრა მოხდა

12:21 - 23/04/2023

ევროპის ხმელთაშუა ზღვის სეისმოლოგიური ცენტრის ცნობით, ინდონეზიაში ერთმანეთის მიყოლებით ორი ძლიერი მიწისძვრა მოხდა. არსებული ინფორმაციით, ქვეყანაში თავდაპირველად 6.1 მაგნიტუდის სიმძლავრის მიწისძვრა მოხდა, რასაც კიდევ ერთი, 5.8 მაგნიტუდის სიმძლავრის ბიძგები მოჰყვა.

აღსანიშნავია, რომ ორი დღით ადრე, 6-ბალიანი მიწისძვრა მოხდა ინდონეზიის სიახლოვეს, მოლუკის ზღვის რეგიონში.

მიწისძვრის შედეგად ნგრევისა და მსხვერპლის შესახებ პირველადი ინფორმაცია არ გავრცელებულა და მნიშვნელოვანი ზარალი ნაკლებად სავარაუდოა. შეიძლება რამდენიმე საათი დასჭირდეს, სანამ ხელისუფლება შეძლებს ზიანის ყოვლისმომცველი შეფასებას, განსაკუთრებით შორეულ რაიონებში. უახლოეს დღეებში მოსალოდნელია მსუბუქი და ზომიერი ბიძგები. მოვლენას არ მოჰყოლია ცუნამის გაფრთხილება.

ოფიციალურმა პირებმა შეიძლება დროებით დახურონ სატრანსპორტო ინფრასტრუქტურა მიწისძვრის ზონაში ზიანის შესამოწმებლად. მცირე შეფერხებები შეიძლება მოხდეს გამორთვის დროს, მაგრამ სერვისი, სავარაუდოდ, სწრაფად განახლდება, თუ დაზიანება არ არის ნაპოვნი. შესაძლებელია კომუნალური გათიშვა, განსაკუთრებით მიწისძვრის ეპიცენტრთან ახლოს.

თბილისის რამდენიმე ქუჩას წყალმომარაგება შეეზღუდა

12:12 - 23/04/2023

თბილისის ზოგიერთ ქუჩას წყალმომარაგება შეეზღუდა. ინფორმაციას ამის შესახებ კომპანია gwp ავრცელებს.

განცხადების მიხედვით:

გლდანის რაიონში, გმირ კურსანტთა ქ. 3 შეს. N 16 თან, წყალსადენის ქსელზე დაზიანების აღდგენითი სამუშაოების ჩატარების მიზნით 04:00-დან 12:00-მდე. წყალმომარაგება შეუწყდება:
გმირ კურსანტთა ქ.

საბურთალოს რაიონში, ჟიული შარტავას ქ. N 18ა თან, წყალსადენის ქსელზე დაზიანების აღდგენითი სამუშაოების ჩატარების მიზნით 03:40-დან 12:00-მდე. წყალმომარაგება შეუწყდება:
ჟიული შარტავას ქ. N16 N18.

ჩუღურეთის რაიონში, გოგი დოლიძის ქ. N 5 თან, წყალსადენის ქსელზე დაზიანების აღდგენითი სამუშაოების ჩატარების მიზნით 03:10-დან 12:00-მდე. წყალმომარაგება შეუწყდება:
გოგი დოლიძის, ფიროსმანის და გოგოლის ქუჩებს.

,,გაერო გეგმავს ევაკუაციის პროცედურების დაწყებას”- შალვა კიკნაძე

11:59 - 23/04/2023

სუდანში დღეს დილიდან სროლები შეწყვეტილია, როგორც ჩემი თანამშრომლები მეუბნებიან, დღეს გავრცელდა ინფორმაცია, რომ, გაერო გეგმავს ევაკუაციის პროცედურების დაწყებას. უბრალოდ ჯერ არ არის დაზუსტებული დრო, – ამის შესახებ „ქრონიკას“ „ჯეო სქაის“ ვიცე-პრეზიდენტმა, შალვა კიკნაძემ განუცხადა.

„ისევ და ისევ ველოდებით საგარეო საქმეთა სამინისტროს, რომ დაგვიზუსტოს დრო და ადგილი – სად უნდა შეიკრიბოს ეს ხალხი და საიდან უნდა განხორციელდეს ევაკუაცია. მხოლოდ ამის შემდეგ შევძლებთ შევძლებთ მივიდეთ საჰაერო ხომალდთან და შევამოწმოთ მისი მდგომარეობა, რის შემდეგაც მივიღებთ გადაწყვეტილებას, შეძლებს თუ არა ჩვენი საჰაერო ხომალდი გამოფრენას“, – აცხადებს კიკნაძე.

არეულობა სუდანში, რამდენიმეთვიანი დაძაბულობის შემდეგ, 15 აპრილს დაიწყო. უკვე ერთი კვირაა რაც სუდანის მოსახლეობა ქვეყნის არმიასა და გასამხედროებულ დაჯგუფებას შორის შეიარაღებული დაპირისპირების პირობებში ცხოვრობს. ქვეყანაში პროდუქტის, სასმელი წყლისა და ელექტრომომარაგების კრიზისი დაიწყო. დაპირისპირების მიზეზი ქვეყნის სამოქალაქო მმართველობასთან დაკავშირებით შეუთანხმებლობაა. ქვეყნის არმია და იქ მოქმედი გასამხედროებული დაჯგუფება ვერ თანხმდებიან, თუ როგორ უნდა გადავიდეს ქვეყანა სამოქალაქო მმართველობაზე.

რუსეთიდან 20-ზე მეტ გერმანელ დიპლომატს გააძევებენ

11:48 - 23/04/2023

რუსეთი ქვეყნიდან 20-ზე მეტი გერმანელი დიპლომატის გაძევებას გეგმავს. რუსული მედიის ინფორმაციით, ამის შესახებ ქვეყნის საგარეო საქმეთა სამინიტროს პრესსპიკერმა, მარია ზახაროვამ განაცხადა.

მისივე თქმით, აღნიშნული გადაწყვეტილება გერმანიიდან რუსეთის დიპლომატიური მისიის თანამშრომლების გაძევების საპასუხოდ მიიღეს.

მანამდე, რუსულმა მედიამ გაავრცელა ინფორმაცია, რომ გერმანიის ხელისუფლებამ ქვეყნიდან რუსი დიპლომატების მასობრივი გაძევების გადაწყვეტილება მიიღო. რუსეთის საგარეო უწყების შეფასებით, ამ ნაბიჯით ბერლინი რუსეთ-გერმანიის ურთიერთობების განადგურების კურსს აგრძელებს.

შალვა პაპუაშვილი ევროკავშირის პარლამენტების სპიკერების კონფერენციაში მიიღებს მონაწილეობას

11:40 - 23/04/2023

24-25, აპრილს ჩეხეთის რესპუბლიკის დედაქალაქ პრაღაში ევროკავშირის პარლამენტების სპიკერების ყოველწლიური კონფერენცია (EUSC) გაიმართება.

ღონისძიების ფარგლებში დაგეგმილია საქართველოს პარლამენტის თავმჯდომარის, შალვა პაპუაშვილის სიტყვით გამოსვლა. ასევე იგეგმება ორმხრივი შეხვედრები როგორც ჩეხეთის რესპუბლიკის მთავრობის წარმომადგენლებთან, ისე პარლამენტის წევრებთან.

საქართველოს პარლამენტის თავმჯდომარე შეხვედრებს გამართავს ევროკავშირის წევრი ქვეყნების პარლამენტების სპიკერებთან. ვიზიტში, შალვა პაპუაშვილთან ერთად, ევროპასთან ინტეგრაციის კომიტეტის თავმჯდომარე მაკა ბოჭორიშვილი მონაწილეობს.

წელს, კონფერენციის განხილვის მთავარი თემა უკრაინის წინააღმდეგ რუსული აგრესია და ფართო გეოპოლიტიკურ კონტექსტში, ევროკავშირის რეაგირება იქნება. ყოველწლიური ფორუმი, მიზნად ისახავს პარლამენტარიზმის როლის გაძლიერებას საერთაშორისო დონეზე.

რუსეთის სარდლობა პუტინს არწმუნებს, რომ თავდაცვაზე გადასვლაა საჭირო – ISW

11:34 - 23/04/2023

რუსეთის სარდლობა ცდილობს, ვლადიმერ პუტინი დაარწმუნოს, რომ თავდაცვით სამხედრო ოპერაციებზე გადასვლაა საჭირო. ამის შესახებ ამერიკის ომის შემსწავლელი ინსტიტუტის ( ISW) ანგარიშშია საუბარი.

სამხედრო ანალიტიკოსები მიიჩნევენ, რომ რუსეთის თავდაცვის მინისტრი სერგეი შოიგუ, გენერალური შტაბის უფროსი ვალერი გერასიმოვი და ასევე „ვაგნერის“ დამფუძნებელი ევგენი პრიგოჟინი სავარაუდოდ, სათანადოდ აფასებენ უკრაინის მხრიდან კონტრშეტევის საფრთხეს, თუმცა მათ პუტინისთვის ამ აზრის პირდაპირ თქმა უჭირთ.

ამასთან, როგორც ISW წერს, პუტინი დაჟინებით მოითხოვს, კონტრაქტორები შეტევების გასაძლიერებლად იქნან გაგზავნილი, რითაც, ექსპერტების შეფასებით, ელიტარული დანაყოფების უსარგებლო ბრძოლებში გაწირვა უწევთ“.

თუმცა, ომის შემსწავლელ ინსტიტუტში მიიჩნევენ, რომ პრიგოჟინს სხვა გეგმები აქვს.

„პრიგოჟინი და ულტრანაციონალისტური საზოგადოების ზოგიერთი ფრთა შესაძლოა ცდილობდნენ რუსული შიდა მედია სივრცის მომზადებას გაყინული ფრონტის ხაზების პერსპექტივისთვის, რომელიც პოტენციურად, ახლოს იქნება 2022 წლის 23 თებერვლის მდგომარეობით არსებულ ხაზებთან“, – ნათქვამია ანგარიშში.

,,სააკაშვილის ჯანმრთელობის მდგომარეობა სტაბილურია, მაგრამ საყურადღებო”- „ვივამედი”

11:23 - 23/04/2023

„ვივამედის“ ექიმის თამარ ჭანტურიას განცხადებით, მიხეილ სააკაშვილის მდგომარეობა სტაბილური, თუმცა საყურადღებოა.

როგორც ექიმმა საქართველოს პირველ არხს განუცხადა, მიხეილ სააკაშვილს, როგორც დედამისი, გიული ალასანია აღნიშნავს, გუშინ ჰქონდა გონების დაკარგვის ეპიზოდი, თუმცა როდესაც მასთან ექთანი იყო, მსგავსი შემთხვევა არ დაფიქსირებულა.

„მიხეილ სააკაშვილთან სტაბილური მდგომარეობაა, მაგრამ საყურადღებო. აღენიშნება სისუსტე, თავბრუს ხვევა, წამოდგომისას წონასწორობის დაკარგვა. სიცხე გუშინ, დღის მანძილზე 37 იყო მაქსიმალური. რაც შეეხება წნევას, გონების დაკარგვის შემდეგ, როგორც აღნიშნეს, ჰქონდა 90/60-ზე, შემდეგ უკვე 130/90-ზე. დედამისისა და პაციენტის გადმოცემით, სავარძლიდან წამოდგომისას ჰქონდა გონების დაკარგვა და დავარდა. მეორე შემთხვევა იყო, როდესაც გადადიოდა სავარძლიდან საწოლისკენ ექთანზე დაყრდნობით, ჩაიმუხლა და გონების კარგვა არ ჰქონია, როგორც კი შევედით, პაციენტი კონტაქტური და ადეკვატური იყო, აღენიშნებოდა თავბრუსხვევაც. ექთანი არ აღნიშნავს, რომ გონების კარგვა იყო, უბრალოდ ჩაიკეცა და შემდეგ ბადრაგის დახმარებით საწოლამდე მიიყვანეს. გონების კარგვა მეორეჯერ არ ყოფილა. პირველად ექთანი არ ყოფილა მასთან, როგორც აღნიშნეს, გონების დაკარგვისას პალატაში იყვნენ დედამისი და თვითონ პაციენტი. მე პირადად გონებაზე დამხვდა პაციენტი, კონტაქტური და ადეკვატური იყო, უბრალოდ ძლიერი სისუსტე ჰქონდა და თავბრუსხვევა. შესაბამისად, შეფასდა ნევროლოგის მიერ და გამოირიცხა თავის დარტყმა, ეს არ ყოფილა“, – განაცხადა ჭანტურიამ

EU რუსეთის წინააღმდეგ სანქციების ახალ პაკეტს ამზადებს – Bloomberg

11:19 - 23/04/2023

„ევროკავშირი რუსეთის წინააღმდეგ სანქციების ახალ პაკეტს ამზადებს“, – აღნიშნულის შესახებ ინფორმაციას გამოცემა Bloomberg ავრცელებს.

ხსენებული სანქციების პაკეტი რუსეთის გავლით გარკვეული საქონლის ტრანზიტს აკრძალავს.

მიუხედავად იმისა, რომ ევროკავშირის წევრი არაერთი ქვეყანა ითხოვს სანქციების დაწესებას Rosatom-ის წინააღმდეგ, ნაკლებად სავარაუდოა, რომ ახალი პაკეტი მიზნად ამას ისახავდეს.

Bloomberg-ის ცნობით, სანქციების ახალი პაკეტის მთავარი მიზანი იქნება რუსეთმა ვერ შეძლოს სანქციებისგან თავის არიდება.

2023 წლის ბოლოსთვის მოსახლეობის საერთო რაოდენობით ჩინეთს ინდოეთი გადაუსწრებს – გაერო

11:05 - 23/04/2023

გაეროს ეკონომიკური და სოციალური საკითხების დეპარტამენტის პროგნოზით, 2023 წლის ბოლოსთვის მოსახლეობის საერთო რაოდენობით ჩინეთს ინდოეთი გადაუსწრებს.

ანალიტიკოსების ვარაუდით, თითოეული სახელმწიფოს მოსახლეობის რაოდენობა 1.4 მილიარდის ფარგლებში იქნება, 2023 წლის ბოლოსთვის კი მათ შორის განმასხვავებელი მხოლოდ 2.9 მილიონი იქნება. თუმცა გრძელვადიანი პროგნოზი ცხადყოფს, რომ ინდოეთსა და ჩინეთს შორის დაშორება გაიზრდება, რაც, ინდოეთის მაღალი შობადობითა და ჩინეთში მოსახლეობის დაბერებითაა განპირობებული.

გაეროს პროგნოზით, 2030 წლისთვის გლობალური მოსახლეობის რაოდენობა 8.5 მილიარდს მიაღწევს, 2100 წელს კი – 10.4 მილიარდს.

ხანდახან, მხრებზე მეტისმეტ ტვირთს ვგრძნობ, მაგრამ გავუმკლავდები – ხვიჩა კვარაცხელია

10:55 - 23/04/2023

უეფას ჩემპიონთა ლიგის ჟურნალმა „ნაპოლის” ქართველ ფეხბურთელთან ხვიჩა კვარაცხელიასთან ინტერვიუ ჩაწერა, რა დროსაც „კვარამ“ იმ პასუხისმგებლობაზე ისაუბრა, რომელიც დღეისთვის აკისრია.

„ნაპოლიში თამაში ჩემთვის დიდი პასუხისმგებლობაა. ხანდახან მხრებზე მეტისმეტ ტვირთს ვგრძნობ, მაგრამ შემიძლია ამას გავუმკლავდე. როცა მოედანზე გავდივარ, ზეწოლა სადღაც ქრება. ვაკეთებ იმას, რაც ძალიან მიყვარს – ვთამაშობ ფეხბურთს”, – განაცხადა კვარაცხელიამ.

მან, ასევე, კომენტარი გააკეთა თავის მეტსახელთან, „კვარასთან“ დაკავშირებით.

„როცა პირველად გავიგე ჩემი გვარი მარადონასთან მიმართებით, თავი სიზმარში მეგონა. დიდებული განცდაა, როცა ასეთ ფეხბურთელს გადარებენ. როცა უკან ვიხედები, ძნელი წარმოსადგენია პატარა ერის წარმომადგენლისთვის კარიერის ასე განვითარება, მაგრამ ამბიციური ვარ. ყოველთვის მჯეროდა ჩემი ოცნების, რამაც დიდი როლი ითამაშა ჩემს კარიერაზე”, – აცხადებს ხვიჩა კვარაცხელია.

1...1,6701,6711,672...1,757 Page 1,671 of 1,757