რადიკალურ ოპოზიციას სურვილი აქვს, რაღაცნაირად პოლიტიკურ ზედაპირზე იყოს. სამწუხაროდ, ამისთვის შოვის ტრაგედიას იყენებენ, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

მაჭარაშვილს კითხვა დაუსვეს შოვის სტიქიასთან დაკავშირებით პარლამენტში დროებითი საგამოძიებო კომისიის შექმნის საკითხზე.

„რომელ „ნაცმოძრაობაზეა“ საუბარი – ძველზე, ახალზე, დაშლილზე, აწყობილზე თუ? 2024 წლის არჩევნებამდე ერთი წელი რჩება და რადიკალურ ოპოზიციას სურვილი აქვს, რაღაცნაირად პოლიტიკურ ზედაპირზე იყოს და სამწუხაროდ, შოვის ტრაგედიას იყენებენ ხოლმე. მტკიცებულება არც ამ შემთხვევაში აქვთ. „ნაცმოძრაობამ“ შეიძლება, დილით ღრუბელი დაინახოს და იტყვის, უმრავლესობამ არ დაუშვა მზის ამოსვლა საქართველოშიო“, – განაცხადა გურამ მაჭარაშვილმა.

გერმანიის საგარეო საქმეთა მინისტრის, ანალენა ბერბოკის განცხადებით, კიევს შეუძლია ბერლინის მხარდაჭერის იმედი ჰქონდეს, რადგან გერმანია დარწმუნებულია, რომ „ევროკავშირის გაფართოება რუსეთის ომის აუცილებელი გეოპოლიტიკური შედეგია“.

„ბომბების სეტყვის ქვეშ, რუსული ტანკების წინაშე, უკრაინა თავდაჯერებულად და გადამწყვეტად დაადგა ევროკავშირისკენ გზას. დიდი მამაცობითა და მონდომებით, უკრაინა ასევე იცავს თითოეული ჩვენგანის თავისუფლებას”, – განაცხადა ბერბოკმა კიევში.

გერმანიის საგარეო უწყების ხელმძღვანელმა რუსეთის პრეზიდენტი, ვლადიმერ პუტინი კიდევ ერთხელ მწვავედ გააკრიტიკა.

„პუტინის საშინელი ტერორი გამოიხატება არა მხოლოდ უკრაინაში ყოველდღიურად სამოქალაქო ობიექტებზე მიზანმიმართულ თავდასხმებში, პუტინს სურს ხალხის გატეხვა, დათრგუნვა და დაძაბუნება. რუსეთი არა მხოლოდ ბომბებით კლავს, ის მომავალს ართმევს ათასობით უკრაინელ ბავშვს. მათ იტაცებენ საბავშვო ბაღებიდან, ბავშვთა სახლებიდან და სკოლებიდან, რათა გადაასახლონ რუსულ ბანაკებში ან გააშვილონ”, – აღნიშნა ბერბოკმა.

პრემიერ-მინისტრმა დანაშაული ჩაიდინა – აშკარაა კორუფციული ფაქტი, რადგან მან სახელმწიფოს რესურსი პირადი მიზნებისათვის გამოიყენა, თან ცინიკურად, – ამის შესახებ ჟურნალისტებს პოლიტიკური ჯგუფის „ევროოპტიმისტების” დეპუტატმა რომან გოცირიძემ განუცხადა.

გოცირიძის თქმით, კიდევ ერთი დანაშაულია ის, რომ პრემიერმა და მისმა პარტია „ქართულმა ოცნებამ” კონსტიტუცია დაარღვია და პრეზიდენტს იმ კონსტიტუციური ვალდებულების აღსრულებაში შეუშალა ხელი, რაც კანდიდატის სტატუსის მიღების საკითხის ლობირებას უკავშირდება.

რაც შეეხება ირაკლი ღარიბაშვილის წინააღმდეგ იმპიჩმენტის პროცესის დაწყების ინიციატივას, როგორც გოცირიძემ აღნიშნა, ამ თემაზე საპარლამენტო ოპოზიციაში აზრთასხვადასხვაობა არსებობს, თუმცა თუ პრემიერის საიმპიჩმენტოდ 50 ხელმოწერა მოგროვდება, ერთ-ერთი მისი ხელმოწერაც იქნება

„ჩანს, რომ ოპოზიციაში 50 ხელმოწერა ვერ შეგროვდება. საკითხის დრამატიზება საჭირო არ არის. ვნახოთ, სამომავლოდ რა იქნება – იმ შემთხვევაში, თუ ოპოზიციურ ფლანგზე ერთსულოვნება იქნება, რა თქმა უნდა, ჩვენ მხარს დავუჭერთ”, – განაცხადა რომან გოცირიძემ.

„ლელო” პრემიერ-მინისტრ ირაკლი ღარიბაშვილის თანამდებობიდან იმპიჩმენტის წესით გადაყენების პროცესის დაწყების ინიციატივით გამოდის.

როგორც “ლელოს” დეპუტატმა სალომე სამადაშვილმა პარლამენტში გამართულ პრესკონფერენციაზე განაცხადა, არ შეიძლება დღეს, როცა საქართველო ევროკავშირისგან კანდიდატის სტატუსის მიღებას ელის, „ქვეყანას მის ისტორიაში ყველაზე უფრო კორუმპირებული პრემიერ-მინისტრი ჰყავდეს და საზოგადოებასა და ოპოზიციას ამაზე რეაგირება არ ჰქონდეს“.

სამადაშვილის ინფორმაციით, ღარიბაშვილის იმპიჩმენტის საკითხზე პოლიტიკურ ჯგუფებთან კონსულტაციებს დღეიდან იწყებენ.

ღარიბაშვილს კიდევ ერთი მუხლი უხდება და ესადაგება – ესაა სახელმწიფოს ღალატი და შეიძლება როგორც რუსეთის ჯაშუში, ასეც მოხდეს მომავალში მისი გასამართლება – თანამდებობის ბოროტად გამოყენებისთვის გასამართლება მისთვის საჩუქარია, – ამის შესახებ „ნაციონალური მოძრაობის“ თავმჯდომარე ლევან ხაბეიშვილმა ირაკლი ღარიბაშვილის მიერ მიუნხენში ჩარტერული რეისით ფრენასთან დაკავშირებით განაცხადა.

ხაბეიშვილის თქმით, მის გადადგომას მხარს უჭერენ, თუმცა მიიჩნევენ, რომ მან სისხლისსამართლებრივადაც უნდა აგოს პასუხი.

„ღარიბაშვილი არათუ უნდა გადადგეს და მერე წულუკიანით ან კობახიძით ჩანაცვლდეს, არამედ უნდა იყოს დაკავებული. ის, რომ მის გადადგომას მხარს დავუჭერთ, ეს ყველასთვის გასაგებია, თუმცა ეს ადამიანი უნდა იყოს სისხლისსამართლებრივ პასუხისმგებლობაშიც მიცემული ამ კონკრეტულ დანაშაულებზე. კიდევ ერთი მუხლი ძალიან უხდება და ესადაგება – ესაა სახელმწიფოს ღალატი და შეიძლება როგორც რუსეთის ჯაშუში, ასეც მოხდეს მომავალში მისი გასამართლება. მისთვის ამ მუხლით გასამართლება, რასაც ჰქვია თანამდებობის ბოროტად გამოყენება, სახელმწიფო ხარჯების მითვისება- გაფლანგვა, საჩუქარია და მის ადგილას ვთხოვდი კიდევ პროკურატურას, რომ იქნებ ამ ბრალდებით გაასამართლონ,“ – განაცხადა ხაბეიშვილმა.

ნინო ლომჯარიას წარმოჩენა „არანაციონალად“, ეს მართლა საოცრებაა, – ამის შესახებ პარტია „ქართული ოცნების“ თავმჯდომარე, ირაკლი კობახიძემ განაცხადა.

კობახიძეს „ხალხის ძალის“ დღევანდელ განცხადებაზე ჰკითხეს, სადაც საუბარია იმაზე, რომ „ნინო ლომჯარია ცნობილი „ნაციონალია“ და მას შუაშისტად ვერავის შეასაღებ, იგივე შეიძლება ითქვას მისი თავმჯდომარეობით დაფუძნებული პლატფორმის წევრების უმრავლესობაზეც“.

„ეს ყოველ ჯერზე ხდება, ნამდვილად ასე იყო, რომ მუდმივად ცდილობენ, წარმოაჩინონ „არანაცებად“ „ნაცები“, ასე შექმნან ცალკე ხაზები საარჩევნოდ. გახარია ამის მაგალითი იყო, კიდე ვიზე იყო საუბარი, არ ვიცი, თუმცა ჩავარდა ეს პროექტი, საერთოდ არ არის საინტერესო. რაც შეეხება ლომჯარიას წარმოჩენას „არანაციონალად“ ეს მართლა საოცრებაა, ვინ გეგმავს ასეთ რაღაცებს უბრალოდ წარმოუდგენელია“,- განაცხადა ირაკლი კობახიძემ.

„არაფერი მიკვირს იმ ადამიანებისგან, ვინც სტიქიური უბედურებით ცდილობს, ხელი მოითბოს“, – ამის შესახებ თბილისის მერმა, კახა კალაძემ შოვის ტრაგედიასთან დაკავშირებით გავრცელებულ მორიგ ბრალდებებს უპასუხა, თითქოს მას შოვთან გარკვეული ბიზნესინტერესები აკავშირებს.

მისი თქმით, ეს ისეთივე ტყუილია, როგორც ტრაგედიის პირველივე დღეებში აგორებული ცილისწამება იმასთან დაკავშირებით, რომ საკუთარი შვილები შოვიდან ვერტმფრენით გამოიყვანა.

„ეს რაღაც ახალი ბოდვაა. შოვში მომხდარი სტიქიის სახით, ძალიან დიდი უბედურება დაატყდა ქვეყანას თავს, რასაც შესაბამისი უწყებების მხრიდან რეაგირება მოჰყვა. სამძებრო-სამაშველო ღონისძიებები დღესაც გრძელდება. სამწუხაროდ, გვყავს გარდაცვლილები. კიდევ ერთხელ ვუსამძიმრებ მათ ოჯახებს, ახლობლებს, ნათესავებს.  არ ვიცი, რა სერიოზული პასუხი უნდა გავცე აღნიშნულ შეკითხვას. არც ის ვიცი, რა ბიზნესინტერესებზეა საუბარი, თუმცა არაფერი მიკვირს თქვენი ტელევიზიებისგან, იმ ადამიანებისგან, ვინც სტიქიური უბედურებით ცდილობს, ხელი მოითბოს, იმიტომ, რომ პირველივე დღეების განმავლობაში მაბრალებდით, თითქოს ვერტმფრენით ვისარგებლე შოვიდან ჩემი შვილების გამოსაყვანად და სხვები მივატოვე“, – განაცხადა კახა კალაძემ.

თბილისის მერის თქმით, საზოგადოება ყველაფერს კარგად ხედავს და არჩევნების გზით, შესაბამის გადაწყვეტილებას მიიღებს.

„მსგავსი სიბინძურითა და ცილისწამებით იყო თქვენი ტელევიზიები დაკავებული, თუმცა საზოგადოება ყველაფერს ძალიან კარგად ხედავს და ყოველთვის მიიღებთ შესაბამის პასუხს, როდესაც ამის დრო მოვა. ახლოვდება 2024 წლის საპარლამენტო არჩევნები და ჩვენი ქვეყნის მოსახლეობა გაგცემთ ყველა იმ ცილისწამებასა და სიბინძურეზე პასუხს, რასაც მთელი ამ წლების განმავლობაში, ყოველდღიურ რეჟიმში ახორციელებდით“, – აღნიშნა დედაქალაქის მერმა.

„თუ ვინმემ რაიმე წარმატებას მიაღწია ევროინტეგრაციისკენ მიმავალ გზაზე, ეს არის  პარტია „ქართული ოცნება – დემოკრატიული საქართველოს“ დამსახურება, ჩვენი ქვეყნის მოსახლეობასთან ერთად“, – ამის შესახებ დედაქალაქის მერმა, კახა კალაძემ მედიასთან ისაუბრა.

როგორც მან აღნიშნა, მიუხედავად იმისა, რომ 2012 წლიდან მოყოლებული საქართველოს ხელისუფლებამ არაერთი რეფორმა განახორციელა და წარმატებას მიაღწია, ევროკავშირის კანდიდატის წევრობის სტატუსი მაინც არ მოგვანიჭეს, რაც იყო პოლიტიკური გადაწყვეტილება.

„დავიწყებ იმით, რომ საქართველოსთან მიმართებაში არასამართლიანი გადაწყვეტილება იქნა მიღებული მაშინ, როდესაც სტატუსი არ მოგვანიჭეს და მისცეს უკრაინასა და მოლდოვას. რა თქმა უნდა, გამიხარდა ამ ორი ქვეყნისთვის სტატუსის მინიჭება, მაგრამ საქართველო ამას ნამდვილად იმსახურებდა. ამ სამი ქვეყნიდან თუ ვინმეს რაიმე წარმატებისთვის აქვს მიღწეული, ეს არის ჩვენი ქვეყანა. ეს პერიოდი უკავშირდება 2012 წლის შემდგომ პერიოდს. ამის მიუხედავად, საქართველო და ქართველი ხალხი დაჩაგრეს. სტატუსის არ მოცემა სჭირდებოდათ პოლიტიკური მიზნებისთვის, რომ ქვეყანაში მოეხდინათ არეულობა, ხელისუფლების ცვლილება ყველანაირი მეთოდით და რომ მერე ხალხისთვის ეთქვათ, თქვენ კი კარგები ხართ, ევროპულ მომავალს იმსახურებთ, მაგრამ ხელისუფლება გყავთ ცუდიო.  სამწუხაროდ, მსგავს მესიჯებს დღესაც ვისმენთ, რაც ძალიან მძიმე და დამაზიანებელია.

კიდევ ერთხელ გავიმეორებ, რომ თუ ვინმემ რაიმე წარმატებას მიაღწია ევროინტეგრაციისკენ მიმავალ გზაზე, ეს არის პარტია „ქართული ოცნება – დემოკრატიული საქართველოს“ დამსახურება, ჩვენი ქვეყნის მოსახლეობასთან ერთად. გვაქვს წინ გადადგმული ნაბიჯები – ვიზალიბერალიზაცია, ასოცირების ხელშეკრულება, თავისუფალი ვაჭრობის შეთანხმება და ა.შ.“, – განაცხადა კახა კალაძემ.

მისივე თქმით, ხელისუფლების მთავარი მიზანი არის ევროპული ოჯახის წევრობა და ამ მიმართულებით მუშაობა აქტიურად გრძელდება.

„ჩვენ ევროინტეგრაციის გზაზე სიარულს, რეფორმების განხორციელებას ვაგრძელებთ. ჩვენი მიზანი არის, რომ რაც შეიძლება მალე გავხდეთ ევროპული დიდი ოჯახის წევრი, მივიღოთ სტატუსი, მაგრამ ეს არ ნიშნავს იმას, რომ უარი ვთქვათ ჩვენს ქვეყანაზე და ჩვენი ქვეყნის ინტერესების დაცვაზე“, – აღნიშნა კახა კალაძემ.

მიმდინარე წლის 9 სექტემბერს, ვეტერანების საქმეთა სახელმწიფო სამსახურის ორგანიზებით, ურთიერთთანამშრომლობის მემორანდუმის ფარგლებში, ლაიონსების თვალის დიაბეტურმა კლინიკა-საქართველომ, შუახევში მცხოვრები ომისა და თავდაცვის ძალების ვეტერანებისა და მათი ოჯახის წევრთათვის, უფასო ოფთალმოლოგიური გამოკვლევები ჩაატარა.

საქველმოქმედო სამედიცინო აქციით, რომელშიც მონაწილეობა მიიღო კვალიფიციურ მედიკოსთა 12 კაციანმა ჯგუფმა (ოფთალმოლოგები, ენდოკრინოლოგი) მაღალტექნოლოგიური აპარატურით, ისარგებლა სამსახურის 124-მა ბენეფიციარმა, რომელთაგან 68 ვეტერანი, ხოლო, 56_ვეტერანის ოჯახის წევრი გახლდათ; განხორციელდა 170 სამედიცინო ვიზიტი; აქციის ფარგლებში, სამსახურის ბენეფიციარებს, უსასყიდლოდ გადაეცათ 248 სათვალე.

აქციის მიმდინარეობას, ადგილზე გაეცნენ: ვეტერანების საქმეთა სახელმწიფო სამსახურის დირექტორის მოადგილე, ჯანდრი უბირია, სოციალურ საკითხთა და სააღრიცხვო-ანალიტიკური დეპარტამენტის წარმომადგენელი, ვაჟა დალაქიშვილი, სამსახურის რეგიონული მართვის დეპარტამენტის აჭარის ა/რ სამმართველოს უფროსი, შოთა ყიფიანი, შუახევის მუნიციპალიტეტის მერი, ომარ ტაკიძე.

ურთიერთთანამშრომლობის მემორანდუმი, ვეტერანების საქმეთა სახელმწიფო სამსახურსა და ლაიონსების თვალის დიაბეტურ კლინიკა-საქართველოს შორის, პირველად, 2016 წელს გაფორმდა და ყოველწლიურად განახლდება. მიმდინარე წელს, ლაიონსების თვალის დიაბეტურმა კლინიკა-საქართველომ, მთელი ქვეყნის მასშტაბით, დღეის ჩათვლით, 12 საქველმოქმედო სამედიცინო აქცია ჩაატარა, რომლის ფარგლებშიც, სამსახურის 1317 ბენეფიციარს, კვალიფიციური, ოფთალმოლოგიური მომსახურება, უფასოდ გაეწია; ამასთან, უსასყიდლოდ ჩატარდა სხვადასხვა სახის მიკროქირურგიული ოპერაციებიც; ვეტერანებს და მათი ოჯახის წევრებს, ასევე, უფასოდ გადაეცათ 1812 სათვალე;

სხვადასხვა სამედიცინო დაწესებულებებთან არსებული მემორანდუმების ფარგლებში, ვეტერანებისა და მათი ოჯახის წევრებისათვის, საქველმოქმედო სამედიცინო აქციები, მთელი საქართველოს მასშტაბით, კვლავ ჩატარდება, რომელთა შესახებ, ინფორმაცია, ვეტერანებს, წინასწარ მიეწოდებათ.