რუსეთის საოკუპაციო ძალებმა უკრაინაში დნეპროპეტროვსკის, ხარკოვისა და ზაპოროჟიეს რეგიონები დაბომბა. უკრაინული მედიის ინფორმაციით, დნეპროპეტროვსკის ოლქში ქალაქ კრივოი-როგის რაიონზე რუსმა სამხედროებმა შეტევა განახორციელეს უპილოტო თვითმფრინავებით, სამხედრო ავიაციითა და არტილერიით. დაბომბვის შედეგად დაზიანებულია საცხოვრებელი სახლები და გაზსადენი.
გასული ღამის განმავლობაში რუსეთის საოკუპაციო ძალებმა ხარკოვის რეგიონის 20 დასახლებულ პუნქტზე არტილერიით მიიტანეს იერიში.
პარალელურად, უკრაინის არმიის გენშტაბის ინფორმაციით, ავდეევკის, მარინკისა და შახტერსკის მიმართულებით უკრაინის შეიარაღებული ძალები წარმატებით აკავებენ რუსეთის თავდასხმებს და მოწინააღმდეგის ყველა შეტევას მნიშვნელოვანი დანაკარგი მოჰყვა ცოცხალი ძალისა და აღჭურვილობის თვალსაზრისით. უკრაინის არმია შეტევით ოპერაციას ახორციელებს მელიტოპოლის მიმართულებით.
