„დროას“ ლიდერის, ელენე ხოშტარიას განცხადებით, ამერიკის შეერთებული შტატების მიერ საქართველოს ყოფილი მთავარი პროკურორის, ოთარ ფარცხალაძის დასანქცირება პიროვნულ სანქციას ცდება და მთლიანად „ქართული ოცნების“ მხილებაა.

როგორც ხოშტარიამ ბრიფინგზე განაცხადა, აღნიშნული სანქციები სერიოზული გაფრთხილებაა ყველა იმ ადამიანისთვის, რომლებიც ძირს უთხრიან საქართველოს ეროვნულ ინტერესებს და ხელს უწყობენ რუსეთს.

„ეს სანქციები სცდება მხოლოდ ფარცხალაძის პიროვნებას, რომელიც თავისთავად არის ივანიშვილის ერთ-ერთი გამოჩენილი კრიმინალი, მაფიოზი, მფარველი, რუსეთის და საქართველოს მოქალაქეობის ერთდროულად მქონე. ეს სანქციები არის მთლიანად „ქართული ოცნების“ მხილება საქართველოში ანტიდასავლური და პრორუსული სპეცოპერაციის ჩატარებისთვის. ეს არის ძალიან სერიოზული გაფრთხილება ყველა იმ ადამიანისთვის, რომლებიც ძირს უთხრიან საქართველოს ეროვნულ ინტერესებს; რომლებიც ხელს უწყობენ რუსეთს ამ სისხლიან ომში და რომლებიც არიან ბიძინა ივანიშვილის უშუალო მფარველობის ქვეშ“, – განაცხადა ელენე ხოშტარიამ.

შეგახსენებთ, რომ აშშ-მა საქართველოს ყოფილ მთავარ პროკურორს, ოთარ-ფარცხალაძეს სანქციები დაუწესა. ამის შესახებ ინფორმაციას აშშ-ის სახაზინო დეპარტამენტის უცხოური აქტივების კონტროლის ოფისი ავრცელებს.

მათი ცნობით, ახალი სასანქციო პაკეტის ფარგლებში სანქციები კიდევ 24 ინდივიდზე გავრცელდება, რომელთა შორის ოთარ ფარცხალაძეც არის.

აშშ-ის სახელმწიფო დეპარტამენტი ოთარ ფარცხალაძეს ქართველ-რუს ოლიგარქად მოიხსენიებს, რომელთანაც რუსეთის უშიშროების ფედერალური სამსახური (“ეფესბე”) მუშაობდა, რათა რუსეთის სასარგებლოდ გავლენა მოეხდინა ქართულ საზოგადოებასა და პოლიტიკაზე.

სააკაშვილის ჩარტერული რეისების დაფინანსებასთან დაკავშირებით დღეს თავდაცვის უწყებაში შეიკრიბა შესაბამისი კომისია. მიღებული იქნა დოკუმენტების გასაჯაროების გადაწყვეტილება, – ამის შესახებ საქართველოს თავდაცვის მინისტრმა, ჯუანშერ ბურჭულაძემ განაცხადა.

მისი თქმით, შესაბამისი დანაყოფი პარალელურად აწარმოებს მოკვლევით სამუშაოებს და პროკურატურასთან ერთად იქნება მიღებული გადაწყვეტილება, როგორ წარიმართება საქმე.

„ის, რომ პრეზიდენტის ჩარტერები თავდაცვის უწყებიდან ფინანსდებოდა, მინიჭებული იყო გრიფით საიდუმლო სტატუსი, ვინ იყვნენ თანმხლები პირები, რა ლოკაციებზე იყო ფრენები განხორციელებული – ეს ყველაფერი კომპლექსურად დიდ ეჭვს იწვევს. შესაბამისი დანაყოფი პარალელურად აწარმოებს მოკვლევით სამუშაოებს და პროკურატურასთან ერთად იქნება მიღებული გადაწყვეტილება, როგორ წარიმართება საქმე. საზოგადოების მაღალი ინტერესიდან გამომდინარე, ყველა დეტალი ეტაპობრივად გახდება საჯარო“, – აღნიშნა ჯუანშერ ბურჭულაძემ.

თავდაცვის სამინისტრომ მიხეილ სააკაშვილის საჰაერო ხომალდებით მგზავრობასთან დაკავშირებით დადებული ხელშეკრულებების განსაიდუმლოების პროცესი დაიწყო.

ცუდია არაფერია იმაში, რომ „ნაციონალური მოძრაობა“ პრეზიდენტის იმპიჩმენტთან დაკავშირებით პარტიის წევრების ქმედებებს წინასწარ აზღვევს, – ამის შესახებ პარტია „გირჩის“ ლიდერმა, იაგო ხვიჩიამ განაცხადა.

მისივე თქმით, „თუ გინდა, შარში არ გაეხვიო, ისე უნდა მოიქცე, რომ ყველა რისკი გადაზღვეული გქონდეს“.

„როგორც იტყვიან, ყველა „ნაცი“ დარბაზში არ შეიშვება და ამიტომ პატიოსანი „ნაცები“ დაზარალდნენ, რომელთა დარბაზში შესვლა შეიძლება. ყველა ერთად რომ შედის, ცუდი რაღაცები ხდება და ეტყობა, ისეთმა „ნაცებმაც“ გადაწყვიტეს თავშეკავება, რომელთაც ასეთი პრობლემები არ აქვთ. თუ გინდა, შარში არ გაეხვიო, მაშინ ისე უნდა მოიქცე, რომ ყველა რისკი გადაზღვეული გქონდეს, როცა რისკების გადაზღვევა გჭირდება. ისინი ერთმანეთს არასდროს ენდობოდნენ, თუმცა ყოველთვის მიშას რწმენა აერთიანებდათ, ამიტომ ამ ფაქტორის უგულებელყოფას ნუ მოახდენთ. როცა სხდომათა დარბაზში ის ხალხი არ შედის, ვისაც ფული არ აუღია და შენ შედიხარ „ნაგლად“, ისეთ მიზეზებს ვერ მოიგონებ, როგორიც იყო თითი მიმეჭირა, მწვანეზე დამეჭირა და ასე შემდეგ. პარტია წევრების ქმედებებს წინასწარ რომ აზღვევს, ამაში ცუდი არაფერია“, – განაცხადა იაგო ხვიჩიამ.

„ნაციონალური მოძრაობის“ პოლიტსაბჭოს გადაწყვეტილებით, ფრაქცია პარლამენტში დაგეგმილ პრეზიდენტის იმპიჩმენტის პროცესში მონაწილეობას არ მიიღებს. ფრაქციის თავმჯდომარე თინა ბოკუჩავამ აღნიშნა, რომ „ერთიანი ნაციონალური მოძრაობა – ძალა ერთობაშია“ კენჭისყრის პროცესში პარლამენტის დარბაზში არ იქნება.

რადიკალურ ოპოზიციას, როგორც ჩანს, სურს, იმპიჩმენტის საკითხით პრეზიდენტთან ივაჭროს, – ამის შესახებ საპარლამენტო უმრავლესობის წევრმა, არჩილ თალაკვაძემ განაცხადა.

თალაკვაძე იმედოვნებს, რომ პრეზიდენტი „ნაციონალური მოძრაობის“ მხრიდან ზეწოლას, შანტაჟს არ დაექვემდებარება.

„ბევრი ინფორმაცია არ გვაქვს, რაზე ისაუბრეს პრეზიდენტთან, თუმცა ნათელია, რაზე იყო საუბარი გარეთ, როდესაც „ნაციონალური მოძრაობის“ ერთ-ერთმა წარმომადგენელმა მედიის საშუალებით პირდაპირ შეუთვალა სალომე ზურაბიშვილს შეწყალება ან იმპიჩმენტიო. რეალურად, ეს იყო გზავნილი, რაც რადიკალურ ოპოზიციას ჰქონდა პრეზიდენტთან. როგორც ჩანს, ამ მიმართულებით მასზე ზეწოლაა და რადიკალურ ოპოზიციას სურს, საკითხით ივაჭროს. არაა გამორიცხული, რომ შეხვედრებზე ამ საკითხით ივაჭრეს და ეს თემა ირიბად თუ პირდაპირ დააყენეს. გარკვეული ცნობებია, ამ შეხვედრებიდან გაკეთდა განცხადებები, მაგალითად, „მოქალაქეებმა“ თქვეს, რომ იმპიჩმენტთან დაკავშირებით იყო საუბარი.

ოპოზიციას მეტი გამჭვირვალობა მართებს. ახლა დაიწყება საპარლამენტო სესია, სხდომები და დიდი იმედი მაქვს, ოპოზიციის ის წარმომადგნლები, რომლებსაც პრეტენზია აქვთ გამჭვირვალობასა და ანგარიშვალდებულებაზე, უფრო მეტს იტყვიან, რეალურად, რა საკითხებზე იყო მსჯელობა საქართველოს პრეზიდენტთან. ასევე, იმედი გვაქვს, პრეზიდენტი არ დაექვემდებარება ასეთი ტიპის ზეწოლას, შანტაჟს, მით უმეტეს, „ნაციონალური მოძრაობის“ მხრიდან, ვინც მას არაკანონიერად არჩეულად მიიჩნევდა, შეურაცხყოფას აყენებდა. მასთან დაკავშირებით ბევრი ასეთი შეფასება გვაქვს მოსმენილი. ვიცით პრეზიდენტის ის პოზიცია, რაც ერთხელ თქვა, რომ შეწყალების გადაწყვეტილებას არ მიიღებს, მაგრამ ამასთან დაკავშირებით კიდევ ერთხელ არის საჭირო მეტი სიცხადე, რადგან ოპოზიციის მხრიდან პირდაპირ მოვისმინეთ გზავნილები – შეწყალება ან იმპიჩმენტი“, – განაცხადა არჩილ თალაკვაძემ.

კითხვაზე, რა მოლოდინი აქვს საპარლამენტო უმრავლესობას, შეგროვდება თუ არა პრეზიდენტის იმპიჩმენტისთვის საჭირო 100 ხმა, თალაკვაძემ განაცხადა:

„იმპიჩმენტს სამართლებრივი და პოლიტიკური დატვირთვა, გზავნილი აქვს, რომ კონსტიტუციის დარღვევას არანაირი საფუძველი, გამართლება არ შეიძლება ჰქონდეს, ყველამ კონსტიტუციის პრინციპების დაცვით უნდა წარმართოს საქმე. კენჭისყრა მას შემდეგ მოხდება, რაც საკონსტიტუციო სასამართლო თავის შეფასებას დაუბრუნებს პარლამენტს და ყველანი ვნახავთ, რა დამოკიდებულება ექნება ოპოზიციას. უნდა ვთქვათ, რომ ოპოზიცია ამ მიმართულებით რთულ ვითარებაშია – იმპიჩმენტს თუ მხარს დაუჭერს, გამოდის, რომ კონკრეტული პოლიტიკური გეგმა აქვთ, თუ არ დაუჭერენ, გამოდის, რომ თვალს ხუჭავენ კონსტიტუციური პრინციპების დარღვევაზე. სხვათა შორის, ნიშანდობლივია იმათი განცხადებებიც, რომლებმაც თქვეს, რომ დარბაზში არ შევლენ. ეს დილემისგან ერთგვარი თავის არიდებაა“, – განაცხადა არჩილ თალაკვაძემ.

„ერთიანი ნაციონალური მოძრაობის“ პოლიტსაბჭოს გადაწყვეტილებით, ფრაქცია პარლამენტში მონაწილეობას არ მიიღებს იმპიჩმენტის პროცესში იმისათვის, რომ გამოირიცხოს ყოველგვარი ინსინუაციები, სპეკულაციები, – ამის შესახებ „ნაციონალური მოძრაობის“ წევრმა, თინა ბოკუჩავამ განაცხადა.

მისი თქმით, „ნაციონალური მოძრაობა- ძალა ერთობაშია“ სხდომას არ დაესწრება.

„ჩვენ მონაწილეობას არ მივიღებთ ივანიშვილის ბინძურ თამაშში, რომელიც უპირველეს ყოვლისა ემსახურება ჩვენი ქვეყნის ევროპული არჩევანის საბოტაჟირებას. სწორედ ამ მიზნით, ფრაქცია „ერთიანი ნაციონალური მოძრაობა – ძალა ერთობაშია“ არ იქნება დარბაზში მაშინ, როდესაც ივანიშვილი გაითამაშებს იმპიჩმენტად წოდებულ პროცესს, რომელიც რეალურად მიზნად ისახავს, რომ საქართველომ არ მიიღოს კანდიდატის სტატუსი და ჩვენი ევროპული არჩევანის რეალიზება არ მოხდეს. ეს არის ჩვენი მტკიცე გადაწყვეტილება, რომელიც დღეს კიდევ ერთხელ დამტკიცდა. „ერთიანი ნაციონალური მოძრაობის“ მთავარი გადაწყვეტილების მიმღები ორგანოს, პოლიტიკური საბჭოს მიერ“, – განაცხადა ბოკუჩავამ.

„ნაციონალური მოძრაობის“ წევრის, ლევან ბეჟაშვილის განცხადებით, სხვა ოპოზიციონერმა დეპუტატებმაც მსგავსი გადაწყვეტილება უნდა მიიღონ და სხდომათა დარბაზში არ შევიდნენ.

„ჩვენ ვაძლევთ რეკომენდაციას და მოვუწოდებთ სხვა პოლიტიკურ ჯგუფებს, რომ არ დავუტოვოთ „ქართულ ოცნებას“ მანიპულაციების და სპეკულაციების სივრცე, მიიღონ ანალოგიური გადაწყვეტილება და არ დაესწრონ იმპიჩმენტის პროცედურის განხილვას, ამით ყოველგვარი ინსინუაციები გამოვრიცხოთ. იმავდროულად, ერთხელ და სამუდამოდ დასრულდეს იმპიჩმენტის ხელოვნური თემის წამოწევა და პოლიტიკური დღის წესრიგის მთავარ საკითხად წარმოჩინება, ვინაიდან მიზანი ამ კამპანიის არის პრეზიდენტის როლის გამოკვეთა, თითქოს ის არის ერთადერთი სახელმწიფო ინსტიტუცია, რომელიც პროევროპულობისათვის იბრძვის და უნდა ჩაანაცვლოს სხვა ევროპული ოპოზიციური პარტიები, ეს ბუნებრივია, ივანიშვილის და „ქართული ოცნების“ თამაშებშია. „ერთიანი ნაციონალური მოძრაობა“ ამ ქოცურ თამაშებში მონაწილეობას არ მიიღებს.  მოვუწოდებთ ყველა პროდასავლელი ოპოზიციური პოლიტიკური პარტიების ჯგუფებს, არც მათ მიიღონ მონაწილეობა ამ თემების განხილვაშიც კი. ვინაიდან, ამ თემების განხილვა და გაცოცხლება ნიშნავს მთავარი პოლიტიკური საკითხებიდან ყურადღების გადატანას. ჩვენ პასუხისმგებლობას ვიღებთ „ერთიანი ნაციონალური მოძრაობის“ ფრაქციაზე და ფრაქციის წევრებზე, სხვა წევრები, რომლებიც ადრე გასულები იყვნენ „ერთიანი ნაციონალური მოძრაობის“ საარჩევნო ბლოკის სიის, ბუნებრივია, მათზე პასუხისმგებლობას ვერ ავიღებთ და არც ავიღებთ. ამიტომ, მოვუწოდებთ ყველა ოპოზიციონერ დეპუტატს, რომ გამოირიცხოს ინსინუაციები და არ დავიტოვოთ სივრცე კითხვის ნიშნებისათვის, ყველა გამოვიდეთ დარბაზიდან და არ მივიღოთ მონაწილეობა ამ პროცესში“, – განაცხადა ბეჟაშვილმა.