ენმ-ის ყოფილი თავმჯდომარის შეხვედრა პრეზიდენტ ზურაბიშვილთან დაახლოებით 1 საათს გაგრძელდა. აუდიენციის დასრუების შემდეგ, მელიამ განაცხადა, რომ მისი შთაბეჭდილებით, ზურაბიშვილი ნაკლებად ფიქრობს ვინ მისცემს ხმას და ვინ არა იმპიჩმენტს. ნიკა მელია გამოეხმაურა ინიციატივას, რომ იმპიჩმენტის კენჭისყრისას დარბაზში ოპოზიცია საერთოდ არ შევიდეს და ამით გამოირიცხება სპეკულაციები, დაუჭერს თუ არა ვინმე მხარს “ოცნების” გარდა, ზურაბიშვილის თანამდებობიდან გადაყენებას: “მე რა შთაბეჭდილებაც დამრჩა, რომ ნაკლებად ფიქრობს ქალბატონი ზურაბიშვილი, ვინ მისცემს ხმას და ვინ არა, ვის მოისყიდიან და ვის არა. ფარული კენჭისყრის პირობებში, რა თქმა უნდა არაფერი არ არის გამორიცხული, მაგრამ მეორეს მხრივ, მოსაზრებას, რომ ოპოზიცია სხდომათა დარბაზში კენჭისყრისას არ შევიდეს, ჩემის აზრით არის ძალიან მძიმე გასააზრებლადაც კი. შენ თუ ოპოზიცია გქვია და პარლამენტში ხარ წარმოდგენილი და იმდენად უნდობლობაა ერთმანეთისა, რომ სხდომათა დარბაზში იმ შიშით ვერ შედიხარ, რომ ვიღაცამ ხმა არ მისცეს ქართული ოცნების სასარგებლოდ, მაშინ იქ აღარ უნდა იყო.” ამბობს მელია. მელიას შემდეგ, პრეზიდენტი “გირჩის” წევრს, დეპუტატ იაგო ხვიჩიას შეხვდა. ხვიჩიას შეფასებით, რეზიდენტი საკითხს “მშვიდად უყურებს”, მიუხედავად იმისა, რომ “ოცნებისგან” ყველაფერია მოსალოდნელი და შესაძლოა “გადაიბიროს ხალხი ოპოზიციიდან, ეს იმაზეა დამოკიდებული რამდენს გადაიხდიან. ძირითადად ნაცმოძრაობის სიით შესული ხალხია ამაში შემჩნეული” – ამბობს ხვიჩია. პრეზიდენტი ოპოზიციური პარტიების წარმომადგენლებს ათონელის რეზიდენციაში უკვე რამდენიმე დღეა პირადად ხვდება.

ბატონო ბორელი, ისევე როგორც ბევრი სხვა თანამდებობის პირი, აბსოლუტურად სხვა რეალობას ელოდებოდა. მას ეტყობა ჰქონდა განცდა, რომ ჩამოვიდოდა და ჭკუის დარიგების კუთხით დაიწყებდა საუბარს – „არ გინდათ იმპიჩმენტი“, „ფრენები არ არის კარგი“ და ა.შ. მაგრამ ცალ ფეხზე მდგომი ვერავინ ნახა საქართველოში, – ამის შესახებ გადაცემა „პოლიტიკურ პოსტში“ „ხალხის ძალის“ ერთ-ერთმა ლიდერმა, დეპუტატმა გურამ მაჭარაშვილმა განაცხადა.

მისი თქმით, ბორელი საქართველოდან, როგორც ღირსების მოყვარე სახელმწიფოდან, ისე წავიდა.

„არასამართლიან, დაუმსახურებელ, ანტისახელმწიფოებრივ განცხადებას საქართველოში არავინ არავის გაუტარებს. ბორელმა პრემიერის სიტყვების უკან დაინახა ის ერი, რომელსაც აქვს ღირსება, თავისუფლებისა და ევროპული ღირებულებების პატივისცემა.

ბორელმა პასუხი მიიღო ფრენებთან დაკავშირებითაც – ოთხი წლის წინ თავად ევროკავშირი სთხოვდა რუსეთს, რომ საქართველოში ფრენები აღდგენილიყო, ამავდროულად, ეს ფრენები რუსეთმა ახლა ცალმხრივად აღადგინა. ამ პასუხზე ვერაფერი თქვა. მეორე – საერთაშორისო სანქციების ვითომ დარღვევებთან დაკავშირებით, რადიკალური ოპოზიცია შავ ხვრელებს რომ ეძებდა, შემდეგ კი ამერიკელებმა და ევროკავშირის წარმომადგენლებმა წერტილი დაუსვეს ამას – საქართველო ასრულებს საერთაშორისო სანქციების გადაწყვეტილებებსო, ამ პასუხზეც ვერაფერი თქვა და მესამე – პრეზიდენტის იმპიჩმენტთან დაკავშირებითაც პრემიერმა ის უპასუხა, რომ სამართლებრივად კონსტიტუცია ითხოვს ამას, ჩვენ კი არ ვითხოვთ. ვინ თუ არა პარლამენტმა და პარლამენტის წევრებმა უნდა დაიცვან საქართველოს კონსტიტუცია. ჩვენ ტექნიკურად ამას ვასრულებთ, მაგრამ, რეალურად, საქართველოს პრეზიდენტს საკონსტიტუციო სასამართლოში დახვდება კონსტიტუცია და მას უნდა ესაუბროს.

პრეზიდენტმა სალომე ზურაბიშვილმა როცა თქვა, რომ ნახევრად ევროპელი ვარო, ე.ი. მეორე ნახევარს, ქართველისას, ევროპულად არ აღიქვამს. ანუ საქართველო ევროპის ნაწილად არ მიაჩნია. ამას გარდა, მან საჯაროდ, პარლამენტიდან მადლობა გადაუხადა ევროკავშირს, რომ კანდიდატის სტატუსი არ მიანიჭა საქართველოს. ეს სამწუხარო პოლიტიკური განცხადებებია, საკონსტიტუციო სასამართლოში კი მას მოუწევს უკვე არა პოლიტიკური, არამედ სამართლებრივი პასუხი ჰქონდეს კითხვაზე – რატომ დაარღვია კონსტიტუცია?

არ მგონია ბატონ ბორელსაც თავის სახელმწიფოში ესიამოვნოს, მისმა სახელმწიფო მეთაურმა რომ კონსტიტუცია დაარღვიოს. პრემიერ ირაკლი ღარიბაშვილის ამ პასუხებმა ვნახეთ, რომ საზოგადოების მხარდაჭერა მოიპოვა. ამიტომ, ბატონი ბორელი საქართველოდან, როგორც ღირსების მოყვარე სახელმწიფოდან, ისე წავიდა. დარწმუნებული ვარ, რომ ის ბრიუსელში იტყვის – ამ ხალხს ან უნდა მივანიჭოთ კანდიდატის სტატუსი, ან მათ დავკარგავთო“, – განაცხადა გურამ მაჭარაშვილმა.

სომხეთს აღარ შეუძლია რუსეთს, როგორც საკუთარი უსაფრთხოების გარანტს, დაეყრდნოს. ამის შესახებ სომხეთის პრემიერ-მინისტრმა ნიკოლ ფაშინიანმა გამოცემა Politico-სთან ინტერვიუში განაცხადა.

ფაშინიანის თქმით, უკრაინაში რუსეთის კატასტროფული შეჭრის გამო სომხეთს აღარ შეუძლია მოსკოვს, როგორც საკუთარი უსაფრთხოების გარანტს, დაეყრდნოს, მიუხედავად იმისა, რომ აზერბაიჯანთან ღია კონფლიქტის დაბრუნების შიში იზრდება.

“უკრაინაში მოვლენების გამო რუსეთის შესაძლებლობები შეიცვალა… ჩვენი სტრატეგია ის უნდა იყოს, რომ ასეთ სიტუაციაში მაქსიმალურად შევამციროთ სხვებზე დამოკიდებულება. გვინდა, რომ დამოუკიდებელი ქვეყანა, სუვერენული ქვეყანა გვქონდეს, მაგრამ უნდა გვქონდეს გზები, თუ როგორ ავიცილოთ დასავლეთსა და აღმოსავლეთს, ჩრდილოეთსა და სამხრეთს შორის შეჯახებების ცენტრში ყოფნას… არ უნდა არსებობდეს შესაძლებლობა, რომელშიც სომხეთი “პროქსი” გახდება. ეს დაუშვებელია,” – განაცხადა ფაშინიანმა.

სომხეთის პრემიერ-მინისტრის თქმით, აზერბაიჯანმა ლაჩინის დერეფნის ბლოკირებით “ჰუმანიტარული კრიზისი” შექმნა და რუსმა მშვიდობისმყოფელებმა საკუთარი ვალდებულებები ვერ შეასრულეს.

“ეს ყველაფერი… რუსი მშვიდობისმყოფელების პასუხისმგებლობის სფეროში უნდა ყოფილიყო და ვინაიდან ეს პრობლემები ჯერ კიდევ არსებობს, რუსმა მშვიდობისმყოფელებმა საკუთარ მისია ვერ შეასრულეს,” – განაცხადა ფაშინიანმა.

ამავდროულად მან აღნიშნა, რომ რუსი მშვიდობისმყოფელები რომ არ ყოფილიყვნენ, მას არ შეუძლია თქმა, რომ ვითარება უკეთესი იქნებოდა.

Politico-სთან ინტერვიუში ფაშინიანმა კიდევ ერთხელ დაადასტურა, რომ სომხეთი მთიან ყარაბაღს აზერბაიჯანის ტერიტორიად აღიქვამს, მაგრამ აღნიშნა, რომ ახლა საერთაშორისო საზოგადოების ხელშია უზრუნველყოს, რომ რეგიონში “ეთნიკური წმენდა” არ მოხდება.

საქართველოს პრემიერ-მინისტრმა ირაკლი ღარიბაშვილმა სლოვაკეთის რესპუბლიკის საგანგებო და სრულუფლებიან ელჩთან საქართველოში, პაველ ვიზდალთან, გამოსამშვიდობებელი შეხვედრა გამართა.

შეხვედრაზე ყურადღება გამახვილდა იმ მნიშვნელოვან პროგრესზე, რაც საქართველოსა და სლოვაკეთს აქვს ორმხრივ ურთიერთობებში, მათ შორის – პოლიტიკის, ეკონომიკისა და კულტურის მიმართულებით. საუბრისას განიხილეს ქვეყნისთვის მნიშვნელოვანი მხარდამჭერი პროექტები, ასევე – ხაზი გაესვა სლოვაკეთის დახმარების მნიშვნელობას ჯანდაცვის სექტორისთვის.

მთავრობის ადმინისტრაციაში გამართულ შეხვედრაზე სლოვაკეთის რესპუბლიკის ელჩმა პრემიერ-მინისტრს საქართველოს ევროკავშირში გაწევრიანების მიმართ მტკიცე მხარდაჭერა დაუდასტურა.

ირაკლი ღარიბაშვილმა სლოვაკეთის რესპუბლიკის ელჩს ორ ქვეყანას შორის არსებული სტრატეგიული პარტნიორობის კიდევ უფრო გაღრმავებისთვის მადლობა გადაუხადა და მომავალ საქმიანობაში წარმატება უსურვა.