არ მგონია, პარტიების დაფინანსებაზე მართლა ვიღაც წუხდეს. ეს კონკრეტულ პარტიებზე ზეწოლის მექანიზმი შეიძლება იყოს, – ასე გამოეხმაურა „გირჩის“ წევრი ალექსანდრე რაქვიაშვილი „რეგიონული განვითარების და ხელშეწყობის ცენტრის“ განცხადებას, რომელიც აუდიტის სამსახურს მიმართავს, დაიწყოს მოკვლევა პარტიების მიერ არასამთავრობო ორგანიზაციების შექმნის გზით უკანონო შემოწირულებების მიღებასთან დაკავშირებით.

ალექსანდრე რაქვიაშვილის თქმით, იმედი არ აქვს, რომ ფინანსების გაკონტროლება რამე კარგს მოიტანს.

„ჩვენს ქვეყანაში ისეთი კანონმდებლობა გვაქვს, რომ ყველა პარტია არღვევს მას. არცერთი პარტია – ჩვენით დაწყებული, „ქართული ოცნებით“ დამთავრებული – ლეგალურად არ მუშაობს. თუ საჭირო იქნება, შეიძლება, ყველა დააჯარიმო და დახურო კიდეც, იმხელა ძალაუფლება აქვს სახელმწიფო აუდიტს და შემდეგ ექნება ახალ სააგენტოს, ანტიკორუფციულ ბიუროს, სადაც ეს უფლებამოსილება გადადის. არ მგონია, სერიოზული იყოს და პარტიების დაფინანსებაზე მართლა ვიღაც წუხდეს. ეს კონკრეტულ პარტიებზე ზეწოლის მექანიზმი შეიძლება იყოს. ვიდრე არ გავაცნობიერებთ, რომ ნებისმიერი პარტიის გაუქმება შეიძლება – მთავრობას ისეთი ძალაუფლება აქვს – და არ ვიფიქრებთ, რომ კანონმდებლობა შევცვალოთ, ეს რისკი სულ იარსებებს. პრობლემა ისაა, რომ, ჩვენ გარდა, არცერთი ოპოზიციური პარტია არ ითხოვს ამ კანონმდებლობის შეცლას. ოპოზიციური პარტიების წარმომადგენლები მიიჩნევენ, რომ პარტიების ფინანსები ასე უნდა კონტროლირდებოდეს. საქართველოში როცა ვენეციის კომისია იყო და ვთხოვეთ, კანონმდებლობა შეგვეცვალა, ოპოზიციიდან მხარი არავინ დაგვიჭირა. უცნაური სიტუაციაა, ოპოზიცია მიიჩნევს, რომ პარტიების ფინანსები უნდა კონტროლირდებოდეს. არანაირი იმედი არ მაქვს, რომ ფინანსების გაკონტროლება რამე კარგს მოიტანს“, – განაცხადა ალექსანდრე რაქვიაშვილმა.

ვერ არიან კარგად, სოფო ჯაფარიძე დანიშნა წარმომადგენლად, აბა, ჩემი ხაბე ვინ არის, – ასე გამოეხმაურა  „ქართული ოცნების“ დეპუტატმა ირაკლი ზარქუა, “ნაციონალური მოძრაობის“ წევრის, სოფო ჯაფარიძის განცხადებას, სადაც ამბობს, რომ მიხეილ სააკაშვილის სახელით ხვალიდან საარჩევნო კამპანიას იწყებს.

„ვერ არიან კარგად, ამით შეიძლება შეფასდეს ეს რადიკალური ოპოზიცია და მათი ბელადი. პატივცემული სააკაშვილი საქართველოს მოქალაქე არ არის და კეთილი ინებოს, პატივი სცეს ამ ქვეყნის კონსტიტუციას. ახლა ხომ მაინც შეუძლოა, მოინანიოს და ერთხელ მაინც გადადგას ადეკვატური, საქართველოს ინტერესებისა და კანონმდებლობის შესაბამისი ნაბიჯი. სააკაშვილი უფლებამოსილი არ არის, საარჩევნო კამპანიაში იყოს ჩართული, რადგან თვითონ დახია საქართველოს მოქალაქეობა და უკრაინაში გაიქცა.

რაც შეეხება სოფო ჯაფარიძეს, ეს გოგო მეცოდება, მის მიმართ ძალიან პოზიტიურად ვარ განწყობილი და ახლა წარმომადგენლად დანიშნა. აბა, ჩემი ხაბე ვინ არის? რომელ პარტიას წარმოადგენს, ეს რომ დადის და წამდაუწუმ სააკაშვილს, ბელადს ახსენებენ? სამი ფრთაა, რომელიც სააკაშვილის სახელს იყენებს და ამბობენ, რომ  „ნაციონალური მოძრაობა“ და სააკაშვილი განუყოფელი ნაწილიაო. ამ დროს სააკაშვილი თავის წარმომადგენლად ნიშნავს ქალბატონ ჯაფარიძეს, რომელმაც უნდა მოიაროს მთელი საქართველო. არ ვიცი, რაზე უნდა ილაპარაკოს, მაგრამ მცდელობა აქვთ. მივმართავ ქართულ საზოგადოებას, ხედავთ, რასთან გვაქვს საქმე?

მთავარი ოპოზიციური პარტია ჰქვია და სამი წარმომადგენელი მოვა თქვენთან, მაგრამ დაუჯერეთ სოფო ჯაფარიძეს, რადგან სოფო ჯაფარიძე არის წარმომადგენელი სააკაშვილის, რომელიც, ქართული კანონმდებლობის შესაბამისად, არალეგიტიმურია, საარჩევნო პროცესში იყოს ჩართული. ასეთ დომხალთან გვაქვს საქმე და რა უნდა გამოვიდეს ამ ხელმოცარულებისგან? ამიტომაც არის, რომ ცდილობენ, ყველა პატარა თუ დიდ ტრაგედიაზე ხელი მოითბონ და პოპულისტური განცხადებები აკეთონ“, – განაცხადა ირაკლი ზარქუამ.

დაფინანსების ნებისმიერი წყარო გამჭვირვალეა, ძალიანაც რომ უნდოდეს რომელიმე პარტიას, ამას ვერ დამალავს, – ამის შესახებ „სტრატეგია აღმაშენებლის“ წევრმა, სერგო ჩიხლაძემ განაცხადა.

ჩიხლაძე გამოეხმაურა „რეგიონული განვითარების და ხელშეწყობის ცენტრის“ განცხადებას, რომელიც აუდიტის სამსახურს მიმართავს, დაიწყოს მოკვლევა პარტიების მიერ არასამთავრობო ორგანიზაციების შექმნის გზით უკანონო შემოწირულებების მიღებასთან დაკავშირებით.

„აუდიტის სამსახური ისედაც აკეთებს ამას, ეს მისი საქმიანობის სფეროა და ამიტომ ახლა ეს რაღაც ახალი შეკვეთილი კამპანიაა „ქართული ოცნების“ მხრიდან, რაღაც სიახლე და აურზაური თუ ქარიშხალი ჭიქაში რასაც ჰქვია. აუდიტის სამსახური აკეთებს ამას, გამჭვირვალეა ეს ყველაფერი და მათ შორის „ქართული ოცნების“ ე.წ. ჯიბის ორგანიზაციებს შეუძლიათ, მიიღონ ამაზე ინფორმაცია.

ესეც არის ტყუილი, რადგან გამჭვირვალეა დაფინანსების ნებისმიერი წყარო. ძალიანაც რომ უნდოდეს რომელიმე პარტიას, ამას ვერ დამალავს. ყველაფერი დევს გამჭვირვალედ. იმავე აუდიტის საიტზე შეუძლია შევიდეს ყველას და ნახოს. არ ვიცი, რას ემსახურება ეს ამდენი სისულელის ფრქვევა“,  – განაცხადა სერგო ჩიხლაძემ.

ეს არის ბიძგი, მითითება, რომ საარჩევნო პროცესი რევოლუციური სცენარით უნდა წარიმართოს, – ასე ეხმაურება საპარლამენტო უმრავლესობის წევრი, საპროცედურო საკითხთა კომიტეტის თავმჯდომარე ირაკლი ქადაგიშვილი. არჩევნების შესახებ, საქართველოში ამერიკის შეერთებული შტატების ელჩის, კელი დეგნანის განცხადებას

ქადაგიშვილის განცხადებით, კელი დეგნანის განცხადება  პოლიტიკური პარტიებისთვის დამახასიათებელ მოწოდებას შეიცავს. მისივე განცხადებით, ახლა ელექტრონულ სისტემაზე ორკესტრირებული შეტევა იწყება.

„ქალბატონი კელი დეგნანის განცხადება თავიდან ბოლომდე პოლიტიკითაა გაჟღენთილი. მოწოდებაა, რომელსაც, როგორც წესი, პოლიტიკური პარტია აკეთებს ხოლმე – „გამოდით არჩევნებზე, დაიცავით თქვენი ხმა!“ ანუ ვიღაც ვიღაცას ართმევს ხმას და წელიწადნახევრით ადრე მოუწოდებს, დაიცავით თქვენი ხმაო. ეს უკვე არის ბიძგი, მითითება, რომ საარჩევნო პროცესი რევოლუციური სცენარით უნდა წარიმართოს.

გვეუბნებიან, რომ არჩევნები ყალბდება არჩევნებამდეც, მაგრამ ფაქტები ვერ მოჰყავთ. 2020 წელს ვუყურეთ, როგორ ხდებოდა ცალყბად არჩევნების აღიარება და მეორე მხრივ, კრიზისის ხელის შეწყობა, მაგრამ ვერც ერთი დოკუმენტი, ჩვენება ვერ იქნა მოტანილი, რომ არჩევნები გაყალბდა. ახლა, როცა მართლაც რევოლუციური საარჩევნო კოდექსი მივიღეთ, რაზეც ყველა მიუთითებდა. ხომ გვახსოვს – ყველა მიუთითებდა, რომ თუ ელექტრონული ხმის დათვლის სისტემა იქნებოდა, მაშინ არჩევნების გაყალბების და შედეგის მყისიერი გამოცხადების პრობლემა არ იქნებოდა. ეს სისტემა მიღებულია, მაგრამ ჩვენ უკვე დავინახეთ, რომ ამ სისტემაზე ორკესტრირებული შეტევა დაიწყო. გააკეთა განცხადება ელჩმა, მერე ერთმა პოლიტიკურმა პარტიამ მოაყოლა, ახლა სხვები მოაყოლებენ და დაიწყება ხალხში იმ აზრის მუსირება, რომ ელექტრონული სისტემით ჩატარებული არჩევნებიც კი გაყალბებულია. „ბანკსაც კი ქურდავენ“ ამ დონის თეორიაზე დაჰყავთ უკვე საქმე, რომ საზოგადოებაში დღესვე დაიწყონ მზადება და წაგებული არჩევნები რევოლუციურ სცენარში გადაზარდონ,“ – განაცხადა ქადაგიშვილმა.

აშშ-ის ელჩის, კელი დეგნანის განცხადებით, აშშ-შიც ნახეს, რომ არჩევნების ელექტრონული სისტემით ჩატარებაც ვერ იძლევა გარანტიას, რომ „ყველაფერი სუფთა და სამართლიანი იქნება“.

როგორც დეგნანი რადიო „თავისუფლებასთან“ ინტერვიუში აცხადებს, მისით მანიპულაციაც შესაძლებელია, თუკი ადამიანები არ არიან გაწვრთნილები ამ სისტემის გამოყენებაზე და თუკი ამომრჩევლებს არ ესმით, ის როგორ მუშაობს. მისივე თქმით, მნიშვნელოვანია ასევე მონიტორინგის გრძელვადიანი მისია, რადგან ადამიანების დაშინება, ხმების მოსყიდვა, ადამიანების მიმართ მუქარა ხდება არჩევნების დღემდე და ეს ტაქტიკა საქართველოშიც სხვადასხვა ხელისუფლების დროს გამოიყენებოდა.

მავნებელი ხართ თქვენ, ქალბატონო ყოფილო ელჩო, ჩვენი მთავარი პარტნიორი, რომელიც უნდა იყოს მხარდამჭერი დემოკრატიული პროცესების, სიმშვიდის, ქალბატონი დეგნანი, რომელიც არის წარმომადგენელი, კითხვის ნიშნის ქვეშ აყენებს ელექტრონულ არჩევნებს, რომელიც მათი რეკომენდაციით დავნერგეთ, – ამის შესახებ საპარლამენტო უმრავლესობის წევრმა, ირაკლი ზარქუამ აშშ-ის ელჩ კელი დეგნანის მიერ „რადიო თავისუფლებისთვის“ მიცემული ინტერვიუს კომენტირებისას განაცხადა, სადაც არჩევნების შესახებაც არის საუბარი.

ირაკლი ზარქუას თქმით, კელი დეგნანმა ვერ გაითავისა, რომ იყო არა პარტიის, არამედ სახელმწიფოს წარმომადგენელი.

„მავნებელი ხართ თქვენ, ქალბატონო ყოფილო ელჩო, Goodbye, my darling. ე.ი. რა გამოდის, რომ ჩვენი მთავარი პარტნიორი, რომელიც უნდა იყოს მხარდამჭერი დემოკრატიული პროცესებისა და ქვეყნის განვითარების, სიმშვიდის, ქალბატონი დეგნანი, რომელიც არის წარმომადგენელი, კითხვის ნიშნის ქვეშ აყენებს ელექტრონულ არჩევნებს, რომელიც მათი რეკომენდაციით დავნერგეთ. უფრო მეტიც, პრაქტიკაში გამოვიყენეთ ახლა.

შუალედური არჩევნები გვქონდა, მათ შორის კრწანისში, თერჯოლაში და ასე შემდეგ, ავირჩიეთ მერები და ვაპირებთ, გორში გამოვიყენოთ ოქტომბრის თვეში შუალედურ არჩევნებში. სადაც ჩატარდა ელექტრონულად, არცერთი პრობლემა, ხარვეზი არ დაფიქსირებულა და ყველამ, მათ შორის საერთაშორისო დამკვირვებლებმაც, ადგილობრივმა არასამთავრობოებმაც თქვეს, რომ კი, ეს გამართულია და მოქმედებს. ახლა ამას რომ კითხვის ნიშნის ქვეშ დააყენებ 2024-ში, მავნებელი ხართ თქვენ, ქალბატონო ყოფილო ელჩო, მინდა, ეს მოგმართოთ და პირდაპირ გითხრათ, თქვენ თქვენი ვერ გაითავისეთ, ვერ გაითვალისწინეთ, რომ თქვენ არა პარტიის წარმომადგენელი, არამედ სახელმწიფოს წარმომადგენლი იყავით. იმ სახელმიფოსი, რომელზეც იმედებს ვამყარებთ დღემდე და მომავალში დავამყარებთ, რომ ჩვენ ევროპულ და ევროატლანტიკურ ინტეგრაციაში კიდევ უფრო მეტად წინ წავიწიოთ, უფრო მეტად დემოკრატიული საზოგადოება ავაშენოთ და მეტად დემოკრატიული გავხადოთ ეს ქვეყანა და ამით ძლიერი, ეკონომიკურად განვითარებული. თქვენ, სამწუხაროდ, ამ მიმართულებით არცერთი ნაბიჯი არ გადაგიდგამთ, ისევე როგორც დღემდე არ აქვს საქართველოს თავისუფალი ვაჭრობა ამერიკის შეერთებულ შტატებთან და თქვენ ამისთვის არაფერი გაგიკეთებიათ, არც უვიზო მიმოსვლა აქვს საქართველოს ამერიკის შეერთებულ შტატებთან და ამისთვის თქვენ არაფერი გაგიკეთებიათ, არც ინვესტიცია ჩაგიდიათ.

ვსვამ კითხვას – ანაკლიის პორტში რატომ არ დევს ამერიკული ფული, რატომ არ გამოხვედით ინიციატივით თქვენ ან სხვები. ყაზახურ ინვესტიციებს გვტენიდა ის, ვინც იყო იქ შესული. რატომ არ არის? ჩამოდით და ჩადეთ ფული. ხომ არის სტრატეგიულად მნიშვნელოვანი თქვენთვისაც. არ გამოვა ასე ორმაგი სტრანდარტით, ვწუხვარ ამის თქმის საშუალება რომ მომეცით, მაგრამ ეს თქვენ ბრძანეთ. ქართველი ერი, უდიდესი ცივილიზაციის, კულტურის, განათლების მქონე საზოგადოება ვართ და რამენაირად იმასაც გავარკვევდით და გავარკვიეთ, ელექტრონულად როგორ შეიძლება მონაწილეობა მივიღოთ არჩევნებში. ძალიან ვწუხვარ, ქალბატონო ელჩო, მაგრამ თქვენ, როგორც ელჩი, ვერ შედექით და ეს უნდა ითქვას.

ვწუხვარ, თქვენ პოლარიზაცია გაზარდეთ ქართულ საზოგადოებაში თქვენი საქმიანობით, თქვენი განცხადებებით და ამის დემონსტრირებაა ის, რაც ბოლოს მოვისმენთ. ჩვენი პარტნიორები, მათ შორის თქვენ და ყველა, საზოგადოება გვირჩევდა, რომ ელექტრონული არჩევნები 100 პროცენტით გაგვეხადა საქართველოში, რომელიც იქნებოდა მყარი და ყოველგვარი მანიპულაციებისგან დაცული, თურმე ესეც არ მოგწონთ.

რატომ? იმიტომ, რომ ალბათ თქვენ იყავით ერთერთი ერთ-ერთი შემოქმედი, რომ აქ რევოლუციური ტალღა აგორებულიყო და 3-4-ჯერ ჩვენ ეს ჩავახშეთ, რადგან საქართველოს და მისი მოსახლეობის უმრავლესობის ინტერესებში არასდროს შედიოდა ქაოსი, არეულობა და არც მეორე ფრონტის გახსნა, რასაც ეს ხელმოცარულები და რადიკალები ცდილობდნენ. ვწუხვარ, მაგრამ თქვენ ძალიან დიდი შეცდომები დაუშვით და გააგრძელეთ, ბოლოს ამით დააგვირგვინეთ. მქონდა მცდელობა, ბოლოს ლამაზად, ლამაზი სიტყვებით გამეცილებინეთ, მაგრამ სამწუხაროა, რომ ასე მოხდა. ასე რომ, Goodbye, my darling“, – განაცხადა ირაკლი ზარქუამ.

ჩვენი სტრატეგიული პარტნიორების ასეთი ღია განცხადებები მიანიშნებს ერთ რამეზე – სრული მხარდაჭერა ექნება ქართველ ხალხს და შესაბამისად, ეს საქმე ბოლომდე ქართველი ხალხის მისაყვანი იქნება, – ამის შესახებ „ერთიანი ნაციონალური მოძრაობის“ თავმჯდომარემ, ლევან ხაბეიშვილმა განაცხადა, რითაც არჩევნებთან დაკავშირებით, საქართველოში ამერიკის შეერთებული შტატების ელჩის, კელი დეგნანის განცხადებას გამოეხმაურა.

მისივე თმით, „გაფორმება სჭირდება იმას, რომ ქართველ ხალხს რუსული ხელისუფლება არ უნდა“.

„როცა პუტინი, მარგარიტა სიმონიანი, სალავიოვი გაქებს, ეს საქართველოს ხელისუფლებისთვის პრობლემაა. პარალელურად, როცა სტრატეგიული პარტნიორი ამბობს, რომ მანიპულატორი ხარ, გამყალბებელი ხარ, რომ საშიში და სახიფათოა საქართველოს ხელისუფლების მიერ ჩატარებული არჩევნები, ეს არის განაჩენი რუსული პარტიისთვის და შესაბამისად, ქართველმა ხალხმა ეს განაჩენი უნდა აღასრულოს. იმას, რომ რუსული ხელისუფლებაა, იმას, რომ რუსული პარტია არ უნდა ქართველ ხალხს, იმას, რომ ამ რეჟიმში ცხოვრება საქართველოს მოქალაქეს აღარ უნდა, სჭირდება გაფორმება და ჩვენი სტრატეგიული პარტნიორების ასეთი ღია განცხადებები მიანიშნებს ერთ რამეზე, სრული მხარდაჭერა ექნება საქართველოს მოქალაქეს, სრული მხარდაჭერა ექნება ქართველ ხალხს და შესაბამისად, ეს საქმე ბოლომდე ქართველი ხალხის მისაყვანი იქნება,“ – განაცხადა ლევან ხაბეიშვილმა.

არიან ადამიანები, რომლებიც ცდილობენ ძირი გამოუთხარონ აშშ-სა და საქართველოს შორის ახლო, ძლიერ პარტნიორობას. ამას ისინი გარკვეული მიზეზების გამო და კერძო ინტერესებით აკეთებენ, რაც სწორედ ამაზეა გათვლილი, – ამის შესახებ აშშ-ის ელჩმა საქართველოში კელი დეგნანმა „რადიო თავისუფლებასთან“ ინტერვიუში განაცხადა.

მისივე თქმით, აშშ არსად წასვლას არ აპირებს და საქართველოს გვერდით იდგება მანამდე, ვიდრე საქართველოს ხალხი დემოკრატიული მომავლისკენ ისწრაფვის.

„ისინი არ ცდილობენ მხოლოდ აშშ-ის დისკრედიტაციას, არამედ ნებისმიერი დამოუკიდებელი ხმისა, რომელიც გამოდის საქართველოს ევროპული, დემოკრატიული მომავლის სასარგებლოდ. ვთვლი, რომ საქართველოს ხალხი საკმარისად საზრიანია – მინიმუმ ისინი, ვისაც მე შევხვედრივარ, ძალიან საზრიანად უდგებიან ამას. ისინი მიეჩვივნენ ამ სახის რუსულ და პრორუსულ დეზინფორმაციას და ვფიქრობ, შეუძლიათ დაინახონ – როდის ცდილობენ ადამიანები დააზიანონ საქართველოს პარტნიორობა მის უახლოეს მეგობრებთან, ნამდვილ სტრატეგიულ პარტნიორებთან, რომლებიც იქნებიან აქ საქართველოსთვის, ვინაიდან აქ ვართ საქართველოსთან ერთად 30 წელზე მეტია და არსად წასვლას ვაპირებთ. ვიდგებით საქართველოს გვერდით მანამდე, ვიდრე საქართველოს ხალხი დემოკრატიული მომავლისკენ ისწრაფვის“, – განაცხადა კელი დეგნანმა.