საზოგადოება შეძრა მომხდარმა და ალბათ არ უნდა არსებობდეს ძალა, რომელიც მომხდარ კატასტროფაზე გლოვის გარდა სხვა რამეს გათქმევინებს. მაგრამ, არა – ეგრეც არ არის. ჩვენს საზოგადოებაში არსებობენ რადიკალი ოპოზიციონერები – ხალხი, რომლებმაც საზოგადოებრივი გლოვა პოლიტიკურ დივიდენდებში დაახურდავეს, – ამის შესახებ ექსპერტი ანდრია გვიდიანი სოციალურ ქსელში წერს.

როგორც გვიდიანი აღნიშნავს, შოვში მომხდარი ტრაგედიის გამო, მთელი ქვეყანა გლოვობს, თუმცა, რადიკალური ოპოზიციის წარმომადგენლები არსებულ ვითარებაშიც კი, პოლიტიკური ქულების დაწერას ცდილობენ.

მისი თქმით, პოლიტიკის გამო ყველანაირი საზღვრის გადაკვეთა დაუშვებელია.

„მთელი საქართველო გლოვობს უმძიმეს ტრაგედიას. საზოგადოება შეძრა მომხდარმა და ალბათ არ უნდა არსებობდეს ძალა, რომელიც მომხდარ კატასტროფაზე გლოვის გარდა სხვა რამეს გათქმევინებს.

მაგრამ, არა – ეგრეც არ არის. ჩვენს საზოგადოებაში არსებობენ რადიკალი ოპოზიციონერები – ხალხი, რომლებმაც საზოგადოებრივი გლოვა პოლიტიკურ დივიდენდებში დაახურდავეს, რომლებმაც შეძლეს, ამ ტრაგედიისთვის პოლიტიკური სარჩული ეპოვათ. ამაზრზენი სანახავია, როცა ჩასაფრებულის პოზიციიდან ცდილობ ყველაზე დიდ სტიქიაში პოლიტიკური ნიშნები იპოვო და, უფრო უარესი, ამ სტიქიაზე პოლიტიკური ქულების მოპოვებას შეეცადო.

ხალხო, არის დაუწერელი წესები, რაც უბრალოდ არ უნდა გეშლებოდეს. არის საზღვრები, რომლის გადალახვაც უბრალოდ არ შეიძლება. არის მორალი, ზნეობა, ეთიკა, ადამიანობა. პოლიტიკის გამო, ყველაფრის გადახაზვა არ შეიძლება. სად გაიზარდეთ, ან როგორ გაიზარდეთ, ასე რამ გაგაბოროტათ?!” – წერს ანდრია გვიდიანი.

დედაქალაქის მერიაში გამართულ ბრიფინგზე შოვში მომხდარი სტიქიის შედეგად გარდაცვლილთა ოჯახებისთვის სამძიმრის გამოცხადების შემდეგ, თბილისის მერი კახა კალაძე გამოეხმაურა  კონკრეტული მედიასაშუალებებით გავრცელებულ ინფორმაციას იმასთან დაკავშირებით, თითქოს სახელმწიფოს კუთვნილი ვერტმფრენი სტიქიის  ადგილზე მისი ოჯახის გადასარჩენად ჩაფრინდა.

თბილისის მერმა აღნიშნულ ინფორმაციას კონკრეტული მედიაარხის მიერ მიზანმიმართულად გავრცელებული სამარცხვინო   პროვოკაცია უწოდა  და აღნიშნა, რომ დასვენების დღეების დასრულების გამო, მისმა მცირეწლოვანმა შვილებმა რაჭა სტიქიამდე რამდენიმე საათით ადრე, ავტომობილით დატოვეს.

„რაც შეეხება  აღნიშნულ საკითხს, ჩემი სამი მცირეწლოვანი შვილი ისვენებდა შოვში ორი კვირის განმავლობაში. ეს მართლაც ასე იყო. ყოველ ზაფხულს ვსტუმრობდით რაჭას და ძალიან დიდი სიყვარული გვაქვს ამ კუთხის მიმართ. გუშინ დასვენების დღეები დაუმთავრდათ და სანამ სტიქია, ეს უბედურება დაიწყებოდა, რამდენიმე საათით ადრე ჩემმა შვილებმა ჩემივე ავტომობილებით დატოვეს ტერიტორია, აღნიშნული სასტუმრო და რამდენიმე საათში დაიწყო ეს უბედურება. ეს სპეკულაციები მიზანმიმართულად ხდება და მიმდინარეობს.

კონკრეტულად  „TV პირველს“ მინდა მივმართო, თქვენ ხართ სამარცხვინოები, როდესაც ასეთი ტრაგედიისა და უბედურების ფონზე, ამგვარ სპეკულაციებს ავრცელებთ. სამარცხვინოები ხართ მთლიანად თქვენი კოლექტივი, თქვენ ხელმძღვანელებთან ერთად. ასაუბრებთ ადამიანს, ქალბატონს, რომელიც უდიდესი უბედურების წინაშე დგას, ეძებს ოჯახის წევრებს და სპეკულირებთ, თითქოს, ჩემმა შვილებმა გამოიყენეს ვერტმფრენი და მისი საშუალებით დატოვეს ტერიტორია. მადლობელი ვარ ღმერთის, რომ შვილები გადამირჩინა, თუმცა, ვთქვათ, იქ რომ ყოფილიყვნენ ჩემი შვილები, უნდა დაეტოვებინათ, არ უნდა ჩაესვათ ვერტმფრენში და არ უნდა გადმოეყვანათ? საერთოდ არ მესმის, რაზეა საუბარი. კიდევ ერთხელ ვიმეორებ, სამარცხვინოები ხართ, როდესაც ასეთ მიზანმიმართულ სიბინძურეს ავრცელებთ“, – აღნიშნა კახა კალაძემ.

ასევე, თბილისის მერმა „ნაციონალური მოძრაობის“ წევრის, კახა ოქრიაშვილის მიერ სოციალურ ქსელში გამოქვეყნებულ სტატუსზე, კახა კალაძისთვის სამართლებრივი პასუხისმგებლობის დაკისრებასთან დაკავშირებით, განაცხადა, რომ „ოქრიაშვილი არის  ნაძირალა, რომელიც მზადაა, იკადროს და გააკეთოს ყველაფერი“.

შინაგან საქმეთა სამინისტროს საგანგებო სიტუაციების მართვის სამსახურის უფროსი თემურ მღებრიშვილი შოვში, სტიქიის ზონაში დაკარგულთა ოჯახის წევრებს შეხვდა.

როგორც მღებრიშვილმა აღნიშნა, დაკარგულთა ოჯახის წევრებს სტიქიის ეპიცენტრს ვერტმფრენის საშუალებით დაათვალიერებინებენ.

„იმ ადამიანების ოჯახის წევრებს შევხვდით, ვისთანაც დაკონტაქტება ამ დრომდე ვერ ხერხდება. მიმდინარე პროცესები მოვახსენეთ, თუ რა სამუშაოები მიმდინარეობს, რა მდგომარეობაა თვითონ სტიქიის ეპიცენტრში. მათ სურვილი გამოთქვეს, უშუალოდ ნახონ სტიქიის ეპიცენტრი და ჩვენ მზად ვართ, შევიყვანოთ ვერტმფრენის საშუალებით და თვითონ ნახონ, თუ რა მძიმე სიტუაციაა. სურვილი გამოთქვეს და შესაბამისად, თავი ვალდებულად ჩავთვალეთ, ეს სურვილი დავაკმაყოფილოთ“, – განაცხადა მღებრიშვილმა.