რუსულმა ძალებმა წუხელ ოდესას სამჯერ შეუტიეს, უკრაინის საჰაერო თავდაცვის ძალებმა ყველა შეტევა მოიგერიეს და 15 დრონი და “კალიბრის” ტიპის 8 რაკეტა ჩამოაგდეს, – ინფორმაციას უკრაინის სამხრეთის თავდაცვის ძალები ავრცელებს.

„მტერმა ღამით სამჯერ შეუტია ოდესის ოლქს, გამოიყენა დრონების ორი ტალღა, სულ 15 ცალი და “კალიბრის” ტიპის საზღვაო ბაზირების 8 რაკეტა. საჰაერო თავდაცვის ძალებმა ყველა შეტევა მოიგერიეს”, – აცხადებენ უკრაინის თავდაცვის ძალებში.

გავრცელებული ინფორმაციით, რაკეტების ჩამოგდების შედეგად, ნამსხვრევებით დაზიანდა ერთ-ერთი სასწავლო დაწესებულების საერთო საცხოვრებელი და სუპერმარკეტი, დაშავდა სამი ადამიანი. ასევე, აფეთქების ტალღის შედეგად რამდენიმე კორპუსს მინები და აივნები და ავტომიბილები დაზიანდა.

ღამის განმავლობაში საჰაერო განგაში იყო ზაპოიროჟიესა და ოდესაში. ოკუპანტების თავდასხმის შედეგად აფეთქება მოხდა ზაპოროჟიეს ოლქის ქალაქ მელიტოპოლში. საჰაერო ძალები ოლქში ბალისტიკური რაკეტებით თავდასხმის საფრთხეზეც მიუთითებდნენ.

აფეთქების ხმები ისმოდა ოდესაშიც. საოლქო-სამხედრო ადმინისტრაციის ცნობით, რაკეტის ფრაგმენტების ჩამოვარდნის გამო ქალაქში რამდენიმე ადგილას ხანძარი გაჩნდა და შენობების ფანჯრები დაზიანდა. ამ დროისათვის ცნობილია სამი დაჭრილის შესახებ. განგაში იყო გამოცხადებულ კიევის, სუმის, პოლტავის, ხარკოვის, დონეცკის, ჩერკასის, დნეპროპეტროვსკის, ჩერნიგოვის, კიროვოგრადის, მიკოლაივისა და ხერსონის ოლქებშიც.

გრძელდება უკრაინის კონტრშეტევაც. გავრცელებული ცნობით, უკრაინულმა ძალებმა ორი მიმართულებით, დონეცკსა და ზაპოროჟიეში წინ წაწევა შეძლეს.

უკრაინულმა ძალებმა, 13 აგვისტოს, კონტრშეტევითი ოპერაციები ფრონტის სულ მცირე ორ სექტორზე ჩაატარეს და დონეცკის აღმოსავლეთით და ზაპოროჟიეს ოლქის დასავლეთ ნაწილში წინ წაიწიეს, – ამის შესახებ ამერიკული “ომის შემსწავლელი ინსტიტუტის” ანგარიშშია აღნიშნული.

ინსტიტუტში აცხადებენ, რომ უკრაინის შეიარაღებული ძალების გენერალური შტაბის ცნობით, უკრაინულმა ძალებმა შეტევითი ოპერაციები ჩაატარეს ბერდიანსკის და მელიტოპოლის მიმართულებებით და ნაწილობრივ წარმატებას მიაღწიეს რობოტინოს რაიონში (ზაპოროჟიეს ოლქის დასავლეთი ნაწილი, ორეხოვის სამხრეთით 13 კმ-ში).

“ომის შემსწავლელი ინსტიტუტის” ანგარიშის თანახმად, რამდენიმე რუსულმა წყარომ 12 აგვისტოს განაცხადა, რომ რუსული ჯარები დონეცკისა და ზაპოროჟიეს ოლქების საზღვარზე მდებარე უროჟაინედან გავიდნენ. თუმცა, 13 აგვისტოს ბევრმა რუსულმა წყარომ ეს ინფორმაცია უარყო და განაცხადა, რომ რუსულ ჯარებს კვლავ ეკავათ უროჟაინის სამხრეთი ნაწილი. „რუსული ჯარები, სავარაუდოდ, კვლავ იკავებენ პოზიციებს დასახლების სამხრეთ ნაწილში“, – აცხადებენ ინსტიტუტის ანალიტიკოსები.

არცერთი დღე არ გადის ისე, რომ რუსულმა ბოროტებამ ჩვენგან არ მიიღოს სამართლიანი პასუხი, – ამის შესახებ უკრაინის პრეზიდენტმა, ვოლოდიმირ ზელენსკიმ ყოველდღიურ მიმართვაში განაცხადა.

„დღეს რუსი დამპყრობლები სასტიკად დაესხნენ თავს ხერსონის რაიონს. არიან დაღუპულები და დაჭრილები. დაღუპულებს შორის არის 22 დღის გოგონა. დაღუპულია ბავშვის დედაც. ჩვენი მეომრები სამაგიეროს უხდიან ოკუპანტების ტერორს. არ გადის არცერთი დღე, რომ რუსულმა ბოროტებამ არ მიიღოს ჩვენი სრულიად სამართლიანი საპასუხო მოქმედება. ყველა განადგურებული ოკუპანტი, დამწვარი რუსული ტექნიკა, ცეცხლი მათ შტაბსა და საწყობებში, ქერჩის ხიდზე გაჩენილი კვამლი და სხვა – ეს ყველაფერი მოწმობს, რომ რუსეთის არცერთ დანაშაულს უპასუხოდ არ დავტოვებთ“, – განაცხადა ზელენსკიმ.

უკრაინის პრეზიდენტმა აღნიშნა, რომ უკრაინა ყოველდღე უახლოვდება სამართლიანობის აღდგენასა და გამარჯვებას.

„ჩვენ ყოველთვის გვაქვს საბაბი, რისთვისაც მადლობა უნდა გადავუხადოთ ჩვენს მეომრებს. უკრაინა უახლოვდება სამართლიანობას, უახლოვდება გამარჯვებას და რუსი მკვლელები ჩვენს მიწაზე უახლოვდებიან განადგურებას. მხოლოდ ამ გზით შეგვიძლია, შევქმნათ პირობები, რომ მთელი უკრაინა კვლავ გახდეს თავისუფალი და უსაფრთხო. რუსმა ტერორისტებმა მხოლოდ ერთი რამ უნდა იგრძნონ: ისინი განადგურდებიან“, – აღნიშნა ზელენსკიმ.

უკრაინის პრეზიდენტმა განაცხადა, რომ უკრაინელი ხალხი უკიდურესად მამაცი და გაბედულია, მათ კარგად იციან, როგორ დაიცვან საკუთარი ქვეყანა. ზელენსკიმ მადლობა გადაუხადა ყველას, ვინც იბრძვის უკრაინისთვის.

გასულ ღამეს, დედამიწის პრაქტიკულად ყველა კუთხის ბინადარს მეტეორული წვიმის ნახვა შეეძლო. მეტეორული ნაკადი პერსევსის თანავარსკვლავედიდან მოძრაობს. ის წარმოიქმნება, როდესაც დედამიწა სვიფტ-ტუტლის კომეტის მტვრის ნაწილაკებში გადის.

მეტეორები წამში 60 კილომეტრის სიჩქარით მოძრაობენ და ატმოსფეროს ზედა ფენებს ეჯახებიან, დაახლოებით 80 კილომეტრის სიმაღლეზე.

შთამბეჭდავი ასტრონომიული მოვლენა ფოტოგრაფებმა დააფიქსირეს.

აშშ-ში, ჰავაის კუნძულ მაუიზე მასშტაბური ტყის ხანძრის შედეგად მსხვერპლთა რიცხვი 93-მდე გაიზარდა.

ამის შესახებ BBC ადგილობრივ ხელისუფლებაზე დაყრდნობით წერს.

გამოცემის ინფორმაციით, კუნძულზე ასობით ადამიანი დაკარგულად მიიჩნევა. შტატის გუბერნატორის, ჯოშ გრინის განცხადებით, გარდაცვლილთა რიცხვი სავარაუდოდ მნიშვნელოვნად გაიზრდება.

ამ დროისთვის მეხანძრე-მაშველები მაუის დასავლეთით ტყის ხანძრის 80%-ს უკვე აკონტროლებენ და უსაფრთხოების მიზნით მოსახლეობის შემდგომი ევაკუაციის საჭიროება აღარ დგას.

კუნძულ მაუიზე ხანძარი 8 აგვისტოს გაჩნდა.