მოგებული პროცესების მიუხედავად, დე ფაქტო სანქცია დაუწესეს ბიძინა ივანიშვილს და სანქციები ემუქრებაო, გვაშინებენ ყოველდღე. ეს კაცი ვერ გაიცნეს, რომ ფულით კი არა, საკუთარი და ოჯახის წევრების სიცოცხლე დადო სასწორზე

სამშობლოსთვის 2011 -12 წლებში და ახლა, ასეთ კაცს რომ აშინებ 2 მილიარდი გაგიჩერეო და ვერ ხვდები, ეს ერთი მხარეა, – ამის შესახებ პარტია “ქართული ოცნების” აღმასრულებელმა მდივანმა, მამუკა მდინარაძემ რუსთავი 2-ის გადაცემაში “ღამის კურიერი” განაცხადა. მისი თქმით, როდესაც მთავარ სტრატეგიულ პარტნიორს ეხება საქმე, საქართველოს ხელისუფლება მეგობრულთან ერთად, მომთხოვნიც არის, ოპონენტები კი ცდილობენ, რომ ეს რუსულ ნარატივად წარმოაჩინონ.  “დე ფაქტო სანქციები დაადეს [ბიძინა ივანიშვილს] და  ახლა ვინღა უნდა დაასანქცირონ ან რითი უნდა დაასანქცირონ ისეთით, რომ გული გაუხეთქონ ვინმეს. მაგრამ, როცა მთავარ სტრატეგიულ პარტნიორს ეხება, ჩვენ მომთხოვნებიც ვართ მათ მიმართ, მეგობრულებიც და ამას მერე ვიღაც დაიჩემებს და რუსულად გასაღებას შეეცდება.  წეღანაც ვთქვით, ამერიკული კანონი გაუსაღეს საზოგადოების ნაწილს რუსულად და შეიძლება ესეც კი შეძლონ. მაგრამ ჩვენ, ყველა შემთხვევაში, საკუთარი სიტყვა უნდა ვთქვათ და მართლები უნდა ვიყოთ საკუთარი ქვეყნის, საკუთარი საზოგადოების წინაშე და ხვალ რომ სხვა მოქალაქე დაასანქცირონ, ქართული სახელმწიფო ამ ყველაფერს უნდა შეხვდეს მზად.” – განაცხადა მამუკა მდინარაძემ.

შეიძლება ითქვას, რომ სააკაშვილი, როგორც ლიდერი დასრულებულია, – ამის შესახებ არჩილ თალაკვაძემ გადაცემაში „იმედი LIVE“ განაცხადა. პარლამენტის ვიცე-სპიკერის თქმით, ექსპრეზიდენტმა აჩვენა, რომ არ არის ლიდერი და თავისი თანაპარტიელებისგან განსხვავებით, ორი თვეც ვერ შეძლო პატიმრობაში ყოფნა.

„მისმა პარტიამ ეს დაინახა, რომ სინამდვილეში ეს ადამიანი, მათი ლიდერი, რომლებზეც ლეგენდები დადიოდა, რომ თითქოს იყო ყველაზე მამაცი, თითქოს მტერს შიშველი ხელით ხვდებოდა და ტანკებს წინ უდგებოდა და ა.შ. არ არის ლიდერი.შეიძლება ყველაზე სუსტიც არის იმ პოლიტიკოსებს შორის, რომლებიც პასუხისგებაში მიეცნენ დანაშაულებზე, რომლებსაც პოლიტიკურად სააკაშვილი ხელმძღვანელობდა. მას ჩამოართვეს ლიდერობა და მისი მემკვიდრეობის გადანაწილებას, ვხედავთ, რომ მთავრდება“, – განაცხადა თალაკვაძემ.

აბსურდი და მარაზმია პრეზიდენტის მხრიდან რაღაც ჩახვეული ლოგიკით ფარცხალაძისთვის მოქალაქეობის არ ჩამორთმევა , – ამის შესახებ „ევროპული საქართველოს“ ლიდერმა, გიგა ბოკერიამ მედიასთან განაცხადა.

გიგა ბოკერიას თქმით, ფარცხალაძისთვის მოქალაქეობის ჩამორთმევას არა ოპოზიცია, არამედ კანონი ითხოვს და ეს ჯერ კიდევ ერთი წლის წინ უნდა გაკეთებულიყო.

„სანამ გვყავს რეჟიმი, რომლის სახეც არის ფარცხალაძე, გამარჯვებაზე ვერ იქნება საუბარი, ჩვენი გამარჯვება იქნება, როცა გვეყოლება პროდასავლური და პრო ქართული, ნორმალური ხელისუფლება, ტერიტორიულ მთლიანობას აღვადგენთ და ნატო-ს წევრი გავხდებით, რუსების ჯარს გავყრით აქედან, ნორმალური ქვეყანა გავხდეთ. ესაა გამარჯვება. ფარცხალაძეს თუ მოქალაქეობას შეუწყვეტ, ეს რა გამარჯვებაა?

ფარცხალაძისთვის მოქალაქეობის ჩამორთმევას ოპოზიცია კი არ ითხოვს, კანონი ითხოვს და ეს უნდა მომხდარიყო ახლა კი არა ერთი წლის წინ. ამიტომაა აბსურდი და მარაზმი რაღაც ჩახვეული ლოგიკით პრეზიდენტის მხრიდან ამის არ გაკეთება. ახსნები და მარაზმში შეყოლა ივანიშვილის რეჟიმთან, არის კატასტროფა და დამაბნეველ ვითარებას იწვევს.

ყველაზე უფრო მთავარი არის ის, რომ ფარცხალაძე წარმოადგენს ჩვენს ხელისუფლებას. მას ხელს აფარებდნენ ეროვნული ბანკის ბრძანებულებით, აქამდე არც კი იძიებდნენ, როცა ეს კაცი ჩვენს მტრებთან დადიოდა მოსკოვში. ახლა საკუთარ თავს ხომ არ დასჯიან? საკუთარ შვილს ხომ არ მოაჭრის თავს, როგორც ერთ ცნობილ ანიმაციურ ფილმშია? ეს არის უბედურება“, – განაცხადა გიგა ბოკერიამ.

კონსტიტუციის დარღვევა პრეზიდენტის მხრიდან ფორმალური და სამართლებრივი თვალსაზრისით სახეზეა, ქვეყნის გარეთ რომ გავიდა პრეზიდენტი, შედეგი რა იყო?, – ამის შესახებ „ქართული ოცნების“ აღმასრულებელმა მდივანმა და ფრაქცია „ქართული ოცნების“ თავმჯდომარემ, მამუკა მდინარაძემ „რუსთავი 2“-ის ეთერში განაცხადა.

„ოპოზიცია უბრალოდ გადადის მორალურ მხარეზე, სადაც უნდათ რომ საზოგადოება შეცდომაში შეიყვანენ, მაგრამ ვერ მოხდება ასე, რადგანაც როდესაც საქართველოს პრეზიდენტი, რომლის კომპეტენციის ფარგლებშიც საგარეო ურთიერთობები არ შედის და მიდის, რომ წარმოადგინოს საქართველო მის ფარგლებს გარეთ – ეს არის დარღვევა, თუკი ამას თან არ ახლავს მთავრობის თანხმობა. ცალსახაა ეს და კონსტიტუციაში წერია იმგვარად, რომ ინტერპრეტაციის საშუალებას არ იძლევა. ქვეყნის გარეთ რომ გავიდა პრეზიდენტი, შედეგი რა იყო? წავიდა პრეზიდენტი შეხვდა ლატვიის მხარეს, ამის შემდეგ გამოვიდა ლატვიის პრეზიდენტი და მიგვითითა, რომ შევუერთდეთ სანქციებს. სალომე ზურაბიშვილის შეხვედრის შემდეგ, რომელიმემ თქვა საქართველო იმსახურებს კანდიდატის სტატუსს და ჩვენ მხარს დავუჭერთო?! პირიქით, გზავნილები მოვისმინეთ, რომ მიუერთდით, დააწესეთ სანქციებიო, ეს იყო მისი შეხვედრების შედეგი“, – განაცხადა მამუკა მდინარაძემ.

ხატია დეკანოიძე „ნაციონალური მოძრაობის“ წევრის, ნიკა მელიას განცხადებას გამოეხმაურა, რომლის თანახმად, მელია არ გამორიცხავს, რომ „სხვა პლატფორმიდან“ მოუწიოს ბრძოლა.

დეკანოიძის თქმით, „ნაციონალურ მოძრაობაში“ არსებულმა პრობლემებმა, ბევრს არ მისცა საქმიანობის საშუალება, რის გამოც, ამ პარტიაში ვერც ნიკა მელიას ხედავს.

„მე ვერ გეტყვით როგორი იქნება ნიკას გადაწყვეტილება. პირადად მე თუ მკითხავთ, მე მას ვეღარ ვხედავ „ნაციონალურ მოძრაობაში“, იმიტომ რომ იმ პრობლემებმა, რომელიც არის ამ პარტიაში, სამწუხაროდ, ბევრ ადამიანს არ მოგვცა საშუალება, რომ ამ პარტიაში გაგვეგრძელებინა საქმიანობა. ეს გადაწყვეტილება ოპოზიციური ფრონტის გაძლიერებას უნდა ემსახურებოდეს და არა – დასუსტებას“, – განაცხადა დეკანოიძემ.