პოლონეთის ოპოზიციის ლიდერის, დონალდ ტუსკის თქმით, 15 ოქტომბერს დაგეგმილ არჩევნებში გამარჯვების შემთხვევაში პოლონეთის მმართველი პარტია პარტია „სამართალი და სამართლიანობა“ (PiS) ქვეყანას ევროკავშირიდან გაიყვანს.
„ან 15 ოქტომბერს ჩვენ გავიყვანთ PiS-ს , ან PiS-ი გაგვიყვანს. ევროკავშირიდან“, – წერს „სამოქალაქო პლატფორმის“ ლიდერი X-ზე.
80-ვე დეპუტატი დავიგინებით, რომ, დიახ, თქვენ აკეთებდით რუსულ საქმეს! – ასე მიმართა ადამიანის უფლებათა დაცვის და სამოქალაქო ინტეგრაციის კომიტეტის სხდომაზე უმრავლესობის დეპუტატმა, ალუდა ღუდუშაურმა, „ევროოპტიმისტების“ დეპუტატ, ხატია დეკანოიძეს.
ხატია დეკანოიძე ფინანსთა მინისტრის მოადგილისგან დაინტერესდა, მმართველი გუნდი აპირებდა თუ არა რეანომობილების რაოდენობის გასაზრდელად თანხის გამოყოფას. ასევე, კომიტეტის სხდომაზე, ხმაური მოჰყვა დეკანოიძის იმ შეფასებას, რომ საქართველოს ხელისუფლება რუსულ ხელისუფლებასთან თანხმდება.
„აზრი არ აქვს საუბარს, „არ გათეთრდების ყორანიო“ – ისეა ამათი საქმე. არავის ჩაუკეტავს კარები, ორი კარია და ორივეგან შეგიძლიათ ერთდროულად გახვიდეთ, მატრიცასავით. გეუბნებით, თქვენთან ვარ ამ საკითხში, იმ საკითხში და მაინც მებრძვით. იმიტომ შევიკრიბეთ აქ, რომ კონკრეტული საქმე ვაკეთოთ. წყალს წაუღია ნებისმიერი მანდატი და პოლიტიკა, თუ ხალხს არ ემსახურება. ხალხს ემსახურება რეანომობილი და დიახ, კარგია! ვიღაცებისნაირად კი არ ვარ რაღაცებს გამოკიდებული. ხალხში დავდივარ და ამაყად უნდა ვიარო. ნუ იქნებით სიცრუის ტირაჟირებაში. რეანომობილთან დაკავშირებით ამბავი ატეხეთ და სამარცხვინო რაღაცები გააკეთეთ. სავალუტო ფონდთან დაკავშირებითაც ატეხეთ ამბავი – რა შუაშია [სებ-ის 19 სექტემბრის] გადაწყვეტილება, ხომ იცით, რომ [სავალუტო ფონდის პროგრამის შეჩერება] ეგრე არაა. რაც შეეხება ყავლაშვილის დაგინებას, ძალაშია. რუსულ საქმეს თუ ვინმე აკეთებს, გადასახადებს რომ იხდიდა, ძირითადი ობიექტები რომ ჩააბარეს შენი პარტიის ყოფილმა ბოსებმა, იმიტომაა ეს. რუსული საქმე იმდენად გააკეთეთ, რომ მაგას ისტორია შეაფასებს. 80-ვე დეპუტატი დავიგინებით, რომ დიახ, თქვენ აკეთებდით რუსულ საქმეს“, – განაცხადა ალუდა ღუდუშაურმა.
დიპლომატიური ურთიერთობები ჩვენ არ გაგვიწყვეტია. ეს იყო მიხეილ სააკაშვილის რეჟიმის ინიციატივა, რომელმაც აშშ-ის წახალისებით „ხელი აწია“ საკუთარ მოქალაქეებზე და ოსებზე, რომლებიც მას თავის მოქალაქეებად მიაჩნდა, ასევე მშვიდობისმყოფელებზეც. როდესაც მან ღირსეული პასუხი მიიღო, თავისი სრული პოლიტიკური, სამხედრო მარცხის ანტირუსული ქმედებებით „კომპენსირება“ დაიწყო, – ამის შესახებ რუსეთის საგარეო საქმეთა მინისტრმა, სერგეი ლავროვმა საქართველოსთან დიპლომატიური ურთიერთობების აღდგენის შესაძლებლობაზე საუბრისას განაცხადა.
ლავროვის თქმით, არასდროს ჰქონიათ ნეგატიური დამოკიდებულება ქართველი ხალხის მიმართ. ამასთან, სერგეი ლავროვი აღნიშნავს, რომ „თბილისში ამჟამინდელი მთავრობა დაინტერესებულია ურთიერთობების ნორმალიზებით, თუნდაც უბრალო მოქალაქეების ინტერესების გათვალისწინებით“.
„მართლა გვიყვარს ქართველი ხალხი, ისევე როგორც სამხრეთ კავკასიის ყველა ერი. რუსეთის, საბჭოთა კავშირის და ჩვენი ხელოვნების, კულტურის, მეცნიერების ისტორიაში ქართველებს განსაკუთრებული ადგილი უკავიათ. ჩვენ დავინახეთ, რომ თბილისში ამჟამინდელი მთავრობა დაინტერესებულია ურთიერთობების ნორმალიზებით, თუნდაც უბრალო მოქალაქეების ინტერესების გათვალისწინებით. ადამიანებს სურთ ერთმანეთთან ურთიერთობა, ერთმანეთთან სტუმრობა, ორივე ქვეყანაში ტურისტებად ჩასვლა და ბიზნესის წარმოება, რომელიც ტრადიციულად აკავშირებდა ჩვენს სამეურნეო სისტემებს. ირაკლი ღარიბაშვილის მთავრობასთან შევთანხმდით ფრენების აღდგენაზე და გავაუქმეთ სავიზო რეჟიმი საქართველოს მოქალაქეებისთვის. უვიზო რეჟიმი რუსეთის მოქალაქეებისთვის უკვე საკმაოდ დიდი ხანია, არსებობდა. მრავალი ჩვენი მოქალაქე სარგებლობდა ამით. უვიზო რეჟიმის შემოღება ახლა ორმხრივ საფუძველზეა საქართველოს მოქალაქეებისთვისაც და საჰაერო კავშირის დამყარება ჩვენს კავშირებს ბევრად მოსახერხებელს და კომფორტულს ხდის. რეისების რაოდენობა და პირდაპირი რეისების გეოგრაფია იზრდება. იზრდება სავაჭრო ბრუნვა. ჩვენთან პოპულარულია ბევრი ტრადიციული ქართული საექსპორტო საქონელი: ღვინო, „ბორჯომი“ და მრავალი სხვა“, – განაცხადა ლავროვმა.
სტატუსშეჩერებულ სტუდენტებთან მიმართებაში გამოსყიდვის ხარჯებს განათლებისა და მეცნიერების სამინისტრო გაიღებს. ამის შესახებ ფინანსთა მინისტრის პირველმა მოადგილემ გიორგი კაკაურიძემ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე განაცხადა.
მისი თქმით, რა ხარჯებზე იქნება საუბარი სამინისტროს მხრიდან, ეს დაახლოებით, ერთ თვეში გახდება ცნობილი.
„პრემიერს არ უხსენებია, რომ 40 მილიონი დაიხარჯება ბიუჯეტიდან. 40 მილიონი ბიუჯეტიდან არ დაიხარჯება. იქნება გამოსყიდვა ამ ვალდებულებების საბაზრო ღირებულების, რაც აქვს ამ ვალდებულებებს, როგორც არსებობს პროდუქტი. განათლებისა და მეცნიერების სამინისტრო უზრუნველყოფს ამ გამოსყიდვის ხარჯებს. რა თანხა იქნება ზუსტად, ამას ვიხილავთ 1 თვის განმავლობაში. ეს იქნება გაცილებით ნაკლები 40 მილიონზე“, – აღნიშნა კაკაურიძემ.
ინფორმაციისთვის, ფინანსთა მინისტრის მოადგილე გიორგი კაკაურიძემ გუშინ განაცხადა, რომ უნივერსიტეტებისთვის 20%-იანი შეთავაზება გაკეთდა და თუ უნივერსიტეტს 20%-ად უღირს რომ სტუდენტი, რომელიც სწავლის საფასურს ვერ იხდის, 20% გადაუხადო, ვალი ამ პირობით ჩამოიწერება. “სტატუსშეჩერებულ სტუდენტებთან დაკავშირებით პრემიერ-მინისტრს არ განუცხადებია, რომ თანხას ბიუჯეტიდან სრულად ჩვენ გადავიხდით. პრემიერმა თქვა, რომ სტუდენტებს დავალიანება ჩამოეწერებათ. პრემიერს არ უთქვამს, რომ 40 მილიონ ლარს დავხარჯავთ – პრემიერმა თქვა, რომ ვალი არის 40 მილიონი ლარი, რომელიც სტუდენტებს ჩამოეწერებათ. ის თუ რამდენს დავხარჯავთ, დაახლოებით ორ თვეში გამოჩნდება, როდესაც პროცესი დასრულდება,”- აღნიშნა კაკაურიძემ.
ფილმები მინისტრის ბრძანებებით არ ფინანსდება. როგორც ჩანს, სისხლის სამართლის დამნაშავეს თავისი მმართველობის ხანაში ერევა ამჟამინდელი მთავრობის მინისტრის მმართველობის სტილი, – ამის შესახებ კულტურის სამინისტროს მიერ გავრცელებულ განცხადებაშია ნათქვამი.
„გვსურს, გამოვეხმაუროთ ბოლო დროს სხვადასხვა მედიაპლატფორმაზე აქტიურად და მიზანმიმართულად გავრცელებულ ცრუ ინფორმაციას, თითქოს რეჟისორ ნანა ჯანელიძის ფილმის – „იარე ლიზა“ – გადაღება კულტურის ახლანდელმა მინისტრმა თეა წულუკიანმა „ბრძანა“.
ამ სიცრუის ტირაჟირებას სათავე დაუდო სისხლის სამართლის დამნაშავის, ამჟამად პატიმარ მიხეილ სააკაშვილის მიერ სოციალურ ქსელში გავრცელებულმა მისთვის დამახასიათებელმა პოლიტიკურმა ტყუილმა.
უპირველესად, საზოგადოებას ვაცნობებთ, რომ ფილმები მინისტრის ბრძანებებით არ ფინანსდება. როგორც ჩანს, სისხლის სამართლის დამნაშავეს თავისი მმართველობის ხანაში ერევა ამჟამინდელი მთავრობის მინისტრის მმართველობის სტილი.
ასევე, შევახსენებთ ყველა დაინტერესებულ პირს, რომ თეა წულუკიანი საქართველოს კულტურის, სპორტისა და ახალგაზრდობის მინისტრად დაინიშნა 2021 წლის მარტში. კინოხელოვანთა ერთი ჯგუფი, მათ შორის – რეჟისორი ნანა ჯანელიძე, მას დღემდე აკრიტიკებს ეროვნული კინოცენტრის რეფორმის გამო, რომელიც ამ ორგანიზაციის გამჭვირვალობასა და სამართლიანი კონკურსების მოდელის შემუშავებას ისახავს მიზნად.
ფილმის – „იარე ლიზა“ – გადაღება სახელმწიფო ბიუჯეტიდან თავდაპირველად 2019 წელს დაფინანსდა (300 000 ლარი), მოგვიანებით კი კინოცენტრის ხელმძღვანელის – გაგა ჩხეიძის გადაწყვეტილებით კინოცენტრმა ფილმის გადაღებისთვის უკონკურსოდ გამოყო კიდევ 240 690 ლარი. 2020 წელს, იმდროინდელი პრემიერ-მინისტრის, გიორგი გახარიას, უშუალო ჩარევით ფილმისთვის დამატებით, ისევ უკონკურსოდ, გამოიყო 1 200 000 ლარი. სულ ფილმის გადასაღებად იმდროინდელი პრემიერ-მინისტრის, გიორგი გახარიასა და კინოცენტრის ხელმძღვანელის, გაგა ჩხეიძის, ხელშეწყობით გამოიყო 1 740 690 ლარი“,- აღნიშნულია განცხადებაში.
პარტია „ლელოს“ განცხადებით, რუსეთის საგარეო საქმეთა მინისტრის, სერგეი ლავროვის განცხადება, კიდევ ერთხელ ადასტურებს, რომ საქართველოს მართავს რუსეთის მსახური ხელისუფლება, რომელიც კრემლთან სრულ თანხვედრაში და ჰარმონიაშია.
როგორც პარტიის მიერ გავრცელებულ განცხადებაშია აღნიშნული, დღეს ყველა ქართველის უპირველეს ამოცანას რუსეთის მსახური ხელისუფლების დაუყოვნებლივ შეცვლა უნდა წარმოადგენდეს.
„ჩვენ უკვე გვსმენია კრემლის დასტური, რომ რუსეთთან პირდაპირი საჰაერო მიმოსვლის აღდგენის ინიციატივა საქართველოს მთავრობამ გამოთქვა. დღეს ლავროვმა ხელახლა დაადასტურა, რომ საქართველოს ხელისუფლებას ჰქონდა კონსულტაციები რუსეთთან ურთიერთობების „ნორმალიზების“ და ფრენების აღდგენის საკითხზე.
მაშინ, როდესაც რუსეთის დამნაშავე რეჟიმი უკრაინის წინააღმდეგ ბარბაროსულ ომს აწარმოებს და საერთაშორისო საზოგადოების იზოლაციის საგანია, საქართველოს რუსული ხელისუფლება ურთიერთობებს აღრმავებს სწორედ კრემლთან და პარალელურად ურთიერთობებს ანადგურებს ყველა სტრატეგიულ პარტნიორთან.
საერთაშორისო კონტექსტიც რომ დავივიწყოთ, იმ ფონზე, როდესაც გრძელდება რუსეთის მხრიდან საქართველოს ტერიტორიის ოკუპაცია, ცეცხლის შეწყვეტის თაობაზე შეთანხმების დარღვევა, მცოცავი ანექსია, მშვიდობიანი მოსახლეობის დევნა და ე. წ. დიპლომატიური ურთიერთობები აფხაზეთსა და ე. წ. სამხრეთ ოსეთთან, ორმხრივ ურთიერთობათა ნორმალიზებაზე რაიმე საუბარი ცინიზმის მწვერვალია.
დღეს ყველა ქართველის უპირველეს ამოცანას უნდა წარმოადგენდეს რუსეთის მსახური ხელისუფლების დაუყოვნებლივ შეცვლა, რათა გადარჩეს ქართული სახელმწიფო და ჩვენი ევროპული მომავალი”, – ნათქვამია განცხადებაში.
ცნობისთვის, რუსეთის საგარეო საქმეთა მინისტრმა, სერგეი ლავროვმა რუსულ მედიასთან კითხვაზე, ხედავს თუ არა უახლოეს მომავალში საქართველოსთან დიპლომატიური ურთიერთობების აღდგენის შესაძლებლობას, განაცხადა, რომ რუსეთს საქართველოსთან დიპლომატიური ურთიერთობები არ გაუწყვიტავს და „ეს იყო სააკაშვილის რეჟიმის ინიციატივა“.
“როდესაც დავინახეთ, რომ თბილისის ამჟამინდელი ხელისუფლება დაინტერესებულია ურთიერთობების ნორმალიზებით, თუნდაც უბრალო ადამიანების ინტერესების გამო, რომლებსაც სურთ ერთმანეთთან ურთიერთობა, ის, რომ ერთმანეთს ეწვიონ, ეწვიონ ჩვენს ქვეყნებს, როგორც ტურისტები, სურთ ბიზნესის კეთება, ჩვენ შევთანხმდით ბატონი ღარიბაშვილის მთავრობასთან ფრენების განახლებაზე და გაუქმდა სავიზო რეჟიმი, ვინაიდან რუსეთის მოქალაქეებისთვის უვიზო რეჟიმი უკვე საკმაოდ დიდი ხანია არსებობდა და ბევრმა ჩვენმა მოქალაქემ გამოიყენა იგი. მაგრამ ახლა, ორმხრივობის საფუძველზე, საქართველოს მოქალაქეებისთვის უვიზო რეჟიმის შემოღება და საჰაერო კომუნიკაციების დამყარება, რა თქმა უნდა, ჩვენს ურთიერთობას ბევრად კომფორტულს ხდის. იზრდება ავიარეისების რაოდენობა, ფართოვდება პირდაპირი ფრენების გეოგრაფიაც, იზრდება სავაჭრო ბრუნვა. ჩვენთან დიდი პოპულარობით სარგებლობს ბევრი ქართული ტრადიციული საექსპორტო პროდუქტი: ღვინო, ბორჯომი და მრავალი სხვა”, – აღნიშნა ლავროვმა.
“სანამ უკრაინა ატლანტის ოკეანის მიღმა მდებარე ნაპირზე – აშშ-ში და კანადაში მხარდაჭერას ეძებს, კიევი მოკავშირეებს თავის უშუალო სამეზობლოში კარგავს. ორშაბათს უნგრეთის პრემიერ-მინისტრმა ვიქტორ ორბანმა განაცხადა, რომ ბუდაპეშტი უკრაინას მხარს არ დაუჭერს არცერთ საგარეო პოლიტიკურ (საერთაშორისო) საკითხში, სანამ კიევი უკრაინაში მცხოვრებ ეთნიკურ უნგრელებს მშობლიური ენით სარგებლობის უფლებას არ აღუდგენსო. როგორც ცნობილია, ვიქტორ ორბანი დიდი ხანია მკაცრად აკრიტიკებს უკრაინის მიერ 2027 წელს მიღებულ კანონს, რომელიც ეთნიკური უმცირესობების ენების გამოყენებას ზღუდავს, – ნათქვამია სტატიაში, რომელიც ცნობილი ამერიკული ჟურნალის „ფორინ პოლისის“ (Foreign Policy) ვებ-გვერდზე გამოქვეყნდა სათაურით „უნგრეთი უკრაინას დახმარებას უწყვეტს: ბუდაპეშტი, რუსეთის მიმართ თავისი პოზიტიური დამოკიდებულებით, ნატოს და ევროკავშირს აღიზიანებს“ (ავტორი – ალექსანდრა შარპი).
როგორც პუბლიკაციაშია აღნიშნული, უკრაინაში მცხოვრები ასი ათასი უნგრელისათვის მშობლიური ენაზე სწავლის უფლების წართმევით გამოხატული უკმაყოფილება ვიქტორ ორბანმა უკრაინას კიდევ ერთხელ აჩვენა, თანაც იმ დროს, როცა ევროკავშირი ემზადება უკრაინას პოტენციური წევრობის სტატუსი მიანიჭოს. ბლოკში გაწევრიანებისათვის მტკიცე გარანტიების მიღება კონსენსუსით მოხდება, ანუ მხარდაჭერა ერთსულოვანი უნდა და თუ ამ დროს უნგრეთი წინააღმდეგი იქნება, კიევს ევროკავშირისკენ მიმავალ გზაზე დიდი პრობლემები გაუჩნდება.
„ვიქტორ ორბანის პოზიცია, რომელიც უკრაინაში მცხოვრები უნგრელების უფლებების დაცვის სურვილით არის განპირობებული, ალბათ, სადაო არ არის, მაგრამ მის ანტიუკრაინულ პოზიციას სხვა მიზეზებიც აქვს – მაგალითად ის, რომ უნგრეთის პრემიერ-მინისტრს ახლო ურთიერთობები აქვს რუსეთის პრეზიდენტთან. ამ ორ უკიდურესად მემარჯვენე ავტოკრატ პოლიტიკოსს ერთმანეთთან „ანათესავებს“ ერთნაირი მიდგომები, იდეოლოგია და ხედვები დასავლური ექსპანსიის მიმართ. მიუხედავად იმისა, რომ ბუდაპეშტი ბუნებრივი გაზით უზრუნველყოფის დივერსიფიცირებაზე მუშაობს, უნგრეთი ძველებურად არის დამოკიდებული მოსკოვზე – ნავთობისა და სხვა მნიშვნელოვანი რესურსების თვალსაზრისით.
ეს პირველად არ ხდება, როცა უნგრეთი უკრაინის წინააღმდეგ დემარშებს აკეთებს. ხშირად ვიქტორი ორბანის მიერ გადადგმული ნაბიჯები მოსკოვის ინტერესებს ემსახურება და კრემლის დასამშვიდებლადაა მიმართული, ვლადიმერ პუტინის სასარგებლოდ.
გავიხსენოთ, რომ რუსეთის არმიის უკრაინაში შეჭრის შემდეგ უნგრეთმა კიევს უარი განუცხადა იარაღის მიწოდებაზე და უპირატესობა სამხედრო მხარდაჭერას კი არა, არამედ ჰუმანიტარულ დახმარებას მიანიჭა. მაგრამ ვიქტორ ორბანის მიერ გაკეთებული განცხადებით ჰუმანიტარული დახმარების საკითხიც საფრთხის ქვეშ აღმოჩნდა მას შემდეგ, რაც უნგრეთმა ევროკავშირს უსაყვედურა – რატომ მთხოვ უკრაინული ხორბლის იმპორტს ჩემს ტერიტორიაზე და „სოლიდარობის დერეფნის“ შექმნას ხორბლის ტრანზიტით გატარებისთვისო. როგორც ვიქტორ ორბანმა აღნიშნა, იგი არ დაუშვებს უკრაინული მარცვლეულის არც ტრანზიტს და არც შიდა ბაზარზე გაყიდვას, არ დააზარალებს საკუთარ ფერმერებს.
„ბრიუსელი გვარწმუნებდა, რომ უკრაინის ხორბლის გარეშე აფრიკის ქვეყნების მოსახლეობა შიმშილით დაიხოცებოდა“, – აღნიშნა ვიქტორ ორბანმა, – მაგრამ პირდაპირ ვიტყვი: ჩვენ მოგვატყუეს“. მას მხედველობაში ჰქონდა ის ფაქტი, რომ როცა შავი ზღვის „მარცვლეულის დერეფანს“ პრობლემები გაუჩნდა, უკრაინის ხორბალი საზღვარგარეთ ევროკავშირის ქვეყნების მეშვეობით უნდა გასულიყო, მაგრამ მისი მნიშვნელოვანი ნაწილი დანიშნულების ადგილზე არ ჩასულა: იაფ უკრაინულ ხორბალზე, რომელიც „დამშეული აფრიკელების“ დასაპურებლად იყო განკუთვნილი, ევროკავშირის მაძღარი ქვეყნებიც უარს არ ამბობდნენ“.
„სომხეთის პრემიერ-მინისტრ ნიკოლ ფაშინიანის პოლიტიკური პერსპექტივა კითხვის ნიშნის ქვეშ დგება:
მისი მომავალი თურქეთზეა დამოკიდებული – შეძლებს თუ არა იგი უნარიანად და მომგებიანად ისარგებლოს თურქეთთან საზღვრების გახსნით და ვაჭრობის გაფართოებით?
რეალობა ისაა, რომ სომხეთს თურქეთთან ურთიერთობის გარეშე სხვა გზა არ აქვს“, – ნათქვამია თურქეთის ყოველდღიურ ინგლისურენოვან გაზეთში „დეილი საბაჰში“ (Daily Sabah) გამოქვეყნებულ სტატიაში სათაურით „სომხეთის ერთადერთი მარშრუტი თურქეთზე გადის“ (ავტორი – მელიქ ალთინოქი).
„მთიან ყარაბაღში განხორციელებულ ანტიტერორისტულ ოპერაციაში აზერბაიჯანის სწრაფი წარმატება სომხეთისათვის შოკის მომგვრელი აღმოჩნდა. სომეხი ნაციონალისტები ანტითურქულ აგიტაციას ეწევიან – ერთმანეთს ადარებენ სომეხი ლტოლვილების ამჟამინდელ და 1915 წლის დროინდელ ფოტოსურათებს. მთელი ქვეყნის მასშტაბით ეწყობა საპროტესტო აქციები, რომლებზეც დემონსტრანტები პრემიერ-მინისტრ ნიკოლ ფაშინიანს ინერტულობაში ადანაშაულებენ და აცხადებენ, რომ მან „სამშობლო გაყიდა, ხალხს უღალატა“.
დღევანდელი სიტუაციის უკეთ გასაცნობიერებლად და გასაგებად თვალი გადავავლოთ პროცესებს, რომლებიც სომხეთში ბოლო წლებში მიმდინარეობდა.
ნიკოლ ფაშინიანი, როცა ხელისუფლებაში მოვიდა, თავდაპირველად იმედს უნერგავდა სომხებს და მათ იმ პრობლემების რაციონალურ მოგვარებას ჰპირდებოდა, რომლებსაც წლების განმავლობაში საზოგადოებაში ღრმად ჰქონდათ ფესვები გადგმული. იგი ყოველნაირად ცდილობდა ბალანსის პოვნას რუსეთსა და დასავლეთს შორის, მაგრამ შეცდა და შედეგად დისბალანსი მიიღო. სწორედ ამ საგარეო პოლიტიკურმა დისბალანსმა გამოიწვია სომხეთის დამარცხება მთიან ყარაბაღში, 2020 წლის შემოდგომაზე მომხდარ ომში. მოსკოვი ერევანს ჯერ აფრთხილებდა, შემდეგ კი „ჭკუა ასწავლა“ – ხელში აზერბაიჯანის პრეზიდენტს ილჰამ ალიევს შეატოვა, რომელიც თურქეთის მხარდაჭერით სარგებლობდა.
ნიკოლ ფაშინიანი, თავის განზრახვების შესრულებას მტკიცედ ცდილობდა – სურდა, რომ სომხეთი ტრადიციული ისტორიული გადმონაშთებისაგან გათავისუფლებულიყო, რომლებითაც სომხური საზოგადოება დიდი ხნის განმავლობაში იყო შებოჭილი. იგი თურქეთსაც კი ეწვია, პრეზიდენტ რეჯეფ ერდოღანის ინაუგურაციის დროს – ქვეყანას, რომელიც „სომხეთის მარადიულ მტრად“ ითვლება. იმავდროულად იგი ეძებდა ალტერნატიულ ალიანსებს, რუსეთის ჩასანაცვლებლად, ამ მიზნით თანხმობა განაცხადა აშშ-სთან ერთობლივ სამხედრო წვრთნებში მონაწილეობაზეც, რაც ადრე არასოდეს არ მომხდარა.
ილჰამ ალიევმა, რომელმაც იგრძნო მისთვის სასიკეთო შესაძლებლობა სომხეთში მიმდინარე შიდა რყევებისა და რუსეთ-უკრაინის ომის ფონზე, სწრაფად და ეფექტურად განახორციელა მთიანი ყარაბაღის გაკონტროლება და ადგილობრივი სეპარატისტული ხელისუფლების დემონტაჟი მოახდინა.
ბევრმა საეჭვოდ ჩათვალა ნიკოლ ფაშინიანის სტრატეგიული კურსი რეგიონში, აშშ-ისა და საფრანგეთის იმედით, მთავარი მოთამაშეების უგულებელყოფისა და მათი ჩანაცვლების შესახებ. ასევე შეცდომად იქნა მიჩნეული (თითქოსდა „გამოუცდელობის გამო“) ის ნაბიჯი, რომ მან უკრაინასთან დასაახლოებლად გარკვეული ანტირუსული დემარში განახორციელა – ცოლი კიევში გაგზავნა, რომელმაც უკრაინას ჰუმანიტარული დახმარების გაწევა აღუთქვა.
მაგრამ აქ ყურადღება უნდა მივაქციოთ ერთ გარემოებას: 30 წელზე მეტი ხნის განმავლობაში მთიან ყარაბაღში მოქმედი ხელისუფლება სომხეთისათვის ე.წ. „სიღრმითი სახელმწიფოს“ როლს ასრულებდა, ანუ ისეთ როლს, რომელზეც სომხეთი იძულებული ხდებოდა დამოკიდებული ყოფილიყო. ერევანში არჩეული ყოველი ხელისუფლება ვალდებული იყო მთიანი ყარაბაღის ინტერესები დაეცვა. მემკვიდრეობითი სტატუს-კვო შენარჩუნებული იყო როგორც რუსეთის, ასევე გარკვეულწილად, სომხური დიასპორის დახმარებით. ნიკოლ ფაშინიანმა კი ამ მემკვიდრეობითი ჯაჭვის გაწყვეტა განიზრახა – შეეცადა რუსეთი ჩაენაცვლებინა. იგი თავის გეგმას წარმატებით ასრულებს: უკრაინასთან კავშირებს იწყებს, საერთაშორისო სასამართლოს რომის სტატუტს უერთდება, რომელიც ვლადიმერ პუტინს დაპატიმრებით ემუქრება…
ნიკოლ ფაშინიანი უჭკუო არ არის – მაგალითად, „ზანგეზურის დერეფანთან“ მიმართებით. მართალია, მის შექმნას სომეხი ნაციონალისტები ეწინააღმდეგებიან, მაგრამ პრემიერ-მინისტრმა იცის, თუ რა პოზიტიურ შედეგს მოუტანს ღარიბ სომხეთს თურქეთთან ვაჭრობა – დერეფნის გახსნა ერევნისათვის „მაშველი რგოლის“ როლს შეასრულებს. ამჟამად თურქეთში ასი ათასზე მეტი სომეხი მუშაობს, რის შედეგადაც ისინი სომხეთში დარჩენილ თავიანთ ოჯახებს ეხმარებიან. სომხეთი თუ საზღვრებს გახსნის (კაცმა რომ თქვას, ჩვენი მეზობლის მოსახლეობა ერთი საშუალო თურქული ქალაქის მოსახლეობის ტოლფასია), მისი ეკონომიკური განვითარება მნიშვნელოვნად დაჩქარდება.
რა თქმა უნდა, ნიკოლ ფაშინიანმა ზანგეზურთან დაკავშირებით გადაწყვეტილების მიღება უნდა დააჩქაროს, წინააღმდეგ შემთხვევაში, როგორც პრეზიდენტმა რეჯეფ ერდოღანმა განაცხადა, მას გზა ირანისაკენ რჩება.
თუ ნიკოლ ფაშინიანი სომხეთისათვის საზღვრების გახსნას და თურქეთთან ვაჭრობის გაფართოებას ვერ შეძლებს, მისი პოლიტიკური პერსპექტივა კითხვის ნიშნის ქვეშ დადგება -არ არის გამორიცხული ისევ ვადამდელი არჩევნები ჩატარდეს.
შეუთანხმებელი მოქმედებები საგარეო პოლიტიკის მიმართულებით აზიანებს ჩვენი ქვეყნის ინტერესებს, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.
„ეს აზიანებს თვითონ პრეზიდენტსაც, ვინაიდან როდესაც ქვეყანაში უკვე იმპიჩმენტია ამის გამო ინიცირებული, ძალიან უცნაური და დამაზიანებელია, როდესაც ის აგრძელებს საგარეო აქტივობას, მაშინ როდესაც კონსტიტუციის მიხედვით, ამაზე არის პასუხისმგებელი მთავრობა და საგარეო საქმეთა სამინისტრო. კიდევ ერთხელ გამოჩნდა, რომ ამას სჭირდება სათანადო პოლიტიკური და სამართლებრივი შეფასება. ჩვენ ველოდებით საკონსტიტუციო სასამართლოს დასკვნას ამ თემაზე, რის შემდეგაც პარლამენტი უკვე იმსჯელებს და კონსტიტუციის მნიშვნელოვანი პრინციპის დარღვევას სრულფასოვანი შეფასება მოჰყვება“, – აღნიშნა თალაკვაძემ.
პრეზიდენტის იმპიჩმენტთან დაკავშირებით საკონსტიტუციო წარდგინება 12 სექტემბერს დარეგისტრირდა. წარმდგენები არიან ირაკლი კობახიძე, ანრი ოხანაშვილი, მიხეილ სარჯველაძე, გიორგი კახიანი და თენგიზ შარმანაშვილი.
საკონსტიტუციო სასამართლოში პრეზიდენტის იმპიჩმენტის თაობაზე არსებითი განხილვა ზეპირი მოსმენით 3 ოქტომბერს, წარდგინების ავტორთა და საქართველოს პრეზიდენტის მონაწილეობით გაიმართება.
ის შეცდომა, რომელიც ევროკავშირმა შარშან დაუშვა, აღარ უნდა განმეორდეს, რადგან სტატუსზე გადაწყვეტილება, ამავე დროს, გზავნილია, თუ რა დამოკიდებულება აქვს ევროკავშირს ქართველი ხალხის მრავალწლიანი ბრძოლის მიმართ – ადგილი დაიბრუნოს ევროპულ ოჯახში, – ამის შესახებ საქართველოს პარლამენტის თავმჯდომარემ შალვა პაპუაშვილმა დუბლინში ვიზიტისას ჟურნალისტებთან განაცხადა.
როგორც მან აღნიშნა, ევროპის საბჭოს წევრი ქვეყნების პარლამენტების თავმჯდომარეების კონფერენციაში მონაწილეობა მნიშვნელოვანია არა მხოლოდ მაღალი დონის შეხვედრებისთვის, არამედ, იმის ასახსნელად, რომ ის შეცდომა, რომელიც ევროკავშირმა შარშან დაუშვა, აღარ უნდა განმეორდეს.
„ევროპის საბჭოს წევრი ქვეყნების პარლამენტების თავმჯდომარეების კონფერენცია ტრადიციულად ორ წელიწადში ერთხელ იმართება. ეს ჩემთვის პირველი შესაძლებლობაა, რომ ასეთი სახის მაღალი დონის ღონისძიებაში მივიღო მონაწილეობა. რა თქმა უნდა, ეს კარგი შესაძლებლობაა კოლეგებს შევხდეთ და ვისაუბროთ, როგორც ორმხრივ ურთიერთობებზე, ასევე, ევროკავშირის წევრი ქვეყნების პარლამენტების თავმჯდომარეებთან, ვისთანაც საუბარი გვექნება ევროკავშირის კანდიდატის სტატუსის მინიჭების საკითხზე. ორმხრივი შეხვედრების გარდა, თავად კონფერენციასაც რამდენიმე თემატიკა აქვს – გამოსვლა მექნება უკრაინის საკითხზე, ასევე, დეზინფორმაციის პრობლემაზე, რომელიც თანამედროვე სამყაროს ერთ-ერთი მნიშვნელოვანი გამოწვევაა. ვფიქრობ, რომ ახლა ყველაზე მნიშვნელოვანია პოლიტიკური გზავნილების მიტანა და იმის ახსნა, რომ ის შეცდომა, რომელიც ევროკავშირმა შარშან დაუშვა, აღარ უნდა განმეორდეს, რადგან სტატუსზე გადაწყვეტილება, ამავე დროს, გზავნილია, ერთი მხრივ, ქართველი ხალხის მიმართ, თუ რა დამოკიდებულება აქვს ევროკავშირს ქართველი ხალხის მრავალწლიანი ბრძოლის მიმართ, მათ შორის, ფიზიკურ ბრძოლას იმისთვის, რომ თავისი ადგილი დაიბრუნოს ევროპულ ოჯახში. ეს ასევე გზავნილია რუსეთის მიმართ და მნიშვნელოვანია, რომ ევროკავშირი ამ ჯერზე, ამ გადაწყვეტილებას, ამ პასუხისმგებლობით მიუდგეს. შესაბამისად, საქართველოს მიმართ პოზიტიური გადაწყვეტილება მიიღოს. ევროკავშირისთვის თავისი არსით სტატუსი არის პატარა ნაბიჯი, მაგრამ ეს დიდი ნაბიჯია ჩვენთვის. ამიტომ, მნიშვნელოვანია, ეს პასუხისმგებლობა ევროკავშირის წევრმა ქვეყნებმა სრულად გაიაზრონ“, – განაცხადა პაპუაშვილმა.
31 ოქტომბრამდე ყველაფერი მოესწრება, არც ევროკავშირს და არც საქართველოს არ აქვს ფუფუნება სტატუსი არ გაიცეს – იმედია, ყველა კეთილგონივრულად მოიქცევა, – ამის შესახებ საპარლამენტო უმრავლესობის წევრმა, ბექა დავითულიანმა განაცხადა, რითაც გამოეხმაურა ინფორმაციას იმის თაობაზე, რომ ევროკომისიის გაფართოების ანგარიშები 31 ოქტომბერს გამოქვეყნდება.
ამასთან, კითხვაზე: რა პოზიცია აქვს იმასთან დაკავშირებით, რომ შესაძლოა, სტატუსი დათქმებით მოგვცენ? -დავითულიანი პასუხობს – “კი, ბატონო, თანახმა ვართ“.
„31 ოქტომბრამდე ერთი თვეა დარჩენილი. ბორელის ვიზიტის დროს შედგენილი იქნა გეგმა, რის მიხედვითაც, უნდა გვემოქმედა რეკომენდაციების შესასრულებლად, ეს ყველაფერი ბატონი ბორელისვე რეკომენდაციით უნდა გადავგზავნოთ ვენეციის კომისიაში, რომელიც ევროსტრუქტურების საექსპერტო ბიუროა. ვფიქრობ, ისინიც მალე შეეცდებიან, დასკვნა დაიდოს. მოქმედების გრაფიკი შედგენილი იყო ბორელთან ერთად, პროცედურა შეთანხმებული იყო ევროკომისიის მენეჯმენტთან, ვმოქმედებთ პროცედურის მიხედვით. ვფიქრობთ, ყველაფერი მოესწრება 31 ოქტომბრამდე. არც ევროკავშირს და არც საქართველოს არ აქვს ფუფუნება ეს სტატუსი არ გაიცეს, იმედი მაქვს ყველა მოიქცევა კეთილგონივრულად”, – განაცხადა დავითულიანმა.
უკრაინის თავდაცვის მინისტრი, ოლექსი რეზნიკოვი მიიჩნევს, რომ ევგენი პრიგოჟინის სიკვდილი ცხადყოფს, რომ ვლადიმირ პუტინის ნდობა არ შეიძლება.
„პრიგოჟინის სიკვდილმა დაასუსტა პუტინი. იმიტომ, რომ ამან მსოფლიოს აჩვენა: თუ პუტინი ვინმესთან გარიგებას დადებს და მას არღვევს, ეს ნიშნავს, რომ მისი ნდობა აღარ შეიძლება. ეს უბრალოდ განგსტერების ქცევაა და კრემლი ასეც იქცევა“, – აღნიშნა უკრაინის თავდაცვის უწყების ხელმძღვანელმა.
23 აგვისტოს რუსეთში, ტვერის ოლქში ჩამოვარდა კერძო თვითმფრინავი, რომელიც მოსკოვიდან სანკტ-პეტერბურგში მიფრინავდა. ბორტზე მყოფი ათივე ადამიანი, მათ შორის ეკიპაჟის სამი წევრი დაიღუპა. ოფიციალური ინფორმაციით, რეისზე დარეგისტრირებული მგზავრების სიაში იყვნენ „ვაგნერის“ ხელმძღვანელი ევგენი პრიგოჟინი, მისი მარჯვენა ხელი დმიტრი უტკინი და დაჯგუფების სხვა მეთაურები.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge