დავით ჯელაძემ ჩამოწოლილი მეწყერის მეორე მხარეს გადასვლა დისშვილთან ერთად შეძლო არა „სანსეტ შოვის“ მხრიდან, არამედ შედარებით ქვემოთ, იმ ადგილას, სადაც ტალახის სიმაღლე ამის თუნდაც მინიმალურ საშუალებას მისცემდა, – მის შესახებ ფრაქცია „ქართული ოცნების“ თავმჯდომარე მამუკა მდინარაძე სოციალურ ქსელში წერს.

„ტრაგედიით მოსარგებლეების წამოწყებული კამპანიის ახალი ტალღა, მანიპულაციის და დეზინფორმაციის ახალი ნაზავი…

ბევრჯერ აიხსნა და ითქვა, რომ 3 აგვისტოს, იმ უსაშინლესი ტრაგედიის დღეს, დაღამებამდე რამდენიმე საათი ჰქონდა სამაშველო სამსახურს, რომ სტიქიის ეპიცენტრი დაეთვალიერებინათ როგორც ვერტმფრენებით, ასევე დრონების მეშვეობით. შესაბამისად, გამორიცხულია, არსებობდეს ადამიანი, რომელსაც იმ დროისათვის შველა სჭირდებოდა და ვერ უშველეს! სტიქიის ზონა მთლიანად იქნა გადაფარული და სადაც კი სიცოცხლის ნიშანწყალი იყო, ყველა შემთხვევას შესაბამისი რეაგირება მოჰყვა.

გამოსარიცხად თეორიული შანსისაც კი, სითბური და ღამის ხედვის კამერებით აღჭურვილი დრონებით ღამითაც გაგრძელდა მუშაობა როგორც სტიქიის ეპიცენტრზე, ასევე მიმდებარე ტერიტორიებზე დაკვირვებით. ვინმე რომ დამატებით დაფიქსირებულიყო, მფრინავები მზად იყვნენ, რისკზეც წასულიყვნენ, თუმცა ასეთი არ მომხდარა.

მფრინავებმა და მაშველებმა გააკეთეს შესაძლებლობის მაქსიმუმი, ჰქონდათ ყველა შესაბამისი და საჭირო აღჭურვილობა. არ დასტურდება არცერთი ფაქტი, რომ ვინმეს მათი შველა სჭირდებოდა და ტექნიკის უქონლობის ან რაიმე ხარვეზის გამო ეს ვერ მოხერხდა.

რა თქმა უნდა, უდიდესი სტრესი გადაიტანეს იმ ადამიანებმა, რომლებსაც მაშველების და ვერტმფრენების მისვლამდე მოუწიათ ჯერ სტიქიასთან ბრძოლა, შემდეგ – დალოდება. თან არ იცოდნენ, განმეორდებოდა თუ არა მასის ჩამოწოლა და როგორც ჰყვებიან, იყო წარმოუდგენელი პანიკა…

რაც შეეხება დავით ჯელაძეს, რომელმაც ბევრი იბრძოლა თავისი ოჯახის წევრების, თავისი დისშვილის გადარჩენისათვის:

ის თავადვე ჰყვება, რომ მაშველებმა და მფრინავებმა ის და მისი ოჯახის წევრები იმ ადგილიდან გამოიყვანეს, სადაც ისინი იმყოფებოდნენ მაშინ, როდესაც სტიქიას სასწაულებრივად გადაურჩნენ, ხოლო თავისი დისშვილი მაშო მანამდე, მძიმე რისკის და არაადამიანური ძალის მოკრების ფასად, გადაიყვანა მეორე მხარეს, ვიდრე მაშველები გამოჩნდებოდნენ. სოცქსელებში ამისი დამადასტურებელი ვიდეოც იძებნება.

ჟურნალისტმა დღეს ირაკლი კობახიძეს (ტელეფონში) აჩვენა ფოტო და დაუსვა კითხვა მასთან დაკავშირებით. მიუთითა ჯელაძისა და მისი დისშვილის გადაადგილების სავარაუდო ტრაექტორია, სადაც ჩამოწოლილი მეწყერის, ტალახის სიმაღლე ზოგ ადგილას 3-4 მეტრსაც კი აღწევდა. შესაბამისი იყო რესპონდენტის რეაქციაც, თუმცა ირაკლი კობახიძემ იქვე თქვა, რომ ეს გადასამოწმებელი, დასაზუსტებელია და ვერაფერს იტყოდა ამ ფოტოსთან, შესაბამისად მითითებულ ტრაექტორიასთან დაკავშირებით.

უმარტივესი ლოგიკაა, ვივარაუდოთ და ამბის გადამოწმებითაც ეს დასტურდება, რომ დავით ჯელაძემ ჩამოწოლილი მეწყერის მეორე მხარეს გადასვლა დისშვილთან ერთად შეძლო არა „სანსეტ შოვის“ მხრიდან, არამედ შედარებით ქვემოთ, იმ ადგილას, სადაც ტალახის სიმაღლე ამის თუნდაც მინიმალურ საშუალებას მისცემდა, რაც ასევე ურთულესი და წარმოუდგენელი ამბავი შეიძლება იყოს, თუმცა ფაქტია და თავად ჰყვება, რომ მან ეს მოახერხა და უკანაც დაბრუნდა.

ვინც შოვი იცის, საუბარია ე.წ. „ვარდისფერი სახლის“ მიმდებარე ტერიტორიაზე. ეს, ბუნებრივია, შეუძლებელი იქნებოდა ოდნავ ზემოთაც კი, ანუ იმ ადგილებში, სადაც ტალახის სიმაღლე ადამიანის სიმაღლესაც კი სჭარბობდა.

ასევე, არ არის გამორიცხული, რომ მათ მოუწიათ იმ ადგილის გადავლა, სადაც ქვედა მხარეს პირველ ტალღად წამოსული შედარებით მყარი მასა იყო, რის გამოც, ღვთის წყალობით, ისინი ბოლომდე არ ჩაეფლნენ ტალახში და გადარჩნენ.

ძალიან სამწუხარო რეალობა ისაა, რომ ვინც უშუალოდ ასეთ ადგილას იმყოფებოდა სტიქიის დროს და არა განაპირა ადგილებში, რამდენიმემეტრიანი, ძალიან სწრაფად და რამდენიმე ტალღად წამების ინტერვალში წამოსული მეწყრისგან თავის დაღწევა მათ ვერ შეძლეს.

მოკლედ, ზოგიერთების მავნებლობის გამო, ისეთ დეტალებზე საუბარიც გვიწევს, რომლებზეც პირველ დღეებში უბრალოდ ვერავინ ილაპარაკებდა.

სტიქიის შედეგებთან ერთად ტრაგედიით მოსარგებლეების მიერ გავრცელებულ სიცრუეს თუ მანიპულაციებსაც ვებრძვით. მანიპულაციებს, რომლებმაც ცალკეულ შემთხვევებში სტიქიისგან დაზარალებული ადამიანების ნაწილზეც იმოქმედა…

ასეთ დროს ხდება ხოლმე გაერთიანება, ტრაგედიის შედეგების აღმოფხვრაზე კონცენტრირება, თუმცა ჩანს, რომ ამ ქვეყანაში არსებობენ ადამიანები, რომლებსაც შეუძლიათ მცირე პოლიტიკური დივიდენდებისთვის უკადრებელი იკადრონ.

მათ შევახსენებ, როგორც წესი, განსაკუთრებით გამორჩეული ერთეულების გარდა, პოლიტიკოსები ხალხს მალე ვავიწყდებით, ხოლო გმირობის და სიკეთის სამაგალითო ისტორიები საუკუნეებს უძლებს“, – წერს მამუკა მდინარაძე.

ზოგადად, ნაცობა რომ სოციალური გოიმობაა, ყველამ ვიცით. ირაკლი კობახიძეს დაუმსახურებლად ნუ აძაგებთ, – წერს სოციალურ ქსელში ანალიტიკოსი გია აბაშიძე პარტია „ქართული ოცნების” თავმჯდომარის მიერ შოვის ტრაგედიასთან დაკავშირებით გაკეთებული განცხადების ირგვლივ გავრცელებული ინტერპრეტაციის შესახებ.

როგორც ანალიტიკოსი აღნიშნავს, ირაკლი კობახიძე სულ სტიქიის ზონაშია დახმარებისთვის, ნაცქაჯი კი კლავიატურის ვირთხაა.

„საშინელი პარადოქსია – სტიქიური უბედურებისას შვეიცარიელი თუ ბრაზილიელი ერი ერთიანდება, აქ კი მმართველი პარტიის თავმჯდომარეს უნამუსოდ თავს ესხმიან ნაცვიგინდარები. ზოგადად, ნაცობა რომ სოციალური გოიმობაა, ყველამ ვიცით. ირაკლი კობახიძეს დაუმსახურებლად ნუ აძაგებთ. ეს ის შემთხვევაც არ არის, რომ “ვაიმე, აღლუმს არ დაესწრო, მოღალატეა”, თავები ვაქნიოთ და ფარისევლურად ვთქვათ ათასგვარი სიბრიყვე. ირაკლი კობახიძე სულ სტიქიის ზონაშია (სამწუხაროდ) დახმარებისთვის, ნაცქაჯი კი კლავიატურის ვირთხაა. ღმერთმა გაუმარჯოს ყველა პატრიოტს, ღმერთმა უშველოს ყველა უბირს! მშვიდობა საქართველოს შვილნო, გარდაცვლილთა სულებს უფალი შეეწიოს!”- წერს გია აბაშიძე.

არაპროფესიონალი ადამიანებისგან ვისმენთ უმძიმეს ბრალდებებსა შეფასებებს იმ საკითხებზე, რომლებზეც სპეციალისტებმა უნდა ისაუბრონ. განსაკუთრებული დარტყმის ობიექტი გახდა ირაკლი კობახიძე, კაცი, რომელიც ტრაგედიის ადგილიდან არ გამოსულა და თავად ადევნებს თვალს მიმდინარე სამუშაოებს, – წერს „ხალხის ძალის” წევრი, თამთა მეგრელიშვილი სოციალურ ქსელში.

მისი თქმით, ბრალდება მარტივია, შესაბამისად, ოპოზიცია ყველაფერს აკეთებს, რომ შოვის ტრაგედიას გადარჩენილი და მოვლენით დამძიმებული ადამიანები ხელისუფლების წინააღმდეგ განაწყონ.
მეგრელიშვილი მოუწოდებს ოპოზიციის წარმომადგენლებს, სხვადასხვა კურორტიდან კრიტიკული განცხადებების წერის ნაცვლად, ჩავიდნენ ადგილზე და გაეცნონ, რა კეთდება სტიქიის ზონაში.

„შოვში დატრიალებული ტრაგედიის დღიდან დღემდე სამაშველო სამუშაოებში ყველა უწყება არის ჩართული.
ინფრასტრუქტურის სამინისტრო აქტიურად მუშაობს, 80 ერთეული მძიმე ტექნიკა არის მობილიზებული და ძალიან ინტენსიური სამუშაოები ტარდება, ასევე მაშველები, სამხედროები არიან მობილიზებული.
ამ ფონზე არაპროფესიონალი ადამიანებისგან ვისმენთ უმძიმეს ბრალდებებსა და შეფასებებს იმ საკითხებზე რომლებზეც სპეციალისტებმა უნდა ისაუბრონ. განსაკუთრებული დარტყმის ობიექტი გახდა ირაკლი კობახიძე, კაცი რომელიც ტრაგედიის ადგილიდან არ გამოსულა და თავად ადევნებს თვალს მიმდინარე სამუშაოებს.

ყველა ბრალდება რომელიც სახელისუფლებო გუნდის მისამართით გაისმის არის შეკვეთილი პოლიტიკური მანიპულაცია.

ბრალდება მარტივია, რთულია იყო მმართველი რგოლი და ამ დიდი პასუხისმგებლობის ფარგლებში იმოქმედო ისე, როგორც უნდა იმოქმედო.

იმის ნაცვლად, რომ ოპოზიციური პარტიები საკუთარი მწირი ძალებით დადგნენ ხალხისა და სახელისუფლებო გუნდის გვერდით, ყველაფერს აკეთებენ რომ შოვის ტრაგედიას გადარჩენილი და უბრალოდ ამ ტრაგედიის სიმძიმით დამძიმებული ადამიანები ხელისუფლების წინააღმდეგ განაწყონ.

ოპოზიცია, რომელსაც არ უყვარს საკუთარი ხალხი, სწორედ ამ ხალხს იყენებს სათავისოდ.
არცერთი არგუმენტი, არცერთი დასკვნა არ იძლევა იმის თქმის საშუალებას, რომ სახელისუფლებო გუნდმა, შესაბამისმა უწყებებმა სტიქიაში მოყოლილი ადამიანების სიცოცხლის გადასარჩენად მოქმედება დაიგვიანეს და ის არ გააკეთეს, რაც უნდა გაეკეთებინათ.

სახელისუფლებო გუნდი, ყველა უწყება დიდი პასუხისმგებლობით მოქმედებს.

კეთილი ინებეთ, ჩადით ადგილზე გვერდით დაუდექით ირაკლი კობახიძეს, მმართველი რგოლის წარმომადგენლებს და მაშველებს, თავად ნახეთ რა კეთდება, სანამ აქ კლავიატურის „ლომებად” იქცევით და რესტორნებიდან და ზღვის სანაპიროდან მათ მოქმედებებს გააკრიტიკებთ.” – წერს თამთა მეგრელიშვილი.