თავის დროზე, როცა საზღვარგარეთ თითო-ოროლა ასეთი რამ გვესმოდა, რა თქმა უნდა, ირონიას იწვევდა, თუმცა ვხედავთ, რომ დღეს ეს საკითხი იმდენად სერიოზულია, დიდი ბრიტანეთის პრემიერ-მინისტრსაც კი მოუწია ხაზგასმა, რომ ქალი არის ქალი და კაცი – კაცი, -ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

როგორც პარლამენტის თავმჯდომარემ განაცხადა, მნიშვნელოვანია, ჩამოვყალიბდეთ და არ დავუშვათ, რომ ჩვენს ენობრივ წესებში ჩარევა მოხდეს და თავსმოხვეული იყოს ვითომდა ღირებულებების დროშით.

„თავისთავად, ქვეყნების გადასაწყვეტია ენობრივი წესები როგორ და რა ფორმით ექნებათ, რა წესები მოქმედებს, ეს ჩვენი საქმე არ არის, თუმცა ასეთ ტენდენციებზე როცა ვსაუბრობთ, გამოცდილება გვაჩვენებს, რომ შემდეგში ასეთი მიდგომების პროპაგანდა იწყება ხოლმე საქართველოში სხვადასხვა ორგანიზაციის თუ დაფინანსების გამოყენებით. თავისთავად მოსალოდნელია, რომ საქართველოშიც ცოტა ხანში გამოჩნდებიან აქტივისტები, რომლებიც გვეტყვიან, რომ ქართლის დედას ქართლის დედა აღარ უნდა ერქვას, დედა ენას აღარ უნდა დაერქვას დედა ენა და დედამიწას – დედამიწა. თავის დროზე, როცა საზღვარგარეთ თითო-ოროლა ასეთი რამ გვესმოდა, რა თქმა უნდა, ირონიას იწვევდა, თუმცა ვხედავთ, რომ დღეს ეს საკითხი იმდენად სერიოზულია, დიდი ბრიტანეთის პრემიერ-მინისტრსაც კი მოუწია ხაზგასმა, რომ ქალი არის ქალი და კაცი – კაცი. ეს თავის დროზე ირონია, ხუმრობა გვეგონა, მაგრამ, სამწუხაროდ, დღეს ასეთი ტენდენციებიც არის. მნიშვნელოვანია, ჩამოვყალიბდეთ და არ დავუშვათ, რომ ჩვენს ენობრივ წესებში ჩარევა მოხდეს და თავსმოხვეული იყოს ვითომდა ღირებულებების დროშით“, – განაცხადა შალვა პაპუაშვილმა.

ჩვენ ვისურვებდით მეტ შედეგს აშშ-სთან ურთიერთობაში და ჩვენი მხრიდან ამას ძალისხმევა არ აკლდება, – ამის შესახებ საქართველოს პირველმა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა მთავრობის სხდომის დასრულების შემდეგ განაცხადა.

როგორც დავითაშვილმა აღნიშნა, ამერიკის შეერთებული შტატები ცვლის სავაჭრო პოლიტიკას და საქართველოს მხრიდან ყოველთვის ხდება მაღალ დონეზე ადვოკატირება, რომ ჩვენი ქვეყანა, როგორც აშშ-ის სტრატეგიული პარტნიორი გათვალისწინებული იყოს ახალ სავაჭრო პოლიტიკაში.

„ყოველ წელს გვაქვს დიალოგი, რომ გადაიხედოს არსებული სავაჭრო შეთანხმებები და მოხდეს გარკვეული პროგრესი, მათ შორის, საქართველოსთვის მნიშვნელოვანი საექსპორტო პროდუქტების მიმართ იყოს ლიბერალური რეჟიმები. ეს არ არის მარტივი საკითხი, კონტექსტი უნდა წარმოვიდგინოთ, მსოფლიოში ბევრი რამე შეიცვალა ბოლო პერიოდში, მათ შორის, ამერიკის შეერთებულმა შტატებმა შეცვალა სავაჭრო პოლიტიკა ბევრი ქვეყნის მიმართ. ძალიან მკაფიო იყო ამერიკის პოლიტიკური ხელმძღვანელობის, ამ შემთხვევაში სავაჭრო წარმომადგენლობის პოზიცია, რომ ისინი აყალიბებენ ახლებურ მიდგომას ზოგადად სავაჭრო პოლიტიკის კუთხით და მხოლოდ საქართველოსთვის არ იქნება, რა თქმა უნდა, ცალკე რეჟიმი, მაგრამ მთლიანად მათ ახალი პრიორიტეტები უნდა ჩამოაყალიბონ სავაჭრო ურთიერთობებთან დაკავშირებით და ამ კონტექსტში, რა თქმა უნდა, საქართველო, როგორც სტრატეგიული პარტნიორი, მოაზრებული იქნება. ჩვენ ამას ვაფიქსირებთ ყველა ფორმატში, რომ საქართველოს ხმა ისმოდეს და საქართველოს პრიორიტეტები იყოს ამ ახლებურ პოლიტიკაში გათვალისწინებული.

ჩვენ არ ვაკლებთ მცდელობას, რომ მოვიზიდოთ მეტი და ხარისხიანი ინვესტიცია ამერიკიდან, მათ შორის ხელი შევუწყოთ პირდაპირ ფრენებს. ამ კუთხითაც ჩვენ მზაობას ვაფიქსირებთ, რომ ინფრასტრუქტურული ცვლილება, რაც შეიძლება ჩვენს აეროპორტებში იყო საჭირო, ეს განვახორციელოთ, თუმცა გვჭირდება მოხმარება, მხოლოდ ჩვენი ძალისხმევა საკმარისი არ არის. გვესმის, რომ საწყის ეტაპზე კომერციულად შეიძლება ახალი პირდაპირი ფრენების დაწყება იყოს რთული, მაგრამ ძალიან მნიშვნელოვანი იქნება სავაჭრო -ეკონომიკური, ტურისტული, ხალხთა შორის ურთიერთობების წასახალისებლად და აქაც, ალბათ, მხარდაჭერა ამერიკის ხელისუფლების მხრიდან იქნებოდა მიზანშეწონილი, განსაკუთრებით იმ სიტუაციაში, როდესაც ჩვენ სტრატეგიული პარტნიორები ვართ და ორივე მხარეს აქვს სურვილი ეს ურთიერთობები გააღრმაოს, მათ შორის, ეკონომიკური ურთიერთობები“, – განაცხადა დავითაშვილმა.

საქართველოს ხელისუფლების პოზიცია არის ძალიან მკაფიო – ჩვენ არჩევნები უნდა ჩავატაროთ მაქსიმალურად გამჭვირვალე გარემოში, – ამის შესახებ პირველმა ვიცე-პრემიერმა ლევან დავითაშვილმა მთავრობის სხდომის დასრულების შემდეგ პრესკონფერენციაზე განაცხადა.

მისი თქმით, საქართველო მზად არის, მაღალი რეპუტაციის მქონე ორგანიზაციის დამკვირვებლები მიიღოს ქვეყანაში იმისთვის, რომ საარჩევნო პროცესი მაქსიმალურად გამჭვირვალე იყოს.

„სრული მზადყოფნა არის, რომ უზრუნველვყოთ დამკვირვებლების უსაფრთხო გარემო, ასევე სათანადო სამუშაო პირობები. აქ საუბარია არა მხოლოდ ეუთო-ოდირის დამკვირვებლებზე, ჩვენი მხრიდან იყო განცხადება, რომ ჩვენ მზად ვართ, უფრო მეტი სხვა მაღალი რეპუტაციის მქონე ორგანიზაციის დამკვირვებლები მივიღოთ პროცესში იმისთვის, რომ საარჩევნო პროცესი მაქსიმალურად გამჭვირვალე იყოს“,-განაცხადა დავითაშვილმა.

„ნაცმოძრაობას“ არანაირი უფლება არ გააჩნია, რომ სასამართლო სისტემაზე საუბრობდეს, არათუ რაიმე ე.წ. რეფორმებს ატარებდეს, – ამის შესახებ პარტია “საქართველოსთვის” დეპუტატმა, მიხეილ დაუშვილმა “ვეტინგის” სისტემის შემოღებასთან დაკავშირებით “ნაციონალური მოძრაობის” ინიციატივაზე საუბრისას განაცხადა.

მისივე თქმით, “ნაციონალური მოძრაობა” “ქართულ ოცნებასთან” თანამშრომლობს და მას სასამართლო სისტემაში ძალაუფლების გამტკიცებაში ეხმარება. დაუშვილი ამის დასტურად იუსტიციის უმაღლესი საბჭოს წევრების დანიშვნის საკითხს იხსენებს.

“არც ერთი მოდელი, სადაც ჩვენ დავინახავთ მცდელობას, რომ “ნაცმოძრაობამ” რაღაცა ე.წ. რეფორმა უნდა გაატაროს სასამართლო სისტემაში, ჩვენთვის მისაღები არ იქნება. საერთოდ უნდა გვესმოდეს, რომ სისტემა, რომელიც დღეს არსებობს, არის “ნაცმოძრაობის” შექმნილი და ისიც უნდა გვესმოდეს, რომ მათ განსაკუთრებით, შარშანდელი გადაწყვეტილების შემდეგ, არანაირი საფუძველი და უფლება არ გააჩნიათ, რომ სასამართლო სისტემაზე საუბრობდნენ, არათუ რაიმე ე.წ. რეფორმებს ატარებდნენ. მარტივი მიზეზის გამო. ერთი მხრივ, ლაპარაკობს რეფორმაზე და მეორე მხრივ, როცა “ოცნებას” დასჭირდა, რომ სასამართლო სისტემაში თავისი ძალაუფლება განემტკიცებინა, ამ დროს “ნაცმოძრაობა” იყო, ვინც მას მხარი დაუჭირა. გაგახსენებთ იუსტიციის უმაღლესი საბჭოს წევრების დანიშვნის საკითხს. ამის მერე რა სასამართლო რეფორმაზე ლაპარაკობენ? როცა ხელისუფლებაში იყვნენ, გააკეთეს ის, რაც გააკეთეს და ხელისუფლებაში არ არიან, ვითომ ოპოზიციაში არიან, სინამდვილეში „ოცნებას“ ეთანამშრომლებიან და სასამართლო სისტემაში ძალაუფლების გამტკიცებაზე ეხმარებიან და თან რაღაცა რეფორმებზე საუბრობენ. ამიტომ, რასაც “ნაცმოძრაობა” გვთავაზობს, ჩვენთვის მიუღებელია,” – განაცხადა დაუშვილმა.

„ნაციონალურმა მოძრაობამ“ წარადგინა წინადადება „ვეტინგის“ სისტემის შემოღებასთან დაკავშირებით, რომელიც მოსამართლეების მიერ ე.წ. კეთილსინდისიერების ტესტის გავლას გულისხმობს.

ის ფაქტი, რომ ჩინეთის სახალხო რესპუბლიკამ საქართველოსთან დაკავშირებით უვიზო მიმოსვლის გადაწყვეტილება მიიღო, ხაზს უსვამს მათ დამოკიდებულებას ქართველი ხალხისა და საქართველოს მიმართ, – ამის შესახებ პარლამენტის თავმჯდომარემ, შალვა პაპუაშვილმა ჟურნალისტებს განუცხადა.

მისივე თქმით, კარგი იქნება სხვა ქვეყნებიც თუ მიიღებენ საქართველოს მოქალაქეებისთვის უვიზო მიმოსვლის გადაწყვეტილებას.

„ბევრი არ არის ის ქვეყანა, რომელსაც ჩინეთთან უვიზო მიმოსვლა აქვს. ის ფაქტი, რომ ჩინეთის სახალხო რესპუბლიკამ საქართველოსთან დაკავშირებით ეს გადაწყვეტილება მიიღო, ხაზს უსვამს მათ დამოკიდებულებას ქართველი ხალხისა და საქართველოს მიმართ, ჩვენი სტრატეგიული პარტნიორობის მიმართ, რომელიც დოკუმენტურად ჯერ კიდევ ახალგაზრდაა ამ მხრივ, თუმცა უკვე ბევრი ასეთი შედეგი გამოიღო. ეს პირველ რიგში, ჩვენი მოქალაქეებისთვისაა ძალიან მნიშვნელოვანი. საქართველოს პასპორტის სიძლიერე იცით, რომ წლიდან წლამდე იმატებს. ამიტომ ყველა ქვეყანას, განსაკუთრებით ჩვენს სტრატეგიულ პარტნიორებს, მოვუწოდებ, რომ საქართველოსთვის უვიზო რეჟიმი შემოიღონ. საქართველოში სულ 3.5 მილიონი ადამიანი ცხოვრობს. არ მგონია ისეთი ბევრნი ვიყოთ, რომ რომელიმე ქვეყანას ჩვენ მიმართ რაიმე კითხვის ნიშნები და შიშები ჰქონდეთ, რომ ამა თუ იმ ქვეყანაში ჭარბად გადასვლა მოხდება. კულტურული კავშირებისთვის, ადამიანებს შორის კავშირებისთვის, უვიზო მიმოსვლას აქვს განსაკუთრებული მნიშვნელობა. ჩვენ ვნახეთ, რომ მას შემდეგ რაც ევროკავშირმა ჩვენთვის საკუთარი საზღვრები უვიზოდ გახსნა, რა შესაძლებლობები მიეცათ ჩვენს ახალგაზრდებსა და მოქალაქეებს, იმოგზაურონ ევროკავშირში, ისწავლონ და ამით უფრო დაახლოვდნენ ევროკავშირის წევრი ქვეყნების მოქალაქეებთან. როდესაც ასეთ გადაწყვეტილებას სხვა ქვეყნებიც მიიღებენ, ეს უფრო გააძლიერებს ქვეყნებსა და ხალხებს შორის ურთიერთობას. ეს ასევე გულისხმობს ეკონომიკურ ურთიერთობების ინტენსივობას, როცა ქვეყნებს შორის მიმოსვლა არის ადვილი. ეს აადვილებს კონტაქტებსაც, კავშირებსაც, რაც შემდეგ უკვე გადაიზრდება და გადაითარგმნება ეკონომიკურ ურთიერთობებში და საქართველოში უფრო მეტ ინვესტიციებში“,- განაცხადა პაპუაშვილმა.

ცნობისთვის, ჩინეთის სახალხო რესპუბლიკამ საქართველოსთან უვიზო მიმოსვლის დაწესების გადაწყვეტილება მიიღო. როგორც საქართველოს პრემიერ-მინისტრმა ირაკლი კობახიძემ მთავრობის სხდომაზე განაცხადა, ამ გადაწყვეტილების შედეგად, საქართველოს მოქალაქეებს შეეძლებათ ჩინეთში 30 დღე დაყონ.

სალომე ზურაბიშვილი არა ქვეყნის გამაერთიანებლის, არამედ ოპოზიციის შიგნით, „ნაციონალური მოძრაობის“ გამაერთიანებლის ფუნქციის შესრულებას ლამობს,- ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ მიხეილ სარჯველაძემ განაცხადა.

„ზურაბიშვილი ახლა ძიების პროცესშია, როგორი შეიძლება იყოს მისი სამომავლო პოლიტიკური კარიერის გეგმები, რადგან ხვდება, რომ მას პრაქტიკულად ყველა შესაძლებლობა აქვს მოსპობილი საიმისოდ, რომ კონსტრუქციული როლის და პრეზიდენტის ფუნქციის შესრულება შეძლოს. ბოლო ხანს ის არა პრეზიდენტის სათქმელ სიტყვებს ამბობს, არამედ ოპოზიციის მხარდასაჭერად გამოდის გარკვეული ინიციატივებით. ის არა ქვეყნის გამაერთიანებლის, არამედ ოპოზიციის შიგნით, „ნაციონალური მოძრაობის“ გამაერთიანებლის ფუნქციის შესრულებას ლამობს“,- აღნიშნა სარჯველაძემ.

დღეს სალომე ზურაბიშვილი „ნაციონალური მოძრაობის“ წევრებს შეხვდება. ორბელიანების სასახლეში თინა ბოკუჩავა და გიორგი ვაშაძე მივლენ. მმართველი გუნდის შეფასებით, ზურაბიშვილი საპარლამენტო არჩევნებისთვის ემზადება და ის უკვე შეფასებულია რიგით რადიკალურ ოპოციონერად.