უკრაინაში რუსული სამხედრო აგრესია გრძელდება. საოკუპაციო ძალების მხრიდან თავდასხმების საფრთხის გამო, უკრაინის სამხრეთ ტერიტორიის აღმოსავლეთ ნაწილში საჰაერო განგაში გამოცხადდა. გასული ღამის განმავლობაში რუსულმა ძალებმა უკრაინის მიმართულებით 13 დრონი გაუშვეს. არცერთი რაკეტა მიზანს არ მოხვედრია.

აფეთქებების ხმა ისმოდა პოლტავაშიც.

უკრაინის გენშტაბის ცნობით, ბოლო 24 საათის განმავლობაში მათ მტრის 850 ჯარისკაცი მოკლეს. რუსეთ-უკრაინის ომის დაწყებიდან დღემდე ოკუპანტი ქვეყნის დანაკარგებმა 411 500 ჯარისკაცს გადააჭარბა.

ცეცხლის შეწყვეტის შეთანხმების მიხედვით, რამადანის პერიოდში ისრაელი ღაზაში მოქმედებებს შეაჩერებს, – ამის შესახებ აშშ-ის პრეზიდენტმა, ჯო ბაიდენმა განაცხადა.

„რამადანი ახლოვდება და ისრაელი დათანხმდა შეთანხმებას, რომ რამადანის დროს მოქმედებებში არ ჩაერთვებიან, რათა ყველა მძევლის გასათავისუფლებლად მეტი დრო მოგვეცეს“, – განაცხადა ჯო ბაიდენმა.

ასევე, დღეს, ჯო ბაიდენმა განაცხადა, რომ ცეცხლის შეწყვეტის შესახებ მოლაპარაკებები მიმდინარეობს და იმედი გამოთქვა, რომ შეთანხმების მიღწევა მომავალი კვირის ორშაბათამდე მოხდება.

რუსეთის მთავრობა 1-ელი მარტიდან ბენზინის ექსპორტის თვით აკრძალვას გეგმავს, – ამის შესახებ საინფორმაციო სააგენტო TASS-ს რუსეთის ვიცე-პრემიერის, ალექსანდრე ნოვაკის წარმომადგენელმა განუცხადა.

მისი განმარტებით, დროებითი აკრძალვის დაწესების მიზანი გაზაფხულსა და ზაფხულში მოთხოვნის ზრდის დარეგულირებაა.

„გადაწყვეტილება საჭიროა საზაფხულო არდადეგების და საველე სამუშაოების დროს მოთხოვნის გაზრდის კომპენსაციისთვის, ასევე ნავთობგადამამუშავებელი ქარხნის დაგეგმილი რემონტის დროს“, – განაცხადა ნოვაკის წარმომადგენელმა.

TASS-ის ინფორმაციით, „შეზღუდვა არ შეეხება ევრაზიის ეკონომიკური კავშირის ქვეყნებს, ასევე ე.წ. სამხრეთ ოსეთს, აფხაზეთს, მონღოლეთსა და უზბეკეთს“.

ინფორმაცია TASS-ს მინისტრთა კაბინეტის პრესსამსახურშიც დაუდასტურეს.

უკრაინის პრეზიდენტი ვოლოდიმირ ზელენსკი სოციალურ ქსელში წერს, რომ მიესალმება უნგრეთის პარლამენტის კენჭისყრას შვედეთის ჩრდილოატლანტიკურ ალიანსში გაწევრიანების დამტკიცების შესახებ.

„ეს არის ისტორიული დღე შვედეთისა და ევროატლანტიკური უსაფრთხოებისთვის. ვულოცავ შვედეთის პრემიერ-მინისტრს, ულფ კრისტერსონს და ყველა შვედს. შვედეთის გაწევრიანება უდავოდ გააძლიერებს ალიანსს, განსაკუთრებით თავისუფალი სამყაროსთვის რუსეთის საფრთხის გათვალისწინებით“, – წერს ზელენსკი სოციალურ ქსელში.

ამასთან, უკრაინის პრეზიდენტის თქმით, უკრაინა მოუთმენლად ელოდება შვედეთთან და ნატო-ს სხვა მოკავშირეებთან მჭიდრო თანამშრომლობას უკრაინის ნატო-ში გაწევრიანების წინსვლისთვის.

შეგახსენებთ, უნგრეთის პარლამენტმა შვედეთის ნატო-ში გაწევრიანების განაცხადს მხარი დაუჭირა. უნგრეთი ნატო-ს 31 წევრს შორის ბოლო იყო, რომელმაც სკანდინავიური ქვეყნის ალიანსში გაწევრიანების რატიფიცირება მოახდინა.

ისრაელის არმია ღაზის სექტორში „ჰამასის“ ობიექტების განადგურებას განაგრძობს. „ცაჰალმა“ ანკლავის ცენტრალურ ნაწილში აღმოჩენილი კიდევ ერთი, 10-კილომეტრიანი გვირაბის კადრები გავრცელა, რომელიც, სამხედროების ცნობით, ღაზის უნივერსიტეტისა და საავადმყოფოს ქვეშ გადის და ანკლავის ჩრდილოეთ და სამხრეთ ნაწილებს აკავშირებს.

„ჰამასთან“ ბრძოლის პარალელურად, ისრაელმა ღამით მორიგი იერიში მიიტანა „ჰეზბოლას“ ობიექტებზეც. ოპერაცია ლიბანში ბაზირებული დაჯგუფების მხრიდან ისრაელის ტერიტორიაზე 60 რაკეტის გაშვების საპასუხოდ ჩატარდა. „ცაჰალის“ ცნობით, შედეგად, „ჰეზბოლას“ უფროსი მეთაური, ჰასან ჰუსეინ სალამი დაიღუპა.

პარიზში უკრაინის მხარდასაჭერად საერთაშორისო კონფერენცია გაიმართა, რომელშიც 20 სახელმწიფოს ლიდერი მონაწილეობდა. კონფერენციას უკრაინის პრეზიდენტი ვოლოდიმირ ზელენსკი ონლაინ ესწრებოდა.

ზელენსკიმ არაფორმალური სამიტის მონაწილეები შვეიცარიაში დაგეგმილ „სამშვიდობო სამიტზე“ მიიწვია.

საფრანგეთის პრეზიდენტმა, ემანუელ მაკრონმა აღნიშნა, რომ სამიტის მონაწილე ქვეყნები შეთანხმდნენ იმ სახელმწიფოების მიმართ სანქციებზე მუშაობაზე, რომლებიც მისი თქმით, ეხმარებოდნენ რუსეთს უკრაინის გამო დაწესებული სანქციების გვერდის ავლაში.

ამასთან, საფრანგეთის პრეზიდენტმა განაცხადა, რომ უკრაინის მოკავშირეები შექმნიან კოალიციას უკრაინისათვის საშუალო და შორ მანძილზე მოქმედი რაკეტების მიწოდებისთვის.

მისივე თქმით, პარიზში გამართულ კონფერენციაზე ლიდერებმა განიხილეს დასავლეთის ქვეყნების სახმელეთო ძალების უკრაინაში გაგზავნის შესაძლებლობა, მაგრამ ამ საკითხზე კონსენსუსს ვერ მიაღწიეს.

„ჩვენ ეს განვიხილეთ. ახლა არ არსებობს კონსენსუსი ჯარების გაგზავნაზე, მაგრამ მომავალში ამ საკითხთან დაკავშირებით არაფერია გამორიცხული. ჩვენ ყველაფერს გავაკეთებთ, რათა რუსეთმა არ მოიგოს ეს ომი“, – აღნიშნა მაკრონმა.