ბულგარეთის ეროვნულმა ასამბლეამ საქართველოსთვის კანდიდატის სტატუსის მინიჭების მხარდამჭერი დეკლარაცია მიიღო. ამ ფაქტს საქართველოს საგარეო საქმეთა მინისტრი ილია დარჩიაშვილი სოციალურ ქსელ X-ზე ეხმაურება.

“სიხარულით მსურს განვაცხადო, რომ ბულგარეთის ეროვნულმა ასამბლეამ საქართველოსთვის ევროკავშირის კანდიდატის სტატუსის მინიჭების მხარდამჭერი დეკლარაცია მიიღო. ეს ჩვენი მეგობრების მხრიდან საქართველოს მხარდაჭერის კიდევ ერთი ნათელი დემონსტრაციაა! განსაკუთრებით ამაღელვებელია, რომ ასეთი მნიშვნელოვანი გადაწყვეტილება მიღებულ იქნა ულამაზეს სოფიაში ჩემი ვიზიტის დროს! ჩვენ ძალიან ვაფასებთ თქვენს მხარდაჭერას! ჩვენ ერთად მივიწევთ ნათელი, ერთიანი მომავლისკენ!” – წერს დარჩიაშვილი X-ის პირად გვერდზე.

რუსეთის გარშემო ყველანაირი თანამშრომლობა, პოლიტიკური თუ ეკონომიკური ფორმატები, უკვე პრაქტიკულად ჩამოიშალა, რადგან რუსეთის ამ რეჟიმის პირობებში ეს არის შეუძლებელი, ამას ძალიან კარგად ეხმაურება ევროსაბჭოს რეზოლუცია, რომელშიც ნათქვამია, რომ სანამ ეს რეჟიმი არ დასრულდება, ევროპაში ახალი უსაფრთხოების, გეოპოლიტიკის არქიტექტურის შექმნა და აწყობა არის შეუძლებელი, – ამის შესახებ „ერთიანი ნაციონალური მოძრაობის“ გენერალურმა მდივანმა, პეტრე ცისკარიშვილმა განაცხადა.

ცისკარიშვილს იმედი მაქვს, რომ ბევრი სახელმწიფო, გლობალური ლიდერები, სხვადასხვა საერთაშორისო ორგანიზაციები გაიზიარებენ და მხარს აუბამენ იმ სულისკვეთებას, რომელიც ევროსაბჭოს რეზოლუციაშია მოყვანილი.

ამასთან, მისივე თქმით, პუტინი უნდა დასრულდეს და ეს რეჟიმი უნდა შეიცვალოს.

„საქართველო დსთ-დან ჯერ კიდევ 2008 წელს გამოვიდა, ცნობილი რუსული აგრესიის გამო და ჩვენ მათთან არანაირი საერთო არც პოლიტიკურად და არც ეკონომიკურად არ გვქონია, თუ არ ჩავთვლით ივანიშვილის რეჟიმის, მათ მიმართ კეთილ განწყობას და რუსეთის მიმართ რევერანსებს. პირდაპირ ვთქვათ, სამწუხაროდ, მათი ფილიალი და გაგრძელება არიან პუტინისტური რეჟიმის ჩვენს ქვეყანაში, ხოლო უკრაინა და მოლდოვა ამ ტენდენციას, ამ გადაწყვეტილებას მოგვიანებით შეუერთდა, რადგან მათაც ნახეს რუსეთის რეალური სახე, მათაც ნახეს ის აგრესია, რომელიც გასულ წელს განხორციელდა უკრაინის წინააღმდეგ და ეს ორგანიზაცია პრაქტიკულად არც გეოპოლიტიკურად, აღარც ეკონომიკურად არაფერს არ წარმოადგენს, არათუ დსთ არაფერს არ წარმოადგენს, არამედ ე.წ „ოდკბ“, რომელიც არის რუსეთის გარშემო რამდენიმე დსთ-ს ქვეყნის უსაფრთხოების სათანამშრომლო ფორმატი, მათაც კი უთანხმოება აქვთ ერთმანეთში და მათაც არ აქვთ საერთო გეოპოლიტიკური ან თუნდაც ეკონომიკური პლატფორმა. ისინი ყველა სხვადასხვა მიმართულებით იყურებიან, ზოგი ჩინეთთან ცდილობს საერთო ენის გამონახვას, ზოგს დასავლეთისკენ აქვს ვექტორი აღებული და პრიორიტეტს ანიჭებს ევროპასთან, ევროატლანტიკურ სივრცესთან ურთიერთობას. აქედან გამომდინარე, რუსეთის გარშემო ყველანაირი თანამშრომლობა, პოლიტიკური თუ ეკონომიკური ფორმატები, უკვე პრაქტიკულად ჩამოიშალა, რადგან ამ რუსეთის რეჟიმის პირობებში ეს არის შეუძლებელი, ამას ძალიან კარგად ეხმაურება ევროსაბჭოს რეზოლუცია, რომელშიც ნათქვამია, რომ სანამ ეს დიქტატორი, სანამ ეს რეჟიმი არ დასრულდება, ევროპაში ახალი უსაფრთხოების და გეოპოლიტიკის არქიტექტურის შექმნა და აწყობა არის შეუძლებელი და ამაზევეა მიბმული შუაგულ ევროპაში მშვიდობის დამყარება. ჩვენ თუ გვინდა მშვიდობა და ეს ყველას უნდა, განსაკუთრებით ჩვენს ევროპელ პარტნიორებს, შეერთებულ შტატებს, მთელ ცივილიზებულ სამყაროს, მაშინ პუტინი უნდა დასრულდეს, ეს რეჟიმი უნდა შეიცვალოს და ეს რეზოლუცია არის ყინულმჭრელი და მე იმედი მაქვს, რომ ბევრი სახელმწიფო, გლობალური ლიდერები, სხვადასხვა საერთაშორისო ორგანიზაციები გაიზიარებენ და მხარს აუბამენ იმ სულისკვეთებას, რომელიც ევროსაბჭოს რეზოლუციაში იყო მოყვანილი“, – განაცხადა პეტრე ცისკარიშვილმა.

„ქართულმა ოცნებამ“ ამ დრომდე არ დაამტკიცა ჩემი უფლებამოსილება ევროსაბჭოს საპარლამენტო ასამბლეაში, მათთვის გაცილებით კომფორტულია რუსეთის, ამ შემთხვევაში პუტინის პირადი ინტერესების დაცვა საერთაშორისო ასპარეზზე ოპოზიციის წარმომადგენლების გარეშე, – ამის შესახებ პარტია „ერთიანი ნაციონალური მოძრაობის“ პარლამენტის ფრაქციის თავმჯდომარემ, თინა ბოკუჩავამ განაცხადა.

მისივე თქმით, ნაცვლად იმისა, რომ „ივანიშვილის რეჟიმის წარმომადგენლებმა დაიცვან საქართველოს ეროვნული ინტერესები, იცავენ პუტინს და რუსეთის პოზიციებს საერთაშორისო ასპარეზზე“.

„ოცნებამ“ ამ დრომდე არ დაამტკიცა ჩემი უფლებამოსილება ევროსაბჭოს საპარლამენტო ასამბლეაში, მათთვის გაცილებით კომფორტულია რუსეთის, ამ შემთხვევაში პუტინის პირადი ინტერესების დაცვა საერთაშორისო ასპარეზზე ოპოზიციის წარმომადგენლების გარეშე. ჩვენ ვნახეთ, რომ სტრასბურგში ქვეყნის ეროვნული ინტერესების დაცვა მოუწია ოპოზიციის წარმომადგენელს, ქალ დეპუტატს. მე, ასევე მომიწია ქვეყნის ინტერესების დაცვა ნატო-ს საპარლამენტო ასამბლეაზე კოპენჰაგენში, სადაც შესწორება დავაყენე რეზოლუციაში, რომელსაც ნატო-ს საპარლამენტო ასამბლეამ ერთხმად მხარი დაუჭირა რუსეთის მიზანთან დაკავშირებით, ოჩამჩირეში გახსნას სამხედრო ბაზა, იქაც, როგორც დღეს სტრასბურგში, კოპენჰაგენში საერთოდ დარბაზში „ოცნების“ წარმომადგენლები არ იმყოფებოდნენ. რატომ? იმიტომ რომ პუტინი არის ივანიშვილის რეჟიმის ძალაუფლებაში დარჩენის გარანტი და ნაცვლად იმისა, რომ ივანიშვილის რეჟიმის წარმომადგენლებმა დაიცვან საქართველოს ეროვნული ინტერესები, იცავენ პუტინს და რუსეთის პოზიციებს საერთაშორისო ასპარეზზე“, – განაცხადა თინა ბოკუჩავამ, რომლის განცხადებასაც „ნაციონალური მოძრაობის“ პრესსამსახური ავრცელებს.

საკონსტიტუციო სასამართლოში პრეზიდენტის წარმომადგენლებმა პროფესიული სინდისი გვერდით გადადეს და არასწორ ინფორმაციას ავრცელებდნენ, – ამის შესახებ საპარლამენტო უმრავლესობის წევრმა, ანრი ოხანაშვილმა განაცხადა.

როგორც ანრი ოხანაშვილმა აღნიშნა, კონსტიტუციის დარღვევა ხელისგულზე დევს და ამის არდადგენა სამართლებრივად კითხვას გააჩენს ნებისმიერ იურისტში.

„ვამბობდით, რომ ეს იყო მარტივი სამართლებრივი კაზუსი და ეს ხელისგულზე დაიდო, როცა ჩვენ ვკითხულობდით: „წარმოადგენს“ და „წარმომადგენლობითი უფლებამოსილება“ განსხვავდება თუ არა ერთმანეთისგან? ამაზე პრეზიდენტის წარმომადგენლებისგან ელემენტარული პასუხი ვერ მივიღეთ. ამას მიზანმიმართულად აკეთებდნენ. პროფესიული სინდისი გვერდით გადადეს და არასწორ ინფორმაციას ავრცელებდნენ. საკონსტიტუციო სასამართლოში პრეზიდენტს კონსტიტუციონალისტები არ წარმოადგენდნენ. თუ პრეზიდენტის სამართლებრივი პოზიციები იმდენად მყარი იყო და ისე იმოქმედა კონსტიტუციის ფარგლებში, ნებისმიერი კონსტიტუციონალისტი, რომელიც პროფესიულ სინდისს პატივს სცემს და დარწმუნებული იქნებოდა, რომ ადგილი არ ჰქონდა კონსტიტუციის დარღვევას, რა თქმა უნდა, ის წარმოადგენდა საქართველოს პრეზიდენტს, თუმცა არ ვიცი, პრეზიდენტმა ვერავინ დაითანხმა თუ უარი უთხრეს. თუ სამართლებრივი სისწორე სახეზე იყო, როგორ შეიძლებოდა, რომ კარგ კონსტიტუციონალისტს მისი ინტერესები არ დაეცვა? კონსტიტუციის დარღვევა ხელისგულზე დევს და, რა თქმა უნდა, ამის არდადგენა სამართლებრივად კითხვას გააჩენს არა მხოლოდ ჩვენი, ნებისმიერი იურისტის მხრიდან. მოსამართლეებმა უნდა იხელმძღვანელონ საქართველოს კონსტიტუციის შესაბამისად – თუ კონსტიტუციით იხელმძღვანელებენ, სახეზეა კონსტიტუციის დარღვევა“, – განაცხადა ანრი ოხანაშვილმა.

საქართველოს საგარეო საქმეთა მინისტრი ილია დარჩიაშვილი ბულგარეთში ვიზიტის ფარგლებში ბულგარეთის ვიცე-პრემიერს, საგარეო საქმეთა მინისტრს, მარია გაბრიელს შეხვდა.

საქართველოს საგარეო საქმეთა სამინისტროს ინფორმაციით, შეხვედრის ფარგლებში ბულგარეთის ვიცე-პრემიერმა ხაზი გაუსვა მტკიცე მხარდაჭერას საქართველოს ევროკავშირში ინტეგრაციისა და ქვეყნისთვის კანდიდატის სტატუსის მინიჭების მიმართ. მათივე ცნობით, შეხვედრაზე აღინიშნა, რომ საქართველო და ბულგარეთი იზიარებენ საერთო ევროპულ ღირებულებებს და საქართველოს უნდა ჰქონდეს ბულგარეთის პოლიტიკური, პრაქტიკული მხარდაჭერის იმედი ამ გზაზე.

ამასთან, მხარეებმა განსაკუთრებული ყურადღება დაუთმეს საქართველოს პროგრესს როგორც ევროკავშირში ინტეგრაციის გზაზე, ასევე ევროკომისიის 12 რეკომენდაციის შესრულების კუთხით. საქართველოს საგარეო უწყების ინფორმაციით, დადებითი შეფასება მიეცა საქართველოს რეფორმებს და გაწეულ ძალისხმევას ევროკავშირთან დაახლოების პროცესში.

როგორც საგარეო საქმეთა მინისტრმა, ილია დარჩიაშვილმა ბულგარელ კოლეგასთან შეხვედრის შემდეგ განაცხადა, საქართველოს საგარეო პრიორიტეტებისადმი ბულგარეთის მხარდაჭერა განსაკუთრებულად მნიშვნელოვანია.

„ძვირფასო მინისტრო, მინდა, კიდევ ერთხელ გადაგიხადოთ მადლობა საქართველოს სუვერენიტეტისა და ტერიტორიული მთლიანობის, ასევე საქართველოს ევროპული და ევროატლანტიკური ინტეგრაციის მიმართ თქვენი უწყვეტი მხარდაჭერისთვის. უსაფრთხოების წინაშე არსებული გამოწვევების ფონზე, საქართველოს საგარეო პრიორიტეტებისადმი ბულგარეთის მკაფიო მხარდაჭერა განსაკუთრებულად მნიშვნელოვანია. გასულ წელს ევროპულმა საბჭომ და ევროპის ლიდერებმა მიიღეს გადაწყვეტილება საქართველოსთვის ევროპული პერსპექტივის მინიჭების შესახებ, რამაც მნიშვნელოვანი იმპულსი შესძინა ევროკავშირისკენ საქართველოს სწრაფვას და რეალობად აქცია საქართველოს მრავალი თაობის ოცნება. ისტორიული გადაწყვეტილებიდან თითქმის ერთი წლის განმავლობაში საქართველომ მნიშვნელოვანი ძალისხმევა გასწია ევროკავშირის 12 პუნქტის შესრულების მიმართულებით. დარწმუნებული ვართ, მიმდინარე წლის ბოლოსთვის ჩვენ ვიზეიმებთ კიდევ ერთ ისტორიულ გადაწყვეტილებას საქართველოსთვის ევროკავშირის კანდიდატის სტატუსის მინიჭების შესახებ, რაც საქართველოს ევროკავშირში გაწევრიანების შესახებ მოლაპარაკებათა დაწყების საფუძველი გახდება. ეს გადამწყვეტი ეტაპია საქართველოს ევროპული მომავლისთვის – ეს არის სტრატეგიული და მომავალზე ორიენტირებული გადაწყვეტილებები, რომლებიც მტკიცედ დაუმკვიდრებს საქართველოს ადგილს ევროპის დემოკრატიული ქვეყნების ოჯახში“, – განაცხადა ილია დარჩიაშვილმა.

„ქართულმა ოცნებამ“ პარტნიორის მიმართ დამოკიდებულება უნდა შეცვალოს, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

„თუ ვინმემ აღქმები და პოლიტიკა უნდა შეცვალოს, ეს „ქართული ოცნებაა“. თქვენ იცით, მათი განცხადებები და წერილები, რომ თურმე რომელ ქვეყანაშიც ამერიკა შევიდა, ამერიკა ყოფილა არეულობის შემტანი და ამ თვალსაზრისით ჩამოთვლილი აქვთ იემენი, ლიბია, სირია. მინდა, „ქართულ ოცნებას“ ვკითხო: შემთხვევით, „ჰამასს“და „ჰეზბოლას“ ხომ არ უჭერენ მხარს, რადგან ასეთ განცხადებებს „ჰამასი“ და „ჰეზბოლა“ აკეთებენ. ჩვენი პარტნიორის მიმართ დამოკიდებულება მათ უნდა შეცვალონ“, – განაცხადა პაატა მანჯგალაძემ.