ახლა უკვე ძალაში შესული კანონიერი გადაწყვეტილებით, საქართველოს პრეზიდენტი ცნობილია კონსტიტუციის დამრღვევად, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

მისივე თქმით, მიღწეულია მიზანი, რომ საქართველოს კონსტიტუციის დარღვევა არავის შერჩება.

„საკონსტიტუციო სასამართლოს გადაწყვეტილება არის არა მხოლოდ სამართლებრივი, არამედ სამართლიანი. კონსტიტუცია მხოლოდ იურისტებისთვის არ არის დაწერილი, ის ეკუთვნის საქართველოს ყველა მოქალაქეს. სამი დღის განმავლობაში ყველა მოქალაქემ კარგად გაიაზრა, რომ საქართველოს პრეზიდენტმა კონსტიტუცია დაარღვია. ეს საკონსტიტუციო სასამართლოს პროცესზე მის აღიარებით ჩვენებებშიც კი გამოჩნდა. დღევანდელი რეალობა არის, ერთის მხრივ, სამწუხარო, რადგან საქართველოს პრეზიდენტმა, რომელმაც ფიცი დადო კონსტიტუციაზე, დაარღვია, განუდგა საზოგადოებას, რომელმაც ის აირჩია. ახლა უკვე  ძალაში შესული კანონიერი გადაწყვეტილებით, საქართველოს პრეზიდენტი არის ცნობილი კონსტიტუციის დამრღვევად.

რაც შეეხება შემდგომ პროცედურას, ეს პოლიტიკური ნაწილია. სამწუხარო რეალობაა, მაგრამ საქართველოს პრეზიდენტი დღეს დგას ასეთი ალტერნატივის წინაშე – ან მიიღოს გადაწყვეტილება, რომ გადადგეს, ან ატაროს ტვირთი, რასაც ჰქვია საქართველოს პრეზიდენტი, რომელსაც, პრაქტიკულად, აღარც ხალხისგან აქვს ლეგიტიმაცია და აღარც საკონსტიტუციო სასამართლოსგან, რომელმაც ფიცი დაადებინა ინაუგურაციაზე და ეს ტვირთი ზიდოს კიდევ მინიმუმ ერთი წელი. ამ რეალობის წინაშე თვითონ ჩაიყენა თავი და გადაწყვეტილებაც თვითონ უნდა მიიღოს.

მე რომ მისი მრჩეველი ვიყო, ვურჩევდი, რომ ცუდსა და უარესს შორის ალტერნატივა ცუდზე გაეკეთებინა. ცუდია, რომ პრეზიდენტი გადადგება, რადგან საკონსტიტუციო სასამართლომ მიიღო გადაწყვეტილება, რომ მან კონსტიტუცია დაარღვია. უარესი იქნება, რომ საკონსტიტუციო სასამართლოსაც კი არ დაუჯეროს და ამის შემდეგაც ზიდოს ის ტვირთი, რასაც კონსტიტუციის დარღვევა ჰქვია.

ჩვენი მიზანია, არავის შერჩეს საქართველოს კონსტიტუციის დარღვევა. რეალურად, ეს მიზანი მიღწეულია. რაც შეეხება პოლიტიკურ ნაწილს, გასაგებია, რომ 100 ხმა ვერ მოგროვდება. ეს პოლიტიკური ნაწილია, დღეს უკვე მივიღეთ ძირითადი ნაწილი, სადაც კონსტიტუციამ პრეზიდენტს უჩივლა, მოუგო და თქვა, რომ მე, ძირითადი კანონი არავინ უნდა დამარღვიოს. არ მგონია, რომ სალომე ზურაბიშვილი დღეს იყოს იმ ხასიათზე, რა ხასიათზეც იყო დაახლოებით ერთი თვის, თუ თვე-ნახევრის წინ, როდესაც ღიმილიან ფოტოებს უგზავნიდა საკუთარ საზოგადოებას. რეალობა სულ სხვაა, როდესაც შენ პრეცედენტულად ხარ საქართველოში ის პრეზიდენტი, რომელზეც საზოგადოებამ უკვე გაიგო, რომ დაარღვია კონსტიტუცია, თანაც საკონსტიტუციო სასამართლოს ოფიციალური, კანონიერ ძალაში შესული გადაწყვეტილება გაქვს, ასეთი ტვირთის მატარებელი პრეზიდენტი შესაშური ნამდვილად აღარ არის, მით უმეტეს უცხოეთში. საქართველოს პრეზიდენტს დღეს უპასუხა საქართველოს კონსტიტუციამ, იცინის ის, ვინც ბოლოს იცინის. დღეს გაიცინა საქართველოს კონსტიტუციამ და დაღვრემილია საქართველოს პრეზიდენტი“, – განაცხადა გურამ მაჭარაშვილმა.

საკონსტიტუციო სასამართლომ საქართველოს პრეზიდენტის მიერ კონსტიტუციის დარღვევა დაადგინა.

დღეს დადასტურდა, რომ საქართველო არის ბევრად უფრო ევროპული, ბევრად თავისუფალი და დემოკრატიული, ვიდრე იყო 10 წლის წინ, როცა ხელისუფლების ყველა შტო და ინსტიტუტი იყო ერთი ადამიანის ხელში , – ამის შესახებ საპარლამენტო უმრავლესობის წევრმა, არჩილ თალაკვაძემ განაცხადა, რითაც გამოეხმაურა საქართველოს საკონსტიტუციო სასამართლოს დასკვნას პრეზიდენტის საიმპიჩმენტო წარდგინებაზე, რომლის მიხედვითაც საქართველოს პრეზიდენტ სალომე ზურაბიშვილის მიერ ევროპაში, მთავრობის უნებართვო ვიზიტების განხორციელებით, ქვეყნის კონსტიტუციის დარღვევა დაადგინა.

როგორც თალაკვაძემ აღნიშნა, 6 მოსამართლემ მხარი დაუჭირა იმას, რაზეც მმართველი გუნდის პოზიცია იყო, რომ იყო მარტივი კაზუსი, ხოლო სამმა განსხვავებული პოზიცია დააფიქსირა და “ეს არის მაგალითი, როგორ ფუნქციონირებს დემოკრატია”.

მისივე თქმით, “ხელისუფლების შტოებს შორის არის ბალანსი და სასამართლოს აქვს თავის მნიშვნელოვანი როლი ქვეყანაში”.

“ძალიან მნიშვნელოვანი გადაწყვეტილებაა. საკონსტიტუციო სასამართლომ მხარი დაუჭირა იმას, რომ ყველა არჩეულმა ლიდერმა, ყველა ინსტიტუტმა თავის საქმე უნდა აკეთოს კონსტიტუციის დაცვით. თუ ჩვენ გვინდა ევროპული სახელმწიფო, უნდა დავიცვათ კონსტიტუცია და ის წესები, რაც სახელმწიფოსთვის არის ძირითადი და ყველასთვის სახელმძღვანელო. ამ გადაწყვეტილებით საკონსტიტუციო სასამართლომ განამტკიცა ქვეყანაში კონსტიტუციური წესრიგი და უთხრა როგორც ხელისუფლებას, ისე საზოგადოებას, რომ პირველ რიგში, ყველამ უნდა დაიცვას კონსტიტუცია, წესები და მხოლოდ ამ გზით შეგვიძლია ვაკეთოთ ჩვენი საქმე, მათ შორის ის, რისიც ძალიან გვჯერა. ეს არის კიდევ ერთი მაგალითი, თუ როგორ მუშაობს ჩვენს ქვეყანაში დემოკრატია ისევე როგორც დასავლურ დემოკრატიებში, არსებობს კონსტიტუციური წესრიგი, სახელისუფლებო შტოებს შორის ბალანსი, საკონსტიტუციო სასამართლომ განიხილა დავა და მიიღო სწორი გადაწყვეტილება”, – განაცხადა თალაკვაძემ.

შეგახსენებთ, რომ საკონსტიტუციო სასამართლომ პრეზიდენტის საიმპიჩმენტო წარდგინებაზე დასკვნა გამოაქვეყნა. კერძოდ, სასამართლომ, საქართველოს პრეზიდენტ სალომე ზურაბიშვილის მიერ ევროპაში, მთავრობის უნებართვო ვიზიტების განხორციელებით, ქვეყნის კონსტიტუციის დარღვევა დაადგინა. ამასთან, როგორც ტურავამ აღნიშნა, დასკვნაზე განსხვავებული მოსაზრება დააფიქსირა სამმა მოსამართლემ – ირინა იმერლიშვილმა, გიორგი კვერენჩხილაძემ და თეიმურაზ ტუღუშმა.

ჩინეთთან სავაჭრო ეკონომიკური თანამშრომლობის კომისიის სხდომის ფარგლებში დეტალურად განვიხილეთ ყველა ის მიმართულება და მნიშვნელოვანი საკითხი, რომელიც ჩვენს ქვეყნებს შორის ურთიერთობებს კიდევ უფრო გააძლიერებს, – ამის შესახებ ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა პეკინში საქართველო-ჩინეთის სავაჭრო-ეკონომიკური თანამშრომლობის ერთობლივი კომისიის მე-8 სხდომის დასრულების შემდეგ განაცხადა.

სხდომაზე მხარეებმა განიხილეს ისეთი საკითხები, როგორიცაა ორ ქვეყანას შორის სავაჭრო ურთიერთობები და თანამშრომლობა ინვესტიციების დარგში, მათ შორის ინოვაციებისა და ტექნოლოგიების, ტრანსპორტისა და ლოგისტიკის სფეროში, ასევე სოფლის მეურნეობის სექტორში პოტენციური თანამშრომლობა.

მისივე თქმით, ეს იყო პირველი შეხვედრა მას შემდეგ, რაც ჩინეთთან სტრატეგიული პარტნიორობა გამოცხადდა და ყველა ის პრიორიტეტული მიმართულება, რომელიც პრემიერ-მინისტრის ჩინეთში ვიზიტის დროს განისაზღვრა, უშუალო სამუშაო კომისიის ფორმატში უნდა იყოს განხორციელებული.

„კომისიის ფარგლებში შეხვედრა გვქონდა ჩინეთის კომერციის მინისტრთან, ბატონ ვანგ ვენთაოსთან, რა დროსაც ვისაუბრეთ ჩინეთსა და საქართველოს შორის ეკონომიკური ურთიერთობის კუთხით ახალი ეტაპის დაწყებაზე. განვიხილეთ ისეთი მნიშვნელოვანი პოტენციური საინვესტიციო პროექტები, როგორიცაა შუა დერეფნის გაძლიერება, ინვესტიციები ტრანსპორტის, ლოგისტიკის სფეროში, ინვესტიციები ინოვაციებისა და ტექნოლოგიების სფეროში, ასევე სავაჭრო ურთიერთობების გაძლიერება და სავაჭრო ბარიერების დაძლევა. რა თქმა უნდა, დავისახეთ კონკრეტული მიზნები იმისთვის რომ ორ ქვეყანას შორის ეკონომიკური ურთიერთობა შეესაბამებოდეს სტრატეგიული პარტნიორობის დონეს“, – აღნიშნა ლევან დავითაშვილმა.

მინისტრის განცხადებით, კომისიის სხდომაზე ასევე ხაზი გაესვა ტურიზმის სფეროში თანამშრომლობას.

აღინიშნა, რომ საქართველოს მიერ ჩინელი ტურისტებისთვის ვიზის გაუქმება ხელს შეუწყობს მეტი ჩინელი ტურისტის შემოსვლას ჩვენს ქვეყანაში და კოვიდპანდემიამდე არსებული ფრენების სიხშირის აღდგენას, ასევე ახალი, პირდაპირი ავიამიმართულებების დამატებას.

ლევან დავითაშვილის თქმით, ეს ყველაფერი გაზრდის ტურისტულ ნაკადებს და მეტ შემოსავალს მოიტანს საქართველოს ეკონომიკაში.

ინფორმაციას ეკონომიკის სამინისტრო ავრცელებს.

დამოუკიდებელი სასამართლოს ზეიმია ბათუმიდან, მგონი, ყველამ იცოდა ეს ამბავი და ყველამ იცოდა, რაც მოხდებოდა პროცესთან დაკავშირებით, ხმები რომ ექვსი/სამზე გაიყოფოდა, ეს ამბავიც ყველამ იცოდა, – ამის შესახებ „გირჩის“ ლიდერმა, იაგო ხვიჩიამ განაცხადა.

ხვიჩიას თქმით, „ქართულ ოცნებას“ აღარ უნდა პრეზიდენტის იმპიჩმენტის პროცესის ბოლომდე მიყვანა.

„მგონი, ჩვენ ახლა უკვე უნდა დავადგინოთ ის მიჯნა, რომლის მერეც ქართველი ხალხი ზოგადად ასეთ დაცინვას არ აიტანს. ზოგადად, მთელი პროცესი იყო ქართველი ხალხის დაცინვა, მათი ნერვებით და მოთმინებით თამაში. როგორც ვიცი, „ქართული ოცნება“ არ არის მონდომებული ამ თვალსაზრისით და ფულს არ ხარჯავს ჩვენ კოლეგა ოპოზიციონერებში. შესაბამისად, დავასკვენი არა ის, რომ მათ ფული არ აქვთ, არამედ ის რომ მათ არ უნდათ ამ პროცესის ბოლომდე მიყვანა. მათ უნდოდათ, რომ ქალბატონი სალომე გადაეგდოთ ოპოზიციის მხარეს და ამით მოებილიზებინათ ის ხმები, რომლებიც მათი ბოლო პერიოდის პოლიტიკის გამო პროდასავლური ხმები დაკარგეს. ეს იყო ჩემი აზრით, „ქართული ოცნების“ შიგნით ინიცირებული კონფლიქტი, რომელიც ბოლომდე არ მივა და ქალბატონი სალომეც დარჩება პრეზიდენტად, ჩემი რწმენით. უბრალოდ, ადამიანთა დიდი ნაწილი წარმოიდგენს, რომ ქალბატონი სალომე მართლა ოპოზიციონერია და რაღაცნაირად ჩათვლის, რომ მას აქვს არჩევანი პროდასავლურ „ქართულ ოცნებას“ და არაპროდასავლურ „ქართულ ოცნებას“ შორის. მგონი ეს თამაშია, რასაც ახლა ვუყურებთ და სინამდვილეში „ქართული ოცნებაც“ და სალომე ზურაბიშვილიც ერთ ძალას წარმოადგენენ. უბრალოდ, ეს არის შეურაცხმყოფელი თამაში საქართველოს მოსახლეობისთვის, როდესაც მას ატყუებენ, თითქოს მათ გუნდში რაღაც ხდება, რაღაც რომ ხდებოდეს „ქართულ ოცნებას“ ქალბატონი სალომეს გადაყენება არ გაუჭირდება, ოპოზიცია სიამოვნებით დაეხმარებოდა ცოტას ფინანსურად თუ წაეშველებოდნენ ამ პროცესში“, – განაცხადა ხვიჩიამ.

საკონსტიტუციო სასამართლომ საქართველოს პრეზიდენტის, სალომე ზურაბიშვილის მიერ კონსტიტუციის დარღვევა დაადგინა. აღნიშნულის შესახებ გადაწყვეტილება საკონსტიტუციო სასამართლოს სხდომათა დარბაზში გამოცხადდა.

„რუსული ოცნების“ შოუ გრძელდება, – ასე აფასებს „ერთიანი ნაციონალური მოძრაობის“ გენერალური მდივანი, პეტრე ცისკარიშვილი საკონსტიტუციო სასამართლოს გადაწყვეტილებას.

მისივე თქმით, საკონსტიტუციო სასამართლო, სადაც „ქართულმა ოცნებამ“ წარადგინა მოსამართლეები, „დიდწილად კონტროლდება ისევ ივანიშვილის რეჟიმის მხრიდან“.

„რუსული ოცნების“ შოუ გრძელდება. ჩვენ ყველამ ვნახეთ, რომ საკონსტიტუციო სასამართლო, სადაც „ოცნებამ“ წარადგინა მოსამართლეები, დიდწილად კონტროლდება ისევ ივანიშვილის რეჟიმის მხრიდან, ოღონდ სიტუაცია ერთგვარად ტრაგი-კომიკურია, თვითონ დააკომპლექტეს სასამართლო, თვითონ დაწერეს კონსტიტუცია, თვითონ აირჩიეს ასევე პრეზიდენტი ზურაბიშვილი, არ მოეწონათ მისი ვიზიტი ბრიუსელში და ამის გამო ცდილობენ, რომ მოახდინონ სალომე ზურაბიშვილის იმპიჩმენტი ამ თანამდებობიდან. ახლა ერთი წამით წარმოვიდგინოთ პრეზიდენტი რომ წასულიყო მოსკოვში ვიზიტით, ლავროვის მოწვევით, გაბედავდა კი „ოცნება“ თუ მასთან შეთანხმებული არ იქნებოდა ამ შემთხვევაში წამოეწყო იმპიჩმენტის პროცედურა? ეს შეკითხვა უნდა დავსვათ ჩვენ და გავცეთ პასუხი და შესაბამისად, ყველაფერი იქნება ნათელი არსებულ პოლიტიკურ ლანდშაფტში“, – განაცხადა პეტრე ცისკარიშვილმა.

საკონსტიტუციო სასამართლოს გადაწყვეტილება მოსალოდნელი იყო და ჩვენ ვამბობდით, რომ ექვსი მოსამართლე ჰყავდათ, რეალურად, საკონსტიტუციო სასამართლომ „ქართული ოცნების“ სასარგებლო გადაწყვეტილება მიიღო, კონსტიტუციური ნორმების განხილვაში არ შევიდა და ცალსახად პოლიტიკური გადაწყვეტილება მიიღო, – ამის შესახებ „ნაციონალური მოძრაობის“ წევრმა, ლევან ბეჟაშვილმა განაცხადა.

როგორც ბეჟაშვილმა განაცხადა, სამწუხაროა, რომ საკონსტიტუციო სასამართლომ დაადასტურა, რომ „კლანის“ წევრების მხრიდან იმართება და შანსი არ არის, რომ პრეზიდენტმა საგარეო მიმართულებით რაიმე ნაბიჯები გადადგას.

„მიუხედავად იმისა, რომ ხელისუფლებას პრეზიდენტის თანამდებობიდან გადაყენებისთვის ხმები არ აქვს, ისინი შეეცდებიან, პრეზიდენტის მანდატი საგარეო ურთიერთობებში შეზღუდოს. ყველა ოპოზიციონერს მოვუწოდებთ, კენჭისყრის პროცედურა დატოვონ, რათა მანიპულაციების საშუალება არ მიეცეს უმრავლესობას და ისინი ამ პოლიტიკურ ფარსში მარტო დავტოვოთ“, – განაცხადა ბეჟაშვილმა.

საკონსტიტუციო სასამართლომ საქართველოს პრეზიდენტის, სალომე ზურაბიშვილის მიერ კონსტიტუციის დარღვევა დაადგინა. აღნიშნულის შესახებ გადაწყვეტილება საკონსტიტუციო სასამართლოს სხდომათა დარბაზში გამოცხადდა.