რუსეთი ოთხი უკრაინელი ბავშვის ოჯახებში დაბრუნებას დასთანხმდა, – ინფორმაციას BBC-ი ავრცელებს.
გამოცემის ცნობით, ბავშვების დაბრუნებაზე შეთანხმება კატარის შუამავლობით მოხდა და რეპატრიაცია არის საპილოტე სქემის ნაწილი, რომელიც გასულ წელს რუსეთის უკრაინაში სრულმასშტაბიანი შეჭრის შემდეგ გატაცებული ათასობით ბავშვის დაბრუნებას ითვალისწინებს.
აღნიშნული ოთხი ბავშვიდან ყველაზე უმცროსი 2 წლისაა, უფროსი კი 17-ის.
უკრაინის ხელისუფლებაში აცხადებენ, რომ დადასტურებული მონაცემებით, რუსეთმა 20 000 ბავშვის იძულებითი და უკანონო დეპორტაცია განახორციელა, თუმცა დეპორტირებულთა რეალური რიცხვი გაცილებით მაღალია.
შეგახსენებთ, მარტში, სისხლის სამართლის საერთაშორისო სასამართლომ უკრაინელი ბავშვების უკანონო დეპორტაციასთან დაკავშირებით რუსეთის პრეზიდენტის, ვლადიმერ პუტინის დაპატიმრების ორდერი გასცა.
