კრემლის დავალებები, რომელიც წინა წელს ჩაგივარდათ, არ გაგივათ! – “რუსული კანონი” არ გავა, ისევე როგორც ვერ დარჩება “ქართული ოცნება” ხელისუფლებაში – არ გაგატანთ საქართველოს რუსეთში, – ამის შესახებ “ლელოს” ლიდერმა, მამუკა ხაზარაძემ ბრიფინგზე განაცხადა, რითაც საპარლამენტო უმრავლესობის მიერ „უცხოური გავლენის გამჭვირვალობის შესახებ“ კანონპროექტს პარლამენტში კვლავ დაინიცირებას გამოეხმაურა.

მისივე თქმით, ბიძინა ივანიშვილმა “რუსული კანონის” შესახებ ერთი წლის წინ ჩავარდნილი ოპერაციის თავიდან გაცოცხლების დავალება კრემლიდან მიიღო, რადგან ევროკავშირის გაწევრიანების შესახებ მოლაპარაკებების დაწყებას ხელი შეეშალოს.

“ქართულმა ოცნებამ” და პირადად ბიძინა ივანიშვილმა კიდევ ერთი დავალება მიიღო. ერთი წლის წინ ჩავარდნილი ოპერაცია “რუსული კანონის” შესახებ თავიდან გააცოცხლა. დავალება მიიღო პირდაპირ კრემლისგან, რადგან ახლა უფრო დიდ მიზანს შეუშალოს ხელი რასაც ჰქვია მოლაპარაკებების დაწყება ევროკავშირში.

მე მინდა, მივმართო ბიძინა ივანიშვილს, გამოვიდეს, როგორც ე.წ. საპატიო თავმჯდომარე პარტიის და ქართველ ხალხს უთხრას, თუ რასთან გვაქვს საქმე. გამოვიდეს და თქვას, საიდან ფინანსდება მისი პარტია, ბიძინა ივანიშვილი, რომელიც არის ერთ-ერთი მსხვილი აქციონერი რუსული კომპანიების და აქ გამოდის და ლაპარაკობს ევროპიდან შემოსული თანხების წარმომავლობაზე. ევროპიდან შემოსული თანხები არის გამჭვირვალე და არანაირი კანონი არ სჭირდება იმას, რომ საგადასახადო ინსპექციამ, ფულის მონიტორინგის სამსახურმა და უამრავმა მაკონტროლებელმა ამოიღოს ინფორმაცია, თუ საიდან შემოდის ევროპიდან ფული და რომელ ორგანიზაციაში შედის. ამას არ სჭირდება კანონი, უბრალოდ, “ქართულ ოცნებას” სჭირდება ეს კანონი, რომ გააკონტროლოს თავისუფალი აზრი, გააკონტროლოს არჩევნები და დაბლოკოს ევროპული პერსპექტივა.

მე მინდა, ბიძინა ივანიშვილს ვუთხრა, რომ არ გაგატანთ საქართველოს რუსეთში. ეს ძალიან კარგად დაიმახსოვრე ჩემგან და ჩემი მეგობრებისგან. ქართველი ხალხის გზავნილს გიგზავნი. არ გაგატან. მთელი შენი ეს ტრიუკები არის მოძველებული და უბრალოდ, მოძველებული კი არ არის, ჭაობისკენ მიმავალია. შენ არ ემსახურები ქართველ ხალხს. შენ არ ემსახურები ქართველი ხალხის ინტერესს, შენ დაცალე ეს ქვეყანა, შენ უმუშევრობის ჭაობში ჩააგდე ეს ქვეყანა, შენ არ იხდი გადასახადებს ამ ქვეყანაში, შენ არ შემოგაქვს ინვესტიცია ამ ქვეყანაში, შენ გინდა მხოლოდ ერთი რამ და ეს არის ის, რომ შენ იყო უსაფრთხოდ ზღვის სანაპიროზე მოკალათებული და შენმა გარემოცვამ აკეთოს ფული ქართველი ხალხის ხარჯზე. ეს კანონი და ყველა ის ტრიუკი, რომელიც აქამდე გაქვს ჩატარებული, არ გაგივა, იმიტომ, რომ ამ ქვეყნის პერსპექტივა არის თავისუფალი სამყარო,” – განაცხადა ხაზარაძემ.

მაგრად „გამისწორდებოდა“ უმრავლესობა ქალები რომ იყოთ [პოლიტიკაში]. ბევრად უფრო სასიამოვნოდ გავატარებდი დროს საპირისპირო სქესის ადამიანებთან, მაგრამ არ არის, რა ვქნა? ძალით ხომ არ მოვიყვანთ?! ჩემი სიამოვნებისთვის ძალით რომ შემეძლოს ქალების მოყვანა, ხომ სხვა სახელს დამარქმევდით? ჩემი სიამოვნებისთვის ჰარემს ხომ არ გავაკეთებ? – ამის შესახებ „გირჩის“ დეპუტატმა ვახტანგ მეგრელიშვილმა პარლამენტის პლენარულ სხდომაზე განაცხადა, სადაც გენდერული კვოტირების გაუქმების შესახებ კანონპროექტს განიხილავენ.

მეგრელიშვილის თქმით, ქალებს პოლიტიკა ნაკლებად აინტერესებთ და არაა გამორიცხული, რომ საქართველოს შემთხვევაში, სადაც „პოლიტიკოსების მიმართ ხშირად უსამართლო დამოკიდებულებაა“, ქალებს კიდევ უფრო ნაკლებად უნდოდეთ ამ სფეროში მონაწილეობა.

„მიუხედავად იმისა, რომ უფლებრივად სრულიად თანასწორები უნდა ვიყოთ ადამიანები, მიუხედავად ჩვენი სქესისა, რელიგიური რწმენისა ან სექსუალური ორიენტაციის, ფაქტია, ობიექტური მოცემულობაა, რომ განსხვავებული ინტერესები გვაქვს. სადღაც ვიკვეთებით – ქალებშიც ჩნდებიან ადამიანები, რომელთაც მამაკაცური ტიპის თამაშები უყვართ და კაცებშიც არიან ადამიანები, ვისაც ქალური ტიპის თამაშები უყვართ, მაგრამ ცხადია, რომ ჭაბურღილებზე, თითქმის 100% კაცები მუშაობენ, ისევე როგორც საბავშვო ბაღებში დიდი პროცენტი ქალები არიან. ცნობილია, რომ ქალებს უყვართ ადამიანებთან ურთიერთობასთან დაკავშირებული პროფესიები და კაცები არიან წარმოდგენილები იმ პროფესიებში, რომელსაც კავშირი აქვს მექანიკურ რაღაცებთან – მანქანა იქნება ეს, მშენებლობა თუ ა.შ.

ჩემო ძვირფასო ანა [წითლიძე], მაგრად „გამისწორდებოდა“ უმრავლესობა ქალები რომ იყოთ [პოლიტიკაში]. მე, როგორც ამ პროფესიით მოხიბლული ადამიანი, ბევრად უფრო სასიამოვნოდ გავატარებდი დროს საპირისპირო სქესის ადამიანებთან, მაგრამ არ არის, რა ვქნა? ძალით ხომ არ მოვიყვანთ?! ჩემი სიამოვნებისთვის ძალით რომ შემეძლოს ქალების მოყვანა ხომ სხვა სახელს დამარქმევდით? ჩემი სიამოვნებისთვის ჰარემს ხომ არ გავაკეთებ? იმის თქმა მინდა, რომ ქალებს პოლიტიკა მართლა ნაკლებად აინტერესებთ, ვიდრე კაცებს. არ გამოვრიცხავ, რომ საქართველოს შემთხვევაში, სადაც საკმაოდ დაძაბული, ნევროზული, ხშირად უსამართლო დამოკიდებულებაა პოლიტიკოსების მიმართ, ქალებს კიდევ უფრო ნაკლებად უნდოდეთ ამ სფეროში მონაწილეობა. თანასწორობასა და პრივილეგიას შორის არაფერი კავშირი არ არსებობს. ლინგვისტურ დონეზე, ორი სხვადასხვა რამეა. თუ თანასწორობას ვითხოვთ, უფლებრივ თანასწორობას ვითხოვთ და არა შედეგების შესაბამისად თანასწორობას იმიტომ, რომ ისევ იქ მივდივართ, რომ შედეგების შესაბამისად თანასწორობა არის კომუნიზმი. ანუ, კომუნიზმი არის სისტემა, რომელსაც მიზნად აქვს დასახული, ადამიანები გაათანაბროს შედეგების მიხედვით“, – განაცხადა ვახტანგ მეგრელიშვილმა.

„თბილისი პრაიდი“ გამჭვირვალობის კანონს რუსულ კანონს უწოდებს. ამის შესახებ „თბილისი პრაიდი“ „ფეისქბუქის“ გვერდზე წერს.

„ქართული ოცნება რუსულ კანონს ხელახლა აინიცირებს! “საპარლამენტო უმრავლესობამ პოლიტსაბჭოსთან კონსულტაციით მიიღო გადაწყვეტილება, პარლამენტში ხელახლა წარადგინოს კანონპროექტი უცხოური გავლენის გამჭვირვალობის შესახებ” – მამუკა მდინარაძემ ბრიფინგზე გამოაცხადა. ქართულმა ოცნებამ 2023 წლის მარტში უკვე სცადა და ვერ შეძლო რუსული კანონის მიღება“, – წერს „თბილისი პრაიდი“.

საპარლამენტო უმრავლესობამ მიიღო გადაწყვეტილება „უცხოური გავლენის გამჭვირვალობის შესახებ“ კანონპროექტი პარლამენტში ხელახლა წარადგინოს.

ბედნიერება რომ ვიპოვოთ ამ ქვეყანაში, „ქართული ოცნება“ აღარ უნდა იყოს ხელისუფლებაში, დღეს „ქართული ოცნება“ აღარ არის მხოლოდ საფრთხე ქართული დემოკრატიისთვის, ის არის ქართული სახელმწიფოებრიობისთვის საფრთხის შემცველი ძალა, – ამის შესახებ პარტია „ახალის“ წევრმა, ნიკა გვარამიამ განაცხადა.

მისი თქმით, პარტია „ახალი“ გააკეთებს ყველაფერს, რომ საქართველო გახდეს ევროკავშირის წევრი.

„მიუხედავად ყველაფრისა, ჩვენი პარტია „ახალი“ გააკეთებს ყველაფერს, რომ საქართველო გახდეს ევროკავშირის წევრი. ეს არის ჩვენი შექმნის მთავარი საფუძველი. ის, რომ ქართველი ხალხი შევიყვანოთ მის ისტორიულ ოჯახში, ევროკავშირში. დაჩქარებული წესით ეს კანონპროექტი არ მიიღებაო გვითხრეს დღეს უმრავლესობის წევრებმა. ეს არის ხაფანგი. კანონი არ მიიღება დაჩქარებული წესით მხოლოდ იმის გამო, რომ ივნისში იგეგმება მისი მიღება, ევროპის ჩემპიონატის განმავლობაში, რომ არ იყოს პროტესტები ამ დროს და ხალხს უბრალოდ არ ეცალოს პროტესტის გამოსახატავად“, – განაცხადა გვარამიამ.

ნიკა გვარამიას თქმით, მოქალაქეებმა უნდა დაიცვან ევროპული პერსპექტივა.

„მე სრულიად დარწმუნებული ვარ, რომ ჩვენ შევძლებთ ვუგულშემატკივროთ ჩვენს ნაკრებს ევროპულ ოჯახში და ასევე შევძლებთ, რომ დავიცვათ ჩვენი ევროპული პერსპექტივა ჩვენს ქვეყანაში, ჩვენს ქუჩებში თუნდაც გამოხატვის კონსტიტუციური ფორმებით, დაწესებულებებში და ნებისმიერ ადგილას, სადაც ჩვენ ეს შეგვიძლია. მივმართავ ქართულ საზოგადოებას, ამ ადამიანების, „ქართული ოცნების“ წარმომადგენლების სიტყვას აქვს ჩალის ფასი. ნუ ენდობით მათ ნურც ერთ შემთხვევაში, რადგან ოლიგარქია, ტირანია მხოლოდ დროებით იხევს უკან. ნებისმიერ შემთხვევაში ის არის თავისუფლების მტერი და თავის მიზანს ყოველთვის განახორციელებს. მინდა, მივმართო ჩვენს დასავლელ პარტნიორებს, ნუ ენდობით „ქართულ ოცნებას“. „ქართული ოცნების“ სიტყვას აქვს ჩალის ფასი, რადგან ოლიგარქია და ტირანია იხევს მხოლოდ დროებით და იგი არ თმობს თავისუფლებას, არ გვაძლევს თავისუფლებას. ის მას მაინც წაგვართმევს, თუ ჩვენ ამის წინააღმდეგი არ ვიქნებით და თუ თქვენ, ძვირფასო დასავლელო მეგობრებო, ბოლომდე არ მიიყვანთ ქართველ ხალხთან ჩვენს საერთო ცივილიზაციურ ბრძოლას. ნუ დავთმობთ საქართველოს, ნუ დაუთმობთ „ქართულ ოცნებას“. კვლავ ვიმეორებ, „ქართული ოცნების“ სიტყვას აქვს ჩალის ფასი. იგი ასე იქცევა, რადგან ის არის რუსული რეჟიმი და რუსეთი ყველგან და ყოველთვის იქცევა ასე. ბრძოლა უნდა მივიყვანოთ ბოლომდე. „ქართული ოცნება“ უნდა შეიცვალოს. სხვა გამოსავალი უბრალოდ არ არსებობს. თუ ჩვენ გვინდა, ცივილიზაციის წევრები ვიყოთ, თუ ჩვენ გვინდა თავისუფლება, თუ ჩვენ გვინდა ბედნიერება, ჩვენ უნდა მოვიქცეთ მხოლოდ ასე და ჩვენი პარტიის მიზანი არის ქართველი ერის გაძღოლა წინ, ევროკავშირისკენ და ჩვენ ამას შევძლებთ, ამაში ვართ ღრმად დარწმუნებული“, – განაცხადა გვარამიამ.

პარტია „ხალხის ძალის“ წევრის გურამ მაჭარაშვილის განცხადებით, უცხოური დაფინანსების გამჭვირვალობასთან დაკავშირებით, „ქართული ოცნების“ საკანონმდებლო ინიციატივა უსაფრთხოების ზომებს არის მორგებული.

მაჭარაშვილის განმარტებით, ბოლო ერთი წლის განმავლობაში მსგავსი კანონი მიიღეს ევროპარლამენტში, კანადაში, საფრანგეთში.

„მოტივად დაასახელეს, რომ მათ ქვეყანაში საჭიროა უსაფრთხოების დაცვა, რათა უცხოურმა ძალებმა ისე არ გადარიცხონ თანხები, რომ არ გაკონტროლდეს, ფინანსები სად მიდის. გვაქვს მარტივი კითხვა – თუ ეს უსაფრთხოება საჭიროა ამერიკისთვის, ევროპარლამენტისთვის, საფრანგეთისთვის, რატომ არ არის საჭირო საქართველოსთვის? ეს კანონი მორგებულია ზუსტად უსაფრთხოების ზომებს. არასამთავრობო თუ ხარ და თან გამჭვირვალე, მაშინ საქმიანობისთვის პრობლემა არ გაქვს. თუ გაუმჭვირვალე ხარ და თანხებს არ ასაჯაროებ, „მოლოტოვის კოქტეილებს“ ყიდულობ, ამ შემთხვევაში არ უნდა დარეგისტრირდეს. ვინც ამ ცვლილებებს აპროტესტებდა, ისინი დღეს სხვა შეხედულების არიან, რადგან კანონპროექტი წაიკითხეს და ნახეს, რომ მაშინდელი პროტესტი უსაფუძვლო იყო“, – განუცხადა გურამ მაჭარაშვილმა საქართველოს პირველ არხს.

„ქართული ოცნება“ უცხოური გავლენის გამჭვირვალობის შესახებ კანონპროექტს ხელახლა წარადგენს. საპარლამენტო უმრავლესობის ლიდერმა, მამუკა მდინარაძემ „ქართული ოცნების“ ცენტრალურ ოფისში გამართულ ბრიფინგზე განაცხადა, რომ კანონპროექტი პარლამენტში დაინიცირდება ზუსტად იმავე ტექსტით, როგორც შარშან იყო დაინიცირებული, ერთადერთი განსხვავებით – კანონპროექტში ტერმინი „უცხოური აგენტი“ შეიცვლება და წარდგენილი იქნება შემდეგი ვარიანტი: „უცხოური ძალის ინტერესების გამტარებელი ორგანიზაცია“.

ამ უსამშობლოებმა და ხელმოცარულებმა საზოგადოება შეცდომაში რომ არ შეიყვანონ, კიდევ ერთხელ ვაკონკრეტებ, ცვლილებები არ ეხება არც ერთი სტუდენტის დაფინანსებას, არც ერთ სოფლის მეურნეობაში ჩართულ პროგრამას, არც შშმ პირებს, არც ერთ ფიზიკურ პირს, – ამის შესახებ „ქართული ოცნების“ წევრმა, ირაკლი ზარქუამ განაცხადა.

მისი თქმით, ეს ეხება მხოლოდ არასამთავრობო ორგანიზაციებს, რომლის დაფინანსება 20%-ზე მეტია უცხოური ფონდებიდან.

„ერთადერთი მოთხოვნა გვაქვს, რომ დეკლარირება მოახდინონ იანვრის პირველ რიცხვში, ვინ დააფინანსა და რა მიზნით. საქართველოს ისეთი გეოგრაფიული მდებარეობა აქვს, რომ ყველა ქვეყნის ინტერესის სფეროშია – როგორც ჩრდილოეთიდან, სამხრეთიდან, აღმოსავლეთიდან, დასავლეთიდან, ყველა სახელმწიფოს თავისი ინტერესი აქვს. ჩვენ ჩვენი ქვეყნის ინტერესები უნდა დავიცვათ. სულ რამდენიმე ხნის წინ მცდელობა ჰქონდათ, რომ ომში ჩავეთრიეთ. მათ შორის იმ გლობალურ ომის პარტიას. დღემდე არ ისვენებენ. პირველ შემთხვევაში, როდესაც ეს გამოვიტანეთ, საზოგადოება, ახალგაზრდები არ ჩავაყენეთ საქმის კურსში და ასე ხისტად მოგვიწია, იმიტომ რომ პრობლემები იყო – ჩვენ ომში მიგვათრევდნენ, ამ არასამთავრობოების დახმარებით. ამის შემდეგ, რომ ვნახეთ რომ გარკვეულ პროვოკაციაზეც მიდიოდნენ, რომ სისხლი დაღვრილიყო, ჩვენ ვთქვით, რომ მოდი უკან დავიხიოთ, გადავდოთ, საზოგადოების ინფორმირება მოვახდინოთ კიდევ უფრო. იქნებ ეს პრობლემა არ დადგეს. მაგრამ რას ვხედავთ, წინა კვირას ისევ მილიონობით დოლარი იხარჯება, როგორც მედიაზე, ასევე არასამთავრობოებზე. ვიკითხეთ, რა მიზნით? – კაციშვილი ხსნას არ იღებს. ჩვენ ვხედავთ, როგორ მტრობენ ჩვენს ქვეყანას. ამიტომ, ამ კანონს ერთადერთი მიზანი აქვს – ის ვინც ფინანსდება, როგორც მედია, ასევე არასამთავრობო ორგანიზაცია 20%-ზე მეტად, დეკლარირება მოახდინონ. უბრალოდ ჩაწერონ ვინ დააფინანსა და რა მიზნით. პრობლემა რაშია?“, – განაცხადა ზარქუამ.

საპარლამენტო უმრავლესობის ლიდერმა, მამუკა მდინარაძემ „ქართული ოცნების“ ცენტრალურ ოფისში გამართულ ბრიფინგზე განაცხადა, რომ უცხოური დაფინანსების გამჭვირვალობასთან დაკავშირებით, „ქართული ოცნება“ საკანონმდებლო ინიციატივას წარადგენს.