“როდესაც მართლმსაჯულებასთან დაკავშირებით კონფერენციაზე იწვევენ ადამიანს, რომელიც მართლმსაჯულების ანტიპოდია, ეს ფარისევლობის ნიშნებს შეიცავს” – შალვა პაპუაშვილი ზურაბ ადეიშვილზე

15
spot_img

ევროკომისიამ კარგად იცოდა, ვის იწვევდა ამ კონფერენციაზე. როდესაც იწვევენ კონფერენციაზე მართლმსაჯულებასთან დაკავშირებით, ადამიანს, რომელიც არის ყველაფერი, გარდა მართლმსაჯულებისა, რომელიც არის ანტიპოდი მართლმსაჯულებისა, ეს არის ძალიან იმედგამაცრუებელი და შეიცავს ფარისევლობის ნიშნებს, – ამის შესახებ პარლამენტის თავმჯდომარემ შალვა პაპუაშვილმა ზურაბ ადეიშვილის ჰააგაში გამართულ კონფერენციაზე მიწვევასთან დაკავშირებით განაცხადა.

პაპუაშვილის თქმით, „მძიმე სურათია, როდესაც ჰააგაში, რომელიც მართლმსაჯულების დედაქალაქად ითვლება, ადამიანებთან ერთად, რომლებიც მართლმსაჯულებისა და კანონის უზენაესობის სფეროში მუშაობენ, ვხედავთ აღიარებულ კრიმინალს“.

„ძალიან მძიმეა ამ სურათის ნახვა, როდესაც ჰააგაში, რომელიც მართლმსაჯულების დედაქალაქად ითვლება, ადამიანებთან ერთად, რომლებიც მართლმსაჯულებისა და კანონის უზენაესობის სფეროში მუშაობენ, ვხედავთ აღიარებულ კრიმინალს, რომელსაც 5 სხვადასხვა საქმეზე მისჯილი აქვს ჯამში 18 წელი, ადამიანი, რომელმაც შექმნა წამების სისტემა საქართველოში, ადამიანი, რომლის დანაშაულებიდანაც ყველაზე გამოსაყოფია ის, რომ კობა დავითაშვილი გაატაცებინა, აცემინა და ადამიანი ამ ცემის გამო ლამის სიკვდილამდე მიიყვანეს და ჯანმრთელობა იმდენად შეერყა, რომ გავლენა ჰქონდა ბოლომდე მისი ცხოვრების ხარისხზე. ეს ადამიანი არათუ თავისუფლად გადაადგილდება, მას ხელს ართმევენ და ხვდებიან სხვადასხვა ქვეყნის წარმომადგენლები. ეს არის სწორედ ის ფარისევლობა, რომელიც სამწუხაროა ზოგიერთი წარმომადგენლის მხრიდან. ბრიუსელში შეხვედრების შემდეგ, მე მგონი, ყველამ გაიგო საბოლოდ ვინ არის ზურაბ ადეიშვილი, მიუხედავად ამისა, ის აღმოჩნდა ამ კონფერენციაზე. აქ ხაზგასასმელია ერთი საკითხი, ეს კონფერენცია ორგანიზებულია ჰოლანდიისა და უკრაინის მთავრობების მიერ ევროკომისიასთან ერთად. ევროკომისია არის ამ კონფერენციის თანაორგანიზატორი, მათ შორის, მართლმსაჯულების საკითხზე ევროკომისარი იყო მთავარი ფიგურა ამ კონფერენციაზე და გახსნითი სიტყვაც თქვა მან ანუ ევროკომისიის მოწვევით იყვნენ იქ წარმოდგენილი ადამიანები. ევროკომისიამ კარგად იცოდა, ვის იწვევდა ამ კონფერენციაზე და დარწმუნებული ვარ, განსაკუთრებით უსაფრთხოების გამოწვევებიდან გამომდინარე, მონაწილეთა სია კონტროლდება და უყურებენ ვინ არის მონაწილე. და როდესაც იქ ხედავენ ადამიანს, რომელიც არის აღიარებული კრიმინალი და ამ ადამიანს შემდეგ იწვევენ კონფერენციაზე მართლმსაჯულებასთან დაკავშირებით, ადამიანს, რომელიც არის ყველაფერი გარდა მართლმსაჯულებისა, რომელიც არის ანტიპოდი მართლმსაჯულებისა, ეს არის ძალიან იმედგამაცრუებელი და შეიცავს ფარისევლობის ნიშნებს“,- განაცხადა პაპუაშვილმა.