მოსკოვში, Crocus City Hall-ში თავდასხმის შედეგად დაღუპულთა რიცხვი 139-მდე გაიზარდა, მათგან 75-ი იდენტიფიცირებულია. დაღუპულთა შორის სამი ბავშვია. დაშავებულთა რაოდენობა კი 182-ს შეადგენს, – ამის შესახებ ცნობას რუსეთის საგამოძიებო კომიტეტი აქვეყნებს, რომელმაც კიდევ სამი ეჭვმიტანილის დაკავების განკარგულება გასცა.

მოსკოვის ოლქის ქალაქ კრასნოგორსკში Crocus City Hall-ის საკონცერტო დარბაზში შეიარაღებულმა პირებმა ცეცხლი 22 მარტს გახსნეს. თვითმხილველის განცხადებით, ინციდენტი ჯგუფ „პიკნიკის“ კონცერტის დაწყებამდე მოხდა – დარბაზის პარტერში სულ მცირე სამი შეიარაღებული პირი შეიჭრა და ავტომატებიდან ცეცხლი გახსნა. არსებული ინფორმაციით, თავდამსხმელებმა ასევე ააფეთქეს ხელყუმბარა, რის გამოც ხანძარი გაჩნდა.

ისრაელის საგარეო საქმეთა მინისტრმა, ისრაელ კაცმა განაცხადა, რომ ისრაელი არ შეწყვეტს ცეცხლს.

აღნიშნული განცხადება ისრაელის საგარეო უწყების ხელმძღვანელმა მას შემდეგ გააკეთა, რაც გაერო-ს უშიშროების საბჭომ მიიღო რეზოლუცია, რომელიც მოითხოვდა ცეცხლის დაუყოვნებლივ შეწყვეტას რამადანის თვეში, მძევლების დაუყოვნებლივ და უპირობო გათავისუფლებას და „გადაუდებელ აუცილებლობას, გაზარდოს ჰუმანიტარული დახმარების ნაკადი ღაზაში.

„ისრაელი გაანადგურებს „ჰამასს“ და გააგრძელებს ბრძოლას, ვიდრე უკანასკნელი მძევლები არ დაბრუნდებიან სახლში“, – წერს ისრაელ კაცი „ტვიტერზე”.

გაერო-ს უშიშრობის საბჭომ მიიღო რეზოლუცია, რომელიც ღაზის სექტორში ცეცხლის დაუყოვნებლივ შეწყვეტასა და მძევლების უპირობოდ გათავისუფლებას მოითხოვს. როგორც „ბიბისი“ წერს, აშშ-მა შეცვალა საკუთარი პოზიცია, თავი შეიკავა რეზოლუციის მხარდაჭერისგან, თუმცა დოკუმენტს ვეტო არ დაადო.

უკრაინის პრეზიდენტმა, ვოლოდიმირ ზელენსკიმ უარყო რუსეთის პრეზიდენტის, ვლადიმერ პუტინის ბრალდებები მოსკოვის რეგიონში მომხდარ ტერაქტში უკრაინის მონაწილეობის შესახებ.

ვოლოდიმირ ზელენსკის თქმით, პუტინისთვის ყველა ტერორისტია საკუთარი თავის გარდა.

„დღეს პუტინი ისევ საკუთარ თავს ესაუბრა და ამას ისევ ტელევიზიით აჩვენებდნენ. ისევ უკრაინას ადანაშაულებს. ავადმყოფი და ცინიკური არსებაა. ყველა ტერორისტია საკუთარი თავის გარდა, თუმცა ზუსტად ის არის, ვინც ტერორით იკვებება უკვე ორი ათწლეულის განმავლობაში. სწორედ ის არის ტერორის ყველაზე დიდი ფანჯარა. ის და მისი დაზვერვის სამსახური. ის როცა წავა, ტერორისა და ძალადობის მოთხოვნა მასთან ერთად გაქრება, რადგან ეს მისი მოთხოვნაა, სხვა არავისი”, – განაცხადა ზელენსკიმ.

უკრაინის პრეზიდენტმა მადლობა გადაუხადა ყველას, ვინც მუშაობს რუსული დარტყმების შედეგების აღმოსაფხვრელად და აღნიშნა, რომ ახლა ძალიან მნიშვნელოვანია ყურადღების მიქცევა მათთვის, ვისაც მხარდაჭერა სჭირდება. მისი თქმით, იმ შემთხვევაშიც თუ ადამიანები უხერხულად გრძნობენ თავს სხვებისთვის დახმარების თხოვნით, მათ უნდა მიაქციონ ყურადღება, მხარი დაუჭირონ და არ დატოვონ ადამიანები სირთულეებთან.

ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ არ გააგზავნის დელეგაციას ვაშინგტონში მას შემდეგ, რაც აშშ-მა ვეტო არ დაადო გაეროს უშიშროების საბჭოს რეზოლუციას, რომელიც ღაზაში ცეცხლის შეწყვეტას მოითხოვს.

„აშშ-ის პოზიციის ცვლილების ფონზე, ისრაელის პრემიერ-მინისტრმა, ბენიამინ ნეთანიაჰუმ გადაწყვიტა, რომ დელეგაცია არ გაემგზავრება აშშ-ში“, – განაცხადეს ნეთანიაჰუს ოფისში.

თეთრმა სახლმა უარყო, რომ აშშ-ის თავშეკავება ასახავს აშშ-ის პოლიტიკაში ცვლილებას.

„ეს იმედგაცრუებაა. ჩვენ ძალიან იმედგაცრუებულები ვართ, რომ ისინი არ ჩამოვლენ ვაშინგტონში, რათა შევძლოთ საუბარი მათთან რაფაჰში შესვლის ეფექტური ალტერნატივების შესახებ. არაფერი შეცვლილა ჩვენს შეხედულებებში, რომ რაფაჰზე შესაძლო სახმელეთო შეტევა დიდი შეცდომა იქნება“, – განაცხადა თეთრი სახლის ეროვნული უსაფრთხოების სპიკერმა, ჯონ კირბიმ.

გაერო-ს უშიშრობის საბჭომ მიიღო რეზოლუცია, რომელიც ღაზის სექტორში ცეცხლის დაუყოვნებლივ შეწყვეტას და მძევლების უპირობოდ გათავისუფლებას მოითხოვს. როგორც „ბიბისი“ წერს, აშშ-მა შეცვალა საკუთარი პოზიცია, თავი შეიკავა რეზოლუციის მხარდაჭერისგან, თუმცა დოკუმენტს ვეტო არ დაადო.

აშშ სხვადასხვა არხით ცდილობს, დაარწმუნოს თავისი თანამოაზრეები და მსოფლიოს სხვა ქვეყნები, რომ, მათი სადაზვერვო მონაცემებით, მოსკოვის ტერაქტში, სავარაუდოდ, არ არსებობს კიევის კვალი, – ამის შესახებ რუსეთის პრეზიდენტმა, ვლადიმერ პუტინმა განაცხადა, რომელმაც ვიდეოკონფერენციის საშუალებით მთავრობის, რეგიონების, სპეცსამსახურებისა და ძალოვანი სტრუქტურების ხელმძღვანელებთან შეხვედრა გამართა.

მისი თქმით, დანაშაული ჩაიდინეს რადიკალი ისლამისტების ხელით, თუმცა მოსკოვს აინტერესებს, ვინ არის დამკვეთი.

„ჩვენ ვიცით, რომ დანაშაული ჩაიდინეს რადიკალი ისლამისტების ხელით, რომელთა იდეოლოგიას თავად ისლამური სამყარო საუკუნეების განმავლობაში ებრძოდა, თუმცა ჩვენ ასევე ვხედავთ, რომ აშშ სხვადასხვა არხით ცდილობს, დაარწმუნოს თავისი თანამოაზრეები და მსოფლიოს სხვა ქვეყნები, რომ, მათი სადაზვერვო მონაცემებით, მოსკოვის ტერაქტში, სავარაუდოდ, არ არსებობს კიევის კვალი. ჩვენ ვიცით, ვისი ხელით ჩაიდინეს ეს სისასტიკე რუსეთისა და მისი ხალხის წინააღმდეგ. ჩვენ გვაინტერესებს, ვინ არის დამკვეთი. ჩვენს სადაზვერვო სამსახურებსა და სამართალდამცავ უწყებებს შორის ერთობლივი მუშაობისას აუცილებელია რიგ კითხვებზე პასუხის მიღება. მაგალითად: არიან თუ არა რეალურად დაინტერესებული რადიკალური და თუნდაც ტერორისტული ისლამური ორგანიზაციები რუსეთზე დარტყმით, რომლებიც დღეს ახლო აღმოსავლეთში კონფლიქტის ესკალაციის სამართლიანი გადაწყვეტის მომხრე არიან? და რადიკალი ისლამისტები, რომლებსაც, სხვათა შორის, მორწმუნე მუსლიმებად აფასებენ, როგორ ჩადიან სერიოზულ სისასტიკეს და დანაშაულს რამადანის წმინდა თვეში? ერთი რამ ცხადია: 22 მარტს რუსეთის დედაქალაქში ჩადენილი საშინელი დანაშაული, როგორც უკვე ვთქვი, არის დაშინების აქტი“, – განაცხადა პუტინმა.

რუსეთის პრეზიდენტის თქმით, ტერაქტი შეიძლება, გამოყენონ უკრაინაში იმის საჩვენებლად, რომ „ყველაფერი დაკარგული არ არის“ და წაახალისონ მობილიზაცია.

„მიზანი, როგორც უკვე ვთქვი, არის ჩვენს საზოგადოებაში პანიკის დათესვა და ამავდროულად, საკუთარი მოსახლეობისთვის ჩვენება, რომ კიევის რეჟიმისთვის ყველაფერი დაკარგული არ არის. თქვენ, უბრალოდ, უნდა შეასრულოთ თქვენი დასავლელი კურატორების ბრძანებები, იბრძოლოთ ბოლო უკრაინელამდე, დაემორჩილოთ ვაშინგტონის ბრძანებას და მიიღოთ ახალი კანონი მობილიზაციის შესახებ, მოიპოვოთ ახალი იარაღი და დამატებითი თანხა, რომლის მნიშვნელოვან ნაწილს მოიპარავთ და ჯიბეში ჩაიდებთ, როგორც ეს დღეს ჩვეულებრივად ხდება უკრაინაში. რა თქმა უნდა, პასუხი უნდა გავცეთ კითხვაზე: რატომ ცდილობდნენ ტერორისტები დანაშაულის ჩადენის შემდეგ უკრაინაში წასვლას, ვინ ელოდა მათ იქ? ნათელია, რომ მათ, ვინც კიევის რეჟიმს უჭერს მხარს, არ უნდათ, იყვნენ ტერორის თანამონაწილეები და ტერორიზმის დამფინანსებლები, მაგრამ მართლაც ბევრი კითხვაა“, – განაცხადა პუტინმა.