გულშემატკივრებს, რომლებიც საქართველო-საბერძნეთის მატჩის ბილეთების ყიდვას ვერ შეძლებენ, მატჩის ნახვა რესპუბლიკის მოედანზე, დიდ ეკრანზე შეეძლებათ.
თბილისის მერიამ რესპუბლიკის მოედანზე კვლავ მოაწყო სამი ეკრანი, რომელზეც ქომაგებს საშუალება ექნებათ პირდაპირ ეთერში იხილონ თამაში. საღამოს 19:00 საათიდან, მოწყობილ სცენაზე გაჟღერდება ელექტრონული მუსიკა, ადგილზე მოქალაქეებისთვის სხვადასხვა გასართობი სივრცეები და კვების ობიექტები იქნება. თამაშის ტრანსლირება ცენტრალურ და ორ დამატებით ეკრანზე 21:00 საათიდან დაიწყება.
გარდა ამისა, საზოგადოებრივი ტრანსპორტი ღამის 02:00 საათამდე იმუშავებს, რათა „დინამო არენაზე“ და პირველი რესპუბლიკის მოედანზე მოსულ გულშემატკივარს სახლში დაბრუნების შესაძლებლობა ჰქონდეს.
დღეს ეროვნული საფეხბურთო ნაკრები, ევრო 2024-ის საკვალიფიკაციო ეტაპის ფინალურ მატჩს თბილისში, საბერძნეთის ნაკრების წინააღმდეგ გამართავს.
