პირობა თუ იქნება, რომ ევროკავშირში მხოლოდ იმ შემთხვევაში მიგვიღებენ, თუ საზოგადოებას სიმართლე არ ეცოდინება და დასამალია ის, რაც გარკვეულ საფრთხეს წარმოადგენს მომწოდებლისგან, რადგან ქართულ პოლიტიკაში ფული შავი გზებით იხარჯება, მაშინ შეიძლება, ამ პარტნიორულ და მეგობრულ ურთიერთობას დავარქვათ „მეგობრობა ძალადობით“, – ამის შესახებ „ხალხის ძალის“ წევრმა, დიმიტრი ხუნდაძემ განაცხადა.

მისი შეფასებით, ეს მიუღებელია და სჯერა, რომ ჭეშმარიტი პარტნიორები საქართველოს გამჭვირვალობის შესახებ კანონის მიღებას არ აუკრძალავენ.

„ეს კანონი რუსული ვეღარ არის. გამჭვირვალობის შესახებ კანონპროექტის პირველი ინიცირებიდან ერთი წელი გავიდა და ოპოზიციას არცერთი კონკრეტული არგუმენტი არ აქვს. უფრო მეტიც, გამჭვირვალობის შესახებ კანონპროექტი თავად ევროკავშირმა დააინიცირა, ხოლო საფრანგეთმა ქვედა პალატის თანხმობით მიიღო. ეს კანონი თუ ევროკავშირში არის ამერიკულ-ბრიტანული, საქართველოში რატომ არის რუსული? აჟიოტაჟი ძირითადად ატეხილია არასამთავრობო სექტორიდან. ფაქტია, რომ ქართულ პოლიტიკაში მოქმედებს შავი ფული და ძირითადი გამტარი არის არასამთავრობო სექტორი. კანონის მოთხოვნა არის მხოლოდ ის, რომ საზოგადოებამ იცოდეს სიმართლე, უცხოური ფული დადეკლარირდეს და საზოგადოებისთვის იყოს ხელმისაწვდომი, საიდან შემოედინება, რა მიზნობრიობით, რისთვის იხარჯება და ვინ ხარჯავს მას.

არსებობს გარე ძალების მნიშვნელოვანი წარმომადგენლობა, რომლებიც აყენებენ პირობას, რომ საქართველო თუ ამ კანონს მიიღებს, ევროკავშირში ვერ შევა. იბადება კითხვა, თუკი თავად ევროკავშირში ასეთი კანონი არსებობს, მაშინ რატომ არ შეიძლება, ეს კანონი საქართველოს ჰქონდეს? პირობა თუ იქნება, რომ ევროკავშირში მხოლოდ იმ შემთხვევაში მიგვიღებენ, თუ საზოგადოებას სიმართლე არ ეცოდინება, სიმართლე არის დასამალი – დასამალი კი არის ის, რაც გარკვეულ საფრთხეს წარმოადგენს მომწოდებლისგან, რადგან ქართულ პოლიტიკაში ფული შავი გზებით იხარჯება – მაშინ შეიძლება, ამ პარტნიორულ და მეგობრულ ურთიერთობას დავარქვათ „მეგობრობა ძალადობით“. ეს, მინიმუმ, მიუღებელია. მჯერა, რომ ქვეყნის გარეთ ჭეშმარიტი პარტნიორები ჭეშმარიტი დასავლური ურთიერთობებით საქართველოს გამჭვირვალობის შესახებ კანონის მიღებას არ აუკრძალავენ. თავად ევროკავშირში დგას საკითხი, რომ საჭიროა ამდაგვარი კანონის მიღება. გარე დაფინანსების თაობაზე ცოდნა საზოგადოებისთვის საჭიროა, რადგან „მოლოტოვის კოქტეილების“ სროლის მოწოდების დაფინანსება გარედან ხდება და საზოგადოება მასში არ უნდა ჩაერთოს“, – განაცხადა ხუნდაძემ.

კანონპროექტის ხელახალი ინიცირების მიზანი ევროკავშირისკენ სვლის დაბრკოლებაა, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მისი თქმით, უნდა დავფიქრდეთ, ვისია კანონი, რომელიც მოსწონს მხოლოდ პესკოვს და სხვას არავის.

„ვისაც რეალობის დანახვა უნდა, საკითხი მარტივია, ხელისუფლებას კანონპროექტის პარლამენტიდან გაწვევისკენ მოუწოდებს გაერო, კანონის მიღების მცდელობას ეწინააღმდეგება ნატო-ს გენერალური მდივანი, ევროპის საბჭოს გენერალური მდივანი. არავინ აღარ დარჩა. მართლა მამა ღმერთი ხომ არ დარეკავს? კანონი მოსწონს პესკოვს. დავფიქრდეთ, ვისია კანონი, რომელიც მოსწონს მხოლოდ პესკოვს და სხვას არავის. ის, ვინც საფრანგეთს ახსენებს, ფრანგული კანონი ან წაკითხული არ აქვს, ან მოსახლეობა შეცდომაში შეჰყავს. ფრანგული კანონპროექტის განხილვა ოთხი წლის განმავლობაში მიმდინარეობდა და საფრანგეთი შეთანხმდა, რომ ტერორიზმთან დაკავშირებით თვალთვალისა და მიყურადების ალგორითმი შეიცვალა. ამ კანონის მიხედვით, მეგობარი და მტერი სახელმწიფოები განისაზღვრა, რეგულაციები მეგობარ სახელმწიფოებზე არ ვრცელდება.

ველოდები, შალვა პაპუაშვილი როდის გამოვა და როდის ამხელს ნატო-ს გენერალურ მდივანს, ევროპის საბჭოს გენერალურ მდივანს და გაერო-ს საქართველოს წინააღმდეგ მტრულ ქმედებებში. კანონპროექტის ხელახალი ინიცირების მიზანი ევროკავშირისკენ სვლის დაბრკოლებაა, რადგან „ქართული ოცნებისთვის“ საქართველო ბოსტანია და საძოვარია, ამიტომ ბევრი ევროპა არ უნდა. გაკვირვებული ვარ, რა გამჭვირვალობას ითხოვს ის ხალხი, ვისაც ირაკლი ღარიბაშვილის გამჭვირვალობა ვერ ჩაუტარებია? იმ ადამიანის გამჭვირვალობა, რომელიც ამბობდა, რომ ნაჩუქარი ათასი დოლარით ისწავლა და დღეს ამბობს, რომ მამამისი მილიონერია. „ქართული ოცნების“ რომელი წევრი დაინტერესდა ირაკლი ღარიბაშვილის ქონების გამჭვირვალობით? ამ კითხვას უნდა უპასუხოს ცრუპენტელა, გადამგდებმა, ცრუ და თაღლითმა „ქართულმა ოცნებამ“, – განაცხადა მანჯგალაძემ.

„უცხოური გავლენის გამჭვირვალობის შესახებ“ საკანონმდებლო ინიციატივა პარლამენტში უკვე დაინიცირდა. ცვლილებები მომავალი კვირის ორშაბათს ბიუროს სხდომას წარედგინება, რის შემდეგაც მასზე მსჯელობა დაიწყება. „ქართულ ოცნებაში“ განმარტეს, რომ კანონპროექტი პარლამენტში დაინიცირდა ზუსტად იმავე ტექსტით, როგორც შარშან იყო დაინიცირებული, ერთადერთი განსხვავებით – კანონპროექტში ტერმინი „უცხოური აგენტი“ შეიცვალა და წარდგენილია შემდეგი ვარიანტი: „უცხოური ძალის ინტერესების გამტარებელი ორგანიზაცია“.

პასუხი უნდა გაეცეს, როგორ ფინანსდება საქართველოში რადიკალური ჯგუფები, როგორ ფინანსდება „მოლოტოვის კოქტეილის“ რომანტიზება ამერიკელი ხალხის ფულით, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

როგორც პაპუაშვილმა აღნიშნა, გაუგებარია რატომ მიედინება ამერიკის მოქალაქეების ფული უცხო ქვეყანაში „მოლოტოვის კოქტეილის“ იდეის პოპულარიზაციისკენ. ეს არ არის კეთილსინდისიერი ქცევა.

„კამპანია „მე ვისროლე“ დაფინანსებული არის ამერიკის ბიუჯეტიდან, რომელსაც ამტკიცებს კონგრესი. ამიტომ, ვფიქრობ, კითხვები ჩვენ კი არ უნდა დაგვისვან, არამედ კითხვები უნდა დაუსვან NED-ს და მოიკითხონ, ამერიკის გადასახადის გადამხდელების, ამერიკის მოქალაქეების ფული რატომ მიედინება უცხო ქვეყანაში „მოლოტოვის კოქტეილის“ იდეის პოპულარიზაციისკენ. ვფიქრობ, ეს უფრო სწორი საქციელი იქნებოდა. იქნებ დაინტერესდნენ, რატომ და როგორ აფინანსებენ ამერიკული ფონდებიდან საქართველოში პარტიებს, რადიკალურ და ექსტრემისტულ ჯგუფებს? არის თუ არა ეს ამერიკელი ხალხის ინტერესებში? უპირველეს ყოვლისა, ამერიკელი ხალხის ინტერესებს ეწინააღმდეგება, როცა სტრატეგიულ პარტნიორ ქვეყანაში, რომელიც შენს ჯარისკაცებთან ერთად მხარდამხარ იდგა ავღანეთში – და ჩვენ დავკარგეთ უფრო მეტი ჯარისკაცი ავღანეთში, ვიდრე ევროკავშირის ბევრ ქვეყანას საერთოდ იქ ჯარისკაცი ჰყავდა – შენი ბიუჯეტიდან რომელიღაც ორგანიზაცია „მოლოტოვის კოქტეილის“ რომანტიზებაში ხარჯავს ფულს. არის თუ არა ეს კეთილსინდისიერი საქციელი? რა თქმა უნდა, ეს არ არის კეთილსინდისიერი ქცევა და ამაზე ჩვენ გვინდა პასუხები, ეს არ არის ჩავლილი საკითხი. პასუხი უნდა გაეცეს, როგორ ფინანსდებიან საქართველოში რადიკალური ჯგუფები, როგორ ფინანსდება „მოლოტოვის კოქტეილის“ რომანტიზება ამერიკელი ხალხის ფულით,” – განაცხადა პაპუაშვილმა.

მისი განცხადებით, პლაკატი – მე ვესროლე, არის ორგანიზაცია „სირცხვილიას“ მიერ წარმოებული კამპანიის ნაწილი და ვინც ამ კამპანიებს აფინანსებს, გაუგებარია მათ რამე კარგი უნდოდეთ ქართველი ხალხისთვის.

„დღეს ვნახე NED-ის ხელმძღვანელობის გამოხმაურება, როგორ არ მიესალმება გამჭვირვალობის შესახებ კანონპროექტს და ამბობს, თითქოს მათი დაფინანსება მხოლოდ ქართველი ხალხის ინტერესებისთვის არის. პლაკატი – მე ვესროლე, არის ორგანიზაცია „სირცხვილიას“ მიერ წარმოებული კამპანიის ნაწილი. „მოლოტოვის კოქტეილი“ შარშან, საქართველოს დამოუკიდებლობის ისტორიაში პირველად ესროლეს ქართველ ხალხს და ცოცხლად წვავდნენ პოლიციელს. ორგანიზაცია „სირცხვილია“, „ნაციონალური მოძრაობის“ ახალგაზრდულ ფრთასთან ერთად, არის რადიკალური ჯგუფი და მას ჰქონდა კამპანია – მე ვესროლე. აი, ეს კამპანია ფინანსდებოდა ამერიკელი და ევროპელი მოქალაქეების ფულით. იმას, ვინც ამას აფინანსებს, რამე კარგი უნდა ქართველი ხალხისთვის? არ უნდა გვითხრას, რას აფინანსებს და რისთვის ამ ქვეყანაში?“ – განაცხადა შალვა პაპუაშვილმა.

საბოლოო ჯამში, კოლექტიური ბექა ოდიშარიების არსებობა ხელისუფლებაში, პრინციპში, ცუდი საერთოდ არ არის იმიტომ, რომ ბექა ოდიშარია არის დღევანდელი „ოცნების“ სახე – უღირსიც აღარ ჰქვია, სიტყვას ვერ ვპოულობ, რომლითაც შეიძლება ბექა ოდიშარიას საქციელი აღვწეროთ, – ამის შესახებ პარტია „საქართველოსთვის” დეპუტატმა, ანა ბუჩუკურმა ჟურნალისტებთან საუბრისას განაცხადა.

მისივე თქმით, „ქართული ოცნების“ დეპუტატი ბექა ოდიშარია 2012 წელს “ერთიან ნაციონალურ მოძრაობას“ აფინანსებდა, დღეს კი “ოცნების” სახეა.

„ბექა ოდიშარია არის ის ადამიანი, რომელმაც გადამწყვეტი პოლიტიკური ბრძოლის დროს, 2012 წელს, აფინანსებდა „ნაცმოძრაობას“ და დღეს არის „ოცნების“ სახე. ეს არის ის ადამიანი, რომელიც 2012-ში „ოცნების” წინააღმდეგ იბრძოდა და დღეს არის „ოცნების“ სახე. უღირსიც აღარ ჰქვია, ვერ ვპოულობ სიტყვას, რომლითაც შეიძლება აღვწეროთ მისი საქციელი“, – განაცხადა ბუჩუკურმა.

ცნობისთვის, პარლამენტის პლენარულ სხდომაზე, ბექა ოდიშარიამ შეურაცხმყოფელი რეპლიკა მაშინ გამოიყენა, როცა პარლამენტის ტრიბუნიდან გენდერული კვოტირების გაუქმების კრიტიკით „ლელოს“ დეპუტატი ანა ნაცვლიშვილი გამოდიოდა.

სახელმწიფოები ზრუნავენ იმაზე, რომ სხვა სახელმწიფო თუ მოქმედებს ქვეყნის შიგნით, აფინანსებს რაღაც ღონისძიებებს, ეს იყოს გამჭვირვალე, რათა ვიცოდეთ, რომელი სახელმწიფო დგას ამა თუ იმ პროექტის, პოლიტიკის უკან, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

როგორც შალვა პაპუაშვილმა აღნიშნა, ბევრ ქვეყანაში არსებობს სხვადასხვა სახის კანონმდებლობა, რომელიც აწესრიგებს გამჭვირვალობას ამ სფეროში.

მისი თქმით, გარკვეული სახის გავლენები უნდა იყოს ღია და არა ფარული.

„სინამდვილეში, საუბარი გვაქვს მარტივ ჭეშმარიტებაზე, რომ ჩვენ ვართ სახელმწიფო, რომელსაც აქვს საკუთარი ინტერესები. ჩვენ მიღმა კიდევ არსებობს 200-მდე სახელმწიფო, ყველას თავისი ინტერესები აქვს და ხანდახან ჩვენს ინტერესებს სხვების ინტერესები არ ემთხვევა. ამიტომ, სახელმწიფოები ზრუნავენ იმაზე, რომ სხვა სახელმწიფო თუ შემოდის ქვეყნის შიგნით, მოქმედებს ქვეყნის შიგნით, აფინანსებს რაღაც ღონისძიებებს, ეს იყოს გამჭვირვალე, რათა ვიცოდეთ, რომელი სახელმწიფო დგას ამა თუ იმ ღონისძიების, პროექტის, იდეის, პოლიტიკის უკან. ეს იცოდეს საზოგადოებამ და იცოდეს სახელმწიფომ. სწორედ ამიტომ, ბევრ ქვეყანაში არსებობს სხვადასხვა სახის კანონმდებლობა, რომელიც აწესრიგებს გამჭვირვალობას ამ სფეროში. ევროკავშირის წევრ 16 ქვეყანაში არის სხვადასხვა ტიპის გამჭვირვალობის რეესტრი. ზოგან ამას ლობისტების რეესტრი ჰქვია, ზოგან -გამჭვირვალობის რეესტრი და სხვა სახელწოდებებია. დიდ ბრიტანეთში, საფრანგეთში ახლა დამატებითი რეგულაციები მიიღეს. ამერიკის შეერთებული შტატები, ავსტრალია, ისრაელი – განსაკუთრებით თანამედროვე ეპოქაში ყველა სახელმწიფო ცდილობს, რომ ამ სფეროში იყოს გამჭვირვალობა. წავიკითხავ ევროკავშირის დირექტივიდან ამონარიდს, რომელიც უკვე დამტკიცებულია ევროკომისიის მიერ და პარლამენტში განიხილება, რას ეფუძნება საერთოდ ეს მოსაზრება, რას ფიქრობს ევროკავშირი და შემდეგ დავფიქრდეთ, საქართველოს მოქალაქეები ვართ თუ არა ღირსი, ისეთივე წუხილები გვქონდეს, როგორიც აქვთ ევროპელ მოქალაქეებს. კერძოდ, დასაბუთებაში წერია: „ოფიციალურ დიპლომატიურ არხებთან ერთად, მესამე ქვეყნების მთავრობები სულ უფრო ხშირად იყენებენ ინტერესთა წარმომადგენლობას, რათა ხელი შეუწყონ თავიანთი პოლიტიკით დადგენილი მიზნების შესრულებას. ეს ვითარება წევრი სახელმწიფოების მიერ აღიარებულია, როგორც შესაძლებლობა მესამე ქვეყნებისთვის, თავი აარიდონ გამჭვირვალობის მოთხოვნებს და ფარულად მოახდინონ გავლენა გადაწყვეტილების მიღებასა და დემოკრატიულ პროცესზე. მესამე ქვეყნების ინტერესების წარმოდგენა, როდესაც ის ფარულად ხორციელდება, ევროკავშირის წევრი ქვეყნების დემოკრატიაში ჩარევის საშუალებად განიხილება. საზოგადოებრივი აზრის ფორმირებით ამან შეიძლება, გავლენა მოახდინოს პოლიტიკურ არჩევანზე წევრ სახელმწიფოებში და მთლიანად ევროკავშირის პოლიტიკაში ჩამოყალიბდეს“. თანამედროვე სამყაროში დიპლომატიურ არხებთან ერთად, რომლითაც სახელმწიფოები კომუნიცირებენ ერთმანეთთან, მათ შორის გავლენას ახდენენ სხვა სახელმწიფოს პოლიტიკაზე, ასევე სულ უფრო ხშირად გამოიყენება სხვა არხები პროექტების სახით, რათა საკუთარი ინტერესები განხორციელდეს, რომელიც შეიძლება, კარგიც არის, ჩვენ ერთმანეთისგან ვსწავლობთ. როგორც ადამიანები ვსწავლობთ ერთმანეთისგან რაღაცას, ასევე სახელმწიფოები სწავლობენ ერთმანეთისგან. სხვა ქვეყნებისგან ჩვენ ვსწავლობთ, როგორ დავიცვათ გარემო უფრო კარგად, სხვები შეიძლება, ჩვენგან სწავლობენ რაღაცებს. ეს გავლენები კარგია, ისევე როგორც ადამიანებს შორის გავლენებია კარგი, მაგრამ ეს უნდა იყოს ღია და არა ფარული, ამაზეა საუბარი. სწორედ ამიტომ ევროკავშირმა შეიმუშავა ეს დირექტივა, რომელსაც მალე მიიღებენ“, – განაცხადა შალვა პაპუაშვილმა.