„ქართული ოცნება“ რომ სხვისი ფინანსების გაუმჭვირვალობაზე საუბრობს, ეს უბრალოდ ძალიან დიდი კომედიაა. ადამიანები ამის მასშტაბს რომ ხედავდნენ, სიცილისგან ჩაბჟირდებოდნენ, – ამის შესახებ „გირჩის“ ლიდერმა, იაგო ხვიჩიამ გამჭვირვალობის კანონპროექტზე საუბრისას განაცხადა.

„მე ძალიან მიხარია, როდესაც „ქართული ოცნება“ ასეთ შეცდომებს უშვებს და წინასაარჩევნოდ ნერვებს უშლის სტუდენტებს. უნდა, ისინი გამოიწვიოს, ხომ მოგიგეო. ენის გამოყოფით ასე ელაპარაკება და ჩემი აზრით, ასეთს რაც უფრო მეტს გააკეთებენ წინასაარჩევნოდ, მით მეტია შანსია, ადამიანებს გავაგებინოთ, რომ ერთპიროვნული მმართველობა არ ვარგა. რაღაცნაირად ჩვენ უნდა გადავიდეთ მმართველობის სხვა სტილზე და ამაში ვთხოვოთ ხალხს დახმარება, თორემ მართლა თუ გვინდა დასავლეთისკენ სწრაფვა, ხომ გასაგებია, რომ ამ მეთოდებით არავინ არსად მიგვესალმება. „ქართული ოცნება“ რომ სხვისი ფინანსების გაუმჭვირვალობაზე საუბრობს, ეს უბრალოდ ძალიან დიდი კომედიაა. ადამიანები ამის მასშტაბს რომ ხედავდნენ, სიცილისგან ჩაბჟირდებოდნენ“, – განაცხადა ხვიჩიამ.

მისივე თქმით, არასამთავრობო ორგანიზაციები ათასგვარ უაზრო რეპორტებს და ანგარიშებს ამზადებენ და დარწმუნებულია, რომ მთავრობას მათი ფინანსური გამჭვირვალობის შესახებ ინფორმაცია აქვს.

„ენჯეოები“ ჩემი მეგობრები არ არიან, ვფიქრობ, კარგს არაფერს აკეთებენ, მაგრამ ამის მიუხედავად, „ქოცი“ სხვის გაუმჭვირვალობაზე რომ ლაპარაკობს, მით უმეტეს, ამერიკული ან დასავლური ორგანიზაციების, რომლებიც ათასგვარ რეპორტებს აწერინებენ „ენჯეოებს“, მათ შორის, არასაჭიროს და მაგ ხალხზე ამბობ, მათი ფინანსები გაუმჭვირვალეა, ჩემი გამჭვირვალეო, არ არის დამაჯერებელი და უფრო მეტიც, სასაცილოც არის“, – განაცხადა ხვიჩიამ.

კონკრეტულ პარტიულ აქტივისტს ნიშნავენ ამ თანამდებობაზე, ეს ნიშნავს ერთ რამეს – მათ არ აღელვებთ სახელმწიფოს, არც ხალხის ინტერესები და ამოძრავებთ მხოლოდ საკუთარი, პირადი ინტერესები. 12 წლის განმავლობაში არც ერთი რუსი ჯაშუში არ ჰყავთ გამოვლენილი და დაკავებული, ხაზს ვუსვამ არც ერთი! – ამის შესახებ „ერთიანი ნაციონალური მოძრაობის თავმჯდომარემ“, ლევან ხაბეიშვილმა ირაკლი ბერაიას დაზვერვის სამსახურის უფროსად დანიშვნასთან დაკავშირებით განაცხადა.

ლევან ხაბეიშვილის განცხადებით, „რას ზვერავს ივანიშვილის პარტია, არავის უნახავს“.

„ჯერ რას ზვერავს ივანიშვილის პარტია არავის უნახავს. 12 წლის განმავლობაში არც ერთი რუსი ჯაშუში არ ჰყავთ გამოვლენილი და დაკავებული, ხაზს ვუსვამ არც ერთი!

შესაბამისად ახლა, რომ კონკრეტულ პარტიულ აქტივისტს ნიშნავენ ამ თანამდებობაზე ნიშნავს ერთ რამეს – მათ არ აღელვებთ სახელმწიფო ინტერესები, არც ხალხის ინტერესები და ამოძრავებთ მხოლოდ საკუთარი, პირადი ინტერესები, რაც გულისხმობს იმას, რომ კონკრეტული მათი გარემოცვა იქნება ბედნიერი, ექნება მაღალი ანაზღაურება, ექნება უზრუნველი ცხოვრება. მაგრამ ცხადია, სახელმწიფოსთვის არც არაფერი სიკეთე იქნება და არც ხალხისთვის იქნება ეს რაიმე მნიშვნელოვანი და საინტერესო.

მითუმეტეს, როდესაც ვსაუბრობთ დაზვერვაზე, კიდევ ხაზს გავუსვამ, 12 წლის განმავლობაში, ივანიშვილის პირობებში არც ერთი სახელმწიფოს მტრის ჯაშუშის, რუსეთის ჯაშუში არ არის გამოვლენილი“, – განაცხადა ლევან ხაბეიშვილმა.

პირველ რიგში, ყოველგვარი ირონიის გარეშე, მინდა, მადლობა გადავუხადო როზნერს და „მესინა ჯგუფს“, რამეთუ მათ „ენჯეო“ სექტორს და „ნაცმოძრაობის“ სხვადასხვა კლასტერის წარმომადგენლებს დღეს ერთად მოუყარეს თავი და ყველა მათგანმა ერთად გამოაქვეყნა ხუთი ტყუილი, რომელიც არის უმარტივესი სამხილებელი, – ამის შესახებ საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა, მამუკა მდინარაძემ ჟურნალისტებს განუცხადა.

მდინარაძის თქმით, ყველას პუნქტს სათითაოდ უნდა გაეცეს პასუხი.

„პირველი ტყუილი იყო თავად სათაური, სადაც ამბობდნენ, რატომ არის ეს კანონი რუსული. პირველი პუნქტი იყო ასეთი – „საქართველოში ამკვიდრებს იგივე წესებს, რაც პუტინის რუსეთში მოქმედებს“. ეს არის მდაბიო ტყუილი, რადგან აქამდე არავის წაგიკითხავთ კანონი, რომელიც რუსეთში მოქმედებს. ვერც ერთ პუნქტს ვერ მაჩვენებთ, რომელიც თანხვედრაშია ქართულ ვერსიასთან. რუსეთში მოქმედი კანონი ეხება არა მხოლოდ იურიდიულ, არამედ ფიზიკურ პირებსაც, რომლებსაც ეკრძალებათ საჯარო მიმართვები და მოსაზრებების გავრცელება. ხომ არ გხვდებათ სადმე ქართულ კანონმდებლობაში მსგავსი? რეესტრში უნდა დარეგისტრირდნენ ქვეკონტრაქტორებიც კი. ანგარიშები ექვემდებარება სავალდებულო აუდიტს. წარადგენენ მოხსენებებს, პროგრამებსა და სხვა დოკუმენტებს ექვს თვეში ერთხელ სხვადასხვა საინფორმაციო ქსელში. ფიზიკური პირები ვერ ინიშნებიან საჯარო სამსახურში, ვერ ერევიან საარჩევნო პროცესში, ეკრძალებათ ქონების გადაცემა ან მიღება, შემოწირულებების გაკეთება, პედაგოგიური საქმიანობა და ა.შ. ასევე, კანონის განმეორებით დარღვევა იწვევს სისხლის სამართლებრივ პასუხისმგებლობას. ექვს წლამდე პატიმრობით ისჯება მოქალაქეების წაქეზება, უარი თქვან მათ სამოქალაქო ვალდებულებების შესრულებაზე. ვერ სარგებლობენ სახელმწიფო სუბსიდიებით, პროგრამებით და გრანტებით და ა.შ. რომელიმე პუნქტი ქართულ კანონმდებლობაში არის? არ არის. შესაბამისად, პირველი პუნქტი არის ცალსახა და მდაბიო ტყუილი.

მეორე პუნქტში ჩაწერეს, თითქოს ჩვენი კანონი „მიმართულია ჩვენი საერთაშორისო მეგობრების წინააღმდეგ, მტრად აცხადებს ევროკავშირს და აშშ-ს“. ეს მეორე უბინძურესი ტყუილია, რადგან ქართული კანონი არ განსაზღვრავს მტრულად განწყობილი ქვეყნების სიას, მეტიც – არანაირ სიას არ განსაზღვრავს. მსგავსში ჩანაწერი ქართულ ინიციატივაში არ არის. ის თანაბრად ეხება ყველა ქვეყანას, მათ შორის ოკუპანტ ქვეყანას და ა.შ. ეს მეორეც დადასტურებულია, რომ არის ტყუილი.

მესამე ტყუილი – „კანონის მიღება გამორიცხავს საქართველოს ევროკავშირში გაწევრიანებას“. თავად ევროკავშირში ინიცირებულია „უცხოური გავლენის გამჭვირვალობის შესახებ კანონი“, რომელსაც ივნისში მიიღებენ, ასე დაანონსდა. მსგავსი კანონები მოქმედებს აშშ-ში, დიდ ბრიტანეთში, ავსტრალიაში, ახალ ზელანდიაში, ისრაელში; უკვე განიხილება საფრანგეთში, კანადასა და სლოვაკეთში. ესე იგი მესამეც ტყუილია.

მეოთხე პუნქტი – „კანონი მეგობრების გარეშე დაუცველს გვტოვებს რუსეთის პირისპირ“. არც ეს არის კონკრეტული არგუმენტი, მაგრამ ამასაც გავცემ პასუხს. გამჭვირვალობის შესახებ ქართული კანონი გულისხმობს პარტნიორ ქვეყნებში არსებული კანონების საუკეთესო პრაქტიკის მიღებას და ამავდროულად, განამტკიცებს საქართველოს სუვერენიტეტსა და დამოუკიდებლობას.

ანუ მათ სათაურის ჩათვლით შემოგვთავაზეს დღეს ხუთი პუნქტი და ხუთივე დადასტურებულად არის ტყუილი. რაც ჩამოვთვალე, ვერც ერთ მათგანთან დაკავშირებით ვერ წარმოადგენენ საპირისპირო არგუმენტს“, – განაცხადა მდინარაძემ.

დღეს და გუშინ გარედან, ჩვენი მეგობრების მხრიდან, სამწუხაროდ, ზეწოლა მოძლიერდა, დიახ, გავუძლებთ და ჩვენს სიმართლეს ბოლომდე გავიტანთ, – ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.

მდინარაძის თქმით, შარშანდელისგან განსხვავებით, ისინი „რუსულ კანონს“ აღარ უწოდებენ.

„ეს შედეგია, ამითაც კმაყოფილები ვართ. თუმცა, კრიტიკა შემაშფოთებელია, დამაზიანებელია, ევროინტეგრაციის პროცესს ხელს უშლის, ყალბია. უნდა გავბედოთ ამის თქმა, რადგან გვაიძულებენ არ მივიღოთ იგივე კანონი, რაც თავად ევროკავშირმა დააინიცირა. ევროკავშირის ქვეყნებში მოქმედებს, განიხილება და გვეუბნებიან, თქვენ არ მიიღოთ ეს კანონიო. კიდევ ერთხელ ვიმეორებთ, წარმოუდგენელი უსამართლობაა ისევე, როგორც თავის დროზე კანდიდატის სტატუსის არ მოცემა. ჩვენო მეგობრებო, წარმოუდგენელი უსამართლობაა, თქვენთან იღებდეთ, აინიცირებდეთ და ჩვენ თითის ქნევით გვეუბნებოდეთ, რომ ეს არ გავბედოთ. ამ უსამართლობას ქართველი ხალხი არ შეეგუება. კონკრეტულ ძალებს თუ უნდათ, ფულით მართონ საქართველო, ასე არ იქნება, საქართველო სუვერენული, შემდგარი სახელმწიფოა და მას მართავს მხოლოდ და მხოლოდ ქართველი ხალხის მიერ არჩეული ხელისუფლება. ეს ყველაფერი ღირებულებით ბრძოლაში გადადის. მეგობრებს მოვუწოდებ, ნუ გააკეთებენ ისეთ განცხადებებს, რომლებიც ძალიან ცუდ რაღაცაში ამხელს კონკრეტულ ადამიანებს, თუ პირთა ჯგუფებს. ერთი მხრივ, თავისთან რა კანონებსაც აინიცირებენ, იმ კანონს საქართველოში ვიღაცამ ეძახოს რუსული. ძალიან კარგია, რომ რუსულს აღარ ეძახიან, მაგრამ კრიტიკაც უსამართლოა“, – განაცხადა მდინარაძემ.

მხოლოდ ქართველ ხალხს შეგვიძლია, განვსაჯოთ, რა არის მნიშვნელოვანი ჩვენი უსაფრთხოებისთვის, სხვა ქვეყანას ამ საკითხებში არც კომპეტენცია და არც მანდატი არ აქვს, – ამის შესახებ პარლამენტის თავმჯდომარემ, შალვა პაპუაშვილმა გამჭვირვალობის შესახებ კანონპროექტზე საუბრისას განაცხადა.

პაპუაშვილის თქმით, მნიშვნელოვანია, ქართველმა ხალხმა იცოდეს, რა ფული შემოდის უცხოეთიდან და რაზე იხარჯება.

„გამოდის, რომ ჩვენი უსაფრთხოების დაცვა არ არის ევროპული საქციელი? რასაც აკეთებს საფრანგეთი, დიდი ბრიტანეთი, ევროპარლამენტი და ევროკავშირი, როდესაც დირექტივას იღებენ, იგივე მიდგომა ქართველებს რომ გვქონდეს, ეს არ არის ევროპული? უცხოური გამჭვირვალობის დაფინანსება არის ქვეყნის ეკონომიკური და პოლიტიკური უსაფრთხოების საკითხი. რა თქმა უნდა, ერთადერთი სუბიექტი, ვისაც შეუძლია ამ საკითხზე იმსჯელოს, არის ქართველი ხალხი და მისი არჩეული ხელისუფლებაა. სხვა ქვეყანას ჩვენი უსაფრთხოების საკითხებში ცოდნა, კომპეტენცია და მანდატიც არ აქვს. მხოლოდ ჩვენ, ქართველ ხალხს შეგვიძლია, განვსაჯოთ, რა არის მნიშვნელოვანი ჩვენი უსაფრთხოებისთვის. არსებულ გეოპოლიტიკურ სივრცეში, სადაც  ყველა მხრიდან საფრთხეა, ჩვენი უსაფრთხოებისთვის მნიშვნელოვანია, რომ ქართველმა ხალხმა ვიცოდეთ, რა ფული შემოდის და რაზე იხარჯება. ერთადერთი, რაზეც ყალბი კამპანია დგას, რომელიც შარშანაც იყო, არის ყვირილით საღი აზრის ჩახშობა. არცერთი საღი არგუმენტი არ არის“, – განაცხადა შალვა პაპუაშვილმა.

საქართველოს დაზვერვის სამსახურის უფროსად ირაკლი ბერაია დაინიშნა.

შესაბამისი ბრძანება პრემიერ-მინისტრმა ირაკლი კობახიძემ უკვე გამოსცა.

ირაკლი ბერაია დღემდე საქართველოს პარლამენტის თავდაცვისა და უშიშროების კომიტეტის თავმჯდომარე იყო. სხვადასხვა დროს ის იკავებდა შინაგან საქმეთა სამინისტროს რეფორმებისა და განვითარების დეპარტამენტის დირექტორის პოზიციას, ასევე იყო სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორი.