„გირჩის“ წევრის, ალექსანდრე რაქვიაშვილის განცხადებით, რუსეთის გადაწყვეტილება სავიზო რეჟიმის გაუქმებისა და პირდაპირი ფრენების აღდგენის შესახებ ნიშნავს, რომ მას მოსწონს საქართველოს საგარეო პოლიტიკა.
მისივე თქმით, ეს მიუთითებს, რომ ქვეყანა არასწორი მიმართულებით ვითარდება.
„რუსეთის გადაწყვეტილება იყო ჩვენი საგარეო პოლიტიკის შეფასება. რუსეთმა თქვა, რომ თქვენი საგარეო პოლიტიკა მომწონსო. ეს ცუდია, მიუთითებს, რომ ჩვენ არასწორი მიმართულებით ვვითარდებით. არ ვიცი, როგორ მოხდება ამის პრაქტიკაში რეალიზაცია. მთავრობის ვალდებულებაა, რომ ყველაფერი გააკეთოს, რათა სანქციები არ დაეკისროს არც ჩვენს ავიაკომპანიებს და არც აეროპორტს, არც სანქცირებული კომპანიების ფრენა დაუშვას. ამ ყველაფერს არაფერი განსაკუთრებული ეფექტი არ ექნება. ფრენები ფაქტობრივად ისედაც გვქონდა ერევნის გავლით და დიდად ბევრი მსურველი არ იყო ამ პირობებში რუსეთში ჩასვლის. პოლიტიკური ზარალი კი შეიძლება, ძალიან დიდი იყოს. ჯობია, საერთოდ არ აღდგეს ფრენები, ვიდრე აღმოჩნდეს, რომ ჩვენი კომპანიები სანქციებს დაექვემდებაროს. ყურადღება მაქსიმალური უნდა იყოს. მთავრობამ საშიში თამაში დაიწყო და რისკები ჩნდება. შეიძლება, გავძვრეთ ისე, რომ სანქციებს არ დაექვემდებაროს ჩვენი კომპანიები, მაგრამ ყველაფერი უნდა გაკეთდეს, რომ ეს არ მოხდეს“, – განაცხადა რაქვიაშვილმა.
რუსეთის პრეზიდენტმა, ვლადიმერ პუტინმა გამოსცა განკარგულებები, რომლებიც საქართველოსთან სავიზო რეჟიმის გაუქმებას და პირდაპირი ფრენების აღდგენას ითვალისწინებს.
საქართველოსთან რუსეთს სავიზო რეჟიმი ცალმხრივად ჰქონდა დაწესებული. რუსეთის ფედერაციასთან სავიზო რეჟიმი 2012 წელს მაშინდელი პრეზიდენტის, მიხეილ სააკაშვილის ბრძანებით გაუქმდა. მანამდე კი, 2010 წლის ოქტომბერში სავიზო რეჟიმის გაუქმება რუსეთის ფედერაციაში შემავალი ჩრდილოეთ კავკასიის რესპუბლიკების მცხოვრებლებს შეეხოთ.
