ლისის ტბის მიმდებარედ, სადაც „პრაიდის კვირეულის“ ჩატარების მოწინააღმდეგეები იკრიბებიან, ვითარებას პოლიცია აკონტროლებს.
ცოტა ხნის წინ, აქციის მონაწილეებმა პოლიციის კორდონის გარღვევა სცადეს.
პერიოდულად პოლიცია იმ ავტომობილებს ატარებს, რომელთა მფლობელებიც აღნიშნულ ტერიტორიაზე ცხოვრობენ. სწორედ ერთ-ერთი ასეთი ავტომობილის გატარებისას აქციის მონაწილეებმა პოლიციის კორდონის გარღვევა სცადეს, რასაც ხმაური მოჰყვა, თუმცა ახლა ვითარება უკვე სტაბილურია, ადგილზე ასობით პოლიციელი იმყოფება.
აქციის მონაწილეებს, რომლებიც ლისის ტბის მიმდებარე ტერიტორიაზე იმყოფებიან, ეტაპობრივად უერთდებიან მოქალაქეები, რომლებიც ვაჟა-ფშაველას გამზირიდან ლისის ტბამდე მსვლელობას მართავდნენ.
შინაგან საქმეთა სამინისტრომ „თბილისი პრაიდის“ ორგანიზებით უკვე გამართულ და დაგეგმილ დახურულ ღონისძიებებთან დაკავშირებით უწყების მიერ განხორციელებული პრევენციული ღონისძიებების შესახებ ინფორმაცია გაავრცელა.
