სოლარიუმი იწვევს კიბოს!, – ამის შესახებ აშშ-ში მოღვაწე ქართველი ექიმი, ქეთი შავლიაშვილი “ჯორჯიან თაიმსის” ბლოგში წერს.
როგორც ექიმი აღნიშნავს, სოლარიუმი საშიშია ჯანმრთელობისთვის, ის კიბოს იწვევს – ჯანდაცვის მსოფლიო ორგანიზაცია კიდევ ერთხელ აფრთხილებს მოსახლეობას სოლარიუმის მავნებლობის შესახებ.
“სოლარიუმის გამოყენება ყველასთვის დიდი რისკის შემცველია, თუმცა განსაკუთრებული სიფრთხილე ახალგაზრდა ქალებს და ღია ფერის კანის მქონე ადამიანებს მართებთ, რომლებსაც მომატებული მგრძნობელობა ახასიათებთ ულტრაიისფერი სხივების მიმართ. დადგენილია, რომ დიდწილად სწორედ სოლარიუმის და მზის ულტრაიისფერი სხივები ახდენენ კანის კიბოს პროვოცირებას.
ავსტრალიაში, ევროპასა და ამერიკის შეერთებული შტატებში, სოლარიუმის მოხმარების გამო, მელანომას 10 000 და კანის სხვა სახის ავთვისებიანი სიმსივნეების 450 000 ახალი შემთხვევა ფიქსირდება ყოველწლიურად.
როგორც ცნობილია, სოლარიუმის ყველაზე ხშირი მომხმარებლები ახალგაზრდა ქალები არიან. დადგენილია, რომ რაც უფრო ახალგაზრდა ასაკში იწყება მისი გამოყენება, მით უფრო დიდია კანის ავთვისებიანი სიმსივნის რისკი.
სოლარიუმის გამოყენება
– 35 წლამდე – 60%-ით ზრდის მელანომას რისკს
– 25 წლამდე – 102% ით ზრდის კანის ბრტყელი უჯრედების კიბოს და 40% ით კანის ბაზალური უჯრედების კიბოს რისკს
კატარაქტა, იმუნური სისტემის დასუსტება, დამწვრობა და კანის ნაადრევი დაბერება- ეს სოლარიუმის სხვა ნეგატიური ეფექტებია ადამიანის ორგანიზმზე.
“, – წერს ქეთი შავლიაშვილი.
