უნგრეთის პრემიერ-მინისტრმა, ვიქტორ ორბანმა პირობა დადო, რომ მიიღებს ზომებს იმ პოლიტიკოსებისა და ჟურნალისტების წინააღმდეგ, რომლებიც უცხოურ დაფინანსებას იღებენ. ვიქტორ ორბანმა ასევე კვლავ გამორიცხა უკრაინის ევროკავშირში გაწევრიანება.

ბუდაპეშტში უნგრეთის ეროვნული დღისადმი მიძღვნილ მიტინგზე სიტყვით გამოსვლისას, ვიქტორ ორბანმა განაცხადა, რომ მოვიდა დრო, განადგურდეს „ჩრდილოვანი არმია“, რომელიც იმ არასამთავრობო ორგანიზაციებს, ჟურნალისტებს, მოსამართლეებსა და პოლიტიკოსებს აერთიანებს, რომლებიც ანაზღაურებას ამერიკის შეერთებული შტატებიდან და ბრიუსელიდან იღებენ.

უნგრეთის პრემეირ-მინისტრმა კვლავ გააკრიტიკა ბრიუსელი უკრაინისთვის სამხედრო დახმარების გაგრძელების გამო და განაცხადა, რომ ევროკავშირს უკრაინის „კოლონიზაცია“ სურს.

ცნობისთვის, მიმდინარე კვირაში ვიქტორ ორბანის მმართველმა პარტიამ საკონსტიტუციო ცვლილებები წარადგინა, რომელიც ითვალისწინებს ორმაგი მოქალაქეობის მქონე მოქალაქეების გაძევებას, თუ ისინი უნგრეთის სუვერენიტეტისთვის საფრთხედ იქნებიან მიჩნეული.

უახლოეს დღეებში ლონდონში ევროპელი სამხედრო მაღალჩინოსნები შეიკრიბებიან და რუსეთ-უკრაინის ომში შესაძლო სამშვიდობო შეთანხმების უზრუნველყოფის გეგმაზე იმსჯელებენ, – ამის შესახებ დიდი ბრიტანეთის პრემიერ-მინისტრმა, კირ სტარმერმა დღეს გამართული ე.წ. მსურველთა კოალიციის წევრი ქვეყნების ლიდერების შეხვედრის შემდეგ განაცხადა.

მოლაპარაკებები დისტანციურ ფორმატში გაიმართა.

კირ სტარმერის თქმით, „მსურველთა კოალიცია“ ახლა ისე მნიშვნელოვანია, როგორც არასდროს.

„ჩვენ შევთანხმდით, რომ გავზრდით ზეწოლას რუსეთზე, განვაგრძობთ სამხედრო დახმარების ნაკადს უკრაინისთვის და გავაძლიერებთ შეზღუდვებს რუსეთის ეკონომიკაზე, რათა დავასუსტოთ პუტინის სამხედრო მანქანა და მოვიყვანოთ ის მოლაპარაკების მაგიდასთან“, – განაცხადა დიდი ბრიტანეთის მთავრობის მეთაურმა.

მისი თქმით, ქვეყნები შეთანხმდნენ, დააჩქარონ პრაქტიკული სამუშაო პოტენციური სამშვიდობო შეთანხმების მხარდასაჭერად.

„ჩვენ ახლა გადავდივართ ოპერაციულ ფაზაში. ჩვენი სამხედრო მოხელეები შეიკრიბებიან 20 მარტს აქ, გაერთიანებულ სამეფოში, რათა წარმოადგინონ ძლიერი გეგმა სამშვიდობო შეთანხმების გასაძლიერებლად და უკრაინის მომავალი უსაფრთხოების უზრუნველსაყოფად. პრეზიდენტმა ტრამპმა შესთავაზა პუტინს გზა ხანგრძლივი მშვიდობისკენ. ახლა ჩვენ უნდა ვაქციოთ ეს რეალობად. ახლა არის მომენტი, ვიმოძრაოთ იმ შედეგისკენ, რომლის ხილვაც გვსურს – დავასრულოთ მკვლელობები და მივაღწიოთ სამართლიან და ხანგრძლივ მშვიდობას უკრაინაში და ხანგრძლივ უსაფრთხოებას ყველა ჩვენგანისთვის“, – განაცხადა კირ სტარმერმა.

აზერბაიჯანის პრეზიდენტის განცხადებით, თანამედროვე სწრაფად ცვალებად მსოფლიოში გლობალური სტაბილურობა უახლოეს თვეებში ან წლებშიც კი ვერ იქნება მიღწეული. ილჰამ ალიევმა, “ევრონიუსთან” ინტერვიუში, განაცხადა, რომ მსოფლიო შევიდა “ახალი წესებისა და ნორმების შემუშავების ფაზაში”.

“მაშინაც კი, თუ [უკრაინის] ომი შეწყდება, არ არსებობს გარანტია, რომ ის კვლავ არ განახლდება. ჩვენ გვქონდა პერიოდი, როდესაც თითქმის 30 წლის განმავლობაში მოქმედებდა ცეცხლის შეწყვეტის შეთანხმება აზერბაიჯანსა და სომხეთს შორის, რომელიც მიღწეული იყო 1994 წლის გაზაფხულზე, მაგრამ ეს არ ნიშნავდა, რომ ომი დასრულდა. ის უბრალოდ ტრანსფორმირდა. ომი მხოლოდ მაშინ სრულდება, როდესაც გაქვთ სამშვიდობო შეთანხმება”, – აღნიშნა ილჰამ ალიევმა.

აზერბაიჯანის პრეზიდენტის განცხადებით, დღეს “მნიშვნელოვანია რეგიონის დაცვა ნებისმიერი კრიზისისგან”.

“ახლა ჩვენ გვაქვს შედარებით მშვიდი პერიოდი, ამიტომ უნდა ვკონცენტრირდეთ ამაზე, რათა შევქმნათ უსაფრთხოების მექანიზმები, რომლებიც იქნება ყოვლისმომცველი, აღმოვფხვრათ ახალი სამხედრო კონფრონტაციის ნებისმიერი საფრთხე და ვეცადოთ ვიცხოვროთ მეზობლურად, როგორც ეს იყო საბჭოთა კავშირის დროს”, – განაცხადა აზერბაიჯანის პრეზიდენტმა.

კურსკის ოლქში ჩვენი ჯარები ალყაში არ არიან, – ამის შესახებ უკრაინის პრეზიდენტი, ვოლოდიმირ ზელენსკი X-ზე წერს.

„ცალკე შენიშვნა კურსკის ოლქთან დაკავშირებით: ჩვენი ჯარების ოპერაცია კურსკის ოლქის განსაზღვრულ ადგილებში გრძელდება. დანაყოფები მათთვის დაკისრებულ ამოცანებს მოთხოვნების სრული დაცვით ასრულებენ. კურსკის ოლქში უკრაინული ძალების წყალობით, რუსული ჯარის მნიშვნელოვანი ნაწილი სხვა მიმართულებებიდან გაიყვანეს. ჩვენი ჯარები რუსული და ჩრდილოეთ კორეის დაჯგუფებების შეკავებას აგრძელებენ. ჩვენი ჯარები ალყაში არ არიან“, – წერს ვოლოდიმირ ზელენსკი.

მისივე თქმით, დონეცკის ოლქისა და ფრონტის ხაზის სხვა ზონებში უკრაინის პოზიციების დაცვა გრძელდება და პოკროვსკის მიმართულებით ვითარება დასტაბილურდა.

„ჩვენ ასევე ვაკვირდებით მიმართულებებს უკრაინის აღმოსავლეთ საზღვრის გასწვრივ, სადაც რუსული არმია ძალების რაოდენობას ზრდის. ეს ჩვენს სუმის ოლქზე თავდასხმის განზრახვაზე მიუთითებს. ჩვენ ამის შესახებ ვიცით და ამას ვუპასუხებთ. მინდა, ყველა პარტნიორმა ზუსტად გაიგოს, რას გეგმავს პუტინი, რისთვის ემზადება და რას უგულებელყოფს. სამხედრო ძალების რაოდენობის ზრდა იმაზე მეტყველებს, რომ მოსკოვი დიპლომატიის იგნორირების გაგრძელებას აპირებს. აშკარაა, რომ რუსეთი ომს ახანგრძლივებს“, – აღნიშნავს უკრაინის პრეზიდენტი.

ცნობისთვის, გუშინ, აშშ-ის პრეზიდენტმა, დონალდ ტრამპმა სოციალურ ქსელში დაწერა, რომ ათასობით უკრაინელი ჯარისკაცი რუსი სამხედროების მიერ ალყაში იყო მოქცეული და რუსეთის პრეზიდენტს, ვლადიმერ პუტინს, მათი დანდობა სთხოვა.

დონალდ ტრამპმა CNN და MSNBC კორუფციასა და უკანონო საქმიანობაში დაადანაშაულა. შტატების პრეზიდენტი აცხადებს, რომ ტელეარხები დემოკრატიული პარტიის პოლიტიკურ ინსტრუმენტებს წარმოადგენენ, რომელთა ქმედებებიც, მისი აზრით, უკანონოა.

ტრამპმა გააკრიტიკა მედია მათ შორის კოორდინაციის გამო. მისი თქმით, ისინი გავლენას ახდენენ მოსამართლეებზე.

„CNN-ის და MSNBC-ის პუბლიკაციების 97,6% ჩემს შესახებ ნეგატიური მასალაა, ისინი დემოკრატიული პარტიის პოლიტიკურ ფრთას წარმოადგენენ. კორუმპირებულები არიან და უკანონოდ მოქმედებენ. არ აქვს მნიშვნელობა რა უზარმაზარ გამარჯვებას მივაღწევ მე, ან რა მარცხს განიცდიან ჩემი ოპონენტები, ეს ხალხი ყოველთვის შემიტევს მე. ეს არ შეიძლება, რომ ასე იყოს. ჩვენ ვაბრუნებთ პატიოსნებას და ანგარიშვალდებულებას ფედერალურ საგამოძიებო ბიუროში იუსტიციის სამინისტროსა და მთელი ჩვენი მთავრობის უმაღლეს დონეებზე“, – განაცხადა ტრამპმა.

დონალდ ტრამპის ადმინისტრაცია შეერთებულ შტატებში 43 ქვეყნის მოქალაქეებისთვის შესვლის წესების გამკაცრებას გეგმავს, მათ შორის რუსეთისა და ბელარუსის მოქალაქეებისთვის.

ამის შესახებ ინფორმაციას „ნიუ იორკ თაიმსი“ წყაროებზე დაყრდნობით წერს.

გამოცემის ინფორმაციით, აშშ-ის სახელმწიფო დეპარტამენტმა შეიმუშავა რეკომენდაციების პროექტი, რომელშიც 43 ქვეყანა სამ კატეგორიად დაყო – „წითელი“, „ნარინჯისფერი“ და „ყვითელი“.

„წითელი“ ქვეყნების ჯგუფში შევიდა 11 ქვეყანა, რომელთა მოქალაქეებს კატეგორიულად აეკრძალებათ აშშ-ში შესვლა. ესენია: ავღანეთი, ბჰუტანი, კუბა, ირანი, ლიბია, ჩრდილოეთ კორეა, სომალი, სუდანი, სირია, ვენესუელა და იემენი.

„ნარინჯისფერი“ ქვეყნების სიაში შესულია 10 ქვეყანა, რომელთა მოქალაქეებს ვიზების გაცემას შეუზღუდავენ. შესვლა შეიძლება ნებადართული იყოს მხოლოდ „შეძლებული ბიზნეს მოგზაურებისთვის“, მაგრამ არა მათთვის, ვინც შედის საიმიგრაციო ან ტურისტული ვიზებით. ამ კატეგორიის ქვეყნებია – რუსეთი და ბელარუსი, ასევე ერიტრეა, ჰაიტი, ლაოსი, მიანმარი, პაკისტანი, სიერა-ლეონე, სამხრეთ სუდანი და თურქმენეთი.

გარდა ამისა, „ყვითელ“ სიაში მოხვდა 22 ქვეყანა, რომლებსაც მიეცემათ 60 დღე, რომ აღმოფხვრან ის საკითხები, რომლებიც შეშფოთებას იწვევს აშშ-ის ხელისუფლებაში. წინააღმდეგ შემთხვევაში, ისინი „წითელ“ ან „ნარინჯისფერ“ კატეგორიაში მოხვდებიან.

როგორც The New York Times აღნიშნავს, საბოლოო სია შეიძლება შეიცვალოს.

ამასთან, გამოცემა წერს, რომ გაურკვეველია, გავრცელდება თუ არა შეზღუდვები მათზე, ვისაც უკვე აქვს მოქმედი ვიზები. ასევე გაურკვეველია, გაავრცელებს თუ არა ადმინისტრაცია შეზღუდვებს ე.წ. მწვანე ბარათის მფლობელებზე, რომლებმაც აშშ-ში მუდმივი ცხოვრების ნებართვა უკვე მიიღეს.