რუსებს არ გააჩნიათ საკმარისი ძალა ხარკოვის რეგიონის ჩრდილოეთით სტრატეგიული მიზნის მისაღწევად, – ამის შესახებ ევროპაში ნატო-ს მოკავშირეთა შეიარაღებული ძალების უმაღლესმა სარდალმა, კრისტოფერ კავოლიმ ბრიუსელში, ნატო-ს საბჭოს შემდეგ გამართულ პრესკონფერენციაზე განაცხადა.
„რუსებს არ აქვთ სტრატეგიული მიზნის მისაღწევად საკმარისი საშუალებები. მათ შეუძლიათ, მიაღწიონ ადგილობრივ წარმატებებს და ეს მათ უკვე გააკეთეს. მათ ასევე განიცადეს ადგილობრივი მარცხი. ასე რომ, დიახ, მე ძალიან მჭიდრო კონტაქტზე ვარ ჩვენს უკრაინელ კოლეგებთან და დარწმუნებული ვარ, ისინი დაიცავენ ხაზს“, – აღნიშნა კოვოლიმ.
ამასთან, პრესკონფერენციაზე ისაუბრა ალიანსის სამხედრო კომიტეტის თავმჯდომარემ, რობ ბაუერმაც, რომელმაც აღნიშნა, რომ ხარკოვის რეგიონში ბრძოლის ველზე ვითარება იმდენად არ შეცვლილა, რომ უკრაინის ხელისუფლება მოლაპარაკებების მაგიდასთან დაჯდეს.
„უკრაინის ჯარებმა დაიბრუნეს ტერიტორიის 50%, რომელიც ომის დასაწყისში რუსეთმა დაიპყრო. რუსული ჯარები ახლა იბრუნებენ ამ ტერიტორიას, მაგრამ ეს არ არის სტრატეგიული წინსვლა, ეს არ არის სტრატეგიული წარმატება“, – განაცხადა ბაუერმა.
