2023 წლის 9 თვეში რუსეთმა ევროკავშირის ქვეყნებიდან 450 მილიონი ევროს ღირებულების საქონელი და ტექნოლოგია მიიღო, რომლის წინააღმდეგ სანქციები მოქმედებს და რომლის გამოყენება სამხედრო მიზნებშია შესაძლებელი.
ინფორმაციას Bloomberg ავრცელებს.
ამ ინფორმაციის მიხედვით, აღნიშნული საქონლის მხოლოდ მეოთხედი რუსეთში უშუალოდ ევროპული ქვეყნებიდან მოხვდა. უკრაინის წინააღმდეგ რუსეთის სრულმასშტაბიანი აგრესიის დაწყების შემდეგ ევროკავშირსა და რუსეთს შორის ამ ტიპის საქონლით ვაჭრობის მოცულობაში შემცირდა. ამასთანავე, გაიზარდა ამავე საქონლის ექსპორტი ევროპიდან მესამე ქვეყნებში, საიდანაც ის შემდეგ რუსეთში ხვდება.
იმ ქვეყნებს შორის, რომლებიც სანქციების გვერდის ავლაში მონაწილეობდნენ, Bloomberg თურქეთს, არაბეთის საამიროებს, სერბეთს, ჩინეთს, უზბეკეთს ყაზახეთს, ყირგიზეთს და სომხეთს ასახელებს.
გამოცემა ასევე იუწყება, რომ ზოგიერთი საქონელი, რომელზეც სანქციები ვრცელდება, საზღვარგარეთ რუსეთის შვილობილი კომპანიები აწარმოებენ და მათი ექსპორტი ასევე მესამე ქვეყნების გავლით ხდება.
ცნობისთვის, უკრაინის წინააღმდეგ რუსეთის სრულმასშტაბიანი სამხედრო აგრესიის მეორე წლისთავზე ევროკავშირმა რუსეთის 10 კომპანიისა და ფიზიკური პირის წინააღმდეგ სანქციები დააწესა. მასში ის კომპანიები მოხვდნენ, რომლებიც რუსეთის სამხედრო-სამრეწველო კომპლექსთან არიან დაკავშირებულები და რომლებიც ადრე დაწესებული სანქციებისთვის გვერდის ავლაში მონაწილეობენ.
