“ზეიმი კარგია, მაგრამ საქმეს მივხედოთ!” – ანა დოლიძე

93
spot_img

პარტია “ანა დოლიძე ხალხისთვის” მთელ პოლიტიკურ სპექტრს მიმართავს და რეფორმებზე მუშაობის სწრაფად დაწყების საჭიროებაზე საუბრობს.

ამის შესახებ ინფორმაციას პარტიის პრესსამსახური ავრცელებს.

პარტიის ლიდერის თქმით, ახლა სრული მობილიზება და კონცენტრაცია სწორედ იმ რეფორმების გატარებაზე უნდა იყოს, რაც თითოეული მოქალაქის მდგომარეობას გააუმჯობესებს და მათ კეთილდღეობას უზრუნველყოფს.

„ვფიქრობ, დროა გამოვიდეთ ეიფორიის ნარკოტიკული ტკბობიდან და საქმეს მივხედოთ. სტატუსიდან რეალური შედეგი იქნება რამდენიმე წელიწადში, ისიც სერიოზული რეფორმების შემდეგ, რომელიც არსად ჩანს და არც იქნება ოცნების ხელში. მაგიდაზე უკეთესი სადილი არ ჩანს და არც იქნება კარგა ხანს.

ამ დროს, ხვალინდელ ქათამზე ოცნებაში ისევ იმ ჭაობში ვართ: ხალხს იტაცებენ და თამაზ გინტური მოკლეს ლოცვის გამო, ხელფასები ისევ დაბალია, ხალხი მიდის ემიგრაციაში, ბევრ ადგილას გვემსახურებიან რუსულად, სასამართლო კლანი ისევ თავის ადგილასაა, ხალხის უმეტესობა კარაქს ვერ ყიდულობს სიძვირის გამო, ახალგაზრდები 2 ადგილას მუშაობენ, რომ სწავლის ხარჯები დაფარონ, ავარიებში ხალხი ისევ კვდება და რაჭის ტყეები ისევ ხიდაშელისაა. ამაზე პასუხი მოსათხოვია „ოცნებისგან“. ზეიმი კარგია, მაგრამ როცა გშია, ის სანახაობას ემსგავსება პურის გარეშე“, – აცხადებს ანა დოლიძე.

გავრცელებული ინფორმაციის თანახმად, პარტიამ უკვე დაიწყო კამპანია #ერთისაქმემომავლისთვის, რომლის ფარგლებშიც მიმართა პოლიტიკოსებს, არასამთავრობოებსა და თითოეულ მოქალაქეს.

პარტიის ლიდერის თქმით, ახლა დროა, ყველამ ის გააკეთოს, რაც შეუძლია, რათა 5 კვირაში ქვეყანამ კანდიდატის სტატუსი მიიღოს.