„უკრაინის არმიის კონტრშეტევა თითქმის ორი თვეა მიმდინარეობს, მაგრამ საომარი მოქმედებები იმ მოლოდინს არ ამართლებს, რაც დასავლეთში და უკრაინაში იყო შექმნილი. რა უშლის ხელს ოკუპირებული ტერიტორიების გათავისუფლებას? მთავარი და სერიოზული დაბრკოლება, რასაც უკრაინის არმია აწყდება, ექსპერტების აზრით, ესაა რუსების მიერ დანაღმული ველები – ფრონტის ხაზი და მის მიღმა არსებული ყოველი მეტრი სიკვდილს თესავს“, – ნათქვამია ამერიკულ „ნიუ-იორკ თაიმსში“ (The New York Times) გამოქვეყნებულ სტატიაში სათაურით „უკრაინის კონტრშეტევას ფართო დანაღმული ველები აბრკოლებს“ (ავტორი – მეთიუ ბიგი).
გთავაზობთ პუბლიკაციას შემოკლებით:
სამწუხაროდ, კიევს საკმარისად არ აქვს ის ინსტრუმენტები და სპეციალური ტექნიკა, რომელიც დანაღმულ ველებს გააუვნებლებს.
ფილადელფიაში არსებული საგარეო პოლიტიკის კვლევის ინსტიტუტის უფროსი მეცნიერ-თანამშრომლის რობერტ ლის თქმით, პრობლემა იმაშია, რომ რუსეთმა გზებისა და მინდორ-ველების დანაღმვა „ინოვაციური წესით“ განახორციელა, თავდაცვის რამდენიმე ხაზის ჩარჩოებში. სწორედ მათი გადალახვის მცდელობის დროს განიცადა უკრაინის არმიამ მძიმე ტექნიკისა და პირად შემადგენლობის დიდი დანაკარგები კონტრშეტევის საწყის ეტაპზე, რის სედეგადაც საომარი მოქმედებების ინტენსივობა შეფერხდა.
რამდენიმე კვირის შემდეგ, გარკვეული დასკვნების შედეგად, უკრაინის არმიის სახმელეთო ქვედანაყოფებმა შეტევა კვლავ განაახლეს – „ამჟამად ინტენსიური ბრძოლები მიმდინარეობს, კიევმა შეტევაში ახალი სარეზერვო ძალები ჩააბა. უკრაინა ასევე იყენებს ტანკებსა და სპეციალურ განმნაღმავ ტექნიკას, დასავლელი მოკავშირეების მხრიდან მიწოდებულს.
მაგრამ როგორც კი უკრაინელებმა სპეცტექნიკა ბრძოლის ველზე გაიყვანეს დანაღმული ველების გასაუვნებლად, რუსებმა თავიანთი ტანკსაწინააღმდეგო საშუალებები და ავიაცია გამოიყენეს და უკრაინის არმიის მოწყვლადი ადგილებით ისარგებლეს.
ავსტრალიის არმიის გადამდგარი გენერალ-მაიორის მიკ რაიანის თქმით (იგი ლოუის ინსტიტუტის კვლევითი ჯგუფის ხელმძღვანელია), განნაღმვის ტექნოლოგია ბოლო რამდენიმე ათეული წლის განმავლობაში არცთუ სწრაფად ვითარდებოდა, მისი სრულყოფა დაყოვნდა დრონებისა და ზუსტ მართვად რაკეტებთან შედარებით.
„უკრაინას განნაღმვის პროცედურის დასახვეწად ახალი ტექნოლოგიების შექმნა ჭირდება. სხვაგვარად რომ ვთქვათ, აუცილებელია „განნაღმვის მანჰეტენის პროექტი“, – ამბობს მიკ რაიანი, რომელსაც მხედველობაში აქვს მეორე მსოფლიო ომის წლებში არსებულიაშშ-ის პროგრამა ატომური ბომბის შექმნისათვის.
უკრაინას კონტრშეტევის წარმატებით გასავითარებლად ფაქტიურად არ აქვს სამხედრო-საჰაერო ძალები ანუ სახმელეთო ძალების ჰაერიდან მხარდაჭერა არ ხდება. ავიაცია კონტრშეტევის წარმატებისათვის აუცილებელია – დამრტყმელი ვერტმფრენები, რეაქტიული ავიაგამანადგურებლები, ბომბდამშენები.. დასავლეთი კი ავიასაშუალებების გადაცემას აჭიანურებს.
შეიარაღების დეფიციტისა და სხვა პრობლემების მიუხედავად, უკრაინის არმია ცდილობს სამ ფრონტზე შეტევას – მათგან ორი სამხრეთის სექტორშია, ზაპოროჟიედან და ხერსონიდან, ერთი კი ჩრდილოეთში, ბახმუტთან (არტემოვსკთან), რომელიც რუსულმა არმიამ მაისში დაიკავა. უკრაინის სარდლობა ისე მოქმედებს, რომ რუსეთი აიძულოს ძალების გადანაწილებაში შეცდომა დაუშვას, რასაც კიევი თავის სასარგებლოდ გამოიყენებს.
„უკრაინელები ცდილობენ რუსებს პრობლემები შეუქმნან ისე, რომ მათ რეზერვები მთლიანად გამოიყენონ“, – ამბობს რობერტ ლი, რომელიც ამას წინათ დაბრუნდა კიევიდან, სადაც იგი უკრაინის არმიის სარდლობის წარმომადგენლებს ესაუბრა.
ფილადელფიელი მკვლევარის აზრით, თუ უკრაინა მხოლოდ ერთი მიმართულებით მიაღწევს წარმატებას და აღმოჩნდება, რომ ეს მთავარ მიმართულებას წარმოადგენს, მაშინ შედეგები არასაკმარისი იქნება. სავარაუდოდ, რუსეთი სწრაფად იმოქმედებს და ფრონტის ხაზის გარღვევის ადგილზე რეზერვებს გადაისვრის. „ამიტომ აუცილებელია შეტევა წარმატებით სამივე მიმართულებით განხორციელდეს“.
