“უკრაინამ ყველა რეკომენდაცია შეასრულა, რათა დაიწყოს ევროკავშირში გაწევრიანების შესახებ მოლაპარაკებები” – ზელენსკი

28
spot_img

უკრაინის პრეზიდენტის, ვოლოდიმირ ზელენსკის განცხადებით, უკრაინამ ყველა რეკომენდაცია შეასრულა, რათა დაიწყოს ევროკავშირში გაწევრიანების შესახებ მოლაპარაკებები. ამის შესახებ ვოლოდიმირ ზელენსკიმ, თეთრ სახლში ამერიკის პრეზიდენტთან, ჯო ბაიდენთან საერთო პრესკონფერენციაზე განაცხადა.

„უკრაინამ შეასრულა ევროკომისიის ყველა რეკომენდაცია, რაც დაკავშირებულია უკრაინის ევროკავშირში გაწევრიანების მოლაპარაკებების დაწყებასთან და ჩვენ მუდმივად გვაქვს კომუნიკაცია ევროპელ ლიდერებთან ჩვენი ერთობლივი ნაბიჯების, სანქციების და პოლიტიკური ძალისხმევის შესახებ რუსეთზე ზეწოლის მიზნით. ამერიკის ხელმძღვანელობა გადამწყვეტია ამ ერთიანობის შენარჩუნებაში”, – აღნიშნა ზელენსკიმ.

უკრაინის პრეზიდენტმა დასძინა, რომ უკრაინის თავდაცვის წყალობით ახლა ევროპის სხვა ქვეყნები უსაფრთხოდ არიან და დაცული რუსული აგრესიისგან.

„უკრაინაში ჩვენ ვიბრძვით ჩვენი ქვეყნისა და ევროპის თავისუფლებისთვის. ვიცავთ ჩვენსა და თქვენს თავისუფლებას და ამის შედეგი არა მხოლოდ ჩვენს ქვეყანაში, არა მხოლოდ უკრაინაში აისახება, არამედ პოლონეთში და ბალტიისპირეთის ქვეყნებში, მოლდოვაში და სხვა ქვეყნებში”, – განაცხადა უკრაინის პრეზიდენტმა.

ზელენსკიმ ახსენა „პატრიოტის“ ტიპის სარაკეტო სისტემები და აღნიშნა, რომ რუსული იარაღი მას ვერ შეედრება.

„ჩვენი მიზანია, გავიმარჯვოთ საჰაერო ბრძოლაში, გავანადგუროთ რუსული საჰაერო ბატონობა. ვინც აკონტროლებს ცას, აკონტროლებს ომის ხანგრძლივობას”, – დასძინა ზელენსკიმ.