“უკრაინა ევროკომისიის შვიდივე რეკომენდაციას 100%-ით ვერ შეასრულებს, მაგრამ გაწევრიანებაზე მოლაპარაკებები მაინც დაიწყება” – უკრაინის ვიცე-პრემიერი

77
spot_img
უკრაინის ევროპულ და ევროატლანტიკურ სტრუქტურებში ინტეგრაციის საკითხებში ვიცე-პრემიერმა, ოლგა სტეფანიშინამ განაცხადა, რომ ოქტომბრისთვის ქვეყანა ევროკომისიის შვიდივე რეკომენდაციას 100%-ით ვერ შეასრულებს, მაგრამ გაწევრიანების საკითხზე მოლაპარაკებები მაინც დაიწყება.
ამის შესახებ მან კიევში კონფერენციაზე – „როგორ გამოიყურება უკრაინის გზა ევროკავშირისკენ“ გამოსვლისას თქვა.
„ოქტომბერში ჩვენ ვერ მოვისმენთ, რომ 7-ვე მოთხოვნა ჩვენს მიერ 100%-ით არის დაკმაყოფილებული, რადგან ეს არის მასშტაბური სამუშაო, რომელსაც წლები დასჭირდება“, – განაცხადა მან. თუმცა, სტეფანიშინა დარწმუნებულია, რომ უკრაინა ოქტომბრამდე მიიღებს „ყველა შეთანხმებულ საკანონმდებლო და ინსტიტუციურ ცვლილებას“.
პოლიტიკოსმა აღნიშნა, რომ ზოგიერთი რეფორმის განხორციელებისას, კერძოდ, ანტიკორუფციულის, „ახალი ამოცანების წინაშე ვდგებით, მაგალითად, ანტიკორუფციული პროგრამის სრული განხორციელება“.
„ჩვენი ამოცანაა, რომ ეს ახალი ამოცანები მოლაპარაკების დაწყებისთვის პირობა არ გახდეს”, – განაცხადა მან.
სტეფანიშინა დარწმუნებულია, რომ უკრაინა შეასრულებს საჯარო ელექტრონული დეკლარაციის აღდგენის პირობას.
ვიცე-პრემიერმა აღნიშნა, რომ უკრაინის ევროკავშირში გაწევრიანებაზე მოლაპარაკებების დაწყების შესახებ პოლიტიკური გადაწყვეტილება იქნება მიღებული, და დეკემბერი იქნება “მოლაპარაკებების დასაწყებად უკანასკნელი შესაძლებლობა“.