,,თავდასხმები საზოგადოებრივ მედიასაშუალებებზე, მთავრობის პოსტკომუნისტურ ფესვებთან დაბრუნება“- ანა ფოტიგა

17
spot_img

პოლონელი ევროპარლამენტარი ანა ფოტიგა აცხადებს, რომ დონალდ ტუსკის მთავრობის მიერ სახელმწიფო ინსტიტუტების დამორჩილებას არაფერი აქვს საერთო დემოკრატიასთან. ამის შესახებ ევროდეპუტატი საკუთარ ფეისბუქგვერდზე წერს.

ანა ფოტიგა ამგვარად ეხმაურება პოლონეთის კულტურის სამინისტროს მიერ მიღებულ გადაწყვეტილებას, გაათავისუფლოს თანამდებობიდან პოლონეთის საზოგადოებრივი ტელევიზიის, რადიოსა და საინფორმაციო სააგენტო PAP-ის ხელმძვანელები.

„თავდასხმები საზოგადოებრივ მედიასაშუალებებზე, რომლებიც პლურალიზმის მნიშვნელოვან ელემენტს წარმოადგენდნენ, არის ამ მთავრობის დაბრუნება პოსტკომუნისტურ ფესვებთან“, – წერს ფოტიგა.

ევროდეპუტატი დონალდ ტუსკის მთავრობას უცხო ქვეყნების ინტერესების გატარებაში სდებს ბრალს.

„კოალიციურ მთავრობაში მიაჩნიათ, რომ მათ „ცოდვებს გაამართლებს შექების სიტყვები, რომლებიც იმ სხვადასხვა დედაქალაქებიდან ისმის, რომელთა ინტერესებსაც ემსახურება ეს მთავრობა“, – წერს ფოტიგა.

პოლონეთის კულტურის სამინისტრომ პოლონეთის საზოგადოებრივი ტელევიზიის, რადიოსა და საინფორმაციო სააგენტოს, PAP-ის ხელმძღვანელობის დათხოვნის შესახებ განაცხადა. 

ამასთან, გაითიშა 24-საათიანი საინფორმაციო არხი TVP INFO, რომელსაც პოლონეთის ახალი პრემიერ-მინისტრის, დონალდ ტუსკის პარტია „სამოქალაქო პლატფორმა“ ყოფილი მმართველი პარტიის მხარდამჭერ პროპაგანდაში ადანაშაულებდა.